22/2 [Sat]
Sabi心靈雞精句： “慢慢地說，但要迅速地想。”
幫葡國小朋友補習中文科
哈哈… 估唔到，一向唔多鍾意中文科既我都可以幫人補中文。 我個補習生叫Sonia，佢爸爸媽媽都係葡國人。 好在，都係小學中文，好在Sonia係讀葡文學校，無中文功課， 又無中文測試考試之類，因為原來葡文學校無中文堂。 不過，Sonia媽咪想佢學好中文，因為想Sonia入一間好既中學。 因此， 我要幫Sonia學好中文，尤其係中文作文方面。 因為Apply中學時，要考入學試，而Sonia上次考過，中文要考作文，不過上次未考入，所以，希望我可以幫到Sonia，等佢可以考好個入學試。 同Sonia補左大概一個星期，佢都好乖，好專心，好肯學。 因為Sonia都有好多生字唔識寫，但係如果作文有字唔識寫，就會「哩咁Hei」，所以我都會俾功課佢做，就係寫生字，第日就會同佢默書。 當然，我無話一定要寫幾多次啦，咁佢會好慘架！我只係叫佢寫到自己認為已經記得點寫，無寫錯，咁就Okay！又會教Sonia用唔同方法造句、作文等等。
今晚煲蘿宋湯
話說，前日，我阿爹攞左個電飯煲俾我，咁我就可以用佢整野食，唔洗下下Microwave：叮叮叮叮叮叮叮。 嘻嘻，繼「燒鰻魚蕃茄飯」之後，我又一力作，就係「蘿宋湯」。 絕對唔係罐頭湯！！ 係自己買野煲架！「勁」~~~成功呀，簡直似模似樣！ 哈哈，個個都讚話好飲！ 不過，煲之前我就攪到好似「倒瀉籮蟹」咁。 哈哈，我用電飯煲攞熱水返房，點知我放得唔好，成個好似人地「食碗面反碗底」咁，跌左落地下… …成房成地水… …之後用地拖又唔乾，最後我係開風扇吹乾達地… …死未。。。哈哈哈… …哈哈哈… …哈哈。
15/2 [Sat]
Sabi心靈雞精句： “對永恆事物的知性理解, 屬於智慧; 對短暫事物的理性理解, 屬於知識。”
元宵節快樂！OR 中國情人節快樂！
尋日情日節，今日元宵節。 呵呵呵~~~ 呵呵呵~~~ 尋日乜野節話? 有人送左支花俾我喎~~~ 呵呵呵~~~好開心啊~~~ ~~~ 原來在傳統上，元宵節會食湯圓，我都係呢一兩日至知道，哈哈。 見今日得閒，所以買左湯圓，陣間返宿舍一齊煮湯圓，一齊食湯圓，有湯圓做甜品啦，Yeah~~~嘻嘻！ 講開食，今晚既晚餐都唔錯，買左我好鍾意食既燒鰻魚，用黎配蕃茄飯！ 係咪聽到都好想食，漏晒口水呢！ 好正架！ 簡直令人回味無窮！ 正！
Management要做Group Project…
6個至8個人一組，希望唔好人多手腳亂啦！ 不過，個Project就好麻煩，要做類似分析既野。 每組，寫一份Report有關0個間公司點apply其中兩種Management Functions。 仲話喎，如果做一間中國內地既公司，就會有Bonus喎… …唉~~~ 老師總會用誘惑既方法俾麻煩你… …
返左都一個星期學，乜堂都上過晒。
因為，我想簡0個0的Lecturers星期三，六先有堂，而星期一，二，四，五都有我想要既Lecturers，所以攪到我呢家一至六都要返學。 不過，都好既，可以分散0的堂，時間無咁緊迫。 又唔晒一大早起身，又可以放得比較早。
9/2 [Sun]
Sabi心靈雞精句： “被擊倒並非最糟糕的失敗, 放棄嘗試才是真正的失敗。”
新春佳節過了, 明天要上學了
新年之前, 睇左好多VCD呀! 最好笑係「人妖打排球」（嘻嘻… 我係咪好Out呀… 哈哈!）不過真係好好笑, 我仲睇左好多次, 睇完又睇。 初一就開始要到處拜年, 直到沉日。 其中只有三天唔係去拜年, 哈哈… 日日都訓到日上三竿, 聽日9點半就有堂… 唔知… 起唔起到身呢…
「人體奧妙展」
7號同菜菜子去左睇「人體奧妙展」! 滿腔熱誠約過好幾個朋友一齊去睇, 一唔係話去左, 就係話好驚唔去… … … 其實, 都無乜野值得驚吖! 不過, 有少少失望, 因為講既野, 大概一個理科學生都基本會知道的, 而只係有真實的人體標本放在眼前供人細看及觸摸。 一點也沒有嘔心或反胃的感覺, 反而, 越睇越肚餓。 哈哈… 離開前, 還買了Postcards and Poster!
流星花園今晚大結局呀!
杉菜真係堅強! 好利害呀!