賽事精華 (05/02/2004)

         喺9度之下踢波真係一啲都唔容易,點不知今場波竟然有成18個勇士嚟參與,真係難得,連阿King都嚟試腳就更加係難得一身好本領,情關始終闖………。

         雖然得9度,但係好多個都一早就嚟到熱身,最堅當然係光仔啦,著住件羽絨嚟熱身都得,真係頂佢唔順。熱咗一輪身之後都仲未見對手出現,廿七軍忍唔住8對8自己玩住先,點知光仔仲可以著住件羽絨嚟鬥波,唔怪得佢話踢咗廿七軍咁耐都未曾出過汗啦。

         終於等到對手出現嘞,點不知佢地又話唔夠人,唯有借住寶強同埋蕃薯過佢地玩住先啦,做無間道真係唔容易,蕃薯就演繹得淋漓盡致嘞,點解??成日交番個波俾我地就略知一二啦。開波初段雙方互有攻守,點不知我係大禁區外推甩波之餘仲收唔住掣撞咗落對方前峰度判罰球,班老師真係無乜品,都未排好人牆就射波,雖然阿勇撲到但係甩手轆番出嚟,可能阿勇熱身唔夠起唔番身,咁就先落後一比零。不過廿七軍並無氣餒,由幾個中前場阿威、阿Cook、富仔、豬妖同埋阿Dick不段策劃攻勢,造出不少驚險鏡頭,最後由阿威、阿Cook同富仔幾個短傳交俾阿Dick近門射入攀平。之後大約三十分鐘左右,富仔沿左路推進,乘對方後防未上前攔截之際,右腳一趟,連守門員都未有反應之際已經應聲入網,最後廿七軍領先二比一完上半場。

        下半場一如以往換另一批隊員出場輪姦對手,上半場個兩個無間道就歸隊出征,而我同阿春就比較後生,抖幾分鐘就可以番飛再撞過。換咗另一批廿七軍出征之後,仍然能夠同對手打成均勢,至於埋門方面就無咁入肉嘞,但係唔知係咪白毛上次頂入一球之後勇咗好多,角球斬出竟然搶頂成功,可惜偏離目標未能造成入球,但仍然值得表揚。而阿King亦有好幾次機會,但都未能把握,可見傷勢仍未痊癒,希望阿King能早日康復從拾當年雄風。