講到花花既心情時，我就諗起有一次0係大埔吉之X既超級市場，見到一個女仕推著部手推車，車上面有隻史納莎，我一眼望落去發覺隻狗好唔開心，真係唔開心得好緊要，就好似人既"愁眉深鎖"咁，我忍唔著行埋個女仕度問佢：

BOOGIE的家姐：點解你隻狗咁唔開心既？

女仕：點解你會話佢唔開心呀？

BOOGIE的家姐：我見到佢好唔開心0羅！係非常之唔開心添！

女仕：你點睇到佢唔開心呀？點睇架？教我得唔得呀？

BOOGIE的家姐：我唔識教你喎！依個係我既直覺，感覺到佢唔開心0羅！好多人都話唔識分狗既表情，開心同唔開心，我諗對得狗耐既人，留意佢地多D就會領會到架啦！咁點解佢咁唔開心呀？係咪你頭先鬧或打過佢呀？

女仕：無喎！不過我執佢番黎到依家都係咁架啦！都差不多成半年啦！同佢挽又唔挽既，我行去邊佢就跟到我去邊！

BOOGIE的家姐：哦！你0係街度執既！咁你有無同佢搵主人呀？佢可能掛著個舊主人所以一直都唔開心呀！你行去邊佢跟去邊係因為佢驚再一之失去主人既滋味！

女仕：無呀！我見都無人貼街招話唔見左隻狗！而且我個仔話，如果有人黎要番隻狗都唔好俾番佢喎！因為我個仔好鍾意佢既！

BOOGIE的家姐：咁可能個主人有貼街招不過係貼0係走失時既位置，咁隻狗自己行下行下咁越行越　遠，所以你咪有可能睇唔到張街招0羅！如果個狗主要番隻狗你係應該俾番佢！因為隻狗咁唔開心連我都睇得出，証明佢好掛著個舊主人啦！你都唔想隻狗成世都唔開心架？而且隻狗係人地既，你同個仔講為隻狗開心著想，要俾番隻狗個狗主，"君子不奪人所愛"麻！依個都係教育之一黎架！你可以同佢去愛護動物協會領養一隻麻！果度有好多狗等人領養，一樣係咁可愛，咁得意！

女仕：不過都咁耐咯！都無得搵啦！個狗主都唔知係唔係唔要佢既！

BOOGIE的家姐：你盡下人事啦！你可以去獸醫診所，寵物店，愛護動物協會度貼告示，如果個狗主真係好掛著隻狗可能而家仍然搵緊佢架！

到最後我唔知個女仕會唔會跟我提議去做，但好肯定隻狗就係如果一世都搵唔番個主人會係好唔開　心既！如果隻狗因為唔見左個主人後咁唔開心，即係話佢同個主人既感情相當好，我個人認為唔應該為左佔有人地隻狗而要隻狗一世都唔開心！咁樣係好殘忍既！希望所有愛狗人仕如果有朝一日執到失狗，盡量同隻狗搵番個舊主人！等佢地可以團聚！

刊登日期：1/5