|
14/4/2003
唔知點開始講...呢幾日我都好唔開心!真係好嬲好hurt!成廿幾年都係咁!究竟我o係我屋企度有無地位?我指係我以前既屋企,廿幾年黎,我完全覺得係唔受佢地班人(尤其係我爸爸班兄弟姐妹)尊重,佢地一直當我係狗咁玩,見一齊食飯悶悶地就耍我!!!好似當左我以前屋企係遊樂場!原本好好地一齊食飯,硬係要當我係箭靶!佢地亂咁話我都唔緊要,我仲可以忍(況且我已忍左廿幾年!),我亦唔需要同佢地解釋,如果我講實情或者同佢地班人解釋,下場我都知唔係正面,佢地只會係咁話我搵籍口,我講乜都無用,所以我呢幾年都已經唔再為自己解釋,解釋講事實黎都無用!佢地都唔係黎幫我地,而係玩緊我自己!我今次真係好嬲!原本我老豆打電話俾我話要番黎食飯,我都係諗住陪吓佢,星期六旺期,有生意都唔做住都走過去同佢食飯,上到屋企原本都仲好開心,因為可以見到堂兄弟姐妹同我大佬,因為太耐無見,都掛住既...;而且我果日又竟然可以好開懷同呢班親戚傾閒偈,我果陣都仲覺得我進步左,無以前咁怕講野...我個仔又似乎乖左,一直以為都順利,食完飯之後,我諗住入吓房睇吓個仔先至再去番舖頭開工,點知,我就係o係呢度俾人耍!而耍我既就係我老豆同佢個妹!我唔想再稱呼佢做姑姐!我依家好憎佢!佢問都唔問一開聲就話我個仔好可憐,佢可憐我個仔,又話我成日都靠哂我老豆個工人湊仔(喂,聽講未肺炎之前我都只係一星期要求個工人湊個仔兩日,原本我老公唔駛再番新界返工,我地都只會一星期俾個仔工人湊一日,都唔算過份...;依家我已經親自湊仔都有三個星期,我個仔唔駛番學,一日廿四小時我都親自湊佢,煮飯俾佢食,打掃屋企...;我唔覺有乜問題,),佢話我依家呢個工人做到今年唔做
(我都一早知啦),問我點,我點知佢想問乜?梗係話唔知先至再講我之前已經同老豆大佬佢地傾左話夾錢請新既...我都未講完,我剩係講左"唔知"兩個字,條八婆就已經叉把口埋黎鬧!又講番之前佢果堆廢話,講到我真係唔負責任之類咁,我都忍左佢,等佢講完之後我先至講番我未講完既野,我老豆o係隔離一直都無表態...我知咩事,佢不嬲都係咁,鐘意o係班親戚面前落我面子,係唔係都講D野入哂我數...我依家爆左出黎,原來佢一直知我講左會夾錢請工人,佢同佢個妹面前話我無提過無做過任何行動,佢梗係唔敢出聲住啦!我夾錢請工人都唔係為我個仔,係為左佢!唔通到時叫佢成六十幾歲人自己打掃成千呎屋,一條友自己洗衫哽飯盒??D人就係咁,鐘意睇少少睇表面,未搞清楚就亂咁吠!跟住佢個妹聽完都無出聲一陣架,佢都知乜事啦,但佢都要搵野黎講,係吹佢唔漲!我都照忍!(都話我講乜都係無用架啦~!)跟住既事我最嬲!果陣都未講完工人問題,我老豆好似覺得唔夠火喉咁叉個咀埋黎又講狗!又話先處理個狗云云...乜佢唔厭既咩?佢唔厭我都厭啦~!隻狗要搵人養都要時間,俾保護遺棄動物栛會收都要排期(我都排左好耐,我唔係一D野都唔做);我嬲並唔係佢話唔要隻狗,而係佢做人既態度!我叫佢收聲,我話再同佢傾狗只會同佢鬧交,我唔想再同佢嘈!我咪即刻走去番工!
佢班細佬妹點話我,我都可以忍,還掂都忍左廿幾年;
但係佢係我老豆,佢抬唔起頭做人,唔等於要我陪佢,或者要我仲CHEAP過佢!好日都唔同我講野,班親戚一黎佢就發台瘟講我隻狗又話我不孝再唔係見我仲忍到就再搵D野講我踩我,務求我真係當眾出醜俾人指指點點,佢先至安樂!我對佢好永遠不受領,都會俾人話我對佢唔好甚至不孝!?既然孝順佢都會俾人話不孝唔俾佢安老,咁EASY啦!我咪不孝囉~!好過我好心做壞事,再俾人當傻仔咁耍...次次心軟原諒佢都係咁既下場,佢唔當我係一份子,我都無問題,我亦唔會再理佢,佢要請工人,佢自己俾錢,我一個仙都唔會俾~!我唔會盡兒女本份!我都唔係佢個女! |
|
16/3/2003
今日我好唔開心呀,我屋企隻"肥妹"(倉鼠媽媽)病左,我好驚佢有事...佢越來越瘦,D毛又甩...都唔知點算,我剛剛忙完一大餐!將佢同D仔女分籠養,希望佢可以休息一排就好番啦~!不過D倉鼠BB又大得幾快,眨吓眼已經三個星期大,已經好大隻仲識得爬上爬落!不過如果肥妹真係有病,我都唔希望佢會傳染俾佢地,唉~!總之好擔心啦~!
早幾日我番去外家食飯,O係自己間房度無意中搵番自己中五紀念冊,睇番又真係幾好笑~!十個同學十個都話我shot shot 地,成日掛住夾band,又投訴我上堂成日拍枱dump地,嘈住佢地訓覺...又會咁齊心既...嘻~!不過雖然當中有好幾個同學同我唔係咁熟,仲成日恰我,但係睇番佢地寫既野,我又真係幾掛住佢地~!可能依家同細個既心態唔同,依家諗番,我果陣又真係幾怪胎,而佢地又唔係壞既,諗番以前班同學,佢地其實都好好人...我心諗,如果俾我遇番佢地,大家可唔可以做到朋友呢..?唔...可能佢地依家未必記得我呢個bandband(或者band妹)...但真係有機會的話,真係好想同佢地敍敍舊,至少都知吓佢地近況嘛~!
|
12/3/2003
早排我大佬同亞媽恢復"邦交",成家人一齊食飯,原本我都預左會變番"後備",我媽係咁,重男輕女,自從早幾年前佢話埋俾我知佢係鍚仔無咁鍚女,兜口兜面咁仲好有學問咁話俾我知,話個個亞媽都會係鍚仔,女就留番亞爸鍚咁話,雖則我都預左呢次佢一同大佬好番佢就唔會重視番我,都慣左啦,但係呢次無諗到佢變得咁快...所以咪有少少唔開心囉,我唔係唔鍚亞媽,而係佢份人就係咁,就好似果晚食飯咁,真係完完全全表現出有亞仔就得既原理,我同老公當堂變回二打六,我地講乜,我亞媽一係無反應當聽唔到,一係就趁我講到半路中途就即刻插咀講番佢鐘意講既野,之後又唔會再問番我地之前講緊乜,中哂我死穴,我份人係好介意人地咁樣,無興趣聽都唔駛扮聽唔到仲要叉開話題,我地講緊我地個仔既趣事,又唔係D乜悶野,就算真係悶都應下聲,等我地知道佢聽到啦~!我老公就係以為佢聽唔到,幫我重複講多次BB件趣事,佢地都係無反應!得我大佬有囉...我亞媽無反應不單只,佢仲會故意望第二度,俾個樣你知"我唔想聽亦無興趣聽",之後我仲嬲,一路食飯都當我無到,突然間又大大聲笑我個頭樣衰,又話我咁既頭點樣賣洗頭水云云...我係覺得好突然同好唔尊重,但佢又係亞媽黎,唔通寸佢咩!?我咪叉開話題講,等佢又覺得我講野悶囉...可能大家會覺得我小器無容人之量,但係佢唔係偶然一次,而係次次都俾我tip中!岩岩星期日佢約我同細佬去行街,...又係咁!早排見佢話怕凍,我買左包麵鼓湯俾佢沖黎飲,買左俾佢成幾個月,佢都話無問題;就呢日同佢&細佬去食壽司,佢突然間話我俾佢果包麵豉湯好難飲要俾番我飲,我話"大佬都係飲呢包,不如你俾大佬飲"(我試佢),佢即刻變樣勁兜,佢話俾番我然後我俾大佬飲喎!即刻就無左下文!之後佢都係用番我之前講佢對我既態度對我!我同老公傾心事講過,其實我都唔明,自己個亞媽同自己關係咁奇,反而我同奶奶(我老公個亞媽)就好親密,我講真,我係鐘意奶奶多過自己亞媽...
|
19/2/2003
剛剛既兩個中西情人節，我同老公都好平咁過．．．無book枱食飯，佢又無送野俾我，但我送左花俾佢∼！嘻嘻！呢樣野我俾亞媽話左成日！佢話，邊有女仔送花俾老公，梗係男人送花俾老婆架啦！哈，我就係鐘意玩新意玩feel!
記得我同老公仲係未婚果陣，有一次約佢喺旺角差館門口等，佢自己傻梗梗咁一早走去花墟買咗扎花俾我，因為時間關係，無時間買花紙卦，果扎花仲係用緊張報紙包住，當佢失驚無神咁遞俾我，我當堂嚇親，開心驚喜之餘，都好奇怪咁心諗咗句，點解扎花無主角既(得毋忘我同滿天星．．．)．．．但係又見到佢個樣好冧咁款，又唔好意思問，嘻嘻！其實我就係鐘意佢咁可愛！所以今次情人節，我買番一式一樣既花(都係毋忘我同滿天星)，喺西方情人節零時零分彈出廳送俾佢！雖然佢無送到任何野(包括花)，但係同佢分享個氣氛經已足夠∼！
雖則中國情人節日頭我發脾氣，但係到夜晚同老公行街街己經開心番，雖則無買到介指，但係有佢陪我已經好開心喇∼！
|
|
|
10/6/2002
前晚我同表姐逛信和，真係好日唔出街，一出黎就係咁買碟睇∼！真係∼！我地除左買Ｄ戲睇，我地都買左好多台灣版既ＤＶＤ，四十蚊隻ＤＶＤ喎！相信大家都唔會再有乜要求．．．我就買左Kiroro,X-Japan
live,倉木麻依live，仲有一隻高中正義既ｌｉｖｅ係買俾我老公睇既．．．不過我出左事．．．買左隻好鬼後生既高中正義．．．是但啦∼！係佢就得，又多歌仔！四十蚊抵喇話∼！
不過，一上到個ｂａｎｄ房硬係會遇到Ｄ好無禮貌既人！之前趁自己無咁嬲果陣仲考慮緊睬唔睬番佢，上到去見到佢咁無品，唔駛諗啦∼！睬呢Ｄ人黎做乜∼！唉∼！我明白大家用同一個ｂａｎｄ房係唔應該搞到好似好僵咁．．．但係既然人地無意和好，我又做乜又黎強出頭呢？費時再ｌａｉ野，都係當條友係透明最穩鎮．．．（問心，自己係咪想咁．．．？唔係囉！）
|
|
5/6/2002
噚晚我搵左我果個做精神科醫生既朋友傾偈．．．嘻∼！原來我果Ｄ失眠並唔係咩神經衰弱，而係我Ｄ生理時鐘亂左！佢叫我唔好咁晏先起身，等我日頭眼訓Ｄ，等夜晚可以早少少訓咁話！不過佢又問我有無諗埋一邊，我原本都無為意，但講下講下又覺得自己諗埋一邊係習慣黎．．．鬼咩！細個咁唔開心！一路講一路諗番以前既事．．．我又喊左出黎喇！真真失禮！不過呢次同佢傾係就失禮Ｄ，但係，最起碼知道，我個仔依家既問題，並唔係因為我地以前教得唔好所致．．．至起碼，我以後唔駛晚晚再自責，成日諗係咪因為我教得唔好，又或者因為我要番工搞到少左時間照顧佢所致．．．起碼，我個人係放鬆左．．．依家個仔既問題，唯有等Ｄ專家教我地點做同教佢，真係希望終有一日，我個仔會變番正常既細路，開開心心咁長大啦！我朋友仲勸我，叫我番教會．．．我諗我會考慮既．．．
|
|
2/6/2002
噚晚我地成班o向band房度玩左成晚！成五點幾先肯收油！不過呢晚真係玩得幾開心！好多ｆｒｉｅｎｄ上左黎！十幾個人塞埋一間好細既房裡面，真係插針都插唔入！我唱歌果陣成日都要就住就住，咁多支結他o係我頭上邊ｆｉｎｇ黎ｆｉｎｇ去，真係有Ｄ擔心會〝哼〞親個頭∼！
不過，呢晚呢班朋友都幾令我感動∼！（我係咪好易喊呢．．．）我呢排連續三晚失眠，搞到個人殘哂咁上去蒲，佢地一見到我個樣就俾我嚇親！係咪問我係咪減肥之類，我咪話失眠囉．．．其實我份人就係咁，個人一靜落黎就會諗好多野，前一排就諗朋友同我個仔既事，呢個禮拜就係咁諗生意．．．佢地係咁勸我，真係又差Ｄ俾佢地搞喊！真失禮∼！我強忍住Ｄ眼淚，怕俾佢地見到我喊∼！^^"希望佢地真係睇唔到我忍喊！我真係好慶幸有呢班朋友！真心朋友依家真係〝買少見少〞咁，雖然我朋友唔多，但有佢地呢班朋友已經足夠！
|
|
29/5/2002
噚晚同我老公仔睇電影！本來真係好想好想睇蜘蛛俠架！點知我去到ＵＡ金鐘，先至知係無九點半！慘呀！最後我地都係睇〝高斯福大宅謀殺案〞！套戲真係幾正！雖則套戲大部份都係講佢地既人際關係多，最後先至係咁二講下發生件謀殺案．．．但係呢套野描述Ｄ人既性格同人際問題都好好，好仔細，雖然到最後都唔知邊個係兇手，但係成套戲黎講，我真係覺得佢好正∼！不過，我老公就悶到差Ｄ訓著．．．^^"
不過今日真係有少少興！原本今日我亞媽叫我陪表姐逛旺角，搞到我編排到今日唔駛湊仔諗住成日陪佢行街，點知今日等左好耐都無個電話黎，我打過去先至知表姐噚日已經自己去左旺角！頂！唔去早通知啦，搞到我今日無啦啦無野好做，仔又見唔到！真係離譜！以後咪再叫我去應酬班親戚添呀∼！咁都有！ |
|
25/5/2002
今日同我表姐逛HMV，當大家互相切磋音樂喜好時，^^"先至發覺自己聽Ｄ野真係少過唔少！！唉∼！鬼咩！做左師奶係咁，永遠都係同呢個世界脫節！我表姐聽好多唔同既野，求其話我鐘意Trip-hop野，佢都可以講到一大堆樂手同樂隊既名，而我係完全唔識亦未曾接觸過∼！．．．遇到對手添∼！！！佢問親我識唔識呢隊果隊，我簡直成個啞哂．．．係咁標哂汗話唔識未聽過．．．唉∼！前一晚先至俾我老公班朋友話完我要惡補一下音樂，話我連呢個〝搖滾始祖〞(雖則明知呢個名係佢地作，但係．．．)都唔知邊個．．．^^"我諗，我真係要將我屋企所有既ＣＤ（我老公珍藏）全部聽鬼哂佢先得！新果Ｄ音樂．．．唉∼！有錢先算啦∼！想聽新野自己都無錢買，無哂符！鬼叫自己窮呀∼！ |
|
23/5/2002
噚晚我又買左盒ＣＤ番黎聽喇！我細個比較鐘意聽ｄ好舊既英文歌，今次買番黎聽，都算係緬懷番細個聽歌果陣時個感覺；我老公都有聽，不過就話有ｄ歌既ＭＥＬＯＤＹ有少少老土．．．我就覺得好正∼！哈！之後臨訓食煙果陣，又同我老公傾下偈，講下岩岩發生既事件，講下信仰，其實我好珍惜呢ｄ時候，因為始終覺得老公大過我，人生經驗比我多，同佢傾果陣，唔單只會知道大家諗乜或者有乜睇法，而且佢真係教左我好多野，起碼聽完佢既意見同諗法，我自己都唔會再鑽牛角尖先啦！呢排真係發覺自己需要睇醫生，係咁失眠又亂諗野，我諗真係好似其他媽媽咁－－－神經衰弱！講真，前兩晚我真係好想訓覺架！但係撻到天光都未訓到，第二晚仲好鬼精神，天光都走左去睇書．．．嘔哂血！安眠藥都救我唔到，咁我真係要靠醫生喇！搞到我日頭好眼訓咁，真係疆屍咁既生活！唉∼！ |
|
22/5/2002
噚晚我同個朋友傾ｉｃｑ，事後其實我都覺得話人話得過火得滯！諗諗下，其實我都要檢討一下自己，我係唔信Ｄ生肖星座書講既預言，但係呢排真係將本書上面講果Ｄ野實現哂出黎咁！真係邪！唔知我係咪真係封下咀唔再講野住呢．．．既然我唔可以將心裡面既感受話俾人知，我諗我真係要收埋自己一年．．．！我都係講下姐！至於我日後點樣改變一下自己，我諗我需要問下身邊既朋友意見，如果佢地真係覺得我唔講野會係一件大好事，我諗，我真係要同佢地探討我日後點樣對人先至係正確喇！講真架！呢排發生咁既事，真係搞到我好亂，一直以為自己係一個好人，同每個朋友既關係都好好，點知就係今次件事令我自信心開始動搖！我諗我自己無錯既，人係要長大，有時對人坦白可以係錯！對朋友真誠或者又係錯或者係幼稚既表現，到底我應該點做，我相信，問過身邊咁多朋友既意見同討論，我會知道自己要係點既一個人囉！ |
|
19/5/2002
噚晚我依然蒲上band房玩，除左果件〝垃圾〞之外，其他人同我既關係都依然好好，之前真係有諗過會唔會唔同佢間房既人打招呼．．．但係嬲就仲嬲緊既，未上去之前梗係口硬話唔再睬佢間房裡面任何人（因為覺得佢地唔信我），但係一上到去，除左件〝廢柴〞之外，我一見到其餘隔離房其中一位朋友，都好自然打下招呼，問心，除左果一位之外，其餘果兩個都係局外人，就算佢地之前點唔信我講野都好，我都唔怪佢地既．．．我諗佢地咁大個人會明事理，所以咪無野囉！不過都好感謝幾個人，佢地知道呢件事之後，不但相信我唔係果種麻煩人，而且仲安慰我，雖然唔係好語重心長，但係，只要令我知道我身邊仲有朋友肯相信我，明白我，支持我，我覺得已經好足夠！雖然呢次我就真係食左件好大既死貓，但係，只要有呢班明白我既朋友同親人，就算日後件事發展成點，我都唔會太大壓力，因為仲有老公啦，快活ｇｒｏｕｐ，肥貓〝哥哥〞（唔係叔叔嘛．．．）仲有梗係我個仔仔（一見到佢個樣就乜煩惱都無哂∼！）同埋神（雖然無時間番教會，但係我知佢都一直好照顧我地一家人！）
仲有呀．．．ｂａｎｄ房內所有朋友（快活ｇｒｏｕｐ），我知噚晚我都好似表現失常(一時大大聲講笑，一時沉默寡言．．．）．．．希望你地原諒啦！過多一排，等我自我反省及重整好自己，我會回復正常架喇！始終就算係俾人屈都好，發生咁既事，我唔多唔少係咪都要檢討一下自己，我知我係細路女，好容易笑同容易喊（尤其呢幾日．．．不過無喊出黎，好彩！），有時傻傻地，放心啦！經一事，長一智，人係會長大既．．．大家就不妨耐心地俾Ｄ時間我去改造自己啦∼！^_^ |
|
18/5/2002
噚晚臨訓果陣有意外驚喜∼！之前我咪話我老公成日話作緊首歌仔俾我既．．．嘻嘻．．．噚晚臨訓果陣，佢問我要紙同筆，我以為佢係想記番低舖頭Ｄ野．．．但係見佢好耐都唔入房訓，就覺得奇怪喇．．．佢一入房就話：“送首歌俾你o丫！”雖然係臨時作一首出黎，但係我已經好開心，至起碼佢仲記得我一直想佢作首歌仔俾我先啦．．．已經係我至開心至難忘既事！咁已經足夠！ |
|
17/5/2002
今日我又明白一件事，原來我份人係唔可以同一個〝Artist
〞做朋友！我同佢講好話，原來o係佢本人心目中係會損害佢既ｉｍａｇｅ！我家下先至知！今晚真係好嬲同唔開心．．．估唔到我會俾人睇成係一個咁既煩人，既然係咁，我又何必再同佢地爭拗落去，呢次佢地俾我既結論就係，朋友講既野千祈唔好信囉，其實呢句話，好耐之前已經有個朋友同我講過，但我果陣仲係覺得朋友應該係互相信任，唔應該朋友講Ｄ乜俾自己聽，我都要三思去考慮信唔信個朋友講野．．．依家真係禮會哂．．．呢班〝朋友〞對住你講乜都會四萬咁口，乜都話無所謂，背後反而變成覺得我好煩，多說話少做事，再唔係Ｄ人將你個朵用黎〝犯事〞，又係經過佢既修改同加插內容，再將果Ｄ變左質既〝實情〞話俾〝當時人〞聽，疆嫂周圍同人講你是非之類．．．究竟，〝朋友〞係Ｄ乜黎？剛剛識既人已經可以〝幫〞搞成咁，令我成為萬人矚目既麻煩人．．．咁我係咁多謝佢地定係唔該佢地呢？可能我唔可以同一個〝Ａｒｔｉｓｔ〞做朋友之餘，我想，連佢身邊認識佢既朋友我都要同佢地劃清界線？原來識一個朋友係要經過咁多程序，仲要係唔好信人之餘仲要守好多規則，咁樣先至叫做一個友誼，呢個道理我成世女都只會o係呢次事件當中先能完全禮會．．．諗番我舊同學果番話，〝原來係以前學校既人先至係最真最好，依家身邊所識既人，唔理係男定係女，大過你抑或細過你，佢地所做既永遠都係不懷好意，笑裡藏刀．．．〞．．．老土就老土左Ｄ，但係聽落，我都認為係！人心難測．．． |
|
16/5/2002
今日我終於明白一件事．．．唉∼！經一事長一智呢個道理我今日卒之體會到！估唔到Ｄ人係咁，當件事都未問清楚未查証清楚就妄下定斷，話一定係你搞出黎，仲要搵個朋友代佢講，個感覺真係唔好受！咁樣俾人冤枉，仲要係點解釋都係無用，我果刻真係唔好受！至憎俾人屈！既然係咁，總之當初咪主動去同人ｆｒｉｅｎｄ啦！好似我老公咁講，呢次真係我自己找麻煩！幫人出頭終出事！仲要係呢位仁兄將其他事入哂我數，當左全部都係我做咁．．．係咪我份人鐘意講野就代表我係是非精？？呢次事件，我真係覺得心淡囉，諗住呢個世上只有女人係麻煩，估唔到男人都會咁．．．佢份人係點就費時講，總之呢件事真係令我覺得朋友唔好亂認！呢件事點？清者自清囉！就係咁喇！ |
|
15/5/2002
今日係我地既結婚週年紀念日~!!今年同舊年一樣，都係o係澳門渡過．．．除左食得好之外，其實真係無乜野好做
^^"．．．不過呢兩日落住雨，我地帶左把超細而懶係
cutie既遮，所以行起街上黎都算係浪漫．．．歌就收唔到，禮物都無件落到手．．．唉∼！不過我都買左好多野食俾自己，我o係間酒店度，一夜之間食左成盒蛋卷∼！！！不過我老公就話：〝喂！你唔好咁放肆喎．．．！〞^^" |
|
9/5/2002
下個禮拜就係我同老公既結婚週年紀念...唔知我地會o係邊度慶祝呢．．．呢排我老公成日練結他，係咁同我講話作緊首歌俾我，但係彈親都知佢唔係作緊歌，而係練野．．．曳豬o丫！咁多年黎我都幾想佢可以作番首歌仔送俾我架∼！所以我係咁要佢快Ｄ作番首黎，寫埋份譜送俾我．．．嘻嘻．．．好緊張呀∼！^_^ |
|
18/4/2002
我今日又買左兩隻卡拉OK碟...做師奶係要唱下K先至開心~!買左番黎我老公猛話我老鬼土~!衰佬O丫~~~!我細個就鐘意聽陳慧嫻既歌,可以好唱口既關係卦...依家咁岩俾我見到佢有卡拉OK仲要係好平~!除左呢隻卡拉OK之外,我仲買左范曉萱絕世名伶演唱會卡拉OK...我覺得佢都幾唱得,同埋首首歌既感覺都好好...好似"最好的愛煞人武器",果種Trip-Hop
音樂真係我既至愛~~!成十九首歌咁多,四十六蚊...抵啦~!
|
|
18/4/2002
我部電腦又shot左喇...真係無陰公~!趁我仲可以開下佢,真係要話聲俾大家知~!如果要搵我地,就電話聯絡我地啦~!如果要報名或查詢學結他,請電82088032搵疆嫂.唔該哂~!!
|
|
15/4/2002
我前一拜買左隻Kiroro精選碟,勁好聽呀!成隻碟既歌俾我既感覺係好舒服,一D都唔會覺得佢煩,如果放工番黎聽真係最好不過喇~!呢隻碟揀既歌曲真係配合得幾好,唔會話覺悶囉,同埋D
melody都好似記,而唱歌把聲又好柔和,完全係識唱之人,絕唔係D傳統日本女歌星果種雞仔聲,值得一買黎聽~!
|
|
9/4/2002
我今日卒之捱埋通宵整埋呢個新網頁，當中我個Friend---Bonnie都俾左好多意見我同幫左我好多,否則依家仲係整得一頁半頁...唔知點算喇...!其實Bonnie話我今次整個網頁太花，咁又係既，比起之前果個，又真係好花！但係，整整下個網頁又越黎越鐘意Ｄ圖畫，都係唔捨得delete住．．．！而今次個照相館我就一改作風，試下將自己既家庭照擺上去，目的係除左俾Ｄband友睇我呢個網之外，我地其他親友都可以上黎睇睇！最近有好多親友都話好耐無見我個仔，又話叫我湊埋佢出黎見下，鬼咩！近拜個仔特別奀皮＠！想哂個仔出黎威都有一定難度！次次都鬧仔收場．．．唉∼！放過我啦∼！依家我擺Ｄ我地Ｄ家庭照上黎，希望能慰解各親友既單思之苦啦∼！
|
|
3/3/2002
我今日聽番噚日我買既碟---
Violet Indiana , Secrect Garden新碟;Violet Indiana呢隊野真係正到唔知點形容~!佢係由Cocteau
Twins個結他手Robin組成,玩既類型同feel都係同以前既Cocteau
Twins一樣.都係有一種好教堂feel但又好飄既感覺,如果又係好似我咁,又係Cocteau
Twins既樂迷,咁就真係一個好好既選擇~!無左Cocteau Twins,依家就有隊Violet
Indiana俾你慰籍下無左Cocteau Twins既痛苦喇~~~!^^"
至於Secrect
Garden,個感覺好似番左教會聽詩咁,感覺好好~!不過我都係最鐘意Violet
Indiana多D~!
Violet
Indiana官方網址:http://www.bellaunion.com/violet.htm
|
|
6/2/2002
上面咁多網等你地慢慢睇啦∼！唔...其實我都有野想講下既...岩岩過左既二月三日係我牛一，今年既牛一真係比較唔開心既一次∼！不過好感動既係，我老公仔陪住我囉！如果無佢睇住我，我估我依家都唔知死左去邊∼！同埋我牛一之前果晚，即係岩岩過左夜晚十二點果陣，我老公仔班朋友知道我牛一，即刻即席JAM左首生日歌俾我聽∼！真係感動到想喊出黎∼！又將我之前既唔開心忘記左，心情又好左∼！連我老公仔都話，Ｄ朋友真係唔知點解突然間咁熱情∼！哈哈∼！無論點都好，我都會好珍惜呢一班大朋友∼！仲有我個大情人∼∼∼老公仔 啦∼！＼
^O^
／
|
| |
|