生命大過天 活著多好

Eric:「糾正你嘅人生態度。」

英皇群星合唱嘅勵志歌曲《天生不倒》係前Swing嘅成員Eric Kwok作曲、監製,唔好以為Eric嘅歌咁勵志樂觀就代表佢一生順景啊!Eric就話兩年前同初戀女朋友分手係佢人生嘅最低潮,不過再唔開心佢都冇諗過放棄生命:「人生態度好重要,大家學下積極正面啲去面對問題啦!你會發覺其實你係捱到o架!」

點睇呢排咁多自殺事件?

「社會風氣問題啦,大家都有困難,咪互相影響鑽牛角尖囉!我反而覺得報紙應該多報導呢啲新聞,等啲人見到其實死解決唔到問題,重增加你身邊人嘅負擔添!」

你人生中有冇遇上低潮?點樣面對呢?

「兩年前,我同拍咗六、七年拖嘅女朋友分手,嗰陣時都算係最低潮,初頭實唔開心嘅,不過信我啦,時間會沖淡一切。我不停話俾自己聽,我會搵到一位更加好嘅女仔。」

有冇好建議俾啲困境中嘅人?

「都係嗰句啦,生命真係好重要,冇錢使咪使少啲囉,失戀咪搵過第二個囉,壓力大咪聽〈天生不倒〉囉,你梗有自己迎辦法解決o架!只要記住,唔好放棄。」

最後有冇鼓勵說話講俾佢哋聽?

「做人嘅嘢,開心啲,樂觀啲,眼光放遠啲,過咗呢一關,明天會更好o架!」