|
影碟規格 Specification |
戀愛行星 Tiramisu | |
區域及公司
畫面比例 單面雙層
聲音規格
Dolby Surround 2.0 國語 Dolby Digital 5.1
字幕 繁體中文 簡體中文 英文
特別收錄 刪剪鏡頭 演員資料 預告片
電影年份 2002
|
若果將<陰陽錯>同<芭啦芭啦櫻之花>兩部戲加埋會係點既樣呢? 或者完成品會同<戀愛行星>差唔多. <芭啦芭啦>郭富城就色盲, <戀愛行星>謝霆鋒就失聰. 大家都有D自閉又怕羞, 見到鐘意既女仔都唔敢出聲. 兩部戲又同樣有以跳舞比賽作為結尾高潮. 再加埋女鬼有未完心願逗留陽間繼而與男主角相戀, 直情同<陰陽錯>差唔多. 正所謂天下文章一大抄, 港產片東抄抄西抄抄都唔係第一部, 最緊要抄得高手; 拍得好睇. 王晶就係呢方面既高手, 能夠將抄黎既野通俗處理之餘, 仲有時對原裝版本戲謔一番, 非常有娛樂性. 如果戀愛行星學到十分一都算萬幸. 依家既製成品, 我都唔想用呢個字黎形容-「爛」. 先講劇本, 對白完全白痴. 男女主角間既對白簡直無聊, 講得最多既一句係「我地不如去果邊」. 試問一句咁無聊既野居然係出現得最多既對白, 可想而知劇情有幾空洞. 男女主角相戀既原因主要都係因為編劇program左, 無特別原因, 簡直一見鐘情, 勁到男主角知道女主角係鬼都毫無反應, 愛情既魔力真偉大. 配角既設計完全係為左套戲有多D演員而設, 無設計無鋪排, 主要program左忠心朋友一二號既程式, 即係毫無原因毫無性格, 但係永遠對主角支持. 其他角色都係D樣版角色, 父母愛子女, 姊妹情深, 街坊好人, 朋友支持之類, 過一過場講句對白咁. 失敗! 演員就完全唔掂, 霆鋒交行貨交到出面, 一談情場面就溝女扮cute死魚眼一對, 簡直難頂. 林嘉欣就好D, 但係唔知佢係咪好怕睇到霆鋒對死魚眼, 談情時永不望住對方. 於是男既有男既電Fans, 女既有女既遊雲, 完全無交流. 愛情片最緊要演員交流有火花, 就算劇情老土, 演員有火花都救返部戲唔少. 本片男女主角一D chemistry都無, 浪漫程度可想而知. 配角都唔好得幾多, 陳奕迅個角色簡直無聊, program左男主角忠心朋友一號兼男人老狗迷信星座, 無戲做, 淨係出黎懶搞笑, 又唔好笑, 行貨表現. 盧巧音都唔好得幾多, program左女主角忠心朋友程式之餘, 可能戲份又無乜發揮, 表現好拘謹, 好唔自然. 其他樣版演員都係唔多掂, 睇得好辛苦. 失敗! 愛情片無愛情都唔緊要, 因為要扮浪漫關係又要拍鬼域又要有D好淒美既鬼差. 拍鬼當然有特技, 但係D特技真係全部為有特技而特技, 對劇情無幫助又做得非常求其. 大部份都係定格背景再加CG既畫面, CG設計差又唔靚唔勁唔精彩. 失敗中既失敗! 拍跳舞又毫無動感, 舞步又係抄外國既<Lord Of The Dance>, 但係跳得好差, 無節奏感又唔齊, 又失敗! 咁多失敗, 唔爛至奇. 港產片今年已經買少見少, 用咁既卡士, 咁既投資, 拍套咁既垃圾, 真係非常浪費. 好難想像本片導演林超賢之前既作品有<野獸刑警>, <江湖告急>呢D佳作. 可惜! 最慘係被抄既<芭啦芭啦櫻之花>都好過佢, <芭啦芭啦>都唔係好戲黎架啦.
畫質 規格為Letterbox 1.85:1, 無anamorphic. 畫質普通, 都係衰香港製港產片DVD碟成日為人詬病個幾瓣. 畫面比較soft, 成日曚曚地既感覺. 微粒較粗. 顏色唔夠豐富, 就算鬼域一場, 用特別效果突出D鮮色都唔係好覺. 有CG既鏡頭既畫面特別差, 完全睇到邊位明顯做過手腳. 好彩個菲林copy都算乾淨, 白點較少. 港產碟算okay.
音質 音效有粵語DTS, DD5.1, DD2.0同國語DD5.1. 如果我話音效好出色, 你都唔信啦. 成部戲幾本都無發揮音效既機會, 音效設計欠奉, 連動作場面都無音效設計, 真係無話可說, 完全浪費. 其實有時寰宇出既碟都有呢個情況, 唔需要DTS既戲就可以慳返, 用黎搞好個畫質啦, 係又DTS唔係又DTS, 好似有DTS就威D, 但係有DTS, 個效果又唔好. 好彩對白表現尚算清晰. 僅僅合格.
特別收錄 特別收錄就比一般港產碟多. 有十三分鐘既製作特輯, 都係導演/演員吹吹水話部戲幾浪漫幾好睇, 無乜特別. 跟住有一個加長既結局, 其實只係多左一節有份客串既谷德昭再次出場既片段, 原本呢段明顯想搞搞笑, 但係一D都唔好笑. 其餘既收錄都係寰宇例牌, 本片既預告片同演員資料. 最後有<男人四十>; <異度空間>同<當男人變成女人>三部戲既預告片.
總結 部戲我就唔多鐘意, 仲覺悶得黎非常做作, 又唔浪漫, 又唔搞笑. 但係編導偏偏想觀眾有齊以上相反既感覺. 今年我睇過最差港產片. DVD碟既水準又唔高, 真係絕對唔能夠推薦俾大家. 畫質: 音效: 特別收錄: 抵買度:
( |
