愛情星座

日本興完動物星座，家電星座，又會興 D 乜野新奇占卜法呢？好有可能會興呢個 Kitora 愛情星座。簡單黎講， Kitora 愛情星座就係將 12 星座按出生日期再細分，並以日本上空最明亮既 28 顆星宿命名，反映各人既戀愛傾向。由於呢個占卜法 2000 年先係日本奈良縣明日香村既「 Kitora 古墳」被發現，因此又稱為日本新世紀占卜法。

22/12-5/1 牛宿 -- 愛得認真
你對每段戀情都投入認真，絕唔會玩玩下拍散拖或者一腳踏兩船。暗戀既滋味雖然使你患得患失，但你另一方面卻非常享受。一旦得到暗戀對象既認同，受到愛情滋潤既你會心花怒放，有時仲可能唔小心講錯野，而得罪情人。不過基本上你對情人十分尊重，係一個包容既人。
真愛方位：西北
吉祥物：公牛

6/1-19/1 女宿 -- 冰封的心
你成日以為戀愛對自己可有可無，覺得朋友，家人，甚至事業都比戀愛重要。所以就算偶有追求者，都會拒人於千里。其實你並唔係咁冰冷，只係你未遇到你既真命天子。只要有一個強而有力，令你覺得佢好有 power 既人向你展開熱烈追求，你呢座冰山就會融化，乖乖地咁跟隨佢。
真愛方位：東
吉祥物：少女

20/1-29/1 虛宿 -- 野性難馴
同你一齊你既情人會好冇安全感，因為你太討厭約束，成日濫用自由，覺得自己係一隻冇腳既雀仔，於是就好安心咁去做出種種不負責任既事情。你最討厭自私、無理取鬧既對象，但對於飛來既豔福，你會毫無招架，唔識得拒絕，搞出好多糾纏不清既霧水情緣。
真愛方位：西
吉祥物：野馬

30/1-8/2 危宿 -- 前衛戀人
你既戀愛態度別人好難理解，忘年戀、多角戀、師生戀、婚外情等，你全部可以接受到，而且仲好有機會發生係你身上。能夠理解到你既自然做到你好朋友，順理成章好易發展成情侶添。不過其實你都幾多呢類好朋友，所以桃花運指數都幾高企。
真愛方位：東南
吉祥物：五角星

9/2-18/2 室宿 -- 絕對空虛
你好難搵到一個令你投入去愛既戀人，不過唔知好彩定唔好彩，你唔介意同 D 冇乜感情基礎既人拍拖，係人前亦可扮作恩愛情侶，但其實你內心係好空虛寂寞，成日好似唔知自己做緊乜咁。你除左需要一個真正去愛既人，仲需要一個心理醫生。
真愛方位：北
吉祥物：結他

19/2-5/3 壁宿 -- 平凡是福
平淡如水既感情生活比較適合你，因為你感情太脆弱，經唔起愛海既驚濤駭浪，就算係小小既漣漪，都教你死去活來。你喜愛情人既撫摸，幾唔開心只要投進情人既懷抱，就可把創傷撫平。你嚮往婚姻生活，希望同情人可以白髮齊眉，兒孫滿地。
真愛方位：東
吉祥物：海豚

6/3-20/3 奎宿 -- 來者不拒
你好享受被暗戀，被追既感覺，任何類型既追求者你都來者不拒，亦好輕易接受人地既愛。你對每段情開始時都充滿幻想，有時將對方諗得太理想化，到實際交往時發覺事與願違，往往嫌棄對方達唔到你既理想而提出分手。所以你換情人同換衫一樣咁密。
真愛方位：南
吉祥物：紅心

21/3-4/4 婁宿 -- 開心積極
你性格樂天，成日臉帶笑容，成個鮮嫩紅蘋果咁，情人同你一齊會冇壓力，好開心。你既戀愛態度主動積極，如果係女仔就唔會介意女追男添。你討厭拖泥帶水，糾纏不清既戀情，一旦唔好彩陷入三角戀，就算自己唔係第三者，你都一定會係首先退出果個。
真愛方位：西北
吉祥物：蘋果

20/4-30/4 昂宿 -- 談情至上
為愛情，你可以犧牲所有，為對方無條件咁付出。你渴望愛情充塞你所有時間，甚至每一條血管。不過你既擇偶條件卻唔算太高，只要情人對你好就足夠。你每開始一段感情，進展都可以好快，甚至好快就有談婚論嫁既衝動 , 因此你往往比人早婚。
真愛方位：東南
吉祥物：閃電

1/5-10/5 畢宿 -- 戀愛冷感
你可以話係患上「戀愛冷感症」，你為人太理智、太冷靜，戀愛亦一樣，要經過多重分析 , 例如諗下對方既外貌、身材、身家、背景 ...... 須知道談戀愛有時係唔可以太理智！有時太深思熟慮，對方既熱情冷卻左先識後悔就太遲。
真愛方位：南
吉祥物：雪花

11/5-20/5 觜宿 -- 問題伴侶
你對愛侶好大疑心，所以經常問對方「尋晚去左邊」、「做乜咁遲先覆機」等問題，令愛侶不勝其煩。不過你決不會將自己全部奉獻俾對方，最好對方愛你 100% ，自己愛對方 80% ，因為咁樣先可以俾到你十足既安全感。
真愛方位：東北
吉祥物：雀仔

21/5-5/6 參宿 -- 研究異性
頭腦靈活既你，對戀愛充滿好奇心，研究唔同性格既異性係你既一種嗜好。好在你約束力夠，一旦開始左一段感情就會收斂你呢方面既好奇心。你既理想對象最好係多才多藝，日日可以帶到新鮮感俾你既人。
真愛方位：西
吉祥物：貝殼

6/6-21/6 井宿 -- 情場殺手
你喜愛無拘無束既愛情生活，拍拖時最好只談風花雪月，唔好涉及你既私人生活。對於「未來」、「婚姻」等話題會叫你太沉重。你都算幾花心，但外表呃到人，俾到異性忠誠專一既感覺，亦憑住呢種特質，你輕易成為 lovekiller 。
真愛方位：西南
吉祥物：太陽花

22/6-7/7 鬼宿 -- 神主使者
你認為戀愛係神聖而崇高既情操，注重精神層面既滿足，甚至神交也可。你相信只要互相深愛對方，就算唔係成日見面，或者相隔萬里，兩人既感情都可以維繫。你對另一半非常信任，俾到十足既自由度及私人空間佢，不過小心因此而令佢覺得你對佢唔夠關心。
真愛方位：南
吉祥物：山

8/7-22/7 柳宿 -- 容易落「搭」
你思想天真，好容易被甜言蜜語及浪漫氣氛所影響，就算遇到一個自己唔太鍾意既人，只要對方肯落嘴頭，當時既環境又有浪漫氣氛，咁你就會好容易咁奉獻自己，但激情過後又會後悔不已。小心月滿當空既日子，月亮既引力會令你既自制能力減到最低，你會做出一 D 意想不到既事情。
真愛方位：東北
吉祥物：斧頭

23/7-1/8 星宿 -- 妒火中燒
性格爽朗既你，最唔鍾意搞地下情，希望成為大家祝福既一對。不過你既妒忌心比人強，對方稍有些風吹草動，你即會大興問罪之師。所以同你拍拖，對方都幾大壓力，唔敢有乜行差踏錯。你比較喜愛年紀大你好多既伴侶，因為俾到你穩定既感覺。
真愛方位：西
吉祥物：風車

2/8-11/8 張宿 -- 愛之獵物
你既戀愛態度非常認真，最憎 D 玩玩下、拍散拖既人。一旦發覺情人視愛情如遊戲，你一定會灑脫地立即抽身離去。不幸既係你觀察力弱，分唔清邊 D 係真心，邊 D 係騙子，結果咪又成為情場殺手既獵物。你既真愛會係 30 歲後先出現，之前果 D 都不過係路過蜻蜓。
真愛方位：北
吉祥物：車輪

12/8-22/8 翼宿 -- 溫柔如水
你天性溫柔如水，無論同性異性都好想同你親近，因此亦容易招惹同性戀者青睞。你唔容許愛侶對你有半點異心，一旦發覺你會非常憤怒，所以你分手既經驗應比人多。不過好在你受大眾歡迎，所以都不愁缺乏愛情滋潤。
真愛方位：東南
吉祥物：蝴蝶

23/8-26/8 軫宿 -- 古典浪漫
你對愛情步步為營，有自己獨特既要求，認為愛情應充滿古典浪漫，例如你喜愛在月下海邊，一面聽古典音樂，一面淺嚐美酒，與情人在細沙上跳著華爾茲。但太理想化既愛情往往令你同愛情絕緣。
真愛方位：北
吉祥物：雲

27/8-22/9 角宿 -- 角式扮演
愛情對你嚟講好比毒品，一旦談戀愛，你便會沉溺係自己既世界中，當正自己係電影或愛情小說主角。最慘係你沉醉係自己既幻想空間，從無理解過對方感受，令對方難以觸摸，成日覺得被受冷落。
真愛方位：西
吉祥物：箭

23/9-7/10 亢宿 -- 社交能手
你係一個社交能手，經常可以引人注目。你追求高貴既情人，因此愛情往往係 ball 場或高級會所發生。你既換畫速度相當之快，因為你永遠相信一山還有一山高，成日覺得身邊既伴侶唔及人地果個好。
真愛方位：東南
吉祥物：酒桶

8/10-23/10 氐宿 -- 一擊即中
你身邊成日都有一大班朋友陪伴左右，所以就算你冇拖拍，人地都會以為你有，斷送左你好多良緣。不過若你主動出擊，表明心意，成功率卻相當之高。好多時候，你既戀情係由友情轉化而成，多 D 留意你身邊既朋友吧！
真愛方位：西南
吉祥物：皇冠

24/10-2/11 房宿 -- 等得太久
外冷內熱既你，唔識去表達自己既感情，令到人地以為你好高傲，難以接近。就算你身邊有異性對你有意思，都可能因你成日掛住一副沈默認真既樣，而唔敢向你表白。你成日覺得「睇定 D 先」，往往就因為你太老定，搞到「蘇州過後冇艇搭」！
真愛方位：東
吉祥物：粟米

3/11-12/11 心宿 -- 有性冇愛
你對肉體關係睇得好隨便，可以有性無愛，更相信真愛可以由性開始。你每段感情都唔會好長久，唔係你嫌人悶，就係人嫌你悶。其實你內心長處「寂寞無重狀態」，好希望同一個了解自己既人長相廝守，只不過唔相信自己可以搵到個咁既人。
真愛方位：西北
吉祥物：號角

13/11-22/11 尾宿 -- 感情包袱
你感情豐富，一旦開始談戀愛，便會認定對方是付託終生既對象。若對方做出越軌既行為，你也會吞聲啞忍，唔會提出分手。愛情實在叫你太沉重，你根本唔能夠放開心情去享受。
真愛方位：東北
吉祥物：稻草人

23/11-7/12 箕宿 -- 活力先生
係感情世界中，你活力十足，精力充沛，經常一腳踏幾船。你崇尚自由戀愛，自由到有時自己都唔知自己做緊乜。對婚姻生活你十分之反感，認為係扼殺你個人自由。在沒有戀愛既日子，你會好唔自在，坐立不安，冇乜可以填滿你生活上既空白。
真愛方位：南
吉祥物：長茅

8/12-21/12 斗宿 -- 渴望無限
你時刻渴愛被愛既感覺，理想係可以發生一段「鐵達尼式」既情緣，轟轟烈烈愛一場。你好懂得為情人製造浪漫，不過距離你既理想戀愛仲好遠，你常因此而鬱鬱不歡，若唔放開懷抱，你同你既情人都會愛得好辛苦。
真愛方位：南
吉祥物：金幣