九四年十二月二十一日,詩詩離開左我,離開左呢個世界~詩詩既痴心,令到我重拾自信,但就冇比機會我報答佢,照顧佢~
詩詩既離開,令到我出現冇分寸既任性,自我放棄,放縱,放任,不能自拔,用一段唔短既時間先可以重新振作,應付會考~
經過一科又一科既考試之後,會考結束左,我既中學生涯亦都跟住結束~我既會考成績並唔理想,但好彩都有一間大專取錄,先至唔洗再重讀中五~上左大專,新既同學,我唔洗一陣就適應~
自從詩詩離開左之後,我又重新習慣一個人生活,我冇再同玲玲佢地聯絡,直至.....
九五年十二月二十日,星期2,天晴~呢一晚,我好似干時咁o係屋企玩電腦,突然間電話嚮~
[喂~]
[喂~Derrick,我係玲玲呀~仲記唔記得我呀?]
[緊係記得啦~搵我係為左聽日既事?]
[咦~~你都記得呀~我仲以為你唔記得左tim~]
[點會~聽日係詩詩既死忌,我當然唔會唔記得啦~我會去ga,你地呢?]
[我地都會去~但時間未確定,我聽朝再call你啦~]
[好呀~]
十二月二十一日,同上年一樣,天陰~我揀左一身黑色既衫,照常返學校上堂~第一同第二堂係數學堂,上堂果陣,我部手機開始振~
係message~[玲玲:請你十一點到藍田地鐵站恆生銀行等]
於是,我就冇上第三同第四堂既電腦堂(反正上唔上都冇咩所謂,電腦係我既強項),準時十一點到左藍田地鐵站等玲玲佢地~
同一年前一樣,早到既永遠係我~唔洗一陣,玲玲,Cat同YoYo都跑到黎~
[嗄.....對唔住呀~遲到左~]唉....
[真係一d都冇變喎~~咦~翠翠呢?]
[你唔知咩?翠翠佢移民到澳洲~]Cat,你知唔知我係咩都唔知ga?
[冇人同我講,我點知喎~你都又唔通知我?]
[係你自己冇同我地聯絡之嘛,做咩賴我地喎~]玲玲最愛抵賴~
[係囉~做咩賴我地~]YoYo最鍾意火上加油~
唉....詩詩唔o係度,我地就經常為左呢d小事要係咁嘈,真係冇哂辦法,但我地亦都唔會因為咁而傷害到大家既感情~
大約用左半個鍾,我地到左將軍澳既華人永遠墳場~
黎到詩詩既墓前,我地既心情都變得好沉重~我先上前將d花放o係詩詩既墓前,之後係玲玲佢地~
[詩詩....]我諗番起以前同詩詩一齊行過既日子~[....我愛你~]
玲玲佢地全部都依住喊,其實呢一刻我都好想喊,眼淚已經o係眼眶裡面,但為左唔好令身邊既女仔更傷感,我一直忍住...忍住,並且決定以後唔比自己喊~
第十一集完