影碟規格 

Specification

區域及公司
All Code 全區碼
鐳射發行
Panorama

畫面比例
-1.66:1
-無anamorphic
DVD5

單面單層

聲音規格
法文
Dolby Digital 5.1 
法文

Dolby Stereo 2.0

字幕

繁體中文

簡體中文

特別收錄
預告片

電影年份

1980

記得第一次看蘇菲馬素既戲係94年既一個零晨, 明珠台播佢主演既<痴男怨女The Student>.個時仲以為係咸野黎, 因為果時明珠台有個深夜影院叫做<夜激情>, 專播電視尺度邊緣既野, 加上痴男怨女個名(年少時候語文能力差以為怨女同怨婦差唔多), 於是偷偷挨夜睇. 結果原來係一套甜到漏既愛情片, 令我對片中年輕貌美既蘇菲產生好感之餘. 之後睇埋<芳芳>就已經覺得蘇菲係最美既外國人. 於是四圍搵佢D戲睇.聽聞佢第一套戲<La Boum>拍得佢非常可愛, 好多比我大既都話呢套戲既蘇菲最討人歡喜, 但係當時反轉成間KPS都無呢套戲. 咁多年都未能欣賞呢套蘇菲既處女作, 直到今年香港既發行商一次過推出蘇菲馬素既法國片, 先可以一睹十三歲蘇菲既風采.

可能期望太大, <La Boum>其實都幾悶, 只不過係片段式記錄十三歲少女既一D生活點滴. 仲要呢D點滴十居其九都係溝仔, 而D法國仔非常好溝, 基本上唔駛溝就已經溝左, 所以都唔知蘇菲煩乜. 戲既其餘時間除左講蘇菲溝仔, 就係講蘇菲媽媽發現老公去滾鬧離婚. 奇在屋企咁大件事, 蘇菲都無反應, 繼續溝仔. 劇情就係咁多, 不過十三歲既蘇菲又真係好可愛, 其中有一幕佢穿緊身跳舞衣既戲, 真係Michael Jackson一定鐘意.仲有不可不提主題曲<Reality>,"Dreams are my reality...."真係繞樑三days.

畫質

<La Boum>港版DVD係由鐳射發行Panorama出既, 碟係單面單層DVD5. 比例係1.66:1無anamorphic. 畫質可以用一個字形容---"劣". 自從美亞同海岸D舊版dvd以來, 呢隻可以講都算質素差既碟. 成套戲畫面好似有層膜遮住, 非常之朦同soft, 無晒details. 黑位係灰色. D dark scenes原全睇唔清層次. 真係非常唔掂.

音質

聲效有5.1法文同2.0法文. "嘩!"一聽以為係鬼片. 5.1條軌D回音超勁, 好明顯港產自製係非常假既5.1聲軌. 聽左五分鐘頂唔住轉聽2.0. 感覺好好多, 但雖然係2.0, 完全無立體聲feel, 基本上同mono無分別. 無定位,無層次, D配樂同對白mix埋. 唔知D對白清唔清, 因為成套戲都係法文.
字幕有中文繁簡體揀, 但係無英文.

特別收錄

基本上係無, 連正片既預告片都無. 淨係得佢公司出既另外三部戲既片段, 有<毒王Blow>, <Avalon>同韓片<強捕>. 三段都唔係正式預告片, 而係由Panorama自己剪輯部戲分半鐘片, 一個字簡陋

總結

如果想睇下蘇菲馬素細個時既演出, 一租無妨. 買就真係...尤其隻碟仲要收成大約七草野.

P.S. 唔知點解DVD Menu就話<La Boum>既中文片名叫<IQ半熟時>, 但係封面就叫<初吻>. 我記得之前<La Boum>續集先叫<初吻>, 第一集係應該係<IQ半熟時>. 或者Panorama個邊覺得<IQXXX>令人聯想到蔡楓華, 而<XX半熟時>就好似李麗珍套三級片, 所以自己同套戲改名.

畫質:

音效:

特別收錄:

抵買度:

(為滿分)

回前頁