Diary

11/14

         我從來都無寫日記既習慣架,但係有時真係好想同大家分享下自己既喜與悲,今日其實都無乜特別時值得去寫,不過我會盡力而為啦!(苦笑中)

          唉....記得琴日派左Maths,真係好低分,雖然經過三次唔合格,我今次合格已經係不幸中之大幸,但係我由測完到派卷之前,我都認為自己無九十都有八十,點知.......我覺得無理由呀,點解喎?點解要係我最有自信心個陣,打我落谷底!!!!點解佢要扣分扣得咁盡???等我高分少少拉下平均分都好啦...........我諗我同數學都係無乜緣份架,如果咁好彩升到高中,一定揀文組!!!最好文組無埋Maths Physics個D科目!!!(搞到我連十名都無埋!仲要見家長..........)

        今日個科Geo個個都認為好難,偏偏我就覺得好易,可能琴日真係比左心機去溫習啦~~不過測Geo個陣好係好搞笑^.^你地認為非洲既馬達加斯加島同埋美國既阿拉斯加有咩關聯呢~~~~問下Raymond就知架啦!!!^^

       究竟咩解究架??竟然可以係十分鐘堶掉疏鴔A鐘意既人三次??雖然四目交投,但係我地心情始終唔同,永遠埋藏係心底.......雖然係好辛苦,但係有付出過未嘗唔係好事,今天的我愛上當時的你,係咪離奇得過份?就算係少少既回憶(別人既眼中不當係一回事),我都會好好珍惜,因為我曾經同你扯上了關係,好希望係5年甚至10年後見番面,就算係過路都好,只希望你是平平安安.....

 11/15

                 今天我覺得很自豪,點解?因為我第一次係自己完成MathsHW,係咪好叻女呢~(我知你係度""),識下既人都知我數理好差,一遇到唔識既數就會唔做,理得佢三7廿一!

               歷史堂個陣秋官突然發起神經,講埋d好搞笑既野,唔知佢究竟有咩慘絕人寰既遭遇呢?

             呢幾排我個黑眼圈好似越黎越大,我明明好早訓(十點至十點半,有時仲成89),但係第二朝好似無訓過咁,從未出現過既眼袋竟然出現左!!!!!人又殘左,.....都唔知考試既日子點過,我諗過食安眠藥架,不過又經有副作用,我好佩服豉油呀,佢竟然可以3,5點先訓!個樣都無乜殘,真係在下甘拜下風!!!!豉油請收小女子為徒吧!

             補完習之後都成六點,跟住仲要塞車(大賽車既關係),差不多7點先返到屋企,食完飯之後都差唔多8,沖完涼之後又差唔多9,開始溫習啦.....z.....z......z..........,,都係溫溫下無乜心機,唯有睇下"流茄歲月",又係一套悶到出汁既戲...........人生真係苦悶!!!!!無驚無險又到十點半,上床睡覺去也..........

11/16

       晨早已經落緊大雨,心情都唔多好!真係好~~~今日唔駛上ETM既堂,可惜琴日溫GR都唔係太好,所以番到學校就急不及待咁溫啦......點知今日要見MR.高喎,因為琴日欠Test Paper囉,佢第一句就係話:今次衰咩野呀,你都好少會咁架喎......真係可憐!

   櫻桃小眼今日去左醫院呀,睇佢應該無乜野架啦,訓番晚第二日又"BiLiBaLa"架啦,唔需要替佢擔心!

   原來Gr Test都唔係好難,豉油好快就搞掂,好得閒咁望住個窗,搞下隻手指咁!真係恨死隔離,因為我正在好努力咁做!!!希望今次有9次頭啦,唔可以衰比奶奶龍””淫浩同埋豬扒睇架!!

   下午我都無返歌詠,我諗都有個幾月無番啦,唔係我唔想番架,一黎多Test,二黎又要補習,想番都有心無力啦.....陶生千祈唔好怪我呀,我都知呢排係歌詠既非常時期,但係亦都係我既非常時期呀,我三次Maths Test都唔合格,我諗你都唔想我留班掛!

   係ICQ度,有一條友Add左我,講左無耐佢竟然用埋d不雅字句黎鬧我,原來呢位不舉男係初三某班既Mr. Wong,本人亦都係情不自禁下同佢對罵一番,當然勝方係小女子啦,Mr.Wong 己經道左歉(唔駛景仰我),我亦都希望無下次同類事件發生,始終本人都係讀書人,有學識有教養,唔想同d無謂人一般見識!

     

11/17

      今日本來係7點幾起身,點解返學個陣我又成日想訓耐D,唔駛返學個陣,又咁鬼死做起身呢!!!本住呢個心態,我又訓過啦,一起身已經係十一點半.講真,今日都無乜特別野做過 ,唔係食飯就係睇電視,唔係睇電視就係打電腦,好似"行屍走肉"咁.......

      呢兩日係 Grand Mix既大賽車,記番起上年我都曾經好留意架,點解!?因為上年有個勁型又靚仔既日本車手參賽囉,佢個名叫佐藤琢磨,連個名都英過人既~~~而且上年仲係冠軍呀!今年好似無乜動靜咁,無乜特別既賽事值得捧場,因此我都係選擇左訓覺!

      琴晚好無聊咁,睇返"新紮師妹",雖然睇左幾次,但係依然咁搞笑,聞說就黎會開續集,有大笑姑婆既千嬅,型爆銀幕既Daniel同埋紅到發紫既Twins都會加入,真係越黎越有睇頭,而且Joe Ma既戲真係好唔錯,同居蜜友同埋我家有隻河東獅都係水準之作!~

      我諗上個禮拜個個既話題都圍繞住"齊天大聖孫悟空",初頭我都對佢好有興趣,點知第一日睇左之後,覺得佢完全唔掂,動畫假到死,成日都係特技特技,但係又做到好假,淨係Sale明星,張衛健個d口頭禪又唔明佢講乜,成日唱山歌,唉.....根本睇唔落去,連平時本人頗喜愛既阿Gill既演技真係差得好緊要,淨係識扮可愛........唉!

   剛先收到史地既Msg,我地去昆明既行程已經訂好左:昆明→大理→麗江古城→古龍雪山,不過都成三千幾蚊,雖然貴左少少,不過我又覺得物超所值既~始終第一次同班Friends去旅行呀嘛~

11/18

         今日堂周會真係好鬼悶呀,果個Dr. X成堂講進化論,經常講一串唔知係乜既英文出黎,扮哂勁咁.....又不斷地重覆:"我十六歲係培正畢業,去左美國19歲就拿到進化論既學位,跟住又讀左四年醫,又學埋火箭......"好心佢啦,如果係有料既就唔駛係培正演講,如果係有料既人都唔會成日話自己有料啦......怪不得連燦哥都話佢無料,唉............

         無啦啦返到學,豉油就話阿度唔駛唱歌,叫我頂阿度.初頭都唔係咁想,不過豉油叫到,兼且自己有成103首歌,就恭敬不如從命,做個烈士!!!(捨己為人既精神係咪好偉大呢)點知當我好有心理準備要唱歌個陣,豉游竟然唔駛我唱,原來係個班要唱既人迫我放棄~!!!!"玩完啦喎"Miss Wong之金句.....一場歡喜一場空了!

         補完數學之後,我地又返到望班班房傾壁報啦,講下講下,奶奶龍無啦啦講起小四時既我,又話佢個陣憎我入骨喎,又話我個陣成個大陸婆咁(忍緊嬲中),好過佢過去到現在都係咁女人,都唔知以後有無人肯嫁佢囉~~~~當我地講緊笑既途中,和尚Fish突然出現,豬扒問我佢係邊個,跟住我就整左個Fish最愛整既"發姣"手勢出黎,爭d比佢追打(不過以後既命運就係比佢叫媽咪啦)!佢仲洗我做野呀,你話呢d咁既人係咪應該拉去打把!!(奷笑中)

       出去幫學生會宣傳部借"純情周周俏的的"既時候,豉油一直係度問我同阿A既關係.......唉,我只可以講聲:"我要講比愛護我既人(我既仔女),傷害我既人(阿A)知,我比我想像中更堅強!"真係好想從來無識過佢,因為我依加諗返覺得佢一直以黎都係度厄我,不過其實我又好恨自己,根本係自己自作多情,點解個個唔鐘意係要鐘意佢,佢究竟係唔係玩我?我唔知,但係好肯定既係時間會沖淡一切,我已經無咁掛住佢,我估不久既將來,佢既名字會永遠係我腦堶戛囓,God Bless Me!

11/19

         今日原來係燦哥既生日,係度同佢講聲"Happy Birthday"(雖然已經親口同佢講左啦)

         上午上堂個陣聽到好震驚我既消息,真係好令我意想不到,不過感情真係一發不可收拾架,唔係話抑制就抑制到,"雖然佢係d咁既人,但係身為你既Friend,我都好希望你得到幸福!,幸福唔係必然,一定要自己爭取,我就係衰膽小,我亦都唔希望你好似我咁,努力呀,向你的未來邁進,不過記住要溫書呀,初三畢業啦,真係許勝不許敗架!"

          地理同埋Gr都有唔錯既成績,我都算對自己有交待啦!最緊要高過"傻人一派"先!~

          Kenny原來同回頭草分左手,雖然唔係咩好事,不過我認為Kenny無乜必要同一個唔鐘意自己既拍拖,咁樣拍法都唔會長久啦,我都知佢之前條女Hurt得佢幾深,希望Kenny會快d好番啦!

         聽日要總默書呀(今晚又要刨一晚)又要考電腦喎(本人都係諗住唔溫),希望聽日生生性性有高分數啦,唔係會比個d小人(奶奶龍之流)取笑!!!!本人決定下個段一定要努力,重返十名之內!!

11/20

        我終於鼓起勇氣,cut左頭髮!!!雖然好心痛,不過除左改變形象之外,第二個目的就係剪指一D煩惱(阿ABC同埋數學差既事實),果個髮型師話考試前剪頭髮唔好運喎,雖然個陣有d驚驚地,但係我相信如果我有比心機溫習既話,一定會考到好成績既,係咪?依加d頭髮好短(我認為),仲要比人串(肥誠同埋飯島聰)似福建婆!?激死我,因此我會勤d洗頭,我要快d生返d頭髮,始終我都係鐘意長頭髮~

           電腦考試難到嘔!!!!!第二部份既5題,我識得做一題ja!!!不過好在原來佔20分,起碼唔會唔合格先啦~~原來溫唔溫習都無乜用,雖然我都無溫到~~哈哈,我係咪好懶呢~~~

           原來有兩個網上測驗喎!!!真係煩呀,仲諗住訓覺架嘛~~其實呢,cut完頭髮之後,我既感覺就係"我呢一生就咁完左啦!~"唔知點面對d同學,我始終唔習慣囉,一諗到咁,就好想返屋企,永遠都唔出街,唔想面對咁多人,順帶一句,如果大家知道點樣可以令頭髮快d長返既妙法,請在留言板留言或者通過icq話我知~多謝合作!!

11/21

     豉油你知唔知你喊得太多,而且係為左d好濕碎既事!!!船過橋頭自然直嘛,我曾經都為左呢d野而擔心,但係依加咪一樣好好地~無事既,明天會更好呀嘛~仲知記住唔好一時衝動呀,三思而後行,不過我相信你唔會亂黎既,因為你係好淡定斯文架嘛,Always Support!

        死啦死啦,幾何我一題都唔識喎,都唔知點考試架!!!物理個方面又唔掂喎,唉.......

         今晚成屋企d人都走哂呀!!!得番我一個係屋企,望住咁大間屋,真係有少少心寒架,又無飯食喎,淨係買左個M記返黎當晚餐,突然間覺得自己好淒涼呀~~~~

         借左"微熱少女"結局篇返黎睇,覺得好唔捨得,因為咁快就完左啦.....而且男女主角都好好好開心咁過埋下半世(熱淚滿腔),搞到我好鬼羨慕,真係好想好想搵到個好似男主角一樣咁溫柔既男仔,我都知我好鬼貪心,而且好難搵到如此好既漫畫型男生,得個諗字都好呀嘛!!!大家有無睇杰倫個手機短訊廣告呀???入面既Jay真係好型呀!!!我真係好想遇到d咁既男仔,唔識表達自己既感情,但係就好鐘意自己既人~~~(我遇到左,但係........)

         千辛萬苦,萬般鋪排下,我終於踏出第一步做左班代表啦!!!!!為左不負阿媽既期望,我會努力入學生會架!希望大家會支持下小女子,當然豉油要出多d力啦(奷笑)~~~茫茫人海中,其實小女子雖然唔係好有才能,只不過本人有上進心,負責任,有創意,仲知要乜有乜,豉油知唔知呀~~~~

       

   12/19 晴

           嘩,原來我已經成半個月無更新過DIARY啦,其實我都唔想架,你知啦,前排又要考試,依加又要做壁佈喎,真係無乜時間更新架,無幾耐前呢度又中病毒呀,真係天不助我囉~~~

            今朝起身既第一個念頭就係快D過左呢日,就可以放一日假,偷得浮生半日閒嘛,已經過左個段令人生不如死既日子啦,已經既我已經正常返同埋有返少少神氣啦,不過老友豉油就慘D囉,仲係2點先訓,真係唔知 佢遲D點過囉(初三已經咁,高中就唔駛訓啦)

              體育堂個陣我為左豉油一個舉足輕重既人改左個名-青茄!~係咪完全想像唔到佢會係邊個呢...嘻嘻,大家 有無睇過皆大歡喜架,講是非係好有技巧架,最高境界就係係佢面前講是非,佢都唔知你係講緊佢是非,所以青茄呢個名只有我,小周大的同埋豉油先知 ~~~~青茄!!!你都係要比我地數架啦,哈哈哈!!!!!

             記得琴日老婆仔比我擺左上檯,哈哈,佢真艷福不淺囉~~咁荀既野都比佢執到,豉油呵~~~~

              今日最開心既事,就係我阿媽終於肯買個outdoor比我,但係其實都係得$199,阿媽依然話唔抵,其實全場最平已經係呢個價,佢仲話叫我出一半喎,好在後尾改變主意ja,唔係我今個月唔駛出街囉~~~