賽事精華 (03/03/2004) 今仗開賽時隊員出席比較少,只得12個,而我係最遲到嘅一個,唯有做住後備喺場邊熱吓身睇吓波先啦。原先諗住又係一場攻防戰,因為阿東話呢隊波有啲踢青年軍,有啲踢預備組,經我觀察之後睇佢地應該係70年代嘅青年軍同預備組嚟嘅機會大啲,不過有幾個啲波底又確係唔錯嘅,可能初次碰頭關係互相仍處於摸索階段,踢完第一節之後雙方互交白卷,而廿七軍表現亦算滿意。 第二節換邊再戰,起初仍然處於膠著狀態,雖然廿七軍仍佔有些微上峰,但攻勢始終唔夠入肉,未有士哥。反而俾對手藉住一個角球機會,乘混亂射入阿勇十指關,先輸一比零。落後一比零嘅廿七軍痛定思痛加強攻勢,可惜對手多次施展超技術勾跌光仔同寶強,攪到光仔火都嚟埋,大腳省落條粉腸度,可惜省唔到仲輸多個角球添。著咗嘅光仔真係有啲似足球小將裡面嘅小志強,恨勁咗好多。而含羞打左閘呢場亦相當出色,阻擋咗唔少對手嘅突擊,值得叫含羞三次,不過最後廿七軍都係無進帳。 第三節大吉話頂唔住後防工作轉打中場,而含羞亦不甘落後轉打前峰,左後防位置就改由白毛擔任,白粉仔阿春功不成就要身退退到清道夫位置。一對新箭頭光仔同含羞初遇拍起上嚟都有啲火花,但係欠缺實質嘅埋門鏡頭,而寶強本應有個攀平嘅機會,可惜離門幾碼把握唔到,跟住仲俾對手憑住一個強闖射成二比零完場。不過今場白粉仔阿春首次使出第二式((((( 連根拔起 ))))),將對手連人帶波踢到飛起,未受過專人訓練嘅隊員切勿模仿。
|