|
影碟規格 Specification |
Panic Room 房不勝防 | |
區域及公司
畫面比例 單面雙層
聲音規格
DTS 5.1 英語 Dolby Surround 2.0
字幕 繁體中文 英文 韓文 泰文
特別收錄 幕前幕後資料
電影年份 2002
|
經過<Seven七宗罪>; <The Game心理遊戲>; <Fight Club搏擊會>三部好似同觀眾玩心理遊戲, 劇情風迴路轉又發人深省之餘亦都拍得好有風格既電影之後, 大家必定對David Fincher既新作有一定既期望. 但係今次<Panic Room房不勝防>David Fincher居然係拍一部非常Straight Forward, 無乜背後含意既純驚險電影, 唔多唔少令到Fincher既擁躉有D失望. 故事非常簡單, 只係講Jodie Foster同女兒剛搬入紐約上城區一間大宅一日, 就有三個賊入屋爆竊. 特別既係大宅有一間叫Panic Room既密室用黎防盜, 於是對母女二人就透過呢間Panic Room同一班賊鬥智鬥力. 不過作為純show-off技巧既商業娛樂片, <Panic Room>又確實拍得相當緊湊同有型. 淨係睇片中幾個鏡頭, 視點由二樓一直穿過圍欄等物件一直pan到門口已經值回票價. 當然仲有個種困獸鬥既壓迫感, 令到成部戲有種令人透不過氣既感覺. 當然劇情搵戲黎做, 犯駁位唔少, 賊幫仲有D笨賊Feel, 不過節奏快又多扭橋位, 加上Fincher純熟既電影技巧, 睇既時候呢D唔合理既地方都無乜時間諗.
畫質 呢隻係我第一套睇既Superbit DVD, 未睇之前已經聽過Superbit既大名好耐, 甚麼畫質超靚, 接近完美既評語, 令我對隻碟既畫質有D期望. 的確片中opening credit拍日頭紐約既高樓大廈, 畫質非常銳利, 大廈邊緣sharp之餘, 連成日出現noise既大廈窗口一D雜訊, 橫紋都無, 係我睇過有大廈景既戲, 畫質最好既一隻. 不過一轉到大宅場景就出現問題, 由於David Fincher出名專拍陰暗既場景, 成部戲基本上都陰陰沉沉. 畫面黑位既處理麻麻, 人物都唔夠清晰, 有D soft既感覺. 不過就無乜微粒. 如果同Fincher之前既戲比較, 同樣拍陰暗場景, <Seven>特別版DVD既畫質絕對比<Panic Room>出色. 不過好彩本片既顏色處理都唔錯, 實淨得黎有表現到非常冷既效果. 作為Superbit DVD畫質絕對失望, 不過以進口三區DVD水準都算okay.
音質 音效既水準就真係超強. 無論DTS 5.1定DD 5.1既表現都非常出色. 低音表現好勁, 特別係爆炸同穿牆既震動感非常勁, 但係最厲害都係密室裡頭演員對白效果既處理, 明顯感覺到聲音有種低頻既效果. 對比起密室內外既音效, 密室裡頭有種壓迫感, 令觀眾感受到密室既幽閉空間. 相對密室外大宅外其他地方, 聲揚特別空曠, 又有種空洞感. 整個音效設計令到觀眾好似置身其中咁, 非常過癮. 特別片首睇樓個場戲由睡房進入密室既音效變化最為明顯. 咁樣既音質先至配合我對Superbit既期望. 字幕方面就有英文, 繁體中文, 韓文同泰文選擇. 特別收錄 傳統既Superbit DVD(除左Superbit Deluxe系列), 因為要將所有碟既空間比晒畫面同聲音既處理, 都唔會有特別收錄, 連目錄Menu都係最普通無動畫效果既平面設計. 不過<Panic Room>就違反Superbit定律, 又有動畫目錄, 又有預告片同幕前幕後資料收錄. 咁樣仲算唔算Superbit系列呢?
總結 以碟而論, 呢隻Superbit DVD就唔多理想, 畫質表現真係強差人意. 不過聲效超強. 以戲論戲, Panic Room都算精彩, 起碼睇晒成部戲都無乜睇表等時間過既位. 不過以David Fincher之前既戲出DVD既記錄, Special Features既分量就唔多合格, 傳聞哥倫比亞遲D會出特別版既Panic Room有導演評述, 刪剪鏡頭等特別收錄, 希望到時畫質同樣有改善就好啦.
畫質: 音效: 特別收錄: 抵買度:
( |
