Diary

2003/06/01

世衛撒消對香港的旅遊警告，香港的旅遊業有可能恢復生機。政府成日都賣廣告，即係華仔嗰個廣告呢？叫啲鋪頭注意下啲服務態度。但係今日我就發現咗一間係彩虹邨嘅粥粉麵鋪，啲服務態度就真係……
咁呢間鋪頭我以前都有幫襯開嘅，以前嘅伙計都幾nice，例如︰我話俾佢聽，碟粉太細碟，我食唔飽，跟住個伙記就話︰「得，我俾多碗你。」咁唔使幾耐，就送上一碗粉，跟住仲問我︰「夠唔夠啊？唔夠可以再加。」嗰陣時間鋪頭都幾旺下架，一到呢個Lunch時間，滿晒人，好多時都要等位，所以我哋嗰陣一打鐘就即刻衝出去，因為勁無位要等嘛。但係時至今日？啲人令願走遠啲去其他地方，都唔去嗰度。或者可能係佢啲服務態度真係好有問題掛。我今日就親身體驗到啦。咁我今日有啲唔舒服，唔想食飯，咁就唸住去食麵食粥啦。咁見咁耐無去過嗰間鋪，咁就去幫襯下啦。因為由於太耐無去，唔知到有咩轉變，咁就入去坐低，叫咗個午餐加一碗粥(我以前去食Lunch好多時都係咁叫)，但係今日唔知點解，突然間好想食油條，咁就話要多碟油條。叫咗之後，突然間睇到餐牌上多咗一個午餐粥餐(以前係無架)，粥餐包括油條或油菜加汽水或豆漿加多一碗粥。之後有個伙記埋嚟問我，你係咪要一個餐架？跟住我同佢講話係，不過杯汽水唔使俾我啦。咁跟住上咗啲麵同粥嚟啦，但係我等嚟等去，都唔見碟油條，咁我就問另一個伙記，點解仲未有油條，估唔到，佢居然同我講︰分開咗計，依家無得轉返餐架喎。嘩！呢啲係乜態度啊？首先唔講其他先啦，就算真係無得轉，係咪都應該講返句「唔好意思」先啦。另外，人哋要入機嗰啲鋪頭都可以轉返，佢呢啲祇係寫單嘅，居然話無得轉，而且嗰陣佢都仲未俾單我。唉！唔怪之得間鋪頭會搞成咁啦。俾著你係客人，你都唔想再去食啦，啲態度差成咁。做服務性行業，要以客為先架嘛！呢啲咁嘅行為，簡直就係趕客啦。我唸佢都應該去反醒下啦，唔係，唔使幾耐就要關門大吉啦。

另外，仲有一件幾搞嘢嘅事，就係呢個M記送外賣事件。M記原來都有「專車」去送外賣架。不過就係唔好似肯X雞同Pixxa Hut嗰啲咁有兩個「碌」嘅專車，佢嘅專車係四個「碌」架，而且都幾方便操控，各位知唔知呢架係乜車呢？無錯啦，呢㗎車，好多阿婆都鐘意用架。係咪好勁呢？我唸，如果M記想發展呢個外賣行業，我唸都應該好似其他鋪咁，真係請返啲專人返嚟送貨啦。平時咁注重服務態度嘅佢，點解唸唔到呢點呢？

今日更新︰
系統壞咗，未能作出更新。

　

2003/05/23

唔經唔覺，己經成兩個月無更新啦，係呢兩個月內，連account都俾人cut埋。所以以後大家要去新網址︰http://musicdreamworks.port5.com http://musicdreamworks.idv.st http://98.to/musicdreamworks http://98.to/音樂夢工場 http://mdws2000.adsldns.org(非24小時開放)

呢個AL亦都遠離我而去啦。尋日考埋個Oral，終於乜都考晒，不過尋日個Oral就死咗，今次個成績真係唔想去睇。

不過，考Oral當日，發覺阿妹好似幻咗失憶症，首先，佢係考場唔見到我，不過呢樣嘢好正常嘅，個個都係「懞面超人」，而且我又剪咗頭髮，要認到，又真係幾難，而且係入面個個人都咁緊張，所以呢個，不算係奇怪。最奇怪嘅係，我去搵佢嗰陣，佢同佢男朋友行緊街街喎，但係佢竟然問我有冇介紹過佢男朋友俾我識，見過未喎。雖然我同佢男朋友唔係咁相熟，但係我都叫做見過啦！睇嚟，佢近期嘅記憶系統好似真係有小小問題啦。阿妹，如果妳睇到呢段說話嘅話，記得去睇醫生check下啦。

為咗呢次嘅Oral考試，請咗三日假，不過其實都係為咗俾自己偷下懶啫。不過，聽日又要返工啦！返工，即係又要捱啦！不過最衰嘅係捱嚟捱去都無乜銀？我部新機幾時先可以面世啊！

　

今日更新︰
系統壞咗，未能作出更新。

　

2003/03/19

離呢個AL越嚟越近啦。

今日將個網頁的Karaoke改造咗一下，方便咗搵歌。由於係呢個短時期內改造。所以效果唔係太好，不過都頂住先啦。

近日呢個非典型性肺炎好似好勁，都係小啲出街為妙，況且，依家都可以話係呢個身無分文，就算想出去都無錢去玩。所以都係安心咁留係呢個屋企啦！

有人話我個網頁好多塵啦，又有呢個蜘蛛網啦！其實我都唔想架，咁要有呢個時間先得架嘛！再加上我個人本身都比較懶，留言版又無乜動力支持，所以………突然間唸起一樣嘢，就係從今以後個音樂大廳部分歌曲唔係全日開放架。一般為下午五點到晚上十二點。其實，如果當你到達呢個主頁而聽唔到歌嗰陣，即係佢未開放啦。

　

今日更新︰
K歌更新︰
陳文媛 - 野種子
E-kids - 下學期
E-kids - 開始戀愛
Shine - 伊莉沙伯太遲來
Shine - 熊貓
陳奕迅 - King Kong
陳奕迅 - Lonely Christmas
陳慧琳 - 他一定很愛你
容祖兒 - 何苦
容祖兒 - 電我
梁詠琪 - 傷心尋回犬
李克勤/譚詠鄰 - 左鄰右里
楊千嬅 - 一千零一夜
趙頌茹 - 大孩子

　

2003/02/05

我終於都返返嚟香港啦。不過，就仲未有好多時間去更新其他嘢。另外，亦因為大部分server都出現咗問題，又要唸過其他地方放嘢啦。所以，短期內，都祇係會著重於呢個日記更新多啲。因為原來都會有人嚟睇我係呢度講嘅癈話嘅。

今次返大陸又發現咗一樣嘢。就係我嘅家鄉嘅空氣污染真係太過嚴重啦。其實都唔止我家鄉嘅，基本上好多地方都係咁。一般嚟講，都係比香港差架啦。但係啲人都生活得好健康喎，咁係咪表示，佢哋嘅抵抗力係會強啲嘅呢？相反，香港嘅空氣好啲，係咁嘅環境下，人嘅抵抗力又係咪會差啲呢？香港有禽流感，係九七年嗰陣，仲有人因為食到有病毒嘅雞而出事，咁大陸啲人都係咁食啲雞啫，但係又唔見有事喎。咁係咪係越差嘅環境下，人嘅抵抗力係會越強啲嘅呢？咁香港嘅空氣變差，我哋可唔可以有更強嘅適應能力去適應呢？

今日更新︰
無乜更新。

　