我屋企有三寶，咁好自然日常生活就會有D趣事發生既！，我會時不時將佢地既有趣事放0係度同大家分享，如果你地對三寶既日常生活都感到興趣，得閒就入黎睇下同八下啦！
檔案名稱：正一生蕃黎既
今日俾我發現到小新個頭頂抓爛左，流晒血，所以要笠著個喇叭頭，連佢食飯我都無同佢除個喇叭頭，因為我試過幾次掛著執碗(狗兜)去洗唔記得同佢笠番，結果已經結成焦既都俾佢一野抓到流晒血，只係抓左一下咋！又要由頭等個傷口結焦啦！所以我唔會再心軟架啦！反正佢笠著個頭都可以飯到既！
三寶一向食飯都係各據一方既，今晚都唔例外，錢錢0係櫃側，Boogie0係梳化旁邊，小新0係窗台前，其實三隻既位置相距只有三四尺，我今晚咁岩掛著睇電視就坐左0係梳化(等執碗---狗兜)，見到Boogie食食下跌左一粒狗糧出狗兜外，但就唔知跌左去邊？Boogie當時無理，因為佢既習慣係食晒兜狗糧先去搵既，當佢食完之後，仲記得曾經跌左粒狗糧就0係地下聞聞聞，聞到腳踏梳化底有野，就係咁用個頭推，個腳踏梳化俾佢推到去小新附近，當時小新垂低頭食緊自己兜糧，個喇叭岩岩蓋著個狗兜，即係佢乜都見唔到，只係見到自己兜糧，當Boogie搵狗糧搵到去小新位置時，突然打小新喎！但係由於小新乜都睇唔到，根本唔知發生乜事，又掛著食自己兜糧，仲以為Boogie黎搶食，就係咁woo...woo...兼用個pat向著佢，而Boogie呢？係咁打小新，果把倀雞聲不知幾大聲，又惡死喎！我咪走埋去諗著捉著佢0羅！點知隻腳踢到個腳踏梳化，一腳踢開左，跟著見到有一粒狗糧係地下度呀！根本粒狗糧仍然0係腳踏梳化底，只係Boogie以為小新食左佢粒狗糧，就係咁打人勒！我執起粒狗糧，諗著叫個倀雞妹過黎食番佢，點知個惡婆仲啄著個細佬，誓不罷休，唉！我唯有行埋佢度俾佢睇下粒狗糧啦，佢一見到搶左黎食勒！我都未見過咁野蠻既狗！自己搵唔到居然賴人偷左都有既！細佬掛著食同埋笠著個頭咋！如果唔係真係交都有得打架啦！
刊登日期：22/11
檔案名稱：俾d顏色你地睇
上次金多寶無人中喎！咁幾歹都要買啦！於是扲左袋已經寫左number既49張紙仔出黎諗著叫小新同我抽番六個lucky number，平時我倒袋紙仔時會欄著錢錢同Boogie既，費事佢地攪亂檔攤，點知今日唔記得左！我一倒袋紙仔出黎，Boogie就走埋黎八勒！跟著錢錢又行埋黎，正想叫佢地行開，個衰Boogie突然打錢錢喎！咁我咪一手捉著佢後頸拉開佢0羅，個衰女就跌"唔唔"勒！咁我欄番著佢倆個入去，跟著執左"唔唔"清理完就叫小新同我擔六張紙仔出黎，咁佢同我做完咁神聖既工作當然要賞佢小食啦！不過無做野果兩個都有份既！
跟著我經過小新佢地間房，見到錢錢企左0係佢自己個籠門口發"hou逗"，我無理佢因為我見Boogie0係佢自己個廁所度又痾左篤屎，我要趕著去執"金"呀，當我再經過房門口時，見到錢錢仍然企0係度望著個籠，咁我咪行入去問佢做乜發"hou"逗？點知俾我見到佢個籠入面有篤屎！！！係兩大條！咁我好大聲問錢錢：邊個0係個籠度痾屎？跟著錢錢好似俾我一問之下即時"撻"著左個火頭咁！一路沸一路跑出房搵Boogie，小新就梗係加入圍攻行列啦！而Boogie個衰女包就好似有備而戰咁，企定定等迎戰咁款，唔駛問啦！又係個衰女包既傑作啦！鬼唔係頭先唔順氣咩！明明打緊錢錢又俾我"的"開佢，有機會仲唔俾番d利害我地睇咩！Boogie梗係諗著打錢錢都未夠喉就俾我捉走左，條氣都未順番，就痾篤屎0係佢個籠度示威啦！個衰女都唔係第一次架啦！上次又係0係錢錢個籠入面痾左篤屎，錢錢又係唔知做乜既！佢痾時又唔出聲喎！痾完又對著佢篤屎發"hou"逗，係要我問佢先好似"如夢初醒"咁，慢幾廿拍既！我咪唯有同錢錢講：你個衰女成日蝦你，如果佢下次仲係咁樣，我同你切佢忽肉出黎，煲湯俾你飲，等你順番條氣勒！
刊登日期：4/5
檔案名稱：新版守株待免
某日既一個早上，當我正0係度刷牙之際，BOOGIE就0係廳度叫左一聲，我以為佢地挽緊就無理會，跟著BOOGIE好心急咁走入廁所搵我，於是我跟左佢出去廳，一出到廳已經見到小新趴左0係地櫃既地下度，BOOGIE一出到去亦都趴低，佢地兩個咀仲插左入個櫃底入面(個櫃係離地幾吋既)不斷擺尾，咁我就趴低望入櫃底，但無野發現，我就鬧佢兩隻野報錯料，點知BOOGIE就好唔順氣向著我係咁WOW，WOW完又趴低入櫃底，咁我就扲個電筒照下但都無野喎！我同BOOGIE講：無野呀！邊有野啫！但佢不斷咁WOW我，我唯有用支騰條撥開電線睇下啦！點知俾我發現左有一粒"狗糧"，應該係前一晚唔小心倒瀉左唔知，於是我就諗著撥粒狗糧出黎之後掉左佢，但我太大力啦，一撥粒狗糧就飛左出黎，BOOGIE一個箭步就搶左黎食，唉.....!真係為食得緊要呀！小新就好唔順氣，係咁WOW著BOOGIE，咁可能粒狗糧係小新發現先既，但而家又俾BOOGIE搶左所以好唔順氣，我為左平熄依個風波，唯有俾番一粒狗糧小新食0係啦！
但當我轉頭走時，BOOGIE又係好緊張咁趴係個櫃底度狂擺尾，我就鬧佢：邊有咁多得你食丫，快D起身！咪係度守株待免呀！但BOOGIE仍然趴0係地下仲插個咀入櫃底，咁我咪再睇下0羅！點知又真係有喎！我今次精啦，細細力撥，之後扲去掉左佢，哎呀！原來係唔可以掉佢地發現左既食物架！佢兩隻衰野一齊夾埋WOW到我失魂呀！仲走去個垃圾桶度聞呀！話我好掉左佢D寶物！結果咪又係要一"狗"一粒狗糧先掂0羅！
刊登日期：29/3
