賽事精華 (02/10/2003)

            慘! 慘! 慘! 贏波輸盤呀! 贏波輸盤呀!    

今仗繼續喺九龍仔仿真草球場迎戰富仔班行家,相信大家都唔會忘記上年喺界限街人造草場;先取得兩球入球之後俾人反勝嘅滋味。開波前大家都提早到場熱熱身拉拉筋,不敢怠慢。一輪熱身之後,正式開波嘞,身穿橙衫白褲右攻左嘅係行家隊,而身穿白衫藍褲左攻右嘅係有主場之利嘅廿七軍(踢咗一場贏波就話係主場!)首先開波嘅係主場之利嘅廿七軍,白毛首先將個波撥後交俾豬妖,然後再轉方向交俾…………。

…………..大禁區內大脾一控一射,入網嘞;可惜係射破阿勇嘅十指關,雖然阿勇已經飛身撲到盡,但係個波來勢實在太急太勁, 撲到波皮都無法阻止入球。

半場休息入更衣室, 呀! 唔係;係入觀眾席商討改變陣容,下半場加入富仔之後,成隊波好似索咗K咁鬼生猛,首先有富仔單人匹馬過關斬將射入追成一比一,之後再由阿春沿中路推進,斬波入離門八碼嘅富仔,富仔接應頭槌冼入反勝二比一。(真係奇聞,富仔頭槌都識入波, 哈! 哈!)

跟住廿七軍食住個勢加強壓力,攻勢一浪接一浪扲住嚟打,攪到對手吃得蕉;Oh! Sorry, 係吃不消至啱。最後更以蕃薯接應富仔傳球,好冷靜咁將皮球送入對手龍門,取得三比一嘅優勢。正諗住贏波兼贏盤之際,喺臨完場前俾對手一個遠傳送入禁區,笠過大吉同對方前鋒撞落盧志個身度碌番出嚟喺對手腳下, 哎! 咁就輸咗個盤咯,真係唔低。