السادة رواد الموقع الأعزاء |
خرج ابن آدم م العدم قلت:ياه
رجع ابن آدم للعدم قلت :ياه
تراب بيحيا و حى بيصير تراب
الأصل هو الموت ولا الحياه؟
عجبى !!!!
ضريح رخام و السعيد فيه اندفن
وحفرة فيها الشريد من غير كفن
مريت عليهم ..قلت ياللعجب
لاتنين ريحتهم ليها نفس العفن
وعجبى!!!
ياما صادفت صحاب وما صاحبتهمش
وكاسات خمور وخمرة وماشربتهمش
اندم على الفرص اللى انا سبتهم
والا على الفرص اللى ما سبتهمش
وعجبى!!!
الكون دة كيف موجود من غير حدود
وفيه عقارب ليه وتعابين ودود
عالم مجرب فات وقال سلامات
دة يامافيه سؤالات من غير ردود
وعجبى!!!
انا شاب لكن عمرى ولا الف عام
وحيد ولكن بين ضلوعى زحام
خايف ولكن خوفى منى انا
اخرس ولكن قلبى مليان كلام
وعجبى!!!
ياباب يا مقفول ...امتى الدخول
صبرت ياما واللى يصبر ينول
دقيت سنين..والرديرجع لى مين؟
لو كنت عارف مين انا كنت اقول
وعجبى!!!
ولدى نصحتك لما صوتى اتنبح
ما تخافش من جنى ولا من شبح
وان هب فيك عفريت قتيل اسئله
ما دافعش ليه عن نفسه يوم ما اندبح؟
عجبى!!!
مرغم عليك يا صبح مغصوب يا ليل
لدخلتها برجليا ولا كان لى ميل
شايلينى شيل دخلت انا فى الحياة
وبكرة هاخرج منها شايلينى شيل
وعجبى!!!
دخل الربيع يضحك لقانى حزين
نده الربيع اسمى..لم قلت مين
حط الربيع ازهاره جنبى .....وراح
وايش تعمل الأزهار للميتين؟؟؟
عجبى!!!
اوصيك يا ولدى بالقمر و الزهور
أوصيك بليل القاهرة المسحور
وان جيت فى بالك اشترى
عقد فل لأى سمرا.وقبرى اوعك تزور
وعجبى!!!
انا قلبى كان شخشيخة اصبح جرس
جلجلت بيه صحيوا الخدم و الحرس
قمتوا ليه خفتوا ليه...انا المهرج
لا فأيدى سيف ولا تحت منى فرس
وعجبى!!!
جالك أوان ووقفت موقف وجود
ياتجود بدة ياقلبى يا بدة تجود
ماحد يقدر يبقى على كل شىْ
مع ان عجبى!كل شىْ موجود
وعجبى!!!
أحب أعيش ولو فى الغابات
اصحى كما ولدتنى أمى وأبات
طائر..حوان..حشرة..بشربس أعيش
محلا الحياة.....حتى فى هيئة نبات
وعجبى!!!
السم لو كان فى الدوا,منين يضر؟
والموت لو لعدونا ,منين يسر
حط القلم فى الحبر وأكتب كمان
العبد للشهوات ....منين هو حر
وعجبى!!!
أيوب رماه البين بكل العلل
سبع سنين مرضان وعنده شلل
الصبر طيب ...وصبر ايوب شفاه
بس الأكادة ...مات بفعل الملل
وعجبى!!!
دخل الشتا وقفل البيبان عالبيوت
وجعل شعاع الشمس خيط عنكبوت
وحاجات كتير بتموت ف ليل الشتا
لكن حاجات اكتر بترفض تموت
وعجبى!!!
لولا اختلاف الرأى يا محترم
لولا الظلطتين ما الوقود انضرم
ولولا فرعين ليف سوا مخاليف
كان بيننا حبل الود كيف اتبرم؟
وعجبى!!!
دى مذكرات كتبتها من سنين
فى نوتة زرقة لون بحور الحنين
عترت فيها ..رميتها فى المهملات
وقلت صحيح أما كلام مخبولين!
وعجبى!!!
ياللى انت بيتك قش مفروش بريش
تقوى عليه الريح يصبح مافيش
عجبى عليك حواليك مخالب كبار
ومالكش غير منقار وقادر تعيش!
وعجبى!!!
الدنيا من غير الربيع ميتة
ورقة شجر ضعفانة ومفتتة
لأياجدع تأمل و شوف....
زهر الشتا طالع ف عز الشتا
وعجبى!!!
hossam rezk
E.alborg
damyatta
egypt
tel.0108444047
