當一個意見係"一竹篙打一船人"就可以用反例喇!意思即係個意見係全面性的!
例如:當有人提出"男人個個都係花心o既!"
可能有人會反駁"車!咁女人都有o的係花心架啦!"
雖然女人係花心可能係o岩,但係反駁唔到"男人都係花心的"呢句,兩樣野都唔對應o既!
所以你應該要諗下,係咪所以男人都係花的o既呢?
呢個時候可以提出反例證明有o的男人唔係花心喇!
就好似漢o既宋弘,個時皇帝話,只要佢休妻,就會將公主下嫁俾佢喇!
但係宋弘堅決拒絕左,而且講左句千古轉俑的說話"貧賤之交不可忘,糟糠之妻之下堂"
<類比>
簡單黎講,即係以其人之道還治其人之身喇!講就太抽象黎!睇下例子(係假設架咋)啦!
有一日,小明呀媽心情唔靚!見到小明懶洋洋咁撻係梳化睇電視啦!
佢好似唔抵得小明咁舒服喎!就叫小明唔好咁懶,去溫下習啦!
但係個時做緊套小明好鍾意睇o既節目(就好似史艷文喇,哈哈!),小明就話遲o的先去溫喇!
呀媽於是就大聲話小明喇
"你遲o的考試都要溫習架啦!遲又要溫,早又要溫!點解唔依家溫呢?"
小明見呀媽好似烏蠅咁阻住小明睇電視,終於忍唔住喇!小明就反駁話喇
"你遲又要死,早又要死,做乜唔依家去死呢?"(嘩......真係過份!目無尊長呀!咪學呀!)
當然,佢只係說明左呀媽叫佢溫習o既理由並唔充分遮,但小明反駁唔到考試要溫習o既必要性!
<歸謬>
歸謬好癖呀個詞,意思即係假設左對方o既主張係o岩o既先,再推出佢o既主張係矛盾,無可能o既!
換言之,即係置之死地而後生喇!舉個好著名o既例子啦!
大約係十六,十七世紀啦,當時o既人一般都認為重o既物件比輕下降得快,
甚至認為下降速度同物件重量成正比添!意大利物理學家伽利略就用歸謬法設計左一個假設!
佢先假定重o既物件比輕o既下降得快,依家有一件半斤重o既物件同一斤重o既連係一齊,
咁呢件連埋一齊共一斤半o既物件比起單一件一斤重o既物件,會係下降得快定慢呢?
*快?---因為假定重o既物件比輕o既下降得快,所以一斤半快過一斤啦
*慢?---假定重o既物件比輕o既下降得快,半斤物件下由降比一斤慢,但由於佢地連埋一齊,
所以半斤重o既拖慢一斤,所以比單一件一斤物件下降得慢!
兩個相反答案明顯指出重o既物件比輕o既下降得快呢個主張係矛盾o既!所以呢個主張唔可以成立喇!
<揭發預設>
有o的意見係預設左某樣野o既!只要揭發預設係唔成立o既,咁個意見都唔可以成立喇!
好似 "今日你無同我食飯,所以你一定同其他人去食飯喇!"
呢個推論就預設左今日你一定食飯,仲一定同其他人去飯添!
可能你今日唔食飯減肥,可能你一個人去食!所以呢個推論唔成立喇!
試下又睇多個句"你今次考試仲有無出貓呀?"呢句預設左你之前o既考試有出貓,
所以你答"有","無"都有問題!