Day 1 | Day 2 | Day 3
 
     
 
View Larger Map  		  
 
 
  更多照片 (167) ..  
     
 
.■ Day 1
 
     
 
往紐約出發
朝早七點由多倫多出發往尼亞加拉大瀑布﹐大約一個半鐘頭後到達彩虹橋過美國邊境。路程同我前幾日去波士頓嘅係一樣。過多一個多鐘頭後停第一個休息站﹐呢個休息站亦都係同前幾日一樣。今次又係食Roy Rogers﹐但係今次唔係食雞包而係食炸雞﹐味道一般。

購物Part I﹕The Crossings Premium Outlets
中途停咗幾個休息站﹐四點半到咗The Crossings Premium Outlets。呢個 outlet 唔算大但係都有唔少嘅店鋪。呢個 outlet 幾特別﹐因為呢個 outlet 有一小部份係有兩層。但係同其他 outlet 一樣﹐就算二樓都係室外所以冬天去一定要著多幾件杉﹐如果唔係冬到無心情行。
     

晚餐
晚餐去咗一間呃鬼佬嘅中國自助餐廳。雖然有好多海鮮﹐但係其實大部份都唔同款式嘅蟹柳﹐仲要係唔好食嘅蟹柳。價錢係USD $18。

新年倒數
今晚住宿係一間離市中心幾遠嘅喜來登酒店。因為返到酒店都幾夜又好累﹐所以就冇去到時代廣場倒數。最後都係喺電視度睇倒數﹐雖然冇現場咁熱鬧但係都一樣開心。
  
     
     
 
.■ Day 2
 
 
世貿遺址
今日一早七點幾去曼克頓Pier 17附近行。由於係一月一日嘅關係﹐平時好多人好多車嘅曼克頓變得非常之平靜﹐想揾個人都難。間間店鋪都唔開或者係下午先開。最後行咗去世貿遺址 (World Trade Centre Site)。同我前幾年去唔同咗好多﹐2004年時﹐附近有好多牌介紹9/11襲擊事件。今次去完全唔覺係世貿遺址﹐周圍嘅圍板就好似普通嘅地盤一樣﹐但 係周圍有好多警車。
     

洛克菲勒中心
下一站就去咗洛克菲勒中心(Rockefeller Centre) 。雖然已經一月一日﹐但係周圍都仲有好多好靚嘅聖誕裝飾﹐有好濃厚嘅聖誕氣氛。到咗十點﹐洛克菲勒中心附更既街道已經開始多人﹐附近嘅店鋪亦都開門。街道 上有小販賣熱狗同紀念品。臨走前去咗參觀紐約嘅主教座堂—St.
Patrick’s Cathedral。教堂入口有警察﹐教堂內周圍都有好多保安。間教堂裡面好靚﹐值得一去。因為聖誕嘅關係﹐祭台旁邊有一個好大嘅馬槽。
     

     

購物Part II﹕Woodbury Common Premium Outlets
經過一個多鐘頭嘅車程﹐下午一點半終於到達Woodbury Common Premium Outlets。呢個算係呢個旅行嘅主要「景點」。呢個 outlet 係北美數一數二﹐個 outlet大到要超過一個鐘頭先行得完一個圈﹐唔計你入去店鋪購物。我差唔多行咗兩個圈﹐買得比想像中少。我以為美國而家經濟差所以會好平﹐雖然一定平 過出面﹐或者加拿大﹐但係唔係真係平得好緊要。行到五點去咗 outlet裡面嘅一間餐廳Positano Grill食晚餐。我叫咗一個雞扒餐﹐個汁裡面有少少酒﹐色香味都有十個正。特別嘅係啲餐包每個都唔同形狀﹐細細個﹐幾好味。我叫咗杯蔓越橘汁 (cranberry juice)﹐係用一隻酒杯裝住﹐支飲管幼到得兩毫米﹐每次只係吸得少少果汁。最後外賣咗一件紐約芝士蛋糕返酒店食﹐可能因為等咗成兩個鐘頭先食﹐件蛋糕 唔係太好食。六點半就回程返酒店。
     

     
 
     
     
 
.■ Day 3
 
 
購物Part III﹕Waterloo Premium Outlets
今日七點鐘離開酒店﹐經過幾個鐘頭車程後去咗一間全日供應早餐嘅餐廳Denny’s 食午餐。我叫咗份超巨形嘅早餐﹕兩隻抄蛋﹐兩條腸﹐兩塊煙肉﹐兩塊班戟﹐一塊火腿﹐薯餅﹐再加一杯蔓越橘汁﹐幾好味又夠飽。再過多幾個鐘頭後就到Waterloo Premium Outlets。 呢個 outlet 其實我四日前先去過﹐但係今次買得多過上次。主要喺Aeropostale 買嘢因為有啲貨係三折﹐再加上coupon 有得再減﹗經過一個多鐘頭後就到尼亞加拉大瀑布﹐到邊境嘅免稅店購物。除煙酒之外有啲護膚品幾平﹐幾抵買。經彩虹橋返加拿大。今次過加拿大境只需要護照加 埋購物單據﹐唔洗帶買咗嘅免稅品入海關。一個半鐘頭後就返到多倫多。

     

     

【完】
  
     
 

更多照片 (167) ..

 
Copyright © 2009 Henry Lam. All rights reserved...