序言：

　　謝師宴結束，係時候要分道揚鑣，從此各自浪跡天涯，為生活而生活。謝師宴過後，徹夜難眠，回想過去種種發生o既事，不免唏噓。係思緒混沌間，忽然良心發現，頓覺要為班做番D野，以報大家在天之靈。班網人均流量慘不忍睹，甚至出現零紀錄，以前SARS持續零感染就拿拿聲俾世衛除名，唔通 ... 唔通，我o既班網亦都 ... 我唔甘心，我唔甘心，結果痛定思痛，毅然大更新網頁，算係為自己積番D陰德。

正文：

　　同一班嘩鬼共處一室，最多o既就有五年時間。五年，五年之後又五年。如果你唔好彩，有八十年命咁大把，五年，即係等於你人生o既十六分之一。俗D講句，哩段時間就好似屙出去o既屎，只能回味，不能收番。（好比喻！）人非草木，發生左關係咁多年，依家話離就離，點都有D唔捨得。講到哩度，眼淚出來了。鳴，一齊o黎回味一下吧。

　　老師就好似交通工具（口痕友：要比錢果下就最似），載住我地通往各人o既目的地。當然啦，有人中途跳軌死左，咁我就冇野講。交通工具有快有慢，有人鐘意搭飛機，有人鐘意踩單車。但係無論點，終有一刻都會到達目的地。每朝番到課室，總會聽到老師們大叫  " 上路喇！" 然後就睡眼惺忪咁開展一日o既旅程。

　　講番謝師宴當日，播左好多影片，當中有一段好有韻味，多謝Isabella，佢拍得好有深度。相信聰明o既你，就一定估唔到。就係拍我地班房人影都冇隻果幕。拍得好，冇人勝有人。冇人o既班房俾倒我地無限o既回憶空間。如果將哩段片拎去評選，分分鐘連金像獎都袋埋。空無一人o既班房，o係我地o既思緒中，呈現出一幕幕感人肺腑，又驚險有趣o既場面。例子多不勝數。例如，你會諗到四十張佈滿我地口水o既桌面；你會諗到莊重文哥哥姿態暸人，身軀輕盈地扑在地上o既場面；你又會驚嘆鎮良兄百步穿揚o既神功，光憑手中o既一把兩傘，就能落點準確地直飛向偉哥o既私處，自此我地班就多左位武林高手及一名大內侍衛。仲有好多回憶片段，雖不能一一盡錄，但大家都明白，我地對哩笪地有好多回憶。回憶總係美好o既，所以當哩段片播完之後我不斷大嗌安哥。（路人甲：講大話，果陣時全場靜英英搵周公，邊鬼度有人嗌呀。當其時訓得最大聲就好似係你！）

　　我地班有四十人，不過四十人中各有唔同花款，唔同o既性格，至o岩愛轉款o既你。有人熱情奔放，有人含羞答答；有人風情萬種，有人可樂鑵身形（記住，可樂鑵唔等同可樂樽）；有人食極唔飽，有人唔食都飽；有人卑躬屈膝，有人打跛腳唔做都得；有人畫功了得，有人訓覺仲得；有人女扮男裝，有人唔扮都似；有人底褲著出面，有人鐘意罩係塊面度；有人英文勁過鬼佬，有人無端端做大佬；有人隻眼色迷迷，有人大叫無野睇；有人心中只有神，有人眼中只有女。　總之，o係哩個班房三尖八角，乜人都有，係咪勾起左好多回憶呢？（路人乙：無喎！　我：咁，你當我冇講過）

　　其實，我地班笨不如你同我想像中咁好o既，市面上其實充斥左好多偽君子，欺世盜名之鼠輩。何以得知？唔信啊，淨係睇個名已經估倒八八七七啦。例如：
【關韻琴】解釋：琴，作為關羽o既後人，一介武夫，當然唔識得琴藝。但係竟然，佢o既後輩如此不孝，整左個咁o既名，相信關大哥泉下有知，做鬼都唔會放過你。仲要係叫「 韻琴 」，即係話彈琴彈到好有韻味，果下先抵死。又唔知自己屬牛（死，暴露年齡添！）正所謂歌仔都有得唱，【對牛彈琴】，咁你話死唔死啊！
【文笑弟】解釋：相信都唔使多解釋，聽個名已經係男仔，只係要偑服伯母獨具慧眼，冇俾佢o厄倒，結果整左個「弟」字落去，否則天理不容，人神共憤。同時，從「笑」字可看出伯母的心情。唔係歡笑，而係苦笑。
【莊重文】解釋：你覺得佢莊唔莊重，又或者重唔重文？相信答案係否定o既。咁大個仔都冇見過有D咁大欖都扯唔埋o既名！
【黎偉雄，楊頌葦】解釋：偉哥，雄嗎？偉嗎？以前可能係o既，但係自從經過著名o既「雨傘事變」一役之後，就好難講喇。楊頌葦，哩個名都令人有D感冒，明明自己係女仔o黎嫁，但竟然整個名叫『 陽萎 』相信聰明o既你就知道我點解要將哩個名同偉哥拉埋一齊。心照！

　　不過，都笨唔係所有人都係咁衰o既，有D名就真係好貼題喇。就好似吳漢均咁，好乖仔，聽阿爸話，貫切始終咁扮演一個渼奸；莊敬就，名如其人，都幾勁啊；周安奇亦都幾似女人啦；翁子成o既家人就恨倒自己個仔，望子成蟲啦！

　　吹左咁多水，相信大家已經訓著左喇！不過，唔好訓住，依家有D猛料要公告，係關於我同關韻琴同學o既關係。大家都知，我地係同年同月同日，從阿媽個肚走出o黎o既人。所以當我生平第一次見到佢o既時候，知唔知我第一句說話係乜？係嗌左聲 ”家姐！”（口痕友：咁咪即係Twins 囉？　我：錯，係Boy ' Z）死未！如果你唔係好似我咁同年月日出世（2月27日），你係唔會明白當中o既感受。果種感覺係好得人驚，好邪，甚至會認為唔通佢係我失散多年o既家姐。（爸：衰仔，亂咁嗡野！）除左我地呢對佳人之外，其實仲有三對隱藏人物嫁。就係霍應新同邱家杰（1月11日），陳鎮良同楊頌葦（5月5日），羅錦珊同唐麗翠（10月29日）。記住哩三日，大家千奇，　千奇，千奇咪出街，最好連電話都唔好開，否則雙重禮物你都咪話唔肉痛。不過大家一定，一定，一定要記得2月27日哩個大日子。當日o既女主角可以不理，不過男主角就 . . .。 

　　友情，係永恆o既，亦係真誠o既。佢唔同愛情。唔通有個男仔（我除外）同你講會愛你一生一世，你就真係信咩！冇嫁嘛。所以大家一定要珍惜依份無價o既友情，如果唔係友情o既力量推動，我都唔會半夜三更打呢份咁長o既論文啦！【友共情】呢首歌其實好正o既。只可惜謝師宴當晚竟然唔記得大家一齊唱，是為人生一大遺憾。每當想到離別在即，心中亦不禁心酸。沒有你們o既日子，以後春天不再潮濕，秋天不再溫暖；夏天不再寒冷，冬天不再炎熱；月光不再猛烈，陽光不再柔和；夏蟲也為我沉默，沉默是今晚o既睡眠。

尾聲：

　　在此送上我o既祝福。祝願大家安康。o係我o既心目中，你地係未來o既工程師，大律師，飛機師，死人化妝師 ........

Forever friends , Forever we will be , Time is changing , but nothing's to be blamed.