大嶼山姜山道有車路直落石壁水塘盡處，穿過鐵閘行落水塘，就會見到一道爛鐵橋樑，後面就係鳳凰山同鳳壁石澗盡頭，真係源遠流長
過爛橋左面有水壩流瀑，流水豐沛但並唔係入口，鳳壁入口
係正面石台林下，入澗冇耐就遇上萬蝶飛舞場面
(好靚呀...咁大個仔都未見過呀...)
群蝶亂舞，成千上萬隻蝴蝶係度飛過不停，場面壯觀，此情此景真係難得一見
第一段澗道悠長，遇有分途記住右行
行佐個幾鐘頭，終於遇到青壁翠潭，可惜冇乜水
由此開始，澗道稍陡，不過上走並唔難
終於行完第一段，去到貝納奇小徑，
就見一個氣勢磅礡既淵谷--猿啼峽
入到猿啼峽，澗道轉左，澗勢急上夾於
雙壁之中，左右都係窮崖惡壁，澗途開始險惡
右邊一幅黑色垂直危崖叫做“鳳羽壁”，擋正係前面，高聳倒懸，氣勢攝人，冇可能爬上去
(好有氣勢呀...有回音架...)
澗左危崖叫“簷崖四壁”，故名思義，崖如簷，險也
澗道直削向上形成一瀑，叫“鳳舞瀑”，
此瀑亦係冇辦法可以爬上去
要上鳳舞瀑，只有一個選擇，就係向左崖
簷崖四壁進發，但極險，除非回頭
開始爬上簷崖四壁既下簷崖...下面
就係鳳舞瀑既小水潭
上到第一層頂。記住上鳳舞瀑只可以左攀簷崖，
雖然右邊有好多絲帶，但果條係一條絕路
係簷崖回望猿啼峽，對面就係鳳羽壁
呢度就係簷崖棧道，只通一人，下臨無底深崖
為咗比大家更清楚簷崖棧道既險，黎幅全景啦
呢張係右邊紅格既放大圖，可見處身簷崖既極險位置，而藍線就係前行既路線，過簷崖棧道之後轉上去既位置，就係全線最驚心動魄既生死位置
再黎一幅猿啼峽--簷崖四壁既全景
再黎一幅全景圖，猿啼峽，簷崖四壁，鳳凰徑，鳳壁石澗第三段，鳳凰門，倒腕崖
進入第三段，成條澗都收窄係雜草樹叢裏面，沿澗上都係石河區
澗道中途見到呢D山桔，體積比提子重要細，連皮食，唔錯
不過D核就多過肉
你可以選擇行石河，如繼續上澗，去到尾段，
就會見到左邊有幅石塔，形狀就好似一隻伏係度既猛虎
上到石塔，由另一個角度睇，就係一塊有眼耳口鼻既人面岩
(佢會唔會一口氣吹我落去架...)
去到鳳凰門可以欣賞好靚既日落石壁，跟住上鳳頂離開
回首頁
回石澗尋幽