自傳1

Barry自細比笑"也母"型 心靈重創

我鐘意一個人靜落黎諗野, 尤其係回憶以前。但媽咪從來冇講過我出世既野, 唔通我係爆出黎既?我只知自世果陣, 爹o地唔o係媽咪身邊, 聽講當時佢渣緊車上山頂, 途中接到電話, 話我出左世喇, 好似o係5，6點左右, 不過唔知係朝早定係黃昏。究竟係我早產定係爹o地走左去唔陪媽咪呢?到而家都仍然係一個謎...

跟Bee Gees改名

爹o地係音樂發燒友, 係貓王、Beatles、Bee Gees既Fans。我細個聽佢爆機都係爆呢o的歌。知唔知Bee Gees好多鬍鬚o個個成員叫Barry Gipp?爹地媽咪幫我收命個陣唸,如果Barry Yip好似Barry Gipp咁勁就好喇! 基於佢地既fans心態,於是我一出世就叫Barry, 出世紙同身份證都有呢個名。但其實我細個好憎Barry Gipp, 覺得佢咁多鬚, 好核突!

痛恨似女仔

我細個生得白淨又滑溜, 好似女仔咁, 好慘! 成日俾人笑我"也母"型，好唔開心! 試過同同學去茶餐廳, 個侍應指住我, 同我同學講：「哥哥仔, 呢個大姐仔係你女朋友呀?」呢件事俾班同學笑足一世!
所以媽咪幫我報學鋼琴, 買埋琴俾我都唔學。佢仲話要同我穿耳窿, 我梗係唔制啦! 嫌我唔夠似女仔咩!
似女仔係我既童年陰影...好記得我係學校廁所見到一個好核突既男同學, 仍個樣成個老人精咁, 冇人同佢玩。但我o個刻好決絕同自己講：「我寧願個樣好似佢咁核突, 都唔要似女仔! 」由細到大，我唔開心唔會俾人知, 唔會同屋企人講。所以媽咪唔知我細個咁憎自己。諗諗下都覺得自己變態, 一唁開心就匿埋係張床度挨住個窗, 十次唔開心儲埋就臨訓前笠埋張被喊。唔俾得人知我喊架已經成日俾人笑我係大姐仔, 更加唔可以俾人見到我喊。.

永別爺爺

細個好少見爹地媽咪, 返學放學都係自己搞掂。放學返學屋企就等爹地媽咪返黎同我出街食飯, 因為媽咪從來唔煮飯, 一個字－－懶!
的同學話返屋企食晏, 我心諗：「嘩，乜咁隆重！」, 我餐餐都出街食, 住家飯對我o黎講, 係過時過節既野。真至媽咪交o左我"女麻""女麻"湊，我至有住家飯食。.

同阿爺阿"女麻"住左一年, 我o地感情好好。爹地有兄弟姊妹, 我係大孫, 所以阿爺阿"女麻"錫到我"火農"。阿爺其實好惡, 人人都驚佢, 但係佢成日俾我打, 可想而知佢幾錫我。好記得佢成日同我講：「俾心機讀書, 送隻勞力士俾你。」我細個就係係阿爺口中學識勞力士呢個名詞, 不過當時唔知係乜, 淨知阿爺乜都買俾我。

讀二年班個年, 有一日爹地係屋企聽完個電話, 成個樣變哂。爹地冇同我講發生咩事, 但我估到係阿爺出左事。原來阿爺係大陸遇到車禍, 所有人去哂醫院, 不過佢地唔俾我去。到我終於見到阿爺個陣, 係出殯個日。.
第一次見到全家人喊, 亦係第一次面對親人離別。

自傳2

啤梨童年6大衰仔紀錄

我細個好乖但係有幾段經歷令我無端端做左衰仔。我瞞住媽咪出去聯群結黨之餘, 仲推同學仔落水, 連細妹都打！

衰仔1：激到阿媽離家出走

有一晚爹地返左工, 得我同媽咪係屋企, 我唔記得做錯咩, 媽咪鬧我話如果我再係咁, 就走出去唔理我, 跟住佢真係走左出去。我透過大門鎖匙窿望出去, 見唔到媽咪, 估唔到佢真係走左。我個陣得幾歲, 間屋得返我一個人, 所以我坐係電視機前望住甄妮唱歌, 覺得媽咪好似甄妮, 所以一路睇一路喊!

而家諗返成件事, 我懷疑媽咪當時根本想出街, 只不過搵藉口掉低我出去玩。因為佢以前好貪玩, 每年聖誕一定將我交比"女麻""女麻", 同爹地去X'mas party。到我訓醒覺，就會見到佢地帶住一隻聖誕襪返黎接我, 裡面袋住成堆Party玩具, 呢隻襪就係我每年聖誕打到既第一份禮物。隻襪擺明係佢地係Party玩完之後順手拎俾我架啦! 不過我都好開心, 細個只要有得玩, 點識諗咁多。

衰仔2：記缺點

讀一年班跟學校去海洋公園, 有個同學係我身邊煩住哂, 我躁起上o黎叫佢唔好再煩, 然後一手推開佢, 點知唔小心推左佢落金魚池! 阿Sir抱返佢上黎, 佢不停喊, 於是全校人都指住我黎鬧, 我除哂的衫黎俾佢換, 淨係著住條褲走。返到學校解散之後, 阿Sir帶左我去果個同學屋企, 要我向佢屋企人道歉, 仲記左我一個缺點。
成件事我好後悔，其實我同佢由幼稚園開始一齊讀書，咁Friend點會害佢,我根本冇心推佢落金魚池, 但學校完全唔俾機會我解釋, 令我既操行蒙上污點。.

衰仔3：童黨通山爬

小學時代係我最開心o既黃金時代, 有好多朋友, 好多開心回憶。我讀柴灣`海星小學`, 個陣幾曳架!當昤星期一至五返學，星期六、日要返童軍；落o左堂就瞞住阿媽咪同同學去踢波，又成日去學校附近既斜坡爬上爬落。而家覺得細個好無聊, 但以前係好容易開心。同班小學同學由細玩到大, 佢地係我最親近既朋友。

衰仔4：風紀隊長明知故犯

小學既龍主任一向偏幫我，可能因為我生得可愛啦！所以我二年班開始做班長, 升到四年班仲做埋風紀隊長, 掌管全級風紀, 分配崗位。不過我地經常同流合污, 成班風紀成日最遲入課室，我仲包庇大家一齊去買野食, 食完先返課室, 個陣我好得人心架！

衰仔5：笑同學賴屎

讀五年班個陣，逄星期六都會參加集郵班，貪有冷氣歎又唔使點郁。有次大家照舊圍住阿Sir講郵票，突然有陣惡窗味突擊，全班同學四散，得一個同學唔敢郁, 所有人用懷疑既眼神啤住佢；佢一企起身，條校褲吊住一抽屎呀! 全班同學一齊狂笑佢賴屎。我都有份笑，一的都冇同情佢既悲劇遭遇, 細路仔邊識體諒人丫！

衰仔6：打到細妹入院

我有兩個細妹, 一個細我五年, 一個細我十年, 做大哥有時都幾"支力"，要照顧佢地, 仲要睇住佢o地唔好學壞。係佢地既眼中我係好有威嚴既長輩, 因為我對佢地幾惡，其實我內心好錫佢地架！有段時間大妹好唔聽話, 佢覺得媽咪錫我多的，我試過打佢，有次仲打到入醫院添！個次係因為佢又搞事, 我好嬲捉住佢隻手, 點知大力過頭扭甩佢既手骹，媽咪即刻送佢入院。當時我仲細, 搞到入院咁大年事梗係驚, 內疚到好似殺左人咁, 我反省之後話過唔可以再對細妹用武力。當佢敷完藥出院，我第一句同佢講既就係「對唔住。」佢竟然感動到喊, 即刻原諒左我。因為我從來唔會同佢講呢的野, 我係阿哥喎, 點會認錯! 不過爹地、媽咪冇鬧我, 因為我一向都好乖, 佢地知我唔係有心打細妹。

自傳3

啤梨青春期　最驚同陌生人游水

升上北角蘇浙公學，初初真係驚！聽講呢間中學有黑社會，而且得一個小學同學升上蘇浙，大家又唔同班; 我以前又未試過搭校車，所有野都陌生! 不過我好快明白要學識獨立。中學俾我另一個感覺係同學之間有一道牆，大家來自唔同區，蘇浙又多人，由A至Q班，同學關係比較疏離。.

玩貪靚

中學生同小學生感覺最大分別係大個仔左，要打呔返學！嘩！打呔咁大男人喎! 結果我每日擺好多時間係條呔度，好著重呔結大定細。青春期我開始貪靚，媽咪每日都會「哦」我：「你又吹頭！」可能受爹O地影響，佢以前開髮型屋, 我成日落去幫的客洗頭，所以六年級開心就花好多心機整頭，個陣剪過海膽頭留條尾，興用「KMS」Gel，返學好揚架！.

變聲期

男仔係青拍期最煩係變聲走音，但我又唔覺自己有明顯變聲喎！細個我把聲似阿媽，的人成日認錯，我最憎拎起電話的人當我係阿媽, 然後一輪咀講唔停。另外我最忌同中學同學去游水，佢o地叫我出去玩，除左游水乜都得！講真唔係好熟, 大家唔著衫咁尷尬。不過我推得好圓滑，唔會令人覺得我怪, 帶佢地游一輪花園之後，講講下就唔記得游水呢樣野。我讀中學已經係PR既人才！

國際級Dance

細我既人緣都好好，呢方面對我而家既工作好有幫助。以前我冇諗過要做成功人士, 中五畢業之後諗，一係搵錢，一係就跟興趣走；最後我揀左興趣, 走去學跳舞。
當時屋企人想我讀經濟，媽咪反對我讀演藝, 覺得跳舞係電視機裡面個的金毛飛，當時演藝介未出名, 佢驚我學壞。由中四開始睇完米高積遜我就鐘意跳舞，諗住讀完演藝就"子貝"個袋去外國做Dancer！可惜我完成唔到理想，因為機緣巧合下做左電視VJ，然後加入電台做DJ。

媽咪報名參加VJ賽

其實我冇諗過要做VJ，點知媽咪竟然私自寄我張相去參加「有線VJ大賽」，到有線通知我入左最後10強我先知呢件事。當時我拒絕！俾同學見到我參加VJ大賽好瘀、好Cheap 架！點知原來有線已經出左宣傳片段，仲俾同學睇到, 搞到我唔敢面對班同學。
神推鬼擁比賽完, 雖然輸o左，但係有線話簽我做VJ, 下!?我冇諗過要做主持喎！不過考慮到可以搵錢，佢地又俾好多機我表演跳舞, 我就決定一邊讀書一邊做Part-Time。我最初做1個兩小時節目，只係負責讀10秒分牌，「紅組10分，黃組5分，籃組咩分，交返俾路芙……」悶到想唔玩咁滯, 但人工幾好就算啦。
畢業之後我搞過舞蹈團－－「舞館」，但漸澌覺得同理想差好遠。為維持舞蹈團經費, 焗住做周年晚會表演, 教跳舞賺錢,所以冇幾耐就摺埋。

地獄通宵節目

我更加冇諗過會做DJ。我唔聽收音機，唔熟電台既野。我係抱住搵避難所既心態去試，因為當時冇公司包薪請Dance。初時我負責報交通，後黎再加多個節目〈麻辣天國〉，仲兼顧做DJ，由朝早六點直踩到晏晝，由個陣開始, 我就練到自己襟捱的。
真正學識做電台節目, 係跟小芝〈我芝訂〉,好多謝小芝教識我咁多野！我一手一腳做〈卡拉O!BaBe〉，一個當時覺得冇可能既節目，我一個後生仔要做通宵節目？直頭覺得俾人打落十八層地獄! 個陣〈我芝訂〉收聽率咁高，無端端調走我，我問公司係咪我做錯野? 佢地話只係節目調動, 亦覺得未有人做過，想我試下。好！我試。呢個係我人生中最大膽既嘗試，半夜人o地播慢歌，我就播Rap！橫掂我要做到清晨6點，我鐘意聽咩就播咩！大家同我都唔好訓~!

搵到滿足感

直至有人同我講打唔通熱線電話，又成日寫信讚我，最開心仲係得到〈YES!〉頒既「最受歡迎DJ獎」，呢個係Fans之外俾我既肯定，我開始搵到滿足感，越做越投入！我唔會俾〈卡拉O!Babe〉跌Watt。而家加入樂壇, 我希望都會有咁好成績，如果得到新人獎，我會好多謝Fans，佢地係我既原動力，當初我猶豫唱唔唱好，係佢地不繼鼓勵我。.最後想多謝正東由零開始幫我出唱片。

（完）