 |
花 花 | |
|
花 花 | |
 |
 |
| 花花，係我為德仔揀既老婆仔，我0係寵物店買佢番黎時，佢頭上有一撻奶癬，經過我每日同佢整理，好快就痊癒，帶花花番屋企當晚德仔聞下佢，之後就走開左，我以為德仔唔會呷醋，所以好放心咁俾佢倆個一齊單獨相處，當我轉身就聽到花花叫左一聲，我擰轉身又無異樣就諗著轉身做自己野，我未轉晒身眼尾"目及"到德仔行後幾步，然後走衡咁跳過花花，但德仔對後腳並無完全跨過花花，而係用對後腳勾佢，被德仔對腳一勾，花花就好似滾地葫蘆咁碌左幾下，我當然有鬧佢啦！但仍然不時聽到花花既叫聲，雖然花花細粒唔夠佢鬥，但仍然會好無奈咁坐0係地下度沸番德仔，而德仔就會扮無事發生過咁行開，我經常鬧德仔話：果個係你老婆仔黎架，唔好蝦佢啦！要鍚佢架，好似我鍚你咁呀！知唔知呀？佢唔太過份我都唔會理佢既，始終狗既世界係要佢地自己去互相適應！ 時間耐左德仔蝦花花既次數都少左好多，花花無脾氣，性格好隨和，我觀察到佢從德仔身上學習，好似德仔每朝都會沸個死對頭郵差咁，初時花花就跟著德仔由露台右邊跑到左邊，又由左邊跑番去右邊，但佢係唔知做乜事既，淨係跟著德仔跑，耐左佢又學德仔咁沸兩聲，德仔擔報紙佢又追著，跟著行，於是我教埋花花擔紙，佢無德仔咁聰明，但都唔算蠢，只係要多教幾次！ 隨著花花既成長德仔已經再無蝦佢啦，開始對佢好好添！我成日見佢同花花洗面，清理耳仔，跟出跟入，成個"觀音兵"咁，我都好開心佢地可以相處得咁融洽！ 自從德仔同花花"偷雞"功成之後，兩隻衰野不知幾好，成日糖黐豆咁，原本每隻狗一個籠既，但佢地就鍾意訓埋一齊，迫到死都要訓埋一齊喎！我見過花花因為太迫而WOO WOO聲，德仔扮聽唔到呀！嘻嘻嘻............幾厚面皮呀！ 一日，朋友打電話黎同我講，佢既朋友既貴婦狗生左六隻小狗，由於係第二胎，屋企已經合共有十幾隻狗，實在照顧唔到咁多隻，想將小狗轉送俾人，條件係要狗主真正鍚狗，而我朋友又知我愛狗，所以問我願唔願意收留其中一隻，經過我考慮之後最後我決定收養，之後朋友帶左隻狗仔黎我屋企，三個月大，白色既貴婦狗，佢就係威威勒，第一個印象係唔八掛，好文靜，但當我留意佢一段時間，發覺原來佢非常古惑既，想俾個下馬威德仔睇咁！佢將德仔趕出露台，之後走到我腳邊扮可憐要我抱，如是者幾次都俾我見到，而德仔就好奀皮咁扮被佢趕出露台之後又由露台跳番入屋！一D都唔怕佢既"下馬威"！ 夏天開冷氣花花都凍到震既，佢又唔識得叫我地開露台門俾佢出去痾尿，所以經常0係地下瀨尿，因為咁我地每次開冷氣都會叫佢出露台，仲叫埋德仔陪佢，但花花就唔高興，每次一踏出露台第一步就即時痾篤尿0係露台地下度，初時我會打佢兩下個pat pat，但發覺問題仍然發生，我就諗點可以解決問題勒！我諗佢痾尿0係露台地下都係因為佢唔鍾意出露台，所以就用瀨尿黎激我，如果我俾佢激到即係中左佢計啦！於是當花花再次俾我叫佢出露台時又痾篤尿0係地下度，我就當無事發生，抹左篤尿就算，唔鬧佢又唔打佢pat pat，又唔望佢喎！但照樣要佢出露台，試左幾次之後，花花都無再用篤尿黎激我啦！呵呵呵........佢做既野都無人理，無影響力！無威脅性既！仲點會再做丫！呵呵呵.............. 有一日朝早發現花花痾血！我立即打電話俾德仔睇開既獸醫，不過當日係另一個女獸醫註診，咁我諗：橫掂都係未睇過既咁不如去"防止虐畜會"既流動車睇啦！反正架車今日去荃灣近咁多，好過出旺角搏啦(我住屯門)！但時間好緊迫，流動車診症係以派籌方式，先到先得派完就無，無籌係無得睇獸醫既！所以必需要趕！趕！趕！飛的士出到荃灣，由於禁區我同花花唯有落車，跑上旋轉天橋，係咁跑，花花仍然好精神，跑得好開心，佢覺得我同佢挽賽跑！終於跑到流動車啦！已經派緊籌，點知派到我前一個已經派完LU！死火啦！點好呢！唯有又搭小巴出旺角啦！ 個女獸醫好年輕，佢話花花係腸炎，打左支針，俾左包葯我，我臨走時問個助手個舊獸醫去左邊？因為一向都係得一個獸醫註診，而且果個就係老細添！佢話老細放大假聽日先番！唉.....又會咁岩既，差果一日！ 回程途中，花花開始呆呆地，無頭先咁精神，縮埋一舊訓覺，番到屋企無耐佢就嘔啦！仲發覺佢開始震，痾血又密左，都無止;痾既！好擔心！拿拿聲將佢同威威隔離，跟著用狗既清毒粉開水噴屋同籠，越夜花花既情況就越差，又唔食野，又唔退燒，又不斷痾血，痾到無得好痾啦！連個身都"拱"起，但又無野痾出黎！唉.....睇見佢就辛苦！！！！我覺得佢同德仔既病徵相似，我諗發狗瘟既機會高D！好彩聽日個獸醫註診0者！ 我見到個獸醫註診心情都好左好多，我當然投訴個女獸醫唔掂啦！結果花花要吊鹽水，打針，跟著扲既葯同德仔以前食既都係一樣，獸醫話花花係發狗瘟呀！結果花花食左幾日葯已經好番晒！跟著我同佢覆診再打多次狗瘟針。 自德仔死果日開始，我每日都喊！無辦法去控制自己既情緒！我都唔記得我喊左幾多日，淨係知自己對眼好難睜得開，好痛！好腫！但眼淚仍然係流出黎，大佬實在無我辦法，其實連我自己都無辦法唔喊！有一日大佬同我講：你可能對著花花令你想起德仔，不如將花花暫時寄養0係朋友度先啦！過一排先接番佢番黎住！我當時無反對過！因為我知依個係我喊既主要原因。花花第一晚好唔開心"唔唔"聲叫，朋友於是抱著佢訓覺，之後花花晚晚都同我朋友一齊訓覺，朝早佢父母就同花花出街大小便，由於花花都好聽話，朋友既父母都好鍚佢！ 大約過左兩個月，我接番花花返屋企，花花見到我都無雀躍既反應，我發覺佢一D都唔開心，佢個籠0係廳但花花經常走入廁所"lee"埋，我都唔明點解，以前一向烕威都同花花挽既，唔知點解今次花花番黎無同佢挽，仲有兩次威威唔知為乜事同花花打架，花花隻耳仔仲流血添！我打電話同朋友講，朋友話0係佢屋企唔係咁既！只係第一晚花花曾經喊過！之後就無勒！咁我叫佢黎我屋企，諗著睇下花花既反應，朋友一到，花花好似救星到咁，猛撲佢，我心諗：朋友一定對佢好好！朋友同花花挽好耐之後走左，花花又"lee"番入廁所，其實廁所係無佢既被舖同籠，但佢都情願入廁所訓，我0係度諗：係咪佢以為我唔要佢呢？佢係咪唔再眷戀依個屋企呢？差唔多一個月，我嘗試過多D抱佢，陪佢挽，但都無乜進展，花花唔多理會我，朋友主動提出黎我屋企探花花，同樣地花花好興奮咁撲佢，終於朋友提出一個要求：花花既然咁唔開心，不如俾佢番我屋企啦！我同朋友講我需要認真考慮一下！ 我開始考慮花花既去留問題，究竟花花點解會唔理會我呢？點解成日"lee"埋？係咪因為佢認為我唔要佢，所以佢唔再留戀呢？點解威威會打佢呢？係咪威威都覺得花花俾我驅逐出家門，再返黎都唔會再有地位呢？既然佢0係朋友屋企會開心，係咪應該俾佢跟我朋友走呢？係咪當初我唔應該將佢寄養0係朋友度呢？唉............我相信當初既決定一定係錯既，唔應該將佢寄養0係人地度既！令到花花誤會我係唔要佢！ 我唔想佢一路都唔開心，既然花花唔再留戀，選擇另一個主人，我亦都應該尊重佢既意願！畢竟都係我自己做錯左個決擇！事前無諗過佢既感受！ 幾年前朋友同我講花花走左去另一個世界！我無勇氣問佢花花點樣走，幾時走，我覺得我既然已經放棄做佢主人，就無資格再過問佢既一切，要關心就要0係養佢既時候關心，事後點關心都無用！！！ |
