賽事精華 (27/01/2004)

         廿七軍首度於九龍仔真草球場作客與磨刀石對壘,隊員仍然踴躍支持,最令人感動嘅就係Billy已經傷逾復出從返綠茵草場協助廿七軍,雖然今仗只喺下半場小試牛刀,但見佢攞波推波同入攝,都已經回復當年七成水準,相信假以時日,必可協助廿七軍揚眉吐氣。但只可惜Billy踢咗十幾分鐘就拗柴受傷出場,希望佢早日康復再係球場獻技啦!

         今日嘅磨刀石已經面目全非今非昔比,以往最弱嘅一環---守門員---已經換上一個能飛善撲嘅男守門員,而舊有嘅球員亦都進步不少,新加入嘅球員就更加揉合速度與射術於一身,要贏佢地真係一啲都唔容易。

         上半場開賽無耐,富仔已經拉傷左後大腿筋出場,令至廿七軍中場一時失去重心,幸好憑住寶強阿Dick同埋阿Cook嘅努力先至可以從劣勢中取回軍心,而後防亦拚命防守力保不失,最後喺臨完場前憑寶強處理右邊角球斬出阿Cook接應頂入廿七軍領先一比零完上半場。

         下半場廿七軍一如以往一次過換上幾名球員,但對手亦都係換上幾名新力軍,可惜對手嘅新力軍個個有番咁上下,控得扭得,而且仲有速度添,一時間撞到班中後場散散哋,就連盧志都俾人衝門撞到暈暈哋添,最後喺失誤與誤會之下廿七軍輸四比一。