26/11 [Tue]
嘩! 今日寫左好多野呀! 請慢用啦!
尋日, 星期一, 日本隊要離開了
我最後都係無上Business, 去左送日本隊走, 話晒都好大機會唔會再見到
所以曳一次都要啦!
>_<
真係好唔捨得佢地
我地交換左地址, 我諗我地會KeepContact
今次幫「第十七屆澳門特殊澳運會」做義工, 學到的比我想像中還要多
這次的經驗中, 還讓我體會到很多平時少遇到的事情。從他們起初的害羞, 話語不多, 漸漸大家對我的熱情, 到最後不捨得的心情… …我怎麼能夠忘掉? 雖然, 相對的時間不多, 只有3日左右, 但當中建立的友誼, 簡直難以形容。可能明知時間不多, 自然會好珍惜。領導及教練對我都好似女咁看待、而運動員他們對我十分熱情, 常主動同我玩, 閒談, 佢地仲夾埋玩我添呀! 哈哈… 佢地真係好可愛
一般人都話, 日本人出晒名團體
以前, 都體會過何謂「Team Sprite」但係, 今次日本隊, 令我覺得佢地出名有團體性, 確實唔係浪得虛名! 做熱身運動時, 大家自動圍圈, 動作一致, 沒有偷懶。
在3人籃球賽時, 佢地每個都為對方打氣。即使打得不理想, 球員會大聲向大家躬身道歉。本應亦在幫他們打氣的我, 心都不由自主地跳左出黎； 打氣既情緒都早已變成感動情緒了, 場面實在令我十分十分十分十分十分感動。 叮叮叮叮叮叮叮! 我感情咁鬼豐富, 少少野都可以感動到喊, 所以其間不段叫自己唔好喊, 但係因為場面真係好感人, 我今次都好叻啦, 忍左好耐呀! 不過, 之後有一個日本隊隊員不慎被撞倒, 整個人倒下來, 嚇死我啦! 佢又不段咁喊喎, 問佢有無事, 有無受傷, 佢又話無。可能佢係怪自己力不從心, 打得不好吧! 全隊人都安撫佢, 安慰佢。你話我仲點忍得住! 真係醜死怪!
為左唔好俾人見到, 見佢無乜事, 另外一個義工就陪我出去喊左一陣
哈哈… 不過, 呢0的並非唔開心既眼淚, 亦唔係可憐他們既眼淚, 而係, 因感動而真情流露的眼淚。我知道, 做緊野一定要忍, 如果唔係就會嚇親人。但係, 真係好感動呀!~~~ 忍唔到啦~~~Herrr Herrr聲~~~之後, 有個教練知我喊, 叫我唔好喊。事後我同番佢講, 我話係因為佢地既Team Sprite而感動。他不但沒有表現出半點驕傲, 反而處之泰然, 實在值得叫人學習。感覺就好似做戲咁, 原來在現實中, 日本人真係咁樣。我覺得自己好有幸, 能夠親身體會, 真正感覺到確實係寧舍唔同。那個場面, 我諗我唔會忘記
星期日晚, 我地有個「第十七屆澳門特殊澳運會」慶功宴
宴上, 每個國家都有表演時間, 我當然有為我的日本隊打氣啦! 哈哈… 佢地表演唱歌跳舞, 係一首童謠, 哼俾你地知就一定知道係咩歌
不過, 要講到表演得最好, 非菲律賓隊莫屬啦!
佢地個個簡直係Dancing King呀~~~! 全場氣氛達到高潮, High到暈呀! 有一個出位到, 好似佢開緊個人Show咁! 簡直係自信及力的表現。一字記之曰:「勁」! 我映左好多相, 有機會俾你地睇丫!
同智障人士相處過之後, 他們的天真, 他們的無憂, 他們的歡樂, 使我真的嚮往。如果全世界都可以係咁, 你話幾好! 起碼, 佢地唔會有假面具：開心就盡情開心, 唔開心就盡情唔開心, 連氣憤發脾氣的都會很真情表露! 沒有一點隱藏的感情
佢地都有送記諗品俾我呀!
我諗都係隨身的東西。有個教練仲叫我同佢入一間店選一條電話繩話要送俾我,我無簡到呀, 我話唔晒客氣, 而且又唔好意思啦都, 哈哈! 最後, 佢就送左佢親手做既錢包俾我! 整得好好架! 哈哈… 男人之家咁有心機, 好難得! 所以, 星期日夜晚返到去即刻反轉間房, 睇下有乜可以送俾佢地。本應係想買, 但係早到晚都要帶住佢地, 跟本抽唔到時間去買, 早得濟又未開門, 夜晚又收晒。好在, 我都有0的儲備~~~! 哈哈… 攪到成2, 3點, 終於攪掂! 星期一, 即尋日送他們離開既時侯就送晒俾佢地嚕!
我們現在已活在幸褔之中：身體健康、沒有戰亂、沒有潦倒的生活、有父母親無私無限的愛、有朋友呵護備致的關心及鼓勵。我想你地知道, 你們每一位對我來說都好重要, 我會珍惜你們每一位, 我會珍惜我所擁有, 我會與你們分享我所擁有, 無論如何我都會珍惜眼前一切。 我並非何等偉大, 但我希望我可以帶給你們歡樂, 令你們感到開心愉快。
大家係咪好感動呢!
肉麻都要講句, 「我係真心架!」^_^
簡直一波未平, 一波又起
前晚, 有人搵我去演Drama呀!
簡直開心興奮到跌渣啦!
雖然唔係Main Role
有得參與已不錯!
因為X'Mas Holiday之前內地學生會有個Party係酒店攪
所以我諗呢個係其中一個節目!
呢個故事好似叫「小美人魚」
係個童話故事
佢地話會以英語歌舞劇的型式
又有靚衫, 又有宮廷舞, 又有晚宴…
聽落都好吸引
我就係做小美人魚的姐姐
好在都有少少跳舞既經驗
其餘仲有3個左右都係做小美人魚的姐姐
呵呵呵…呵呵呵…呵呵呵…「美人魚」呵呵呵… 呵呵呵… 呵呵呵…
SaBi係美人魚, 呵呵呵…呵呵呵…呵呵呵…
22/11 [Fri]
原來, 我係幫「第十七屆澳門特殊澳運會」做義工
有香港, 日本, 陝西, 河北, 中華台北, 菲律賓
所謂「特殊澳運會」, 係指障人士澳運會
所有隊伍都係今日到
而我就係負責日本隊!
我個Partner(我唔識佢), 臨時有事, 直頭Quit左
好在我一個人帶都可以話攪得掂
所以, 呢幾日我都會同佢地一齊
星期一上晝, 佢地就會離開
至衰星期一有堂
因為我好想送他們
走一堂Business得唔得呢?
嘻嘻…
哎呀, 講開Business
Jacky Sir 話我個Mid-Term考得比佢想像中差呀!
好傷心呀, 令阿Sir失望左添
唉! 講番義工0的野先
今日6點到碼頭接日本隊船
好少去碼頭唔係返香港而係去接人, 哈!
見到佢地, 每個都好有善
笑著臉同我講「Kon Ni Chi Wa」
當然, 我梗係有同佢地講番句「Kon Ni Chi Wa」啦!
14人之中有7個係正常
都係領隊和教練
我地都係用英文溝通
不過, 因為他們的英文…唔可以話人地英文唔好
但係就有時都好難溝通到
所以, 我會畫圖
同埋, 有時都會用下日文
哈哈, 我學左0的日文終於有用啦!
呵呵呵呵呵~~~
接船之後, 我地就去食晚餐
之後, 帶他們到達住宿的地方
安頓好一切我地才走
都攪到差唔多十點先至走
因為, 都要安排好多野
資料又幾遲先俾到我地
所以, 起初都會覺得有0的亂
但係之後, 好彩都攪掂左
在車上, 四國語言, 好攪笑~~~
因為車上有不同語言的人
所以, 講完廣東話, 又講普通話
之後就到我用英文溝日文同我個隊解釋番
哈哈, 好好笑…
另外, 我個隊有個叫Hiroki Kawaguchi
Kawaguchi San 佢好得意
又好主動咁成日同我講英文
佢仲講左佢個女朋友個名俾我知添呀!
哈哈!
可能我係第一次接觸智障人士的關係
有好多野對我黎講都係好新鮮
雖然他們係智障人士
但係其實同正常人差唔多
反而我覺得他們比正常人可愛得多
聽朝730就有車接我
我諗今晚我一定要睇熟晒0的野
如果唔係聽日又唔知做乜咁就唔好啦
聽晚Dinner我唔可以同佢地食呀…
因為, 小妹參加左個比賽
哈哈, 至於係咩比賽
等我入到決賽先至話俾你地知啦
哈哈… 雖然, 你地未知我比咩賽
不過, 記得同我打氣喎!
我諗大概7點到10點幾掛
因為我都唔知個Schedule, 唔知幾時到我
不過, 只要係地係呢段時間諗下我
同我打氣加油, 我一定可以收到架!
記住啦!
同我打氣呀!
20/11 [Wed]
Daddy, Happy Birthday!
今年正日又返唔到黎添
上星期同你慶祝左, 嘻嘻, 算係咁啦掛!
之前, 去左跳Steps
失準~~~“咬柴”~~~
好在無大礙
不過就成個跌低坐左0係度
我諗係人都見到, 因為Dance Room
三面都係鏡, 你只要望到鏡都會見到…
真係“菸”到跌渣!
下次要小心0的, 專心0的先至得!
我好Update架, 連“跌渣”都識講, 嘻嘻!
仲有一句就係: “噼啪你個𠾐啲咚”
還有兩首歌仔, 聽住啦!~~~
“大笨象會跳舞, 馬騮仔會上樹, 狐狸會打關斗; 山豬山豹山羊, 山中一隻老羊, 望見老孫發牛豆”
第二首就係: “哎~~~ 靚仔靚仔我愛你哎~我~愛你; 靚仔靚仔我愛你哎~我愛~你; 靚仔我愛你, 愛你愛你愛你愛你靚哎~~~”
呀! 仲有急口令:
“水邊一隻牛, 草邊一隻牛, 水邊0個隻牛嫁俾草邊0個隻蠢牛牛, 牛公牛‘那’牛生牛, 牛牛牛牛牛牛牛”
嗒住黎講都仲得架!
嘩! 你話係咪好叻呢, 只係睇左上個星期五個集同尋晚個集就記得咁多啦
哈哈… 死未!
演紫薇仙子既阿嬌~~~好靚呀!
不過, 就算佢好似平時咁都夠晒靚!
紫薇仙子有首同哪吒既詩, 不過我只係記得最後一句:
“心有靈犀一點通”
黎緊幾日, 我同宿舍朋友都會去做翻譯義工
好似係0的唔知咩特殊奧運會
可能係傷殘人士運動會, 又可能係智障人士運動會
不過, 都唔係好知詳細情形
就係因為咁, 我0的朋友又擔心會唔安全, 驚俾人呃
唔知呢, 我乜都無諗過就Join嚕
係因為我無佢地咁有危機感
定係我過份樂觀呢?
我同佢地講, 我諗如果佢地可以係我地學校招攬人手
應該先有校方批准
所以, 我估應該無大問題
但係, 聽佢地講又話只要5, 6 個學生
咁少人都得, 就有少少問題
不過, 佢地可能會0係其他學校招攬人手
所以, 只要6個都不足為奇
但係, 司濛佢都真係成日話我諗野諗得太美好
今晚我地6個會去同0個個人開會
不過, 講真都唔知佢係邊個, 只係知佢姓關
唔知仲有無其他人
又唔知去Office, 定係去邊度
佢地話, 人生路不熟
所以佢地同我講話好驚
我? 唔驚, 有乜好驚喎
一有唔妥, 咪即走
我地唔會出事既
不過, 今晚就睇唔到孫悟空啦!
10:30pm~~~~~~~
喂, 我開完會返黎啦!
都話唔會有事架啦!
^_^