Sabi心靈雞精句：“ 要知足，並要珍惜眼前和現在所擁有的!

西昌航天科技交流團
9日既交流團，咁快就過左魯！ 到呢家都仲係好掛住呢咁多日既生活點滴，雖然有時會幾Tired，但係每一日既經驗都係難能可貴！ 我明白到呢次機會唔係人人都有，所以我好珍惜每一日同大家一齊既時光 ~~~ 珍惜每分鐘、珍惜每一秒。 可惜， "歲月不留人"，短短的9日就咁就過去了！ 回程當天更因唔捨得呢個旅程而落淚了！ 呢次旅程既經驗，確實令我大開眼界！ 有好多不公開俾人參觀既地方，例如 "遊客止步" 區，我地都可以一一近距離咁觀看或觸碰。 加上當地主辦單位熱烈既歡迎，和貴賓一般既招待，實在令我太意外！ 今次簡直係 "食得招積、住得舒適、遊得出色" 呀！

D 組
Anna組長、Sabi副組長、成員有: Kit、Katie、Margaret、Catherine、Joey、Stanley、John & 超
好開心可以同佢地同組，join團之前，即使有d係同校，個個我都唔識，都係之後慢慢熟絡起來。 至於我同Anna，可能因合作關係，比較快熟同更要好。 很快，我地就做左好朋友！ 成日講白痴野同做白痴動作 & 大笑，有時佢都頂我唔順。 有次Dinner時仲笑到要同我講話: "同你食飯真係辛苦呀！ 想有啖安樂茶飯食下都唔得！" >>> 點解佢會咁講?! 都係因為太攪笑啦我！ 哈哈！ 我諗我可以係鄭中基接班人啦！ 哈哈哈！ 你知嗎? 開頭唔係個個都識笑架，慢慢，個個都笑得好開心！ 呢點，我的確好安慰！ 成功了！ 由唔係咁團結，到到最後很快可以集齊人、由大家都唔係好聽我地講野，到大家有d反應、由分開各自搵fds玩，到有d團隊精神等等。 呢個轉變實在叫Anna同我都好安慰！ ^_^ 雖然，個個都有d騎哩野，但係畢竟大家都係同Group，無謂計較咁多，只要大家呢幾日過得開心就Okay啦！ 係唔係? 出黎玩，就梗係要開開心心玩盡佢啦！ 對不對！ ***註: Anna要我多做 "重組句子" 。。。 ~.~

踏足火箭發射機地、近距離接觸火箭
我地可以超越 "遊客止步" 個牌，走到火箭發射既地方、走入圍欄，手觸真實火箭全身。 簡直發夢一樣！ 當時，也有一些當地人參觀，不過只有我地先可以走到咁近睇！>>> 一個字！ "威"！ 我仲買左幾支火箭返黎做手信！ 最正個支，已經俾左我唯一既細佬！ 因為d火箭都幾大支，所以買得好少咋。 另外，我地仲入 "火箭發射控制中心"！ 雖然我地唔可以掂佢地d儀器，但係可以入去望下，映下相咁，都已經好足夠了！ 除左參觀之外，都要去聽講座。 其中有一個講座提到當時有一個衛星，多個國家都不能成功將佢放上太空。 後來，大家都將呢個衛星改名為 "災星" ！ 不久，中國便計劃嘗試將 "災星" 升上太空去。 經過嚴謹測試和計算，"災星" 終於可以成功地被中國發射到太空！ 實在叫人驕傲。 連美國，蘇聯等科技先進的國家不能做到的，中國竟可一次成功地將 "災星" 送到太空去！ 中國既航天技術，確實有一定的水準。 讚！

火車之旅
城都和西昌之間既旅程，我地都係坐火車。 一坐就成晚，即係要在火車上過夜。 由城都去西昌果程車，上到火車。。。 個個都好似在難民營一樣，又熱喎、乾蒸一樣！ 睡前，我們開玩笑，玩遊戲，開開心心地渡過了好幾個小時，直到車廂關燈，我們才乖乖地去訓覺。 之前我搓書左要訓最高果格，但係佢地見我好似唔識上去又唔識落返黎咁，好騎哩，咁所以佢地就比我訓最下面果格！安靜的車廂內，只聽到火車在軌道上行走時發出的聲響，一下一下的隆隆聲伴我進入夢鄉。有趣的是，我覺得我的頭不斷向上移，就好像火車不斷地 "掟彎" 一樣。於是故意 "訓低少少" ，頭很快又向上移！ 另外，天還未亮，"寒流侵襲，幸得人間暖流"，有團友為其他團員蓋被，而我亦都係其中一位受惠者。差唔多天光，有人幫我地com被呀！初時望唔到佢係邊個，之後我又Hei被，之後佢又黎同我com被，但係呢次就俾佢嚇親魯！濛瀧中，感到有人為我蓋上被子，初時更誤有人"突襲"！你知啦，同人com被會離開個人好近，好似琴你咁甘麻！火車上又乜人都有！ 醒左一醒見到有個人咁近自己 >>> 梗係驚！！哈哈！幸好只是虛驚。 最後，隔多一陣，佢又黎拉一拉我張被上肩膀，可能怕我會凍掛！ 最後，都係唔肯定佢係邊個！ 早知係咁就Hei多幾次被，Hei到見到佢為止！ Anyway，我好多謝佢！其實，亦要多謝在兩晚火車的旅程上，輪流守護大家的男團員。要不，我們都不能安睡了。謝謝！

樂山大佛、三星堆、都堰古代水利工程
除了見識有關火箭既野，我地都有觀光一下。 樂山大佛、三星堆和都堰古代水利工程係其中三個令我難忘既地方。 樂山大佛就係一個有成座山咁大既佛，要見佢，要走一段比較難行既路，又高又斜既一段樓梯路 >>> 都唔短架！ 大佛頭高14.7米、髮髻有1021個、耳長6.72米、鼻長5.33米等等。 至今係全世界最大既一座石刻佛像，用左90年左右先完成的傑作！ 勁！ 另外，三星堆文化距今4800-2800年，而這2000年中既後期就係商代後期。 (呢句我抄，嘻嘻！) 1929年發現古物更一時轟動多個國家爭先報導！ 經過多年發掘終於將所有古物掘起，更不斷作大規模既報導。 當中更發現有工具可把堅硬既石頭整齊的地cut開！ 勁！ 最後，都堰古代水利工程，其實係當時偉大既水利工程，它大大改善了當時人們既生活質數，好讓水患消失。 呢項工程更Show到當時人們智慧非凡，係一項巨型而偉大的工程！ 勁！

乜事都有
整個旅程，勁臨時改野！ 五時花六時變，攪到Anna同我都無所適從。 有時做左d野，一話改，我地之前準備好既野就如垃圾。。。無用！ 出團前又唔講明日日都要著團衫，攪到我帶齊晒九日咁多件衫！！ 又派得兩件團衫！ 點夠九日著喎！！！ 攪到要洗衫，又唔可以日日洗，因為會唔乾！ 我地要睇準機會先洗架咋！ 團入面都有幾多騎哩人，有人奄尖聲悶、有人搏出位、有人吹水唔抺嘴、有人發姣、有人搏濛。。。咩人都有！ 有個人呀，將我同佢講過既野當係佢自己既野咁講返出黎呀！ 激到我呀！ 侵犯版權呀！ >_< 小林係團既顧問，佢好好人架！ 四個顧問之中，佢最好玩！ 我仲串佢添，哈哈！ 其實，日久我就開始作反，連祕書長都串過，哈哈！ 佢地唔介意既，玩下之麻，見佢地係玩得之人先玩佢地咋！ 如果唔係！ 點敢呀！ 另外，我多左個阿哥 >>> 佢個名同我個名差最尾個字，佢係 "雄" & 我係 "欣" >>> "雄欣" VS "洪欣" 哈哈哈 ~~~ 成程都以兄妹相稱！ Funny！ 佢好勁架，大人物黎架！ 北京有Club架！即係成個渡假村個隻喎！

發射場的生活
我地每三組就有一個排長。 排長係著迷彩衫既軍人，其中有幾日都對住排長，我地要聽佢指揮。 一聽到佢地吹BB，我地就要her her聲走去集隊。 個幾日，真係人都癲！ 再過耐d都真係會神經錯亂 + 痴線！ 次次一聽到BB聲，就成個彈起！ 要快速地著鞋出去，遲左要企出黎係後面俾人訓話架！！！ 有次我聽到有人吹口哨咋，訓訓下覺我都成個彈起呀！ 之後先知原來聽錯咋，你話�魽I 仲有一次，我地出左營，住得比較近市區，出面有人無端端吹BB，又嚇到我成個醒晒！ 我諗排長受人指揮既時候都係要過呢d既生活，我真係登排長既BB生活辛苦啦。 雖然有d壓力，不過，呢d經驗都係蠻有趣的唷！

排長
不知不覺就對我地個排長產生強烈既感覺！ 不曉得咩感覺！ 只係覺得佢好可愛！ 喜歡他的傻氣！ 有次食Lunch時我走去問佢幾多歲，佢即刻面都紅晒！ (真係見到佢漸變色架塊面！) 好好笑！ 排長好少笑架，開頭我地會用 "唔識笑" 黎形容佢，所以每次罕有地見到佢笑我都會大聲話: "排長笑啦！排長笑啦！" ^_^ ~~~有兩個朝早，佢都會教軍套拳，每次我地做返比佢睇之後，佢既表情超攪笑 & 可愛！ 哈哈！ 諗返都好笑！ 排長睇完我地做之後就猛話我地做得 "不錯"、"很好"、 "好！再來！" ~~~ 但係我地明明做錯晒喎！ 哈哈！ 到我地要難開排長個日，在等火車既時候，我主動走埋去排長度，佢又笑啦！ ^_^ 本來想送少少野比佢，可惜排長話佢唔可以收禮物，又唔可以映相，我都係好辛苦先偷映左佢既相咋！ 我問過點解有d軍人又得，原來，每一隊都有唔同既規矩，所以都說不定。 最後，我同排長握手之後就上火車魯！ 之後，我頭都唔敢回望佢，因為真係好唔捨得，已經喊緊架啦，越望佢會越喊得勁。 個情景令我諗返 "情深深、雨濛濛" 入面基仔同趙薇在火車站分手一幕！ 哈哈！ 火車快要開之際，我見到佢既背影離開，眼淚又一次把把聲。。。 因為我知道呢次之後，再見既機會係微乎其微。 So Depressed！ 控制唔到呀！ 眼淚把把聲！ 唔捨得排長呀！ 開頭諗，應該只有我地Group人先至知我喊，點知，其他組既人都見到！！！ 點解架?！?！ 我已經呢埋喊啦喎！ 咁都比人知既?！ 真係唔係好明！ 之後問Anna，佢話 >>> "梗知啦！ 喊到兩隻眼紅到咩咁！ 一睇就知啦！" 唉~ 有破綻！ 之後，仲傳出非聞添呀！ 有一組唔知邊個傳出 "有一個女仔，鍾意左排長，走既時候、上火車時喊呀！。。。個女仔係D、E、F組其中一組架！ 係長直髮，帶眼鏡架！。。。" Karen話一聽到就估到個女仔一定係我！ 哈哈哈！ 真叻！ 所以，第二日Karen即刻問我尋日有無喊過，哈！ 無野講啦我~！ 之後，我先知原來出事！ 跟住我咪即刻話 "我唔捨得先喊咋！ 唔係鍾意排長喎！" 然之後，我咪又灑出本領 ~~~ 就係大笑啦！ 其實，講真呢家都有少少掛住排長，因為佢的確可愛！ 成日會諗，排長五點幾起身做軍操、早餐、Lunch、午休、Dinner等等。 哈哈哈！ 不如咁講啦！ 我係鍾意排長，我仲鍾意好多人添！Karen啦、Anna啦、Margaret啦、Amy啦、阿Dee啦、徐樂達啦。。。好多好多好多喎！ ^_^

友誼
雖然成團人有成六十幾七十人、又唔識得晒咁多、每日都有不如意既事情發生，但係我都覺得過得又開心、又充實、又富足。。。好幸福！ 學到既、體驗過既。。。 我都會好好牢記心中。 識到一班朋友更是可貴，友誼係要雙方努力建立，先可以成功！ 我會好好珍惜你地，亦會不時回味呢九天以來既生活。 多謝！ ^_^ 笑！

***金句:
排長 VS 隊長 VS 部長
導遊 VS 道友
中國 VS 中腳
機關 VS 龜關
博彩業 VS 波菜葉
集體活動 VS 解體活動