waiwai

威威係我從朋友度收養番黎既，當時係有幾隻仔同幾隻女，我無去朋友度揀狗，我係諗著隨緣，威威當時三個月大，第一眼既感覺係唔八卦，好靜，溫馴。

但原來威威一D都唔怕事，仲好識扮野添，第一晚黎到已經俾"下馬威"俾德仔睇，當我唔在意時趕德仔出露台，之後又扮可憐走到我腳下，如是者當晚都做左好多次！

由於威威初黎步到，唔知邊度係廁所，所以就0係地下瀨左尿，咁我教佢去廁所度痾，我無祈望佢一教就曉，當然佢亦唔係一講就明啦！經過幾日既教導佢都識去廁所，有一次佢0係廳既地下瀨尿，我就薄責佢幾句，之後就好耐都唔見佢0係我面前出現過！我覺得好出奇，突然諗起：死勒！係咪跌露台跌左落街呢？即刻走出露台睇下！好彩無0者！咁威威去左邊呢？我周屋搵都唔見佢，真係搵左好多次都無喎！真係無理由既！人有三急入去廁所先，俾我發現兩個圓形水桶中間既罅隙有D白色野，原來係威威"lee"埋0係度！唉......又會咁小氣既！話佢兩句之麻都無打佢！好啦！既然佢咁小氣咁我唔會縱容佢既，我扮睇佢唔到0羅！佢鍾意嬲幾耐就幾耐啦！只要我知道佢安全就得勒！幾個鐘之後威威見無人理佢就用好慢既動作由廁所行番出黎，仲用眼尾"目及"下我，我當然扮到視若無睹啦！

同威威去獸醫度做身體檢查，獸醫話烕威係單睪丸既！咁即係話佢另一粒睪丸隱藏0係腹腔內，如果一直都唔跌落黎將來就會有機會變成癌症，而且單睪丸既狗係唔適合繁殖下一代，因為依個情況係會遺傳既！我無諗過俾威威配種，但絕育手術都係等佢大少少先做會好D！

有次我經過廁所，見到威威札定個馬準備痾屎，但佢一發現我0係門口就即刻走番出黎，唔痾喎！算啦！咁私隱既野佢唔想俾人睇我咪唔睇0羅！我真係發覺佢好怕人地見到佢痾屎既！因為果次之後試過好多次我唔覺意經過廁所，見到佢個pat pat明明有屎痾緊出黎佢一見到有人就縮番入去，跟著走出廁所！真係怕鬼左佢呀！急咪痾0羅！忍乜鬼0者！

威威對人好友善既，係人都岩，係人都嗲得一餐，我無教過佢"請請"，佢自己會對著人係咁做"請請"既動作，所以好多人都鍾意佢，d街坊見到佢一定同佢挽一輪先俾佢走既。由於佢外貌討好，又識嗲人，0係街度好多陌生人撩佢挽，佢又好容易跟人行，所以我要訓練佢知道出街要跟著主人，唔好跟陌生人行，要佢識得"驚"。每次同佢出街時發現佢唔留心我既存在時，我會立即"lee"埋一個可以望到佢既地方，當威威發覺唔見左我時候，佢會周圍搵我，佢會越搵越心慌，依個時候我會有意無意之間俾佢見到我既存在，我唔會主動叫佢，如果我主動叫佢會俾左個錯誤訊息佢，佢會以為當主人唔見左時唔駛驚，主人會自動搵番佢，咁佢就會越黎越大膽，掛著同陌生人挽，越行越遠，唔會時不時回頭望主人！威威都好醒，好快就意會到我既意思，之後出街都唔敢離開我太遠！

由於貴婦狗既毛要經常修剪，咁我又唔識唯有同佢去寵物店美容啦，頭幾次都無乜唔妥，點知試過兩次0係寵物店惹左腸炎，而第二次比第一次嚴重，我記得佢去完剪毛第二日就開始有D唔妥，成日定格咁企0係度唔郁，D大便雖然係條狀但有少少黑色，當我抱起佢時佢就會慘叫一聲，我越諗越谷氣，俾錢出去美容仲要惹埋病番黎跟手尾！！！咁岩俾我見到一本雜誌開辦一個狗既講座，內容包括有獸醫講解狗隻結構，疾病，絕育等等，有狗隻美容師講解基本狗隻護理及一般剪毛技巧，仲有狗隻訓練師教授基本訓練，我上完個講座，加上朋友又上過狗隻美容課程，經過一段時間實習，都算剪得威威唔失禮人啦！我又發覺威威都好貪靚兼且好有耐性，同佢剪一個靚靚裝真係要四五粒鐘架！佢唔會周身郁既，好定咁任我舞，剪完毛會好開心咁周屋跳，所以同佢剪毛我好開心之餘又有滿足感架！

有一日我發現威威擒花花，雖然花花未起水，但佢已經攪到好投入，我都係時候同威威安排絕育勒！結果威威去左愛協做手術，手術後當晚佢無胃口食野，無大小便，麻醉葯過後佢開始後腳震，兩眼緊閉，應該係葯力過後開始痛，到差唔多天光明顯見佢好轉，仲去廁所小便，過左兩日威威嘔，又無端端好似隻蝦咁彈彈下，我睇下佢個傷口啦，又無乜特別咁喎！無腫，無紅，無流膿，只係傷口附近肚部比平時紅少少，佢又開始唔食飯，都係唔對路勒！同佢睇獸醫先！哦~~~~~原來唔係出面傷口發炎，係入面個傷口敏感呀！

自從花花由朋友屋企接番黎之後，威威間不中都會打花花，試過有兩次仲打到花花耳仔流血，當時都唔係好明白點解威威會打花花，因為以前佢兩隻係有挽既！而花花自己都好自我封閉，由朝到晚都"lee"0係廁所，表現得好唔開心，經同朋友商量決定將花花由佢照顧，因為大家都覺得花花既然留低係唔開心既，不如就依從花花既決定，因為花花0係朋友屋企係開心D。之後我諗番威威打花花既事件，相信係花花先過威威黎我地屋企既，狗既世界係最遲入屋既排位最低，自然係排花花之後啦，但因為花花離開一段時間，當佢再番黎時，威威就自己重新排位，將自己排第一位，打花花係想俾個下馬威佢睇，再加上花花無心戀戰，威威就更加囂張！

我成日去書店睇狗書，買埋好多0係屋企，有日，我地想買一隻短毛狗，於是剿番d狗書出黎，睇下邊種狗岩自己既要求，我地想要一隻好少沸，短毛，個性活潑，身體強壯望落去"實突突"既細種狗，終於俾我地揀到啦！係Beagle (比高)，我地原本係諗著買隻仔既，但去到賣家屋企發覺有隻女都好靚好得意，大佬話不如要埋佢啦，咁我地就抱左佢地番屋企勒！隻仔叫大舊，隻女叫豬女。

帶左大舊同豬女番屋企，威威即刻去聞佢地，大家都無乜異樣，時間耐左我留意到威威既行為有D問題！兩隻Beagle一齊長大，年紀相若當然係經常挽埋一堆啦！威威好似好想同佢地一齊挽咁，走埋佢地度，但係兩隻Beagle無理佢喎！繼續兩隻挽，威威就發惡打大舊，但大舊好似唔係好知威威發惡咁，用個咀格左威威幾下跟著繼續同豬女挽，而威威會豎起條尾係咁望著佢地挽，表現得好唔高興，其實威威係好想同豬女挽，而豬女就鍾意同大舊挽多D，試過幾次威威同豬女挽，大舊見有得挽又走埋去諗著一齊挽，點知威威發惡打大舊，果幾次大舊都發惡啦！打番威威轉頭，威威當時大約一歲，七八磅左右，大舊三個月都有十磅重，每次大舊都可以好輕易咁打到威威四腳朝天，而威威即使係俾打低仍然身體僵硬，係咁"夏~~~夏~~~"聲，好惡，好唔服氣，大舊通常都係點到即止既，我覺得佢地既打交唔係一般既爭女，而係爭"玩伴"！經常係咁爭結果有一次大舊咬親威威，仲流血添！不過依個情況0係大舊大約四個月大既時候就無再發生勒！因為大舊腸炎死左！！！

威威唔似豬女，豬女好鍾意咬野，但威威唔鍾意既，俾骨佢都唔咬既！加上我唔係日日同佢地刷牙，所以好快威威個口就有陣難聞既氣味，帶佢去愛協睇獸醫，獸醫話佢有隻蛀牙，要剝牙啦！由於要麻醉，所以早一晚無飯食，朝早帶佢去，下晝四點去接佢時我帶定D已經浸透既狗糧，威威一定好肚餓，因為佢唔係有病唔會無胃口食野既！一定好想食野只係個傷口會痛！個助手抱威威出黎，跟住俾一包野我，睇真D係牙黎既！咦~~~~~？點解有四隻咁多既？跟著個助手同我講：係呀！獸醫話見到佢果幾隻牙都鬆晒就同佢剝埋啦！嘩！唔係麻，事前都無同我講會剝咁多隻呀！一D心理準備都無！有無攪錯呀！咪鬧左佢地一輪先走0羅！個心都"鄧"威威痛呀！跟著我俾浸好既狗糧佢食，佢食得好快，可想而知佢幾肚餓呢！

每隻狗我都會教佢地做基本動作，主要原因係可以控制得隻狗好D，同埋人狗之間多一D溝通，感情都會好好多，麻煩都會少D，野都做少D啦！有朋友唔明白點解要狗做動作，佢話又唔係要佢去表演，學黎做乜！所以佢隻狗唔係好聽話，唔合作既，隻狗鍾意點就點架勒！亦都有人連訓練狗既大小便都攪唔掂！我就真係接受唔到隻狗0係屋企四維痾屎尿，其實訓練一隻狗去服從主人係有好多好處，因為狗既世界係權力至上既，無權無勢地位就低微，同樣自己叫唔聽隻狗，即係主人head唔住隻狗啦！

威威既自專都相當強，就好似兩隻Beagle挽無佢份，佢都可以走埋去打人地既！做動作都係呀，做基本既 sit, down, come, stay,都無問題既，但一學到salute佢就好抗拒勒！佢覺得我耍佢架！死都唔肯做，我教狗做動作從來唔會打既，只會"乙水"同利誘，但威威兩樣都唔受喎！我用佢最鍾意食既瘦肉引佢，佢都唔受"乙水"呀！仲走開添！不過佢對著我依個家姐就真係慘0羅！我最鍾意同狗挽野架啦！我心諗：德仔我都攪得佢掂啦！我唔信攪你唔掂！呵呵呵...........終於俾我諗到佢既弱點勒！就係---小器+妒忌，佢一見到我抱著另一隻時，一定第一時間沖埋黎爭位，又會"翁"起個鼻同咀，露晒D牙好惡咁兇其他狗，於是當佢唔肯做salute動作時，我就抱起其他狗係咁呵，係咁鍚，激到佢札札跳，跟著再"乙水"佢做動作，哈哈哈~~~~~~佢唔係好襟激架咋！好快就屈服啦！仲要次次叫都做添呀！

其實買Beagle之前，我0係書度已經發現有種狗係我好鍾意，不過香港一直都無得賣，係史納莎，要買就要經petshop從外國買入因為自己唔識攪，價錢非常昂貴，我又怕隔山買牛，而且petshop俾我個印象唔係咁好。到後來個地鐵廣告一出，全香港既petshop無一缺貨，但價錢都唔平呀！由七千幾至萬幾蚊都有，由於係心頭好，仲恨左好耐，結果都決定買隻史納莎，當日行左成個下晝都揀唔岩，到夜晚成九點幾終於買左錢錢。

由於錢錢係我夢寐以求既狗種，加上佢性格好好，我好想養多一隻史納莎，於是同錢錢配種，留低一隻女叫Boogie，之後諗著遲D同錢錢絕育，但有朋友得知我有史納莎BB就叫我讓，但BB已經全部出讓晒啦！佢央求左我好多耐，好多次，咁好啦！最後一次，我驚錢錢生得太多隻，於是配種既時間推遲兩日，又只係配一次，希望隻數唔會咁多啦！好好彩喎！真係得一隻呀！係小新一隻咋！原本係諗著讓俾朋友既，但大佬一直都叫我留低小新，再加上"湯丸"事件(會有另一個篇幅去講錢氏家族既事件)既發生，令我好...好...好...唔開心，好後悔出讓左既狗BB得唔到一個好主人既照顧！！！所以我最後好衰咁決定反口啦！唔讓啦！

威威好怪，D狗BB都唔係佢既，佢成日都趴0係竇狗側邊，但係如果D狗BB想聞下佢，又或者想爬上佢個身上面，佢首先會"翁"起個鼻同咀，露出D牙，如果咁樣D狗BB都唔知驚，佢就會"胡胡"聲，我驚佢會咬D狗BB，所以我唔俾佢再行埋竇狗度啦，用個欄杆隔開佢地，佢見我一行埋竇狗度就會"un un"聲叫！

小新細細隻已經好惡死既，得手掌咁大0者！我朋友抱起佢諗著用塊面去呵下佢，佢"胡胡"聲架！所以佢由細到大我都兇著佢，成日反佢個肚向天，唔俾佢"胡"我！如果唔係大左仲得了既！

威威同豬女，錢錢，Boogie相處係無問題出現，唯獨同小新相處就好有問題勒！我發覺小新學去廁所痾尿學極都唔識，都成三個月啦！真係無乜理由會蠢成咁既，錢錢番黎一兩個禮拜就識，Boogie三個月都識啦！小新次次都係痾廁所門口，第二度無個喎！結果我知道點解勒！原來衰仔威唔俾小新入廁所痾尿，每次威威去完廁所，小新又想去時，佢就會唔出廁所，企0係入面唔俾小新入，小新唯有0係廁所門口痾啦！我見到咁就趕威威出廁所，但衰仔威就算出左黎佢都係要企0係廁所門口，仲要豎起條尾咁望著小新，小新有時都唔敢痾架！小新有時為左想以最快既速度去完廁所，就會只係前手踏入廁所就咁痾，結果D尿咪又0係地下度0羅！到小新七個月大佢先敢"諗都唔駛諗"咁行入廁所痾尿，但與此同時又有另一個問題發生！

唔知為乜，有時小新同威威會無緣無故咁嗌交既！有時只係互相望望下，咁威威就會發惡架啦！威威一惡小新就不甘示弱鬧反轉頭，其實我係明白狗既世界係會爭排位既，小新既成長，令到威威覺得受威脅，所以先發制人，但小新既性格都唔弱，我從好多狗書既知識得知要避免兩狗互鬥一係就主人同佢地重新排位，一係就由狗自己去打生打死去爭做大哥，但依個方法會好危險，萬一兩隻狗都係好強悍既性格，即使佢唔夠打都要一直打落去，係要打到死為止！我原本係主張狗既世界係應該由狗去處理番既，但由於威威係好要面，自專心好強，唔衰得！而小新又係惡既性格，如果由佢地自己去解決，個後果將會好似後者咁"打生打死"！我當然選擇由我同佢地排位啦！話晒威威係先過小新黎我屋企，而且當初我無諗著會留低小新，所以威威做大哥係理所當然既，咁我既做法係凡事以威威行先，食飯威威食先，抱都係抱威威先，總之乜都係威威先！

有時真係唔知係威威太過主導性，定係乜野！我真係唔識講！好多時見到威威會截著小新既去路，唔俾佢行既，對峙一陣，大家既表現開始惡，威威會豎尾，而條尾係微震，又"胡胡"聲，小新就避免同威威眼神接觸，但四隻腳企得好硬淨，通常我見到咁樣都會分隻開兩隻狗一陣，避免佢地打交。時間耐左，威威仍然係咁霸氣，而小新開始有D抗拒，開始同威威有眼神接觸，更麻煩既係錢錢同Boogie都開始沸威威，唉~~~~~~依個開始就係一個無法收拾既局面！有一次威威又係咁截著小新去路，仲"胡胡"聲，錢錢同Boogie就沸威威，小新今次"胡"番威威啦！威威以好快既速度打小新，小新當然反抗啦！打番佢！係快到我叫都叫唔著！以威威當時絕育後增加左體重都係得十磅，而小新就有成十六七磅，當然好快就打到威威反轉啦！我即分開兩隻狗！好在無任何損傷！

不過自從果次之後，小新似乎覺得自己有條件同威威爭一日長短，打交既場面時不時出現，而且越黎越激烈，我覺得錢錢同Boogie既影響係主要既催化劑，佢地一沸威威，小新就越投入打交，係越打越狠，我試過幾次伸手想分開佢地，都俾佢地其中一隻咬到，由於混亂根本就唔知係邊隻咬到我！可想而知佢地當時係打到幾咁火紅火綠，威威都俾小新咬到耳仔流血啦！威威雖然俾小新打到反轉仍然係好惡咁咬，咬，咬，其實0係咁既情況下只要威威肯認輸，咁以後就乜事都無勒！問題係佢一路都唔肯認輪，事後仲要挑戰小新，而我又真係唔知當初幫威威上位係咪錯既？？？亦都估唔到家族既影響力咁大！！！`佢地已經去到水火不融既地步！我知道再演變落去將會係一個有傷亡既結局！！！

到咁既地步我真係要將佢地分開啦！我真係好，好，好唔開心，好難過！！當初唔俾錢錢生小新就無咁既事發生啦！結果而家要攪成咁！！既然要分開，要送俾人當然係小新啦，因為當初都係無諗過佢會留低架麻！而且佢都唔係好大得一歲。唉~~~~~~~~不過大佬反對呀！當日係大佬話要留低小新既，而家要送走佢，大佬當然唔高興啦！經過一番爭辯，我地有個協議，就係首先送威威俾人，但如果威威係好唔開心既話，我會接番佢番黎，將小新送出去，因為我覺得一歲既狗係會較容易接受新環境同新主人既！只係大佬唔願意送小新出去先！

結果我搵到個住我附近既朋友，佢願意收留威威，我同佢講得好清楚，如果威威唔開心我係會帶番佢走既！當日我同威威沖涼剪毛，真係百般滋味在心頭，覺得好對佢唔著！我帶威威落樓下，朋友一見到佢好鍾意，由於威威一見人都會做"請請"動作，所以"乙水"得人好開心，朋友越係讚威威我個心就越唔舒服，越覺得對佢唔著！越唔捨得佢！於是我同朋友講：你走啦！你帶佢番去啦！遲D我搵你！跟著我轉頭就走，我朋友係咁同我講：拜拜，拜拜！我都唔敢擰轉頭回應！眼淚真湧出黎！

當晚真係訓唔著！第二朝一早打電話俾朋友，問下威威既情況，佢話威威好靜好嗲，不過由於係陌生環境，唔知邊度係可以痾尿既地方，終於忍到天光時0係廳度瀨左勒！我教朋友用報紙索番少少尿放去威威既新廁所度，等佢知道去邊度痾尿！過左一個禮拜左右，再同朋友通電話，問下威威究竟有無唔開心？朋友話佢有同佢兩個仔挽，又有食飯，唔覺得佢唔開心咁！但我都係唔放心，因為佢可能唔係咁識分究竟佢開唔開心，於是我約佢去公園度，睇下究竟威威係咪真係同小朋友挽，係咪真係無唔開心，我同佢講我唔會0係佢地同威威面前出現，因為我唔想佢記得我，我只係想知道佢究竟係咪可以開心咁生活！我0係天橋上面遠遠望落去，見到威威同兩個小朋友追逐，威威有主動去拾波俾小朋友，又有走去八掛下其他野同途人，咁我相信朋友既說話---佢係開心既！

原本我間中都有同朋友通電話問下威威既情況，不過大佬就話知道佢開心就唔好再繼續打聽啦！佢引用左一句古老人既說話：賣仔莫摸頭！意思即係話你越摸會越唔捨得，越傷心，越掛著佢！咁佢都講得有佢道理既！只不過我係覺得威威同花花既情況唔同！花花0係"無選擇之下，有同自己選擇過"，而威威係無得選擇咁俾我地送走左！好彩既係果一刻我知道佢仍然開心咁生活，我個心叫做好過少少，但將來係點呢？我結果都係選擇左逃避！唔再去問啦！