德仔

我自細已經好鍾意狗，尤其是大狗，十幾年前搬入村屋住，一心諗著養隻大狗，於是經常去寵物店睇狗，好想買隻大狼狗，杜柏文或洛威拿之類，因為覺得佢地可以保護到主人，一晚，亞哥打電話俾我話：我有樣野送俾你呀！我心諗：咁筍！罕有喎！問佢係乜黎架？佢就話："肆隻腳械mood架four？hi 真d械........"(一個電視油漆廣告既對白"四隻腳係乜家伙？睇真d係駱駝)，我一諗就諗到係"狗"勒！再追問係乜品種既狗，佢就答我係杜柏文，我當時好開心，因為連個天都幫我揀左隻狗啦！

德仔，俾我收養時大約一歲多D，由於舊主人要出國讀書，家人唔同意帶埋德仔去，所以暫寄養係另一個家庭一段時間，個家庭本身已經有兩隻狗，於是由我收養左德仔，第一眼見到佢時，感覺係：好失望，原來只係一隻"迷你"杜柏文，仲係好廋，眼神係無奈，對人無特別反應，當我帶佢離開時佢對眼一直望著"暫養主人"直到車已轉彎，再睇唔到為止！

雖然係失望，但我始終係好鍾意狗既，所以無抗拒過接收德仔，返到屋企第一件事就係帶佢去露台俾佢睇下有幾高，等佢知道個危險性，因為佢實在太廋！真係驚佢會失足跌落街。

大約朝早七點幾電話響起，佢"暫養主人"打黎問我帶左德仔落街大小未.？有無買菠蘿包俾佢食？佢話佢工人習慣每朝六點幾就同德仔落街，吓？？六點幾？要我六點幾同佢落街？我都未聽過狗要食菠蘿包架！於是望下德仔一眼，發現佢0係度震，我諗佢一定係好急尿勒！忽忽收線打算立即帶佢落街，但已經太遲，佢瀨左lu！我並無責罵佢，因為依個係佢習慣，但咁即刻要我每日都要六點同佢落街？OH！ My God！！！

瀨左尿但都要食菠蘿既，咁我就同佢一齊去買菠蘿包，返到屋企將個包放0係個狗兜，但德仔望一眼個包，聞下再望我，無食喎！原來佢係要人將個包"met"到細細舊先識食既！我望著佢心諗：唔係麻？你係一隻狗黎架！連食都唔識，點生存呀？對著一隻"少爺狗"，我突然好想令佢做番隻正常狗！而且食菠蘿包對狗黎講好似怪左D咁！

我第二朝就改買白麵包，一塊"met"開六塊，開始時佢唔食架，我用手餵佢佢又食喎！於是我就每次遞俾佢時，一到佢個口我就扮扲唔穩跌左，結果佢都自己食晒個包。

一日，我要出去一個上晝，返到屋企打開門，嚇我一跳，我以為有賊入屋呀！茶机上既野跌晒落地，椅同枱推到路中心，報紙同雜誌被撕到碎濕濕，露台既水桶，椅背既衫，電話，筆全部係地下，但德仔就唔見左，後來0係廳既一角見到佢，佢用對眼側望我，成身發震，我知係佢做既好事啦！我捉著佢鬧佢，德仔用一種好倔強，好唔服氣既眼神望我，我忍唔著用騰條打左佢幾下！

往後既幾日我每次出完街一定會有令我驚訝既場面出現，每次返到屋企我都要執屋，而德仔就次次都係"尼"埋一角仲成身震，我都唔明點解明知我番黎一定會打佢但都係要犯既！真係好唔明！我實在忍唔住啦！我決定出街時縛著佢，咁就萬無一失啦！但事實講俾我知係唔得既！而且仲會令事件更差，當我開門見到個奇景時簡直係無名火起三千丈呀！成地都係紙巾碎，係我剛買番黎未用既幾卷抹手紙，德仔全部同我撕到碎濕濕，舖滿成個廳，如果想像唔到既話就可以諗下騰雲駛霧既仙境係點就最貼切勒！連露台既落地窗簾都成幅扯埋落地下，以一隻只有十五六磅既狗，點可以扯左成幅窗簾呢？一定要用好大既體力先做到！我真係嬲到七孔出煙，鬧佢之餘我今次唔係打佢幾下，係狠狠咁打左佢十幾二十下之多，德仔既反應簡直係得人驚！佢一粒聲都無出過，好似一D痛既反應都無咁！仲擰轉塊面抬起個頭，果一刻我覺得佢倔強得好可怕，從來無想像過一隻狗可以倔強成咁既！我嘗試過縛佢0係其他位置，但只要可以俾佢接觸到既物件無一幸免，我實在唔想縛到得番一呎既活動範圍俾佢，更加唔想要困佢入籠，但奇景每日都發生，我開始覺得自己有壓力，因為每次開門唔知又會見到D乜野！結果我都係買左個籠番屋企，諗著出街時我困佢入籠，到我番黎我就放佢。

每次我出完街番屋企總係見到佢個水兜反轉左，我相信佢係發脾氣啦！其實我都好明白佢諗乜既！兩個主人都唔要佢，俾人遺棄既感覺一定係唔好受，但佢又唔俾時間我同佢相處，唔同我合作，我唯有用困籠既方法啦！希望大家相處落遲D會明白如果佢聽話係有人會鍚佢既。

一日，我番到屋企見到佢0係籠入左面痾左屎，諗著叫德仔出黎然後清理個籠，但叫極佢都唔出，我伸手入籠諗著拉佢出黎，但突然隻手一陣痛楚，我大叫一聲跟著縮手，見到隻手已經損左，係佢咬我！我當時真係好嬲好嬲，心諗：我已經好容忍你，付出咁多精神同時間你居然唔領情！仲咬我？我乜都可以忍，唯獨係隨地大小便同咬主人既狗我係唔可以忍！於是我冒著會再俾佢咬既危險，伸手入去一手抽佢出籠，跟著用果隻被佢咬過既手去掌佢個咀，係不斷咁掌左佢個咀十幾下之多，係掌到佢牙血都流埋，我依個舉動除左因為我實在好嬲之外，我亦明白到當一隻狗咬過人一次之後，如果無好好教訓佢係一定會有第二次咬人既機會，我要話俾佢知我隻手係唔咬得既，我係唔怕佢咬既，之後又扲起支騰條係咁打，好用力咁打我都唔知自己打左佢幾多下，我淨係知我打到手都軟埋，但德仔仍然"啍"一聲都無，我真係覺得佢好可怕，係倔強得好可怕！佢只係擰側個頭用個背脊去擋我支騰條，到我停手勒！佢就用好憎恨既眼神望著我，我實在係支持唔著，我頂佢順啦！乜養狗唔係件快樂事咩？點解會令自己咁大壓力架？點解會好似同個仇人住埋同一間屋架？點解唔俾時間自己去適應個新主人呀？.............一連串既問題一下子湧晒出黎，令我覺得收養佢係一件好錯既事，好沮喪，我終於要放棄啦！我唔再堅持啦！我立即打電話俾亞哥，同佢講我唔要佢啦，我放棄啦，我投降啦！

但亞哥只係輕輕咁帶過幾句說話：你唔要佢，佢唔會有人要架啦！個"暫養主人"無可能要番佢，因為佢兩隻狗同德仔唔可以融洽相處！你再考慮下啦！我收線後，望著隻滿眼仇恨既狗心諗：我可以點做呀？放佢出街？扲去"防止虐畜會"(愛協舊名)？佢死梗！同佢再搵新主人？即係將個問題交俾另一個人，"己所不欲，勿施於人"我唔會咁做！

當晚思前想後，點解德仔明知會俾人打都要搗亂？係咪佢要話俾我知佢好唔開心，好嬲，好想人留意佢？點解咁仇視人？係咪因為多次被遺棄，所以好憎恨人類？點解打到咁痛都可以唔叫？係咪要話俾我知，佢唔怕打，唔會屈服於強權，佢係比我強？既然上天安排左佢黎我屋企，我係咪要克服個問題呢？德仔既然要我知道佢唔開心，咁我係咪都可以俾佢知我都好唔開心呢？既然佢認為被遺棄，無人關心係咁可憐，咁係咪要佢知道要珍惜一下人地既關心呢？既然佢認為自己係強者，我打佢唔代表係強者，咁係咪有D方法可以唔打但佢又領悟到我係強者呢？

結果我諗到一個方法，但我唔知行唔行得通，但唔試過又點知！好！一於由聽日開始，即使唔可以令佢同我既關係改善，只要佢唔再咬我，唔會0係屋企隨地大小便，我就用依個方法養到佢老死為止！我有一個想法係：佢既然識得諗咁多野出黎激我，佢應該係好聰明，應該明白我既用意既！

行動閞始！我將會唔望佢，唔摸佢，唔叫佢，係完全當佢透明，好似屋企無狗咁，我每日只會放一兜清水，同定時放低狗糧，唔會理佢食唔食，朝早無麵包，晏晝無小食，唔會同佢挽，無任何眼神同身體接觸，我諗過如果德仔堅持同我對敵，到佢需要沖涼時我會板起塊面，保持無眼神接觸，做完沖涼既步驟之後，一下多餘既觸摸動作都唔會有，即係話我只提供一個有瓦遮頭，清潔既地方俾佢，但愛心，關懷，玩伴(人)，要求(小食，新玩具，落街)，發洩對象(我)欠奉。

我覺得德仔真係好聰明，只係一個上晝已經感覺到我孤立佢勒！但佢都唔示弱喎！開始孤立番我，當我出廳時，佢一係入梳化底，一係行去見我唔到既地方，佢無垂尾，垂頭之類，態度並唔係驚我架！係"不屑"同我一齊咁！我行東時佢就行去西，我暗地裡都好欣賞佢既"有性格"，對峙左幾日之後，我發覺德仔開始偷望我，有時仲係定眼望，我當然扮唔知啦！佢開始唔避開我，好明顯佢係態度軟化啦！但我要保持現時既態度，要堅持到佢有明顯表現出佢係知錯勒。

一日，當我0係房整理衣物時，突然見到德仔擔著個波坐0係房門口，當佢見到我望佢時，表現得好興奮，由於一開始我就唔俾佢入房，所以佢一直都無入房既習慣，佢0係房門口行黎行去擺晒尾，由佢返黎既第一日我都無見過佢擺尾，我真係好開心呀！佢同我擺尾啦，佢撩我同佢挽喎！佢終於明白自己係需要玩伴，同我對敵係無好處，無人同佢挽，無小食，無人關心，無人撫摸，我先係權力重心，我係強者，我可以支配佢既一切，佢願意接受我，願意俾時間大家相處，佢投降啦！我即時同佢挽波，仲挽得好開心，之後我又帶佢落街散步，0係公園挽賽跑，返屋企前仲買左雞胸肉俾佢做晚餐，又去寵物店買左支營養膏俾佢食添！經過我幾日既無困籠測試，我決定唔再需要用繩或籠去限制佢活動範圍，佢以後可以0係屋企自由活動啦，就算我出街佢都無搗亂LU。

我覺得德仔好聰明，決定教佢做一D簡單既動作，SIT, DOWN, COME,做左幾次佢已經學識，我見都難唔到佢，又諗D深既玩意，就係要佢擔麵包，係唔准食既，由廳擔去廚房，放入個狗兜度，要我話左"OK"先可以食，一開始時我扲塊麵包對著佢講："HOLD",佢當然唔明我講乜啦，即刻就食勒！我"NO"佢，張大佢個口，扲番塊麵包出黎，"再放佢面前同佢講"HOLD"，佢依次無食只係望著塊麵包，我將塊麵包塞入佢個口，佢以為可以食啦，我又立即"NO"佢，繼續講"HOLD"，重覆左好幾次，佢開始明白乜野係"HOLD"勒！我就"OK"由得佢食左塊麵包仲狂摸佢，讚佢GOOD BOY，第二日我又教佢擔著塊麵包行去廚房度放入狗兜，初時我要拉著佢個頸圈行既，之後佢明白左我要佢去廚房，我就"OK"俾佢食左塊麵包又狂讚佢GOOD BOY，第三日我教佢將口中既麵包放低，當佢行到埋個狗兜度我張開佢個口講"LEAVE"，重覆好幾次佢都已經明白晒！之後既日子我仲教左佢好多野，擔報紙，拖鞋，狗繩就更加難唔到佢勒！有次我去狗展，見到警犬表演，隻狼狗追著個賊咬，我突然間好想德仔學，於是買左D狗書睇，之後就叫大佬扮賊，用件舊牛仔褸纒著隻手去訓練德仔"ATTACK"，其實我無諗過會成功，因為我從來都無訓練過狗，而且"ATTACK" 都屬於高級課程，訓練左隻狗識左之後，如果隻狗控制得唔好又會有危險性，但我考慮過德仔只係一隻迷你品，傷害人既能力有限，而且我相信自己會好好看管好佢既，相反如果係一隻狼狗我就唔夠膽教佢"ATTACK"啦！因為我無把握可以控制到佢！德仔真係一隻極度聰明既狗，好快已經明白我要佢做乜，只要我叫"ATTACK"佢就會咬著大佬隻手唔放，大佬將佢揪起離地０係咁打轉佢仍然唔放口，直至我叫"LEAVE"。

德仔同我既感情越黎越好，我行去邊佢就行去邊，就連我去沖涼佢都要跟埋入去，我踏入浴缸佢就一定訓0係我對拖鞋上面，我坐0係梳化佢對前手會放0係我對腳背上面，我覺得佢好似要掂著我既野先有安全感咁，我每次行佢一定貼著我腳邊行，係好貼，我有時都驚踏到佢，但一次都無試過，而且仲一次都無"KICK"到我添！好犀利！

德仔好識享受，每朝佢會0係露台，睇街景，睇下小朋友踏單車，睇下樓下D狗打交，偶然又會睇到捉狗隊入村捉狗，佢同郵差係死對頭，原因係個郵差用橡根射過佢，所以一見個郵差出現就會由露台既右邊追到左邊狂沸，之後就食早飯，跟著搵我同佢挽一陣，到下晝佢會擔自己用黎沖涼既毛巾舖0係露台度，F型咁訓0係上面合埋對眼晒太陽，晒大約十幾分鐘就入屋抖下，隔一陣又出過去晒，真係好識嘆！我都無教過佢擔自己浴巾去晒太陽，佢居然會自己做仲舖得一D都唔媽乎，無一舊舊，無摺起，係好平好平咁，日子有功佢既毛色變得”立立令”好似打左一層蠟咁，好靚，我每日都欣賞著佢聰明既舉動，每次見到我都會有回心微笑！到大約五點，佢又知道時間到既，好似識睇鐘咁！會擔條狗繩黎我面前等去街。德仔夏天好鍾意沖涼，一同佢講：沖涼啦！佢就好高興，我扲佢條浴巾時，佢會同我鬥搶，之後跳入我地既矮浴缸等沖涼。

一次，經過寵物店，見到一隻迷你品，係女仔，個多月大，個頭有奶癬，突然想起德仔大個仔啦！不如同佢搵個老婆仔啦！反正我好想德仔既優點可以延續下一代，經過不斷既觀察，隻狗女既奶癬有明顯好轉，於是我買左隻狗女番屋企，改左個名叫花花，德仔聞下佢之後無乜太大反應，直覺覺得佢無敵意，無妒忌，但當我轉身之後就發覺佢蝦花花勒！佢好黑心呀！行後幾步之後就沖過去跳過花花，但對後腳過唔晒既，係利用對後腳勾跌佢，佢既一勾花花就好似滾地葫蘆咁！德仔經常用依個方法偷偷去蝦花花，但隨著花花既長大，依個情況有大大改善，我經常見到德仔跟著花花行出行入，有時又LAM佢面同佢清潔，過左大約個幾月花花起水啦！哦！原來花花大個女啦，德仔鍾意佢呀！呵呵呵.........不過我並無打算花花第一次起水就俾佢配種，因為我從書度知道第一次起水隻狗係未夠成熟，對狗本身同狗BB都無好處，但我又唔想困著任何一隻0係籠度，我相信只要看著佢地唔俾佢地接近就乜事都無啦！所以我要好似看牛咁看著佢地，為左方便我看管，我輪流將其中一隻縛0係露台，一隻就要佢留0係廳，我發現德仔開始唔食飯，仲經常偷偷接近花花，但都被我阻止，花花起水到第十九，由於德仔唔食飯，佢明顯廋左好多，係瘦到皮包骨，當日我看牛都看到口乾啦，就入廚房飲水，突然聽到D怪聲，`哎呀！攪出"狗命"啦！衝到出露台已經太遲啦！當我翻查狗書同問寵物店之後，知道花花無懷孕機會我先安心D！

0係花花四個幾月大既時候，我發現德仔每次大便時第一條屎係好正常，但到第二條時就好軟仲有少少黏液，情況連續個多禮拜左右，黏液明顯多左，胃口亦差左，諗著帶佢去睇獸醫，但十幾年前香港無乜獸醫既，醫術亦都好差，我終於問到人話旺角有個獸醫幾好，就帶左德仔去睇，獸醫話佢只係普通既腸胃炎，俾左D腸胃葯德仔，但食葯後好似無乜改善，有一日朝早，我聽到一陣沙啞既狗沸聲，原來係德仔沸緊個郵差，但點解佢會聲沙既，食錯野？無丫！過左兩日佢把聲越黎越沙，胃口越黎越差，大便開始有血，我開始好擔心，帶佢返獸醫度睇多次啦，又話只係喉嚨發炎加腸胃炎喎！又過左兩日病情加重左於是去防止虐畜會(現時既愛協)睇，點知個女獸醫態度好差咁同我講：佢已經好嚴重架啦！無得醫架啦！無任何葯俾我就叫我走，我當時真係好嬲，點會咁嚴重呀，點會無得醫呀！跟著就好驚，係驚到喊！其他狗主見到就叫我去旺角另一個獸醫度睇，但我突然諗起德仔既"暫養主人"，我好想問下佢德仔以前睇過邊個獸醫，於是忽忽搭車返屋企無同德仔去旺角，返到屋企第一時間打電話俾德仔"暫養主人"，但工人話佢去左旅行唔知幾時返！我登時方寸大亂，唯有聽日再同德仔出過旺角睇獸醫，但因為佢無胃口唔食野，我去買左D佢好鍾意食既雞肉撈飯，但佢都只係食左一半就唔食啦！我見佢個身微微咁震就用張被冚著佢個身，突然諗起本狗書有教測體溫，於是用探熱針同佢探熱，嘩！103度呀！佢發燒呀！咁發燒咪唔可以冚被！我又扲走佢張被，但見佢震我下意識又覺得佢係凍，結果當晚又冚又扲走張被幾十次，因為實在心亂如麻！唔知點算！我又不停用針筒唧葡萄糖水佢飲，但佢飲左好多水都無去過小便，我同佢講：德仔，起身去痾尿啦！佢好懂性，起身出露台痾尿，我見佢真係要好用力先起到身，好緩慢咁行出露台度！我既眼淚不自控咁流左出黎。

一早我同德仔去獸醫度，個獸醫好輕描淡寫咁話佢只係腸炎，又話唔算嚴重，同德仔打左支針扲左葯返屋企，跟著果兩日德仔都無好轉，個身仲越黎越震，完全無胃口，一D野都唔食，燒又無退，我覺得唔對路，再打電話俾德仔"暫養主人"但仍然未返，點算好呢？我見到佢不斷震，痾血，發燒已經到１０４度，唔食野，對眼仲有好多黃黃綠綠既眼膠黐著張唔開，我心好痛，每日我買不同既野引佢食飯有魚肉有雞，佢最多食幾啖就唔食，我忍唔著開始喊！因為佢再唔食野就無能力去同病魔戰鬥，我唔可以帶佢再睇番果個獸醫架啦！佢地都唔識醫佢，點解會無個醫生識醫佢架？真係好心煩！我又四出問人邊度有好獸醫，又有人同我講旺角有另一個獸醫，於是我又帶德仔去，今次個獸醫好離譜，佢居然話德仔只係眼發炎，仲話佢眼睫毛逆生要做手術，叫我同佢約個期做手術！佢黐線架！眼發炎會發高燒既咩？眼睫毛會突然間倒生既咩？我除左嬲之外仲好驚好驚，係咪意味著德仔個病好重？重到無得醫？咁係咪個無良獸醫見德仔臨死都做多單生意呢？我覺得好無助只係識得對著德仔喊！

我每日都打電話俾德仔”暫養主人”，但每次都得到個我唔願聽既答案"未返，唔知幾時返”，我仲可以為德仔做到D乜野呢？佢既身體已經不自控咁由朝震到晚，對眼既膠抹完又有抹完又有，根本連張開少少都唔可以，仍然係痾血，而燒就不斷咁升，已經接近１０５度，但我一D辦法都無！周圍打聽邊度仲有獸醫，結果知道尖沙咀有個獸醫，啊！即係我以前細路仔時，屋企隻銀狐狗睇過既獸醫！記憶中個獸醫都唔差，於是第一時間帶德仔去睇，去到見到獸醫原來已經唔係以前果個，而係一個好年青既女獸醫，好濃厚既英國農場”LOOK"既女子，我個心已經冷左一截，再睇到佢診症既手法，真係失望到極點，完全唔敢掂德仔，好似一個好驚狗既人咁，只用聽筒聽德仔既身體，無檢查眼，耳，口，鼻，我同佢講德仔發燒，佢先同德仔探熱，開左D所謂退燒同腸胃葯，就乜都無勒！我當時真係好忟憎，好無助，好嬲，好驚，好無奈，我真係連鬧佢既精神同氣力都無，我已經好多日無訓覺，無食野，我知即使我鬧佢都無用，因為佢根本唔識醫，係無一個獸醫識醫，果刻係我一生人第一次領會到”絕望”既知味！我抱著德仔搭車返屋企既途中，眼淚不斷湧出，因為我知道再搵唔到一個識醫佢既獸醫佢唔拖得好耐，佢已經瘦到唔以一隻狗，再遲D就算有好既獸醫都無用！我經常用一D生活鎖碎事同自己做個賭博，祈望從中得到希望同安慰，最深刻一次係我發覺自己心愛既一條牛仔褲拉鍊壞左，我同自己講：只要拉鍊無事就代表德仔無事，佢會醫得番好既！跟著我博命咁拉條拉練，希望可以拉到正常，無卡著係中間，我拉左好耐都唔成功，我好忟憎，好唔開心，我喊！將條褲掉埋牆角，因為我好失望，但過左一陣，我好唔憤氣又執番條褲跟著再繼續拉條拉鍊，拉左好耐，突然"咔"一聲，拉鍊拉到啦！無事啦！果一下個心有番少少希望，由谷底爬番上幾步，雖然可能係自欺，但果刻我真係好需要一DD既希望去支持自己！之後我唔敢再拉果條褲既拉鍊勒！

我每日仍然繼續打電話俾德仔"暫養主人"，德仔已經燒到106度，我叫佢起身去小便，佢仍然好懂事，好努力咁爬起身，但今次佢唔係去露台，而係入左我個房度小便，我知道佢已經神智不清啦！我既絕望令我明知係”白費心機，浪費金錢”既行為都做，我打電話俾一個經常0係報紙賣廣告既無牌獸醫，叫佢上黎同德仔睇，我係明知佢無牌，明知係一場賭博，但唔賭就一定係輸，可能我覺得咁做都叫"盡左最後努力"啦！當然結果係無補於事！德仔仍然陷入神智不清狀態，由朝訓到晚，仍然不停全身震，而我只係識得望著佢不停喊，試問病足成個幾月，又不自制咁震左差不多成個月點會唔辛苦呢！原來當狗病得太重太耐時會發出一種難聞既氣味，令整間屋充斥著死亡警號，我感覺到好似德仔既死亡已經好接近咁！

我終於搵到個"暫養主人"啦！我以第一時間飛的士去獸醫度，入到診症室，放德仔上枱，個獸醫企0係另一張枱前，望到德仔就問我：點解咁遲先帶佢黎睇呀？我個心冷左一大截，我詳細交代德仔既病情，跟著問佢：有幾大機會可以醫得番？佢答我：只有五成把握！我聽到佢句說話，個心突然變得好平靜，雖然只得五成機會，但對我黎講已經係一個好消息，獸醫講得俾我知有幾多成把握咁即係話佢知德仔乜野病，發"狗瘟"原來係咁可怕既！即使打左預防針都只可以有七至八成預防能力，獸醫同德仔打左兩支針，吊左一大包相信係鹽水既液體，液體注入皮下漲左好大個水囊，獸醫話液體會慢慢俾德仔吸收，之後又即時餵佢食左一粒葯同搽眼葯膏，吩咐我如果聽日無好轉就要再覆診。

當晚我真係好緊張，成晚觀察著德仔，因為依個係佢關鍵時刻，我相信依個可能係佢最後機會，佢既體力已經唔可以再捱落去！係瘦到慘不忍睹！接近天光時間，我留意到德仔既震有明顯減少，我行埋去摸下佢個頭同身，已經無之前咁熱，再望下佢對眼，明顯少左眼膠，於是我去烚雞肉嘗試俾佢食，好彩德仔都有反應，佢肯食野啦！雖然只係幾啖，總好過無食丫，佢已經差不多五日一D野都無食過！由於太疲累我終於訓著左，突然被一D水聲嘈醒左，一望！呀！係德仔自己飲水呀！佢好耐無自己飲水啦！佢好番好多啦！可以自己起到身，仲識得去露台小便呀！不過就行得好吃力同好慢！我摟著佢係咁鍚佢讚佢係叻仔，見佢條尾好緩慢咁擺動，我知佢係明白我因為佢既"好轉"而開心既！往後既幾日德仔都有明顯改善，再無痾血，無發燒，對眼睛無膠狀物，只係胃口唔太好，無乜氣力，大便仍然有黏液，由於佢無"沸"過，所以唔知喉嚨有無好轉！

葯己經食完，再帶德仔去獸醫度覆診，獸醫話佢進展非常好，生命力好強，只要再食多幾日葯就無問題勒！今次佢只係俾左一種葯德仔，每日每次只食一粒就足夠，但獸醫話德仔太瘦勒！叫我用"雞精"開水俾佢飲！吓？？？雞精？？？鹹架喎？？獸醫話雞精可以快速補充體力，因為鹹所以要開水飲，而且只係飲一個星期左右，對狗黎講係無影響，於是我買左半打雞精返屋企，每日除左餵一粒葯之外，仲開一樽雞精溝一樽清水分多次俾佢飲，效果又幾好喎！德仔龍精虎猛咁，已經完全好番咁，但為安全計我都同佢睇多次獸醫！經獸醫一再檢驗德仔已完全康復，跟著再補打一支狗瘟加強劑，我仲問獸醫德仔可唔可以配種，獸醫笑笑口話：當然可以啦，佢有女朋友未呀？我打算番屋企買張道謝卡寄俾獸醫，多謝佢救番德仔，但結果都忘記左無寄去！

自從德仔大病完之後，我覺得佢好親我，俾以前仲要親，眼神經常留意著我既舉動，又好保護我，有時我同大佬挽下，推撞一下，佢都會好緊張咁擺出一幅隨時攻擊既動作，我覺得佢好似好明白我同佢曾經共同渡過艱辛既日子咁！

幾個月既快樂日子好快過左，有一日我約左朋友中午飲茶，咁岩包租婆話要入我屋企油露台欄杆，話好快攪掂唔會阻我飲茶，我咪俾佢入黎油0羅！佢油完之後我約人既時間都到勒！但如果我就咁出門口，德仔同花花一定會櫸爬，咁咪整花晒0羅！腦海一迅即逝諗左一句："不如困佢地入廁所啦！"唔好！佢地咪睇唔到景物0羅！都係縛著佢地係露台近樓梯既窗咪得0羅！反正個零鐘就番黎啦！

當日唔知做乜，一路飲荼一路掛著德仔，飲完茶大佬話要去睇下電器，但我都話唔好啦！我掛著德仔呀！仲話搭的士番屋企添！其實由酒樓返屋企行路只需十五分鐘，我地平時都係行路去行路返既！的士去到屋企隨近，我見到露台被太陽晒著就同大佬講：哎呀！唔知會唔會晒親佢地兩隻野呢？終於到樓下勒，平時德仔0係露台見到我地會沸，但果日佢無既？一路上樓一路同大佬講點解德仔會唔沸既？由於村屋既樓梯好窄，寬度只可以容納一個人行，所以我行0係大佬後面，上到三樓轉彎時大佬突然停低話：點解會咁架？跟著無再郁過身體，咁我就用手推開佢問：乜事呀？睇下！但大佬用個背脊阻擋我，跟著開門叫我入屋，佢既舉動令我更加想知發生乜事，於是我好大力咁推開佢，但我依一眼既影像將永遠留0係我腦海中，一生難忘，我見到德仔吊著係牆邊，雙眼張開，牆上有爪過既痕跡，地下有稀爛既大便，我不禁痛哭失聲，真係點解會咁架？只係離開個幾鐘就無左一隻我用盡心思，方法，去同佢溝通既狗，心力交瘁咁同佢渡過徘徊0係死神身邊既日子，一下子失去佢我真在接受唔到！佢既死絕對係我既錯！！！我太大意！無諗過佢好耐無俾我用繩縛過，唔知繩係有一定限制活動空間，我點解唔困佢入廁所呢！雖然無景物睇但起碼佢唔會死！點解唔考慮周詳先決定呢！約左人都可以遲少少0者！唔會死人0者！點解無諗到佢既安全問題呢！就係因為自己既大意令我失去心愛既狗，當日既努力嘗試，付出既心血又有乜用！大意換黎一個無法補救既"後悔"，"後悔"係於事無補，"後悔"係唔可以令事件重新開始俾我從新安排一次！"後悔"係一個深刻既烙印！永遠永遠印0係我腦海入面！