|
Petsa: Hulyo 03, 2005
Simbahan: Diocesan Shrine of Immaculate Concepcion, Naic, Cavite
Pari: Fr. Nonilon Tibayan
Oras ng Misa: 4:00pm-5:00pm
Pamagat: Kahinahunan
Gospel: ---
Paunawa: Ang sumusunod na pagninilay ay ang buod at pagkakaintindi
lamang ng inyong lingkod sa homilya ng pari. Ang aking gamit ay batay na
sa sariling interpretasyon.
Pagninilay
Ang kalakasan po ay nagmumula sa
kahinahunan.
Mga kapatid, marami sa atin ang nag-aakalang
ang sinumang gumagamit ng pisikal na lakas, armas o anumang pwersa laban
sa kapwa ay silang higit na makapangyarihan. Samantalang yaong
mahihinahon ay madalas na inaapi at sinasamantala.
Sa katotohanan, yaong gumagamit ng armas
at pwersa ay silang higit na mahihina. Nagsisilbing sanggalang nila ang
ganito upang ikubli ang kahinaan sa kanilang kalooban. Madalas pa,
silang mga padalus-dalos naman ay silang malimit magkamali, samantalang
ang mahihinahon at mapayapang nagsisipag-isip ay silang nasa matuwid.
Sa atin pong lipunan, laganap ang
karahasan at sigalot. Sa panonood na lamang ng telebisyon, sinasabi sa
isang pag-aaral na sa isang oras na pagharap sa TV, 30 iba't ibang klase
ng karahasan na ang makikita. Maging katatawanan, cartoon, drama o iba
pa--mula sa simpleng salita, hanggang sa matitinding batukan, armasan at
patayan--may karahasan.
Sa isang inilahad sa Bibliya, kung saan
isang babaeng nagkasala ang noon ay inaalipusta sa harap ni Kristo,
handang batuhin hanggang sa mamatay ng maraming tao, si Kristo ay
nanatiling kalmado. Hindi Siya naghusga, nagsabi ng masama o gumawa ng
anumang mali. Sa paglalahad sa kanya ng mga tao hinggil sa kamalian at
nararapat sa babae, nagsalita si Kristong kung sinuman sa mga tao ang
walang kasalanan, mauna na sa pagpukol.
Ang atin pong lipunan sa kasalukuyan ay
nahaharap sa matinding krisis--nasa gitna ng kontrobersya ang liderato
ng bansa, kaugnay ang pulitika at ekonomiya. Sa ganitong yugto, marami
ang tumatawag tungo sa karahasan. Ito po ang pagkakataon nating maging
mapayapa. Gamitin natin ang wastong pagninilay, at kumilos ng may
kahinahunan sa lahat ng bagay.
Petsa: Hunyo 26, 2005
Simbahan: Diocesan Shrine of Immaculate Concepcion, Naic, Cavite
Pari: Fr. Nonilon Tibayan
Oras ng Misa: 4:00pm-5:00pm
Pamagat: Pag-iingat ng Buhay
Gospel: ---
Paunawa: Ang sumusunod na pagninilay ay ang buod at pagkakaintindi
lamang ng inyong lingkod sa homilya ng pari. Ang aking gamit ay batay na
sa sariling interpretasyon.
Pagninilay
Ang bawat tao ay may tinatawag pong
instinct. Ang ganitong konsepto ay maiuugnay rin sa Law of Survival.
Sapagkat ang bawat isa ay may kalikasang pabor tungo sa kaligtasan ng
sarili, natural kung gayon na ang isang taong nasa bingit ng panganib ay
iligtas ang kanyang sarili.
Halimbawa, ang isang taong nakitang
mababagsakan siya ng isang bagay mula sa itaas ay agad na tatakbo palayo
upang huwag mabagsakan.
Subalit kung pakikinggan ang sinabi ni
Kristo, na sinumang nag-iingat sa kanyang buhay ay mawawalan nito, tila
magkakaroon ng kalituhan. Ngunit huwag tayong magulumihanan. Kung atin
pong pagninilayan, may kakayahan ang bawat isa sa atin upang lagpasan
ang ating kalikasan. Kumbaga, we can go beyond our instincts.
Kung atin pong maaalala ang trahedya ng
Pagoda sa Bulacan, kung saan daan-daan ang namatay sa ilog, isang bata
ang noon ay naroon. Bagaman nakalangoy na siya upang mailigtas ang
sarili, nang maalala naman ang kanyang kaibigan, muli siyang bumalik
upang iligtas ito. Namatay siya subalit naligtas ang kanyang kaibigan.
Sa isang barkong papalubog naman na may
byahe mula Cagayan, may apat na madreng bagaman suot na ang mga life
vest, ay nagawa pang ibigay ang mga ito sa kapwa. Sa pangyayaring iyon
ay nasawi ang mga madre.
Sa atin pong buhay, maraming pagkakataon
upang lagpasan ang anumang dala ng kalikasan. Ang buhay na siyang
pinakahigit nating maiaalay, mawala man dito sa lupa, ay mabubuhay
magpasawalang hanggan sa piling ng ating Poong Maykapal.
|
