 |
Siberiaj Memoretoj
Al la memoro de Leonido Breĵnevo
La Cionisto kiu pafis Roberton Kenedion
Siberia Memoreto
originale verkita en Esperanto de
Liland Brajant ROS’
  |
Subite, homoj komencas aŭdiĝi en la koridoro; pli kaj pli ili laŭtiĝas. Frapado ĉe la kupea pordo. Mia patro stariĝas kaj iras al la pordo, malfermas ĝin. Konsterno! La koridoron plenŝtopas homamaso tian, kian ni neniam vidis en Sovetio. Kvazaŭ Tokianaro preta por la metroo. Ni ne parolas ruse. Mi ankoraŭ ne scipovas Esperanton. La solaj homoj en la trajno, kiuj scipovas kaj la anglan kaj la rusan — la usona diplomato kaj la novosibirska profesoro — supozeble ebrias kaj ĉiuokaze ne disponeblas. Dum mia patro elfosas sian poŝ-vortaron, iu viro trabaraktas ĝis la fronto de l’ amaso, kaj kiam Paĉjo revenas al la pordo, tiu viro levas sian manon al sia orelo, kun la fingroj etenditaj por ŝajnigi pistolon, kaj diras laŭte kaj klare: "Robjert’ Kjenedi’, PĤĤJJUUŬ!" Ni ne bezonas komunan lingvon por ekkompreni la teruran novaĵon, ĵus diskonigitan de la trajna radio, ke Roberto Kenedio mortis. La sintrudema mimo sidiĝas kun mia patro kaj kune, per la vortaro kaj kelkaj komunaj germanaj vortoj (por esti pastoro oni iam devis lerni la germanan!) Paĉjo kunmetas la novaĵon pli detale:
En Losanĝelesa hotelo Roberto Kenedio estas pafmortigita de iu cionisma teroristo.
Kiam ni atingis Moskvon ni provis trovi pli multajn detalojn, sed ni ne sciis la telefonnumeron de la ambasadejo (ŝajne ne ekzistis telefonlibroj) kaj la plej novaj vendataj eksterlandaj tagĵurnaloj — la francaj kaj italaj komunismaj gazetoj — estis tro malaktualaj. Nur post nia alveno en Helsinkio, preskaŭ semajnon post la okazaĵo, kie ni povis aĉeti la Parizan Heroldon-Tribunon, ni informiĝis, ke la pafinto, Sirhano Sirhano, ne nur ne estis cionisto, sed estis motivita parte de la amikemo inter Israelo kaj (eventuale prezidentiĝonta) senatano Kenedio.
Tiu somero de 1968 estis nervoza tempo en Sovetio kaj Eŭropo, ne nur en la Tet-frapitaj Usono kaj Vjetnamio. Eble vi memoras, ke ne longe antaŭe mortpafiĝis d-ro pastoro Marteno Lutero Kingo (juna); Ĉeĥoslovakio sub la reĝimo Dubčeka estis eksperimentanta pri humana socialismo (kaj timiganta Breĵnevon); laŭ la famoj aŭdeblaj en Siberio, ŝajnis probable ke tio estos la lasta somero de kapitalismo en Parizo ... kaj tamen, (ju pli) ĉio ŝanĝadis kaj (des pli) ĉio restadis senŝanĝa!
Kio estis, tio estos; kaj kio estis farata, tio estos farata;
Kaj ekzistas nenio nova sub la suno.- La Predikanto 1.9
(Полюшка поле-ды)
Marŝa kanto de la Sovetia Ruĝa Armeo
MIDI
- Klaku por salti al:
- La Frontpaĝo de La Lilandejo
- Paĝo pri Mia Vivo
- Mia Rusa Hejmpaĝo
Urlo de tiu ĉi dokumento :
http://www.oocities.org/lilandr/lbr/junagxo/cionisto.html