Berlin es urbe kun du centres - le grupe de cheri hoteles, drinkeries, cinemas, butikes cirkum le Memoral Kirke, brilianti nukleus de lume, kom falsi diamante, in le meskini krepuskule del urbe; e le ipso-konsiant urbe-centre de edifises cirkum Unter den Linden, sorgosim aranjat. In grand international stiles, kopies de kopies, iles aserte nostre dignitate kom chefurbe - parlamente, du musees, stat-banke, katedrale, opera-teatre, dek-du ambasades, triumfal arke; on oblivied nulum. E iles omni es tantim pomposi, tantim korekti - exept le katedrale, kel revela in su arkitekture, fulmine de ti histerie, kel vasileta sempre arier omni gravi, grizi Prusian fasade. Extingat da su obskuri kupole, ile es, unesmi vido, tantim shokantim droli ke on sercha nome aptim absurdi - le Kirke del Sinmakuli Konsumo.
Ma le veri sine de Berlin es mikri humidi nigri boske - le Tiergarten. Durant isti anu-parte, le kolditate forseska le rurani yunos departa su mikrisi nonprotektet vilajes en le urbe, por sercha nutrivum, e labore. Ma le urbe, kel adorad tantim briliantim e atraktivim in le nokteciele super le planes, es kold e kruel e morit. Su varmitate es ilusion, miraje del vintre-dezerte. Ile non reseva isti yunos. Ile have nulum donabli. Le kolditate renda iles fuga ek su strades, en le boske kel es su krueli sine. E ibi iles blotisa sur benkes, hungrant e frostant, e reva pri su lontan rurhause-fornes.
traduktet da James Chandler, 2007