我看《鹿鼎記》

　　其實我係中一睇《鹿鼎記》所以D細節已經唔係好記得，但係《鹿鼎記》令我對金庸小說產生濃厚既興趣。

　　《鹿鼎記》主角韋小寶大家都應該聽過，可能睇過電視劇、可能打機知道故事內容、睇漫畫、都可能係真係睇過原著。韋小寶搞笑鬼馬人人皆知，之不過，冇睇過原著的話，你並唔會深深體會韋小寶搞笑鬼馬既程度係點。由於我睇完太耐，所以一時諗唔起咁多笑料例子，只有幾個。

　　韋小寶戲弄沐劍屏一幕還記得嗎？我就係因為呢一個片段令我最喜歡沐劍屏，屏兒係個天真無邪既小郡主，韋小寶要令佢留底，就o係佢塊面胡亂搽D野o係佢塊面道，後黎又話要搽珍珠就去左買珍珠比佢，佢番黎既時候，沐劍屏點左佢穴，令韋小寶郁唔到，但係韋小寶扮到死死o下咁，話沐劍屏點左佢死穴。沐劍屏功夫又未練得到家，給韋小寶一講，就信以為真而且唔知點做。韋小寶戲弄佢，要佢同佢講三聲好哥哥...太多啦，總之...呢段係好好笑

　　仲有一個簡單既例子，假太后o係床底發現韋小寶，便自然咁樣講...

太后：「是你？」

韋小寶：「不是我。」

　我真係唔記得咁多，但係我相信，如果睇《鹿鼎記》而唔笑既人，一定係無情感既，當你心情低落既時候，大可以睇o下《鹿鼎記》，會令你開心番好多！你會因為韋小寶而覺得呢個世界歡樂係自己找架...

　　《鹿鼎記》除左講一D國家既事，我覺得《鹿鼎記》我最喜愛睇既...係韋小寶同康熙既呢段友情，當你睇完全本《鹿鼎記》之後，你會對友情有另一種睇法。你會比韋小寶天真無知對義氣既理解感動，你會讚嘆天真先至係處世之道。當天地會既義同康熙既情發生衝突既時候，情義兩難存，韋小寶佢既退出...

　　講起《鹿鼎記》不能不提既係佢o個七個老婆，一直我都覺得奇怪，點解韋小寶只係個十幾歲既小朋友，但係就可以享齊人之福呢？七個老婆真係唔講得少，韋小寶並冇話個個都愛得一樣深，偏愛的...當然係阿珂，因為係韋小寶唯一一個刻意迎娶既老婆，得來不易。金庸強調既唔係有多個老婆既好，而係想人諗o下，現今夫妻失和而發生既事，婚外情、殺妻、小小事便要離婚等等...但係點解韋家既媳婦們卻個個以禮相待，情如姐妹？實在值得現代人反省...

　　介紹到呢道，唔知你有冇對《鹿鼎記》有多D既了解呢？希望你地會去睇o下呢本社會縮影既小說啦！