Le filme A Scanner Darkly (cirkumim: Observile Obskurim) es fondat sur le romane de siencie-fiktione da Philip K. Dick. Ile eventa in non tre lontan future in Usa, in socie konstantim observat e samtempe adiktet na le droge 'Substancie D'.
Le direktiste del filme, Richard Linklater, usad le rari teknike "rotoskopa" por produkte le aspekte de grafi noveles: le filme bli surpikte da esakdre de artistes. Dunke isti filme es realmente du filmes: le original filme bli totim surkovra per le piktet imajes. Le efekte de isti teknike es tre original e totim apti por isti filme.
Le komplote del filme es komplexi, e unesmi-ves on forsan non pove komprense omnum kel eventa. Le aktores (inklusent Keanu Reaves, Robert Downey Jr, Woody Harrelson e Winona Ryder) es omni tre impresivi. Le rakonte have kelki surprisos proxim le fine.
Le alti nivele de observation in le socie de Scanner es kelkim familiari: ile es simil kam nostre socie de hodi, solmente le motive por le paranoia es diferant: in nostre monde ile es terorisme; in Scanner le motive es droges. Dunke le rakonte serva kom interesanti spegle de nostre monde in 2007.
Por ilustra le paralelitate kun nostre epoke, Linklater adi un karaktere kel non esed in le romane da Dick: le Usani radio-hoste Alex Jones apari brevemente sur le strade por protesa kontre le observation. Isti adition emfasa mem plu fortimente le konektion kun nostre monde de hodi.
Kom resume, io vel rekomenda isti DVD-filme ad omnes, specialmente fanatikes de siencie-fiktione, e tes kel have intereso pri le problemes de nostre propri socie.
James Chandler, 2007
A Scanner Darkly in le IMDb e che Wikipedia.
On pove kompra isti DVD-filme che Amazon US
e Amazon UK.