|
影碟規格 Specification |
FROM DUSK TILL DAWN 殺出個黎明 | |
區域及公司
畫面比例 單面雙層x2
聲音規格
Dolby Surround 2.
字幕 英文 西班牙文
特別收錄 製作特輯 NG片段 刪剪鏡頭 幕後花絮 Music Videos 預告片 電視廣告 相片集 <Full Tilt Boogie>紀錄片
電影年份 1996
|
自從<危險人物Pulp Fiction>之後, Quentin Tarantino就好似有型電影界既代表人物一樣. 睇返94到96年其間, 逢趁有QT個名既戲, 無論導演; 監製; 編劇; 甚至演出, 部戲就即刻變得好型好激咁. 其中一個原因係QT參與既戲暴力好似走唔甩咁, 較出名既有<Desperado三步殺人曲>, 呢部QT客串既戲, 鎗戰場面每十分鐘就有一場, 仲有時殺到成地死人, D子彈好似打唔完咁. 無咁出名既好似<Killing Zoe 亡命之徒>, ending既都要血肉橫飛一番. 但講到血肉指數最高既都要數呢部<殺出個黎明From Dusk Till Dawn>啦. 導演曾經係一篇訪問講過成部戲用左超過80加侖既血漿. 可想而知部戲有幾咁血腥. 所以當年上畫香港都列左部戲做三級, 十八歲以下不准觀看.
故事係講一對劫匪兄弟, 大哥有勇有謀, 細佬殺得性起, 打劫完仲脅持人質被警察通緝. 點知細佬殺性又起搞到一鑊泡, 大佬於是將計就計脅持一家三口著草去墨西哥投靠個邊既大佬, 點知等緊佢地既係又一場腥風血雨. 為左唔好影響未睇既, 唯有講住咁多. 因為部戲你越知得少, 第一次睇既時候既震撼就越大, 可惜香港既傳媒同宣傳一早爆晒果個轉節位, 所以我睇既時候無晒突如其來既感覺. 不過睇得一樣咁過癮, 因為真係血肉橫飛, 殺人無數, 絕對適合鐘意官能刺激既朋友. 仲有呢部係George Clooney拍ER紅左後第一部擔正做男主角既戲(唔計陳年垃圾片<Return Of The Killer Tomatoes>既話), 但係已經拍得佢好有型, 幾個鎗既close-up真係有我地發哥咁型, 可惜部戲唔能夠令佢一炮而紅, 搞到佢要做蝙蝠俠, 仲整到蝙蝠俠系列一命嗚呼, 近年先至憑<驚濤駭浪Perfect Storm>成為票房靈藥, 之後既<Ocean’s Eleven>仲收成兩億美金添. P.S. 當年十八歲睇一部入戲院睇既三級片就係呢套, 估唔到轉下眼就咁多年. 但係近期睇翻套戲都唔覺out-date, 反而我就老左好多, 至少心態上面係?
畫質 呢隻特別版已經係<From Dusk Till Dawn>第二次出既一區DVD. 第一次無anamorphic, 今次都無. 不過以Letterbox既水準, 呢隻比例1.85:1既碟畫質都算唔錯. 最突出係顏色既表現, 開頭場景既自然色調到後段酒吧紅色為主既場景, 仲有刻意偏綠既血, 鮮豔既夠晒搶, 暗啞既又夠實淨. 微粒表現亦都okay, 以無anamorphic既碟黎講算好好, 當然比較暗既場景微粒就比較礙眼. 唯一缺點都係無anamorphic, 放大黎睇, 人物邊緣有D化化地既感覺.
音質 音效方面就絕對唔似畫質咁, 得僅僅合格既質素. 套戲既DD5.1聲軋充分利用左環繞聲既效果, 特別係酒吧大開殺戒既時候, 你絕對會feel到D人(?)由一面飛到另一邊, 又飛過頭頂個D效果, 聲效定位做得好出色. 對白表現(其實套戲都無乜對白) 亦都好清晰, 無俾強勁既配樂蓋過或者mix埋一舊舊. 碟上仲有英文同西班牙文字幕選擇.
特別收錄 LD年代<殺出個黎明>已經出過一隻特別版LD, 今次就將LD既特別收錄完全移植之餘, 仲額外加料. 首先講Disc2, 依! 點解唔講Disc1先既??? 原因都係製作既錯, 將收錄電影個隻碟印左做Disc2, 所以Disc2就收錄左正片, Disc1反而係製作特輯. 咁都係講返Disc2, 就有導演同監製(即係Quentin Tarantino) 既評述聲軋. QT係口水佬就係人都知, 成條Track佢又講自己D演技做成點, 又講下自己寫本片劇本既故事, 當然唔少得佢對其他同類型電影既知識啦. 再加埋導演同樣咁多口, 成條track幾乎無pause過. 非常熱鬧又多野學既評述聲軋. 其餘既收錄有NG片段, 成段NG片基本上係George Clooney出醜大全, 好多NG片都係佢唔記得對白, 甩咀咁, 有段佢仲嬲到發脾四. 跟住既收錄有十三分鐘叫做Hollywood Goes To Hell既製作特輯, 收錄左一D導演/演員訪問同幕後花絮. 之後有五分鐘既刪剪鏡頭. 再跟住有一段兩分零鐘關於戲中酒吧既幕後花絮. 較為特別既係命名為The Art Of Making Movie既部份, 呢部份收錄左四段導演講解佢拍呢四場戲遇到既困難同解決方法. 最後有Music Video兩首, 本片既預告片同電視廣告, 相片集同幕前幕後資料.
輪到Disc1啦. Disc1全隻碟收錄左一部記錄當年拍<From Dusk Till Dawn>既紀錄片, 叫做<Full Tilt Boogie>. 呢套紀錄片曾經有一年香港國際電影節放過, 之後無上戲院又香港無出影帶影碟. 話明紀錄片當然有返咁上下長, 呢部就長約100分鐘, 記錄左拍<殺出個黎明>時遇到既困難, 好似沙漠既風沙同埋同美國電影工會之間既磨擦. 仲額外有各個演員平時既生活點滴, 同演戲理論. 如果鐘意<From Dusk Till Dawn>就會覺得幾有趣, 如果連正片都無興趣既話, 咁<Full Tilt Boogie>你就會覺得好悶啦. 特別既係<Full Tilt Boogie>係有英文字幕揀既, 咁就唔駛Listening啦.
總結 值得一提<From Dusk Till Dawn>既一區碟香港經常缺貨, 於是有舖頭入左韓版. 雖然韓版同美版特別版既規格同特別收錄一樣, 但係主影片有多處被韓國電檢刪剪左, 用黑畫面block左一D殘肢鏡頭 原來韓國電檢對人體殘肢既血腥特寫鏡頭都幾敏感. 除左美版韓版外既選擇就係四區澳洲版, 澳版係唯一有anamorphic既版本, 但係就得單碟, 無左<Full Tilt Boogie>呢套紀錄片. 畫質: 音效: 特別收錄: 抵買度:
( |
