XORTÊ DEWA MA
  TEZEKİ BERDÊ TAMİR
  GOLIKE
 ŞANIKA PEPUGİ
 YARA MI
 ÇÊNA XALI
  MEMIKÊ MI
 KOÊ BİNGOLİ
 SEYİD MUSA
  MERHA BA VARTO

XORTÊ DEWA MA
 
Dewe de zaf xorta wendêne, zafêrê xo ki bi bi malım. Dewe amnani biyene şên, zımıstani biyêne xırabe; pêro xorti, zımıstani şiyene mektebe, malımi ki şiyêne sukanê binade domani dêne wendene. Azebi dewe de mendêne, ebe şar şıma waştêneke wa bıbo amnani. Zerê her jü azebe de xortê bi. Zafê azeba waştêne ke wa malıma bıcerê. Maa nê azeba ki vatêne: " Ma şênanê xo danıme malıma."
 Xorta ze bıraa jüvinra hes kerdêne. Jüvinde leqi kerdêne. Gege ki destê jüvini guretêne serê mezela de, pêbona de, ware de koti raşt amêne uja govende kaykerdêne. Usi destê xo kerdê ze zurna şımê xo ze Xalisi qılaşnêne ra u zurna dêne pıro: "dü dü du ri ri rayi rayi ra ra narına nay nay nay..."   Bırayi ki daul dêne pıro. Vatêne: "Gırrna kumbıd Gırrna gumbıd Gırrna gumbıd..." Ê bina ki govende kaykerdêne.
Mılet amêne dormê dina de biyêne top u  tenine vatêne: "Ero şıma malımê, şıma solciye; şı ze xêxa kaykenê, no veyve niyo tawa niyo..." Têne mileti ki amêne qaytê xorta kerdêne, hüyene u verdêne ra. Tenine ki vatêne: "Rınd ke şıma estê şıma niya jüvinra hes kenê; lao lao, Heq şıma de bo, Heq şıma verdo, khal u pir kero."
Tewr xemê xorta nêbi. Usi sabaji xo ki dêne arê. }iyêne verê govenji ya u qaytê  wertê şımanê dina kerdêne ke, ê ki sabaj cıdê. İna ki  destê xo kerde cevê xo, qesta perê dênecı. Zurneji ke perê guretêne vengê zurna kerdêne derg u serê xo kerdêne berz; sanki bı raştine perê guretê, rüyê xo zaf biyene şa. Govenji ki zaf comert bi. Çımke destê xo kerdêne cevê xo u dergê zurneji kerdêne. Waxto ke ina sabaj dêne, zaf ki biyêne qure. İsani vatê belki ina bıraştiye sabaj do. Eke govenda xo xelesnêne nafaki jüvinde leqi kerdêne "astê" piê jüvin vatêne.
Pêbona caê xorta bi. Uja biyene top. Pêbona de xorti şiyêne a sere amêne na sero bin. Uja tope kay kerdêne. Uja jüvinde leqi kerdêne. Pêbona de domani niştêne hera u heri vaznêne. Pêbona de xortê  dewe, ze rêfê cucuka cêrenê. Kemerê pêbona ki zafê bi. Gege ki kemeranê pêbona sera nıştêne ro, xorê mucul biyêne. Pêbona de cüni bi. İni bi. Hezoki bi. Wertê hezoka ra, raê şiyêne thaxa Beka. Bınê raê de ini bi; cıra vatêne ini o khan. İniyo khan wertê dı hezoka de bi. Wertê hezoka ra raê şiyêne serê mezela, şiyêne derê pili, uja ra ki şiyêne dala sure. Bover ra,  iniye de bin bi. Cıra vatêne iniye Zoze. Çê Zoze nezdiye ini bi, ayera cı ra vatênen iniye Zoze. A ki zaf qariyêne. Tew, xemê mileti bi ke Zoze qarina.
Ali va:
-Lao bêrê ma şıme iniye Zoze de awxe bışımı me.
Nac hüya qaytê Cemi kerd u va:
-Awxa Zoze şora, ma awxa aê nêşımenime.
Cem bıhers u va:
-Oxlum şıma awxa maa mı nêşımenê wa meşımê. Bêre ma şıme iniyanê maanê şıma de awxe bışmıme.
Pêro pia bi şa; jüvinde leqi kerde u şi serê mezela. Serê mezela honık bi surê de germe amêne. Bêvengiye kewte wertê xorta. Kuli pia  bêveng wertê mezela ra veciya yi averde şi. Uja ra dewa Tata zaf rındek asena. Tenê xorta zeriya xo kerd bi şênanê Tata. İna yeke zeriya xo kerd bi şênanê Tata, bıvıle şewtine qaytê Tata kerdêne; zer u peşkê xo weşêne.
Memi zanıtêne Usi zeriya xo kerda jü şeneke Tata; ebe leqi u hüyayiş, peşıka xo dergê Tata kerd u Usi ra va:
-Ero hela bê ita, qayt ke waştiya to hawa şona şê apê xo.
Mamud va:
-Ero şımê to se roştiye tı se rınd vênena.
Mem hüya u qaytê Mamudi kerd:
-Tı ke mı ra inam nêkena Usi ra vace.
Us hebê esmer bi. Dar u  berê xo hurdi bi. Usi ra qe veng nêveciya, Mamud ke hini va. Esmertina Usi biye sur u va:
-Ba ule ez bı xo tawa nêvenena. Mem xo Heq ra keno.
-Ez xo Heq ra kena hiniyo? Nıka zer u pışke to se veşenê. Tı nıka xo xo de vana 'aax ez nıkaTata de lewê waştiya xode biyêne'
Usi bıvengê de berz:
- Tabi wazena.
Cem qewt wertê qesa.
-Şıma Usê feqır ra vanê şı?
Memi serê xo hejna u va.
-Qa ez zan zer u pışkê to ki ze Usi zêde veşenê. Haş ita iniyo ke wa şıma ra şiyê vaco.
Mem ke qalê Haş kerd pêro pia hüyayi.
 Tenê xorti ki şi hetê deri ser uja, pê xo şarna jüvini u miza xo kerde. Dayera tepiya pêro piya amê her jü kemerê sera niştiro, ancia qaytê dewa Tata kerd. Bi qufe qufa Mamud xoci, destê dê pê qena dede bi, hem serê xo hejna hem ki qese vırna u va:
-Welatê ma zaf welatê de rınd o, hama bêwayir o. Qaytê na deşta Tata kerê, her şi tede beno gewe. Hama mıletê ma hewvan rê xebetino. Ma gere ke her şi bıroşime, hama ma her şi hernenime. Her şi na welate êno. Ma hama vaş şinenime, kenime lode u zımıstani danime dawari. No niya nêbeno!
Mamud xoci destê xo pêqena xo ra verdayra u destê xo na heti ser a heti ser hejna. Se ke malım derse dano telaba hini hevalanê xorê qesê kerd. Ê bina ra qe veng nêveciya. Ê bina ki, heqe dê xoci u serê xo ina ki hejna.
Usê Qılıci hüya wertê herdişa sia ra şımê xo bereqiya qaytê Mamud kerd va:
-Tı raşt vana. Ule ze tuyo. Make hardê Tata ke rınd nêbiyêne hande şêne rındi cıra veciyêne.
Mamud hüya; Usi verê xo şarna Engini cıra pers kerd.
-Hini niyo, tı Heq kena raşt vace?
Engin ra qe veng nêveciya. Qaytê Usê bini kerd u cıra va:
-Bacanax tı bê, tı bê ma şıme, tı goş menê nina ser.
Usi u Engin ke veştra, ê bini ki pêro piya veştra ancia serê mezela ra amê derê pil ra bi derbaz, şi bover lewê iniye Zoze.
 Xorti şi ini ser, awxa serdıne şımıte. Awxa ini kewtêne derêpili. Eke biyêne amnan deropil de awxe biyêne zaf şenika. Hama eke biyêne usari deropil biyêne har, kemeri dar u ber şanıtêne xo ver u berdêne. Piltina xo usari musneno isani. Eke biyêne usari dere biyêne pırê awxe, biyêne gımıyo naliya derêpili. İsan cıra vısiyêne pêra, isan nêtawreno ke cıra derbaz bo. Çen pırdi dewe vıraşti, şen pırdi derêpili kerd xırabe. Kes nê zano, şen mi u şen vereki na awxe berdê? Amnan be amnani; awxe hini biyêne şenıke ke, biyene ze teberık. Mıletê dewe gege awxe sera gelece kerdêne.
Ver verê deri de; darê qewaxi, dare viyali bi; dormê dara ebe kemera kerdo kıfşe ke, her kes sindorê xo nasbıkero. Goroke vanê cao ke nıka dari estê merê dewe biyo. Kam ke amo xorê dari kerdê gewe. Na dere thaxa Bekara nezdi bi ayera darê zaferi ê dina bi.
Bınê dara de, domananê Qıjkeka xorê gol vıraşt bi awxe kerdêne xora. Xorta nê gol de awxe nêkerdêne xora. Çımke şermayine. Domana gol de zaf kaykerdi bi, awxe bi bi ze awxa şiliye. Domana ajne nêzanıtêne. Xo kerdêne berz u dênê awxe ra, tenê domana ki awxe eştêne jüvini.
Xorta tenê qaytê domana kerd. Defêna şi lewê iniye Zoze. İni sera şen azebi niştbıro; helbê dina ini verde bi helbê xo kerdene pırê awxe. Eke xorti ame uja kuli pia caê xo ra veştra qaytê deri kerd. Gule hebê hürdiye biye, wertê azeba de, hama şênede yamane biye. Xorti ke amê lewê dina; aê zanıt ke ê awxe wazene, hona ina qe şiye nêva a verba dina amê u  xorta ra va:
-Ez zan ke şıma têşanê.
Hüyayişi Gule guret hem hüna hemki va:
-Berê xo rê iniye Zoze de awxe bışımê.
  Kuline ke awxa xo mırdi şımıte. Hebê Gule de leqi kerd u pêro pia Gule ra va:
-Heq to ra razi bo.
Usi va:
-Hêya, Ule raşt awxa Zoze zaf weşa. Gulê Heq mıradê to bıkero, wa mêrike de rınd u şıt helal to de veco.
Gule hebê biye sur u qaytê Usi kerd, nê dawrake şiye vaco. Hama Gule qe bınê qesade manena:
-Ma şıma malımê her kes şıma ceno, ma rê ki Heq kerim o.
Kuli pia hüyayi u awxa xo ke şımıte tenê avoro şi, uja  darê viyali bi, sia dara de nışt ro. Usi salê arde vere xo de nêro, cêbê xora qozi veti u va:
-Bêrê ma qoz keme.
Ê bina ki her jü xorê kemerê arde u  dormê sale de gılor niştro.
Memi va:
-Ma vist u jü kaykenime.
Mamudi cığare nêşımıtêne, Memi ra va:
- Tı şen cığara bıde mı, kara ma nêmiya wa.
Memi Bitlisa xo ra, şar phonc cığarê veti dayi Mamudi. Memi zanıtê ke; eke kare bo cığara pêro o cêna, eke zerar bo cığarê dê şonê; qaytê Mamudi kerd u va:
- Lao rınd kaybıke .
Ali qozi  dayi Memi u va:
-Xoce tı banke bıde.
Memi şen cığarê pakêta Bitlisi ra veti serê sale sera nayro; kaxıdi gureti, kerdi têra u kerdi vıla u her jü kaxıtê dêcı.
Ê bina ki  cığarê bitlisi verê xode nabıro.
Kefê Naci cade bi, ê dê zaf şiyo nanende kefê xo amêne. Xo xo de hüyêne; destê xo kerdê fekê xo, phonc mina beşıke xo corde da lewanê xo ra.
Us caê xo ra veşt ra, xo na heti ser a heti ser ard berd tene caê xo kerd rınd u va:
- Lao ma ra şê Usê Dawu vanê; Memo tı kağıtê bıde mı.
Naci qaytê Usi kerd:
-Ma hela kaybıkeme, ma zanıme sebeno.
 Xorta ke tenê ke kağıdi kaykerdi pêro piya xelê bi bi vêşan. Naci qaytê hevalanê xo kerd u cıra pers kerd:
-Ma bime veşan. Çê kamde ma ewro werdene bume?
Mamudi vake:
- Ma şıme şê Mem de non bume ewro kara dê zaf biye.
Pêro piya va:
-Ya
Pêro pia veştra u verba şê Memi bi raşt. Mamud vırniye de hini bi bi tuğ ke handê vace. Destê dê pê qena dê de bi, gınêne kalşa ser u xo na heti ser a heti ser şıkıtêne.  Eke derê pila ra  bi derbaz. Usi qaytê ê bina kerd u bidestê xo Mamud musna ê bina u va:
- Lao lao no kutık se quro. İsan zano ke no biya mudur.
 Mamud hüya u verê xo şar duna va:
-Şıma pêro hona malimê; ez u Kemalê lacê Rıhanê teyna bime mudur, muduriye teniya ki niya ez tornê Gedik Ağa ya.
Usi qesa dê bırna:
-Heya tı tornê Gedik Ağa ya, Us beno zamayê Hüsên Ağa yi. Ma ma feqıra rê ki Heq kerimo.
Xorti kuli piya hüyayi.
Pêro pia amê şê Memed xoci. Çê dina axpin sera hard lerzla ra dıme amê bi vıraştene. Dormê şêyi kerd bi pırê daranê qewaxi u daranê yemişi. Wertê dara ra vayê de qıjke ke biye, vaye de her waxt tenê awxe biye. Awxe wertê dara ra vecine; verê şêveri ra derbaz biyene, ancia qewtêne wertê daranê axpini  u verocê axpin ra wertê dara de biyêne vila.
 Verê şêveri de jü şırtıke biye. Eke awxe amêne şırtıke ra beyêne derbaz biyêne xuşe xuşa awxe. Germê aşma amnaniya pêêno, sia dara zaf honıke, baxşe de xuşe xuşa awxe, dara sera şucuki ze bılbıla wanene. Vaşê bınê dara bırno biyo şimen. Dormê baxşi, duwar kerdo ke şiyê mekiyo wertê dara. Dara yemiş guret bi, gılê dara amênê ke bıresê hard. Tı vana belki ceneto.  Fatma ki  wertê dara de nışta ro xorê şay şımena.
Qesê Fatma ki zaf weş bi, isan waştene goş daê ser no. Xorta daê ra aê xorta ra zaf hes kerdêne. Aê ke xorti di va:
-Gelê xocaa şıma xer amê şımanê mı sera amê. Lao lao şıma rınd ke amê, şay yê hewaltine dayina weşo. Berê ma xore ronişime hem şay bışımıme hemi ki xorê qesê bikeme. Ule na sia dara ki zaf honika. Heq Mıstefa ye mı ra razi bo ke nê dari nayro.
Mamudi va:
- Anna Fatma tı ebe şay nêxelesina ra, tı gere ke perocê ma rê hazır kerê. Ma kuli zaf bime veşan.
Anna Fatma ki va:
-De berê ronişe; Heq şı nesip kerdo ma ê wenime. Ule ez hini nişta ro ke xora nêvênena ki rauzi. Nêzo şênê sekenê, şêderê şêde niyê?
Fatma qêrê:
-Erê şıma şê derê, bêrê ita tever, xorta rê şiye perociye biyarê.
Gulcemale amê tever u va:
-Abê şıma kuli pia xêra amê. }ıma şı wazene, ez şıma rê şı biyari?
Mamud xoci va.
-Waê şı hazır esto ê biya.
Ali va:
-Tenê non u dorax biya ma xorê ebe şay bume.
Gulcemale şiye zere, tenê ke mende ancia amê tever. Nonê tendure, toraxo weş u rono teze ard. Malıma şopi vıraşti nonê xo ke werd. Nafaki dare ra sai kerdi cıra saê xo ebe solê werdi.
Fatma ki jü saê kerde sole, eke saa xo werde vake:
-İsan zano ke şıma wendo. Seki tamê fekê xo zanê.

TEZEKİ BERDÊ TAMİR

Reqasa u Segıre dı dewe  zafi ki züvin ra nezdiyê.  Reqasa dewe de xormeçika wa, Segıre dewe de Lolica wa. Piya yê Segıre ke şiyêne suke, amêne Reqasa ra niştêne ereba ra u şiyênê suka Gımgımi.
Reqasa ki dı dewe; cıra vanê dewa cori u dewa cêri. Dewe cori zaf dewe de khana. Hama dewa ceri hardlerzla dıme ama vıraştene. Xıdê Elê Kare dewa cori de niştênero. Rocê şodır ke veştra rüyê xo şut. Nonê xo verd ceniya xora va:
-Herê aê qajocaxı  biya, ez xo de beri Gımgım, uja belki tamir keri.
Cêniya dê ke, şiye qajocaxı biyaro, ê xo xo de va hama vaşt ke wa cêniya dê bıheşno; ayera hebê bi vengê de berz:
-Bê qajocaxı qe nêbeno.
Cêniya dê qe çiye nêva u şi qajocaxı ard u kerd zerê jü çuwalê de sipi verê merdê xo de naro. Şiyê karê xo ugurê xo.
 Xıdi tenê mend u çêra veciya verbe dewa cêri şi. Dewa cori de erebe çinê bi. Gereke şorê dewa cêri. Mıletê dewa cori ke şiyene suke, dewa cêri de gege amêne erebe şiye; gege amêne ereba de ca çinê bi. Ayera Xıd  bıvaştene amê dewa cêri ke wa bıreso ereba.
Eke amê dewa cêri verde şi lewê ereba u mıleto ke ereba da cıra va:
-Ez na u şona çê muxtari ponc deqêde êna. Mıst ke amê, cıra vacê wa mısera vındo.
Çabık çabık şi çê muxtari, uja torbê xo yate de naro şi oda meymana; muxtar oda de nıştoro ewraqa nê xo de niyadêne. Ê selam da muxtari u dê de tenê qesê kerd. Waxto ke muxtari kaxıtê de imza kerdi; a sıra de tevera ereba dudıke depıro. Xıdi tewr qaxıde xo nêgureti bıecele yate ra çuala xo gurete u vecia tever. Muxtar dedime amê tever u qêra:
-Nenê bra Xıdır qa nê qaxıtanê xo ki bice.
Xıd hüya va:
- Nenê ci de aqılê mı bo. Qa ezi ki seba nê mêratarê şona suke.
 Xıdi qaxıtê xo muxtari ra gureti u kerdi cebê xo ebe vaştene amê;  bı hılkahine nişt ereba. Zerê ereba pırê mıleti bi qe ca bile çinê bi ke ronişo. Mılet sanke jüvini sera niştbiro. Tenine jüvini thanda u tenê ca da Xıdi. Xıdi ke caê xo guret, hona selam da mıleti u torbê xo ki verê xo de naro.
Ereba ke amê suke. Xıd verde şi lewê tamirci wa qajocaxi xo vırazo. Hetan qajocaxı bêro vıraştene o ki xorê kar u gurê xuyo bini keno.
Xıd verba dukanê Memê tamirci hem şiyêne, hemiki xo xo de qesê kerdêne.  'Eke zede fiyatli tamir kero, ez tamir nêkena. No Mem ki zaf kutık o. tamir mebo ki beno. Dewe de tezeki zafê ma xorê idare kenimê. Qey yanê peranê xo fuzili bidi. Peranê ke dana Memê tamirci xorê çiye de bin cena.'
Xıd ke kewt zerê dukani, selam da Memi. Eke fekê torbê xo kerd ya ke tezekê.
Se kerd ya se veciya tever qe kesi fam nêkerd. Xıdi nê zana ke sebikero. Nê tezeki kotira amê? Cêniya xora bi hers xo xo de va' ancia a çêna kutıki, hera golige nê tezeki dayi mı. Ez kerda rezil. Nezo Memi di ya nêdi?'
Xıd zerê suke de  hem cerêne hem ki xo xo de qesê kerdêne: 'Lao nê tezeki se mı ardi ma qajocaxi xo sekerd?  Qajocaxi ki xelê fiyatli ma gureti bi.'
 Xıdi ke karê xo da arê; tenê çimi mimi xorê herina u verbe garaji şi. Ereba Mısti uja biye şi pê şofêrde niştro. Mıleto bini ki amê nişt ereba. Mılet zafo tenê Reqasa cori rayê, tenê Reqasa cêri rayê tenê ki Segıre rayê. Mısti ereba xo ke rıd kerde pırê mileti; işê pır kerdene bi, ereba feko qenera kerdi bi pır.
Mısti mawene xora va:
-Şo bılêta arêde.
 Mawene Mısti bılêti kerd top u berdi dayi Simsar u perê xo gureti u  kewti raê.
Xıd xaftla qêra u  va:
-Gelê cirananê Reqasa, phonc deqê koş mısernê, ez şıma ra çiyê
 vana.
 Mıleti vengê xo bırna, Xıdi ebe hüyayiş va:
- Şıma zanê ewro jü lolıji se kerdo?
Qe kesi ra veng nêveciya Xıdi ancia hama ebe vengêde hurdi:
-Ewro jüye de lolıji tezeki berdê Gımgım ke wa tamir kero.
Qerebelıx kewt wertê mıleti. Her fek ra çi yê veciya. Derde kişta şoferi de nişt bı ro cıgare fek te  bi. Hetan nême kerd bi hit. Fite fita daê biye. Xıd ke qesa xo xelesnê. Derde xo pêde çarna u qaytê Xıdi kerd.
-Lao lao to herdişa xo kerda sıpê tı qey züri kena. Kamo tezeka beno tamir? No kam ji hero niya keno? Xo Heqi ra meke.
Rüye Xıdi hebê bi sur nêzana ke vaco çı . Hebê tede mend. Bıvengede şenık qaytê piyanê Segıre kerd u pêçıka xo dergê dina kerd.  Bıvengêde tersonık va:
-Ma tı qey mı ra bena hers, qa mı tezeki nêberdê tamir, qa jü loliji berdê.
Mısti vengê Xıdi bırna bıhüyayiş:
-Nêne hela kewra ra pers ke tezekê xo tamir kerdê ya nêkerdê?
Alê suri:
Qayte piyanê Segıre kerd u va:
-Nenê bra şıma qey niya xo no qernayişne? Qa şıma ki çiyê vacê.
Piyanê Segıre qaytê jüvini kerd pêro pia ebı jü veng:
-Bra Haq bo Ali bo, ma bı xo bêşıkime, bra Ulahi kesêma nêşiyo tamir, neki çımê ma gıno tamırji ra.
Derde ancia qewte werte u va:
- Ohi şıma mıletê Reqasa dest... Heq hevz u imanê isani şımara bıkero. Her waxt kar u gurê şıma niya ro. Êbi xo hertine kenê, defêna ki kenê Lolıjanê feqıra ser.
Alê Segıre:
-Waa Derde mı çıçıke to buwerdêne. Tı teyna ke cuanıka Qesa de ma bıxo Reqasji ya nêşikime, belki tı hêfê ma bıcêrê.
Derde daina biye xure u  verê  xo çarna Alê suri :
-Hela qaytê mıno anê alêhini darê. Ê ki hera xo vere çê verê xo de xeneqıte kerd Lola ser.
- Derdê derdê xo Heq ra meke ma mı qey xeneqıte Weysê Segıre amê dewe ke arda bero. Hera xo dara verê çêverê ma ra gırêdê u hera feqire xeneqıte.
-Hışbe lao Alo xo Heq ra meke, ezi ki Segıre ra niya tı mı qankena. Çımanê xo çar ya ke, u qaytê mı ke; ez Derda.
Derde hetê Segırjiya guret hama ancia ki fayde nêkerd.
Xıd sond weno vano:
- Qa ez zan jüyê Segirê ewro tezeki berdi ke wa tamir kero.
Eke Xıd niya vano mıletê Reqasa hünê; ê Segıre ki sond wenê hama kam inam keno.
Ereba ke amê  dewa cêri de vınete, mılet ereba ra bi piya. Her kes verbe çê xo şi.
Xıd verba çê muxtari  şi. Muxtari  deste qajocaxi bi o ki verba Xıdi amê.
 

GOLIKE

Teze şodıri pêra guwr kerdêne, Mem gıran gıran cıla xora veştra cêniya dê hona hewn de biye. Qemiş nêbike cêniya xo rauzno. O bı xo veştra kıncê xo day xo ra; tene çimi mimi kerd top u şi tever. Tevera qayt kerd ke mılet kuli hao heranê xo bar keno. Bi bıle bıla Memi ancia amê kewt zere şi cila cêniya xo ser niştro, bıdestê xuyo çep cêniya xo hejnê.
-Lilika mı, qıdayê to indi rauze, ma herê kewtme. Şar kuli şi ware ma teyna mendime.
Gulizare ki veştra caê xo de niştro u ebe kıncanê xo cerê eke kıncê xo di, qaytê merdo xo kerd u va:
-Hela aê kıncanê mı bıde mı.
Memi kıncê cêniya xo dayici, aê ke kıncê xo day xo ra Memi ki tê yardım kerd.
Hurdima pia amê verê çêveri. Galê xo, cılê xo u gab qacaxi ardi tever. Çen heri bar kerd u heri kerdi lacê xo Cem ver. Hürdima pia şi tawlah. Mem u Gulizare qe jüvinra nêvisyêne. Nıka lilıka Memi şona ware Memo feqır teyna dewe de sekeno. Mem rew rew şono ware hama cêniyê ware Memi qarnêne. Ayera Mem seranê veri, ebi şewe şiyene ware.  Mem hebê tari ra tersêne. Memo feqir seba lilıka xo, ters nêzanıtêne u her çi kerdê çımanê xo ver u şiyene ware. Yaki Gulizare çiye kerdê mane Memê xo ardêne ware. Mem hela emser çı mane keno ke şoro ware.
Gulizare Memi ra va:
- Ma se bıkeme na golıka ma sawiya ma se beme ware?
Mem:
-Çualê de gırs biya ma cıkeme, ez erzen pışta xo ma gıran gıran oncinme we şonime ware.
Gulizare şiye zere ra çulalê de sıpê ard. Memi golika xo kerd zerê çualê u fekê çualê tada u eşte bişta xo ser, Gulizare ki kerga xo gurete hurdima pia qewti  raa wari ser. Xêlê ke şi. Mem zaf qefeliya nezdiye kaşê sur de niştro bina xo gurete
Memi qayt kerd ke golike qe nêlekena. Fekê çuale kerd ya ke çı ya kero  golike par nê perar merda.
Merdena  golike zaf zorê dinara şi . Gulizare şone ware ke şıt u mast, ron u torax biyaro. Nawa golike ki merde, manga ki bena züya. Mal u davarê xuyo zafi ki çinê bi. Gulizara feqıre sebıkere. Yacero, bero dewe qe nêbena, çen pesê xo estê eki germa ver benê züya.
Mem hem kewt golike ver, hemi ki zanıtêne ke  mıletê Reqasa pêbıhesiyo indi ê helak kenê. Kılama erzenê ser, awake nê biya anê Memi ser.  Mem se bikero ke kes mezano ke, ê kolıke kerda zerê jü çuale u xeneqıta.
Domanê Segıre ke cıra verdi ra, ê ki şine waranê xo. Mem hüya u lilıka xora va:
-Ma indi na golike kenime Weyse Segıre ser .
Gulizare qaytê merdê xo kerd va:
-Ma golika xo bıkışime u Weyse Segıre serkeme Ule çiyê rınd. Niya qe beno?
-Gulizara mı, mı qıdayê to, ma ke mekeme Lola ser, tı zana mıleti Reqasa ma weno.
Gulizare zanıtê durumê Reqasjiya, ayera qe vengê xo nêkerd.
İndi Mem şi koti na mesela qesê kerd, Golike, xeneknaine eşte Weysê feqır ser. Reqasa ra na mesala biye vıla. Amnani wertê wari de, wertê palade  na qesa amê vatene.
Eke Weys pêhesino, şono Mêmi zaf kuno u vano:
-Lao ma şıma, mıletê Reqasa dest şıme qoti, şıma pêro hertina xo erzenê ma ser.

ŞANIKA PEPUGİ

Beno nêbeno jü çêneke beno jü ki bıraye daê beno. Hona ke nê zaf doman benê maa dina mırena. Piê dina xorê zewecino. Xorê jü cênike ano. Na cênike zaf hoqebaze bena.
Lewê piê domana de, na vana:
- Mı qıda u bela ê şıma guretêne. Ez şıma ra zaf hes kena. Ez hürinda maa şıma dera.  Ez  ferqe nêkena wertê şıma u domananê mınê bina.
Piê dina xo xo de vano 'çı cênike de şıt helal; mı de veciye, qaytê mıno domananê mı kena'.
Waxto ke piê domana çê de nêbeno.
Na domanara vana:
-Domanê her u kutıka, mı çi de fegê piê şıma kerdêne. Şıma biye bela ê sere mı. Ez seb keri? Ez şıma deste kamta şori?
Domani, na hoqabaza zürekere ra zaf tersenê ayera qe çiye piê xo ra nêvane. Na hoqabaze domana zaf xebetnena. Domani şone tever xebetine, êne zere xebetine. Gege zaf qefelinê. Domanê cirana bona sera kaykene. Nê ki wazene ke şore lewê domana de kaykerê hama dêmariya xora nêtahrene.
Roca ra roca de usari bena. Vare vileşnaro, koi benê belekiye, gul u sosini vecine. Mal u dawar zêno. Beno çive, çiva çucukê. Derê bene pıre awxe, beno xuşe xuşa u gure gura awxe. Dewe bena şen, Mal u davar şono tever. Domani şone selxı ver. Waxto ke selxı verdane mali. Beno qare qare vereka bızeka.
 Milet şono hêluge, şono so, şono sunga, şono rıbêsa u kengera. Pêro werdena xo çolara anê. Tar u ture usari zaf o. Tar u turê usari qe qedino.
 Dêmariya domana vengê domana dana u cıra vana:
-Domanê cirana şonê tar u turê usari anê, şıma ita zere de biye poyini. Urzêra, urzêra şore çol.
Layik vano:
-Daê  mebe hêrs tı çı wazena, mara vace ma şıme biyame.
Dêmarya dina ina ra vana:
-Anê turıki bıcere şore ma re kengera biya rê. Ez na şande germıya doi pocena.
Waê jü turık, jü ki zengene cêna, layiki jü xılçıke ceno u şone kengera.
Waê u bırayi şone çol. Raê ra xorê mücül benê. Layik zaf kefê xo êno. Waa xo de leqi keno. Waê ki vana:
- Mı qıda u bêla to guretêne zaf xo mekefelne. Hona raa ma düriya.
Layik vano:
Ma zaf kengera biyame. Çımke ez zaf germiya doi ra hes kena.
Waê vana:
-Ero germıya doi rê zaf kengeri lazım niye.
Bıra vano:
- Nê, nê wa bo, ma zaf kengera biyame.
Nê şone jü tümi sera kengera danê arê. Waê jü kenger wena jü ki dana bıraê xo.
Vana:
- Qaytê ne jü kergeri teyniya wenme. Ê bina danme arê.
Bıra vano:
 -Ya.
Waê zengene xo cena turık dana bıra xo. Bıraê daê ki  turık erzeno vılê xo u ebe xılçıka xo kengera veceno. Nê xelê kengera danê arê.
Waê vana:
- İndi beso, ma şıme dewe. Make herê bukime dêmarya ma mara mıradina.
Bıra vano:
-Hêya waê tızana.
Nê kunê raê ser êne. Waê vırniyede, bıra daê dıme eno. Layik zaf kefelino. Waa xo ra vano:
-Waê ez zaf kefeliya ma tayê bina xo bıceme.
Waê vana:
-Hêya bıraye mı, ma tayê bina xo bıceme.
Nê waxto ke nişenê ro waê qayt kena ke turık dıpo talo. Qe jü kenger tede çino.
Waê bena hêrs vana:
-To qey kengeri werdê? Nıka ke maşime çê dêmariya ma mara bena hêrs. Ma kuna. Ma cıra vanme çı?
Bıra sond weno.
Vano:
-Heq bo, Ali bo, Xızır bo ke mı kergeri nêwerdê. Mı ke jü kenger werdo ez meresi çê.
Waê zaf dêmarya xora tersena. Bıra xo inam nêkena. Qerena u zibena. Nê zana ke se bıkero? Bıra beno bêteseli waa xora vana:
- Waa mına rındeke; tı zana ke ez to ra zaf heskena, tı zana ke ez züri nêkena. Tı ke mı inam nêkena be zerêmı de qayt ke.
Waê bıraê xo merednena ra u ebe kardi vêrê bıraê xo qılaşnena ra tede qayt kena.
Qe kengeri zerê bıraê da de çino, jükek teyna zere dero o ki aê bı xo dabi bıraê xo.
Na vana:
- Bıra urzera ma şıme çê indi herê kewtime. Urzera, urzera!
Bıraê xo nata hejnena bota hejnena. Qe hış u pış cıra nêvecino. Bıraê xo kena vırana xo. Qayt kena ke bınê turıki dırıyo.
Vana:
- Mı qıda u belaê to bukretêne. İndi urze xo ser.
Na zaf tersena sekena bıra nêvezenora. Aqıl êno sere ke, aê biraê xo kişto. Têw teze bıra, bıra par nê pêrar merdo.
Na idi zana ke aê bı xo bıraê xo kişto. Na berbena dana xora. Bıraê xo kena qevsingê xo.  Na qêrena u zibena; dana xora rüye xo pıncır kena. Qeri u zibayina daye hard u azmeni  keno qule. İndi teseliya nayê bena.

Na ana bıra xo şüna, peşena têra, kena mezele.
Mezele sera zaf berbena. Dina xo bena tariye, nêzana ke se bı kero. Mezele sera dest u pau kena xo ver. Neşikina ke şoro dewe. Xo xo de vana 'ez se şona dewe, ez milet ra se vana, ina ke bıraê mı mıra pers kerd; ez çı cevabe xo dana.'
Na Heq u Eli re dua kena vana:
-Heqo tı  mi têyre ke, ez ko be ko bıfeteli. Seba derdê bıraê xo rê bınali u bıwani. Heta dina esta ez bınali u bıkali.
Heq dua aê ano ca a bena têyra koyi; namê xo beno Pepug. Usar ke êno pepug nişena gıle dar u beru ra ko be ko fetelina.
Vana:
-Pepu, pepu,pepu!
-Kêko, kêko!
-Kam kişt? Mı kişt!
-Kam şüt? Mı şüt!
-Pepu, pepu,pepu!
-Kêko, kêko!
-Kam kişt? Mı kişt!
-Kam pêşt? Mı pêşt!
-Pepu, pepu,pepu!
-Kêko, kêko!.....

YARA MI!

Ez  to ra zaf hes kena. Heşt seri, ez to ra dür biya. A waxt handê zamet nêbi. Nıka çayê to zaf aseno. Tı zaf kuna mı vêri. Mı nêzantêne ke niya beno; mıke bızantêne niya zameto, mı tı nêruşnêne. Hona ke tı ita biya ez pişman biya, jü ki tı zaf manena. Nêzan qey ma niya kerd. Çê ma wo teze de pia bıvınetêne çığa rınd bi. Belki tı ebe mı huna, tı vana ke: "Ma se beno ez ancia êna". Ez zan ancia tı êna, hama ez nıka lewê to de bibiyene çığa rınd bi. Tı zaf rındeka, tı hêcaê dınya wa. Tı ke lewê mıde ra ez xo zaf rınd vênena. Tı ke lewê mıde niya; ez van belki, dınya mı biya xırabe. To hona ez fam nêkerda, belki mı nêmusna to. Hama se beno, wa bıbo ez to ra zaf hes kena. Ez lewê to de niya ayera nêvan. Qe nayede zur çino; ez to ra zaf hes kena. Tı zê melegana, tı melega mına. Ebe kelıma nêno vatene ke ez bınıvisni. Ma ez teze xortê niya ke to xapnena. Bê to, dınya mı bena cenem u xırab. Bê to ez nêm isana.
Tı  zana ita senêno. İsan ke teyna bo, nê kes to ra pers keno, ne ki halê to diyar beno. Tenê hevali estê, ê ki ze şarê ma nêbenê. Tı ke şiya, to ra dıme, mı en zaf kelıma "HEJ " heşna. Mıletê itay zaf qesê nêkene. Tı nina mı ra zaf  rınd zana, ez qey to rê nıvisnena.
Rınde ka mı, çêna xali, melega mı. Eşqo ke mıde esta, o eşq hona to nêdiyo, ya ki mı nêmusna to. To gegane mıra vatêne ke " tı ze robotana".  Robotı hes kerdene nêzane ke. Hama ez robote niya ke. To ke na vatêne, mı ki xo xode vatêne "belki ez zaf teyna menda coka tı mı ra niya vana." Nê yara mı nê, ez ze robot niya. Êmi ki canê mı esto, hemi ki, ez isana ra zaf hes kena. Mı ke isana ra  hes nêkerdene, ma qey halê mı niya biyêne.
Tı zana mı vızeri kınci şüti. Çımke waxte kınca to kerd bi kıfş. Kınce Pia mı bi. Waxto ke mı kınci şüti; tı u Pıa mı kewti mı veri. Ayera dıme maa mı ame mı veri. Pêniye de nışta ro u berba.  Gula mı tı zana ke ez to ra hes kena hama emrê to rınd nêşi hetan nıka. A ke to diye oncia to diye.
Maa mı ebe axa mı şiye. Waxto ke merde ez lewê daê de nêbiya. Xezuka; ez uja lewê maa xo de biyêne, mı ki xo re deste maa xo buguretêne u qevsıngê xo kerdêne. Heya ma kuli mırenime; isan waxtê merdene de lewê jüvinede nêbo a zaf zor o. Ma sebiyêne, ez uja lewê maa xo de biyêne.
Waxto ke ez welat te, hona ke xort biya, mı serê xo nêne qoranê maa xo ser, ze domananê qıjke ka, mı maa xo de kaykerdêne. Xezuka; maa mı biyamêne ita, wa çen roci lewê mı de meyman biyêne, mı xizmeta dayika xo bıkerdene.
Maa mı hero mı rê duwa kerdêne. Çen roci veri merdena maa mı. Mı maa xo de telefonde qesê kerd. Aê va: "Ero bawo tı kulê derde mı nêzana. Tı zaf kewta mı veri. Mı tı bıdiyenê, wa qey ke, Heq ruhımı bukretê."  Mı ki va: "Tü di daê êno to veri,  to mı ra vatêne ke 'Lao lao Heq kamjiye xera, aê bıkero.' Belki na xera ke na biya. Daê tı qe mereq meke, halê mı zaf rindo. Seba mı düşünce de to çinê bone." Defêna aê va ke: "Ero tü dı; mı tı kerda weyi, kerda pil, nıka ki, tı şarı ra vana daê. " Mı ki va ke daê tü di vane: " Welatê şari nêbeno welatê isana, maa şari nêbena maya isana."
***
 Ma şarê xo ra kewtime düri.  Ma rındekey u demokrasi pêro dugelanê binade  cêrayme.  Pêro rındekey ki, demokrasi u zereweşaye ki made biye. Ma goş nêne pilanê xo ser. Şime kıtaba de Stalin wend. Stalin jü diktator bi. Waxtê dê de demokrasi sovyete çinê bi. Gerege pêro piya ze dê fıkır bıkerê. İna eke ze dê mekerdêne, ê dêne kiştene. Stalin zaf hevale xo day kiştene.
Hona ki ez fam nêkena, qey zaf mordemi zereweşiya ma nêvênene.  Şonê cawanê bina ra niyadane. Çiyo ke mara düriyo şone ê ma rê anê. Verde gereke isani xo nasbıkere. Pilanê ma vato ke: " Xo nasbıke ke, şari ki to nas bıkero!"  Kalıkê M. Emin vatê ne: " Sen seni bilki sen sen olasın"   oncia watene "İyiler iyidir."  Çı wazena made esto. Qesa pilanê ma, dina de kewti mezela dina.
Made zereweşiye esta. Na zereweşiye demokrasi o. Ma kesi goş nêna pıro. Ma demokrasi dugelanê bina de cêrayme. Ma xo ra kewti me düri. Ma tarıxê xo nêzanime hama tarıxê ê bina zaf rınd zanme. Çiyo ke êma nêbi kefêma te amê. Ma bime Tırk, ma bime Kurmanc, hama xo nas nêkerd. Ma ko ra  verde va "dağ" pêdo va "çiya". Ma ware ra va "yayla" ya ki va "zozan".  Waxto ke ma namê nêne domanane xo ra şiyene name Tırka yaki ê Kurmanca nêne pıro. Ma qe fam nêkerd ke, qa êma ki zono. Made ki namê estê. Çımke isan senêno, gereke hini xo bumusno şari. Ma xo nas nêkerd şime şaro bin naskerd. Ma pi u kalıkê xo nas nêkerd, pi u kalke şari nas kerdi. İsan verde gereke koka xo nas bikero. Şaro bin verde koka xo nas keno, pêdo wazena şarê bini naskero.
Tı zana isanê itayi se nêno. Ze ma niye,  ma tenê isana kenme ze Heq. Şarê ita verde xo nas kene. Çımke vane ke:"her çi isana de esto." Pero insani ze züviniye. Nê isana ra heskenê. Qe kes, kes ra ne rınd, ne ki xırabo. Nê ki ze pilane ma vanê: Pero dınya Heqi isana rê vıraşta.
Tı Bo Görani  zana se nê piya o. Çê Bo Göran'i zaf rınd o. Uja tı pero çiya nê rında şikina bıvene; zereweşiya, demokarasi, Heqa merdiyo cêniye. Ê meriki, pêro çi, xo de diye. Caanê bina de qe nêcero. Pêro rındekey xo de, cênıka xo de u çê xo de di. Ayera têpiya welatê xo rê, mıletê xo rê yardım kerd. Qe kes ra çiye nêwaşt.

***
Yara mı, êwro Murad Stockholm de ro. Ez teyna çê de ra, ezi ki nawa to rê na mektuve nıvisnena. Çê ma zaf rınde ko. Darê ke verê çê ver derê zaf biye rındeki. Baxçe zaf biyo rındek. Dara goze u erige zaf meyve guretê. Gulê to yê ke, zerê çêyi de ki zaf biye rındeki. Seba dina mereq meke. Ez rınd kaytê çı kena. Her çi zaf rindeko. Hama teyna bine, qe rınde niya. Ez se tevêr de  teyna ronişi?  Bê to qe nêbeno. Tı naye indi gerege bızanê. Hela welate xeribiyede isan teyna qe nêbeno.
Piya mı zaf kewta mı vêri. Ez zana ke aê ez xo vêra kerda. Hama a qe mı vêra nêşona. Waxto ke a nêrdıgana ra onciyêne u şiyene qatê seri. Her waxt çımanê mı vera qe nê şona. Her dem tı u Piya  çımane mı verde rê. Teynabine çığa zora. Hona ke mı vêrdero ez vaci: Piya des u şeşê aşma amnaniya pêhênede şona Eldonet . A teze bena des u ponc aşmi. To di pilanê ma vatene ke. "Rocê êna ke maê ewladê xo erzena. " Tı vace na a roca. Se ma Piya xo şodır  benme uja çaverdanime u şande cenme anme çê. A feqirê se idare kena. Ma se keme ez xebetina tı şona mekteve. Qe kesê ma, ita çino ke qayte Piya ma kero.
No xebato ke ez nıka tede xebetina  benê Östersund . Teze jü xebetê de bin anê ita. Tı zana verde ez telefon ser xebetiyêne. No xebato teze radio ser o. Jü ki ez wazen ke jü xebatê binde bıxebeti. Hevali wazene ke, ez dı heftê şori Linköping .  Hemi ki waxto tı êna ita. Ayera mı nêwaşt. Çımke qe nêbeno. Tı ke ama, ez ita nêbi, kiletê çê yi bile tode niyo. Qayte çığa zoro. Tı ke ayta biyêne, ma xo rê mucul biyêne.  Gore daye ma ki çiye kerdêne.
***
Rındeka mı indi tı se kena? Welat de çı esto, çı çino? Tı zana ke, mı na des u çar seriyo ke welat çaverdo. Welat zaf kewto mı veri. Xezuka ezi ki nıka lewê to de biyêne.  Ez zan, tı Estenbol dera. Hama uja ki  şenık xatırê ma çine. Eno to veri, sera 1977 de, ez  İspir de malım biya. Ez pêhesiyake tı şiya Estenbol, ezi ki  ama Estanbol. A waxt tı waştiya mı biya.
 Rocê ez u to , Xalisê zamayê mı u Gulşa waa mı, ma xo rê şime zerê Estanbol de cêrayme. Make amême çê kalikê to ma ra mıradiya va ke: "Ero lao lao aybo, şermo, şıma  qe şermo haya nêkenê, şıma de qe şerm çino, hebê bışermayıne utam bıkerê.  Ş ıma hona nêzeveciye... " Pirıka to vengê dê bırna u cıra mıradiye. Va ke : " Qayte mı no, nê ke rê, nênê to rê çı lazım, to herdışa xo kerda sıpêh xo rê cayê xo de ronişe u qarışê domana mebe. Ano sebiyo domani xo rê şiye cerêh."
Roce ki ez u to jü ki  xalıka mı (Amıka to) ma şime resmê xo onıt. To ke, o resm di xo de biya. Ê resm de ez zaf rındek veciya bi. Qa tı zana ez xortina xo de zaf xosera biya.
 Estenbol rındeko hama welatê ma, ma rê tayina şirın o. Xezıka ez ki  to de biyêne, ma piya bışiyêne dewa ma. Nıka amnano dewe  şiya ware. Ze weri tenê şiye warê Korta tayê ki şiye warê Çelkeri. Ma şiyene warê Korta, Uja ra ki şiyene warê Çelkeri. Tı çığa ke  suke de biya pil ki, tı ki dewa ma ra wa. Ma u piê to dewa ma ra yê. Nê ne qa ti xeribe niya, qa tı ki çêna xalı mına. Eno to veri ez u to ma piya şime warê Korta.
Ma şiyene warê Korta, uja ra ki şiyene warê Çelkeri. Çelker dayina rındeko. Nênê ma Korta xırabe niya ke. Tı zana warê dewa ma hurdima ki zaf rındekê. Ma awxa serdıne şımıtêne. Şıt, serêşıti, mast u do zaf bi; ha bure ha bure. Cêniye dewa ma, eke  mal u dawarê xo dıtêne şiyêne serê tüma, biyêne top. Ciranê ke dormê holıka made bi, amêne lewê tümê holıka ma. Ez zana ke nıka ancia ê tümê holıka ma sera benê top. Ma ki şiyene lewê dina xo rê mucul biyene. Wertê cêniyanê dewa made zaf canükê hewli bi. İna hem rêştıkê xo rêştêne hemi ki qesê kerdêne. Dewe ra, mal u dawari ra qese biyêna ya. Eke jü camerd dewe ra biyamêne ware cêni şiyêne o diyêne. Xoxo de vatêne: " Xezuka piyaye maki biyamêne. " Yaki xebere ruşnêne vatêne wa o bêro. Hama çiye mane kerdêne; ya miye lenga, ya nêweşa... İndi çiye ra nê çiyê mane kerdêne.
Waxto ke ma doman bime. Ê ke şiye Çelker , ê ke şiye  Korta ma zaf züvini qarnêne. Ma do ardêne dewe. Ş odir şefak de veştêne ra maa nê ma do kerdêne rêuka u kerdêne parê hera. Ma amêne dewe. Peroc ra tepiya dewe ra onciyêne we şiyene ware. Waxto ke ma şiyene ware piyanê ma cirananê ma; ware ra çimi waştene, ma kerdêne teme. Xezube a waxti. Dewa ma zaf rındekê biye.
Hama goro ke vane nıka  ze veri niyo. Mıleti zaferi dewe cavêrda şiye sukane gırsa. Ê ke dewe de mendê, qe halê xo rınd niyo. Hama ma oncia şiyene dewe.  Oncia ki halê şarê ma rınd nêbiki, axri ma züvine diyêne.
Muradi zaf çimi, mı ra pêrs kerdêne. Mı ki cırê qesê kerdêne. Gege ki ez biyêne hêrs. Mordemê Murad u Piya zafê hama qe kesi ki nasnêkene. Murad ancia jü dolıme şiyo dewe. Piya qe nêşiya.
Tı zana, çı amê mı veri? Ez vanke eke ma şıme dewe, ma araba Piya nêberdêne. Dewe de kemeri u kaşi zafê. Araba qe tede nêxebetina.  Hama uja kam Piya ceno? Tı zana ke ez lewê pila de çêneke nêcena vırana xo. Ancia tı cêna. Hama qey tı cena ke, qa ez domanê niya. Ez na usari biya çewres sere. Ez Piya cena. Tı zana ke ez temelê ki niya. Ma no çêo ke teze herina to di ez se xebetiyene. Uja qesê bike ma sebiyo. İna ra vace  ke merde mı zaf jiyatiyo. Ma se beno, tı ki hebê mı bıgoyne. Ê vanê belki ke no memo verên o, hini xaxut bi.
 Nê ga  uja ze ita niyo ke. Pero isanê mayê. Ma meymanime, hemiki meymane çê xo me. No meyman ke cigera dina ra bo, meymani nanê ser u çımane xo ser.
Mılet amêne seba ma, ma ra pers kerdêne. Ma ra vatene namê na qıjge ke çıko? Ma ki vatêne: name daê Piya wa. İna ki vatene " Ero bawo bawo no senê namo." Çımke ê ki neheq niye: Hetan nıka ma namê ereba na domananê xo ra, ayera tepia ma namê tırka na domananê xo ra, nayera des vist serê ra veri ki, ma namê kurmanca na  domananê xo ra.
 Qey niya bi? Ma qey xo inkar kenime? Mı cıra vatene nê nê qa no zonê ma o. Tü di ma vanime piya şıme, piya bême, piya amê, Aspariye nê, piyatiye amê. Mı ina de qêse kerdêne, zerê xo kerdêne tal. Ş arê dewa ma verde ra mı ra hes kenê. İna ze mı kerdêrne. Nayera tepia namê domananê xo: Bover, Naver, Korta , Çelker, Berz, Bulusk, Astare.... nêne pıro.  Se ke Hamdi nêvatene belki ke jü veciyene name çêna xo Mar/Mor nêne pıro. Beno ma qey nêbeno. Mar çiye de rındo. Tı ke mar rê xırabiye mekere, o ki to rê xırabiye nêkeno. Marê welatê ma, qe emsalê xo çino. Qe to heşno ke welatê made mari do jü ra.
Waxto ke ez dewe de biya, ez zaf mara ra tersêne. Mı ke mar çaê bıdiyene ez hetê ser rêmenê ê hetê ser rêmenê. Mı qalê mari kerd meselê amê mı vêri.
Rocê ez u piê mı, ma merga ma wa Qanikovete derime. Piê mı çineno ezi ki  nana pıro. Merga ma zaf hite biye ayera ma dırmığ nêkerdêne, hini ma nêne pıro. A waxt merga ma u çê apê mi Barko piya biye. İna verde merga Beja çinıtêne ayera tepia amêne merga Qanigovete. Wertê pala de en qıjgek kam o, o şono awxe ano,  Waxto ke çê apê mı amêne, ma zaf xebetiyene. Eke mı no piê mı têhna biyene, mı hande zor nêdene xo. Mı ke piye xo ra vatene apo çığa germo, ê ki mı ra vatene: "Ero bawo zaf germo xo rê şo çê." Hona ê, qêsa xo nêxelasno mı vatene "ya". Ez şiye ne çê.
Ma bême mesela xo. Piê mı, mı ra va şo ma rê awxe biya. Mı ki qabê awxe guret ez şiya ini. Ez hin gıran şona ke hande vacê. Germê perociyo, ez zaf qefeliya, têwr nêwazen bıxebeti. Xo xo de vana: "Ahx xezıka ez nıka çê de biyêne, ya ki sia daranê made xo re ramerdiyene."  Ez şiya ini, mı awxe arde piê mı awxe şımıte, Ap Qewaz ki merga xo çinêtene. Merga dê ki lewê merga made ra, wertê merganê made jü derê esto.  Piê mı ke awxe şımıte, mı awxe berde ap Qewaz rê. Hona ke mı nêberda piê mı, mı ra va " tenê rew şo awxe meke germ". Mı ke awxe, piê xo rê ardêne, Ap Qewazi ki zanıtêne ke ez dê rê ki awxe bena. Ayera o xo re jü şımêla vaş sera merediya bi ra. Se ke ez kêwta nezdiya ap Qewazi çı bıvenni marê de gırs kışta  ap Qewazi de o ki vaş sera biyo derg.  Ez hini qêrage mı va "apoo mar"!  Ap xo rê,  ez xo rê, mar ki xo rê hetêser rêma. Se ke çımê mı gıno mar ra, ez hini rêmake, awxe ke mı deste de pêro rışiyade.
***
Ez şarê ma rınd nas kena. Ş arê ma zaf zereweşa o. Mıletê ma xo rınd nas keno. Ş arê ma hetan nıka, zonê xo, adet u tore xo ard. Hama ma, na seranê pêhêna, kulturê xo ra kewt me düri, ma zonê xo caverda. Qaytê domanê ma zonê ma nêzanê. Eleman de, Estanbol de tenê ciranê ma estê. Eb xo nêzanê Tırki qesê bıkerê; hama domanê dine qet zone ma nêzane, pêro Tırki qesê kenê. Qesê esto vanê: "Zonê ma non u sola ma wa". Qaytê mı çend seri Tırki wendo. Hama hürinda, zonê ma nêcêno. Halê zonê ma o gılor başko.
1970 ra tepiya domananê  Vartoy zafine wend. Hama ma edêtanê xo ra kot me düri. Qesta ma bime "modern". Dınya de ê ke biye "modern" qe kesi kulturê xo canêverdo. Tı ke raştiê mı ra  perskena ma nêbime "modern" ma bime Tırk. Çımke ma kulturê xo caverda ê Tırka guret. Ma pilane xo ra vatene  ê "gericiye". Zaf gunê u xetê ma estê. Tarıxa Vartoy de êno nıvısnaine " zelzelê 66 ra ravêri  u  zelzelê 66 ra tepiya."
 Gula mı; tı verê hardlerzê hazar u new se u şeşti u şeşi rınd nêzana. Çımke a tawh tı  hona çar seri biya.  Tı nıka welat dera, uja pilanê mara pêrske. Eke qalê veri beno, khal u pirê ma  vanê: " Tê xezube ê waxta, mılet feqir bi hama insanetiê biye". Ma wend bi, hama ina mara zaf rınd zanıtêne. Qesê de pi u kalkanê ma esta. Vane ke: "Her waş koka xo ser beno gewe." Ma koka xo ser bime gewe; hama seke dara aşi kenê, ma hini aşi kerdime, dayera ma rınd koke nêgurete yaki koka masera darê de bine (yabani) biye gewe. Ş arê ma no edet u kulturê xo hetan nıka ard, hama zafi ki zulum u ezyet di. Gege amê kiştene, gege koa de  mendi, gege kewti zindana, hama oncia ki hetan nıka edet u kulturê xo ard u resna ma, nayera tepiya ki dora ma wa.
Yara mı, eke ez kulturê ma bınıvisni zaf vatenê mı estê. Hama gereke no kulturê ma memıro.
Ez koti ra ma koti, mı çınay ra qesê kerdêne. Hêya, qa raşt mı xo rê dereqê  dewa made nıvisnêne. Ancia dewa xo biyari xo vêri u ğeyala bıkeri. Hê ya ancia qalê dewa xo bıkeri. Ma qalê mıletê dewe ma kerdêne.
Eke ma piya bışiyene dewa ma, se kerdene se nêkerdene. Tı zana taye leqiê ma estê. Tü di eke mı gege leqi kerdêne.  Tı u Hamdi watenê nê laqiê Vartoy. Ma ê leqiê ma ki kerdêne. Leqiê reqasa, Varto de her kes zano. Tı vace ê leqi, mı xo vêra kerdê?  Nê nê ez se xo vêra kena.
Dewa made Haş esto. Qa tı nas kena. O ki xalê to êno. Xınamıê ma Haşım. Ez Haş ra zaf hes kena. Waxto ke ez dewe de biya, haş rew rew amêne çê ma. Haşi zaf cêniya ra hes kerdêne. Ê dê kuli feg bi. Kamci cênike bena wa bi bo ê vatene: " Lawo lawo a hini dana ke hini vacê." Gore Haşi dewa made cênıka nêdana çina. Mıleti dewe xüya Haşi  zanıtêne, xortê dewe kewtêne re Haşi. İndi qalê cêniya kerdêne.
To qayt kerde ke Haş çê made ro, Dot ra Sewguliye u Çiçe amê. Haşi serê xo hejnene u hüyene vatene: " Nina şenık nêda, lao lawo nina welat kerd xırab". Çiçe u Sebe ki zanıtêne ke Haş vano çı. Çiçe Haş ra vatenê " Ero tı çı guna ma cêna. Ma wena, se kena, indi be dolıme ez dolıme ki wa Sebe bi do to." Haş biyene sur u feg biyene pıre kefi u sere hejnêne venge xo kerdêne alçağ ke, wa ê meheşnê ê ke dorme  dê de dına ra vatene: "Qenê daê, zürê kere , ez zana ke, na dana kuline, hama  ma rê çiye çino." Haş serê xo hejnenê, heto bin ser qayt kerdene vatene: "Hela qayt kerê, na oruşbiya qenê daê, êna ita çı. Cı ra vacê, wa şoro lewê bırakane xo. Ena lewê ma, ma wa feqırara vana çı."
Goroge ez pêhesiya; dewa ma nıka ze veri niya. Mılet zaf biyo feqır.  Haş Haşê verên niyo, Haşımo feqır biyo nêweş. Çiçe vanê zaf biya perişan. Feqıre se bıkero. Lacê daê Musa, askeranê Tırka de ke dopera, amo kıştene. Ş are ma nıka zaf bınê zulum dero. Qe rüye şarê ma nêhüya.  Ş arê ma zaf onut, hona ki anceno.
Se ke pilê ma nêvane "xezube waxtê veri".  Verde ke çığa ke mılet feqır bi ki. Ebe qeydê edeta nê xo, destê jüvini guretêne yardım dene jüvini. Jüvinde leqı  kerdêne.
Dewa ma de jü "qılıc" bi. Namê xo Xalıtê Qılıc bi. Merıkê de  kal bi. Çen çê dina bi cıra vatenê çê qılıca. Xalıtê Qılıci xelê ki pil bi. Serê xo ebe paça pıştêne, çogana dê ki her waxt dê dest biye. Her roc şiyene pê Tabi. Uja merg u hega dina bi. O şiyene uja ke, domani selxi mekerê merg u hegaê dina. Qarveni dê ra zaf tersenê. Waxto ke ap Xalıt amêne, domana  pê kemera de, pê dara de xo dêne we. Domani qêrene vatêne: "Lao heso". Eke na vatene ap Xalıt zaf qariyêne. Nata kayt kerdêne, bota kayt kerdêne qe kes nêdiyene. No biyêne hers u vatene: "Ero mı kırê Hes de ma u cênıka şıma kerdêne. " Qe xemê domana nêbi. Domani hüyene qêrene  defêna vatêne: "Lao heso". Ap Xalıt ebe domana cêrene, hama domani nêdiyêne, xo bı vengê dina guretene u şiyene. Çımê ap ke kewtre domana, çogana xo eştene re dina u dıme remêne, Ap Xalıt nêreştêne dina. Cıra xeberdenê. Ê ke xeberdêne domana dayina zêde vatêne: "Lao heso". Ap Xalıt ke amêne dewe nafa ki ma u piê dina ra xeber dêne.
Namê tornê Ap Xalıt Hes bi. Nafa nê ke venga tornê xo denê vato "lao heso" . Dolıme kewto mılet ver,indi qe vındenê. Jü ki Mıletê dewa ma eke jüvinde leqi kerdêne jüvinra vatene " Hero mı kıre Qılıc de to kerdêne."  Kıre Qılıc'i ze "teberık" bi. Gegeke ez u xalê to Xalis make jüvinde telefon de qesê kenme, ma jüvin ra vanime.
Jü tornê ap Xalıt esto namê dê Use Mami o. Namê piye de ki Uso. No tornê ap Xalıt mısayibe xalê tı o. Hemi ki Hevalê mı no domantine o. Ma zaf jüvinra hes kerdêne. Use mı no çavreş. Nêzo xo rê sekeno? Ma se jüvinde leqi kerdêne. Ma pê bona de, serê mezela ra, dalasure de  şenık leqi nêkerde. O waxt çığa rınd bi. Uso  çavreş, nê çıme xu ye sia, eke herdışe verdêne biyêne ze heşê koi. Hevale mı ne domantıne zafê. Ez ki nêzana kamçi perskeri, kamçi persmekeri. Her çiye ke to di, kulinê ra zaf zaf selamê mı vace.
Tı Hesê Xalıti nas kena. To di se hüyene. Eke o hüyene çimanê dera se hesiri amêne. Ma rê meselê qesê kerdêne. Ma se hüyene. Mı lace dê ra u çen hebanê bina ra, va ke wa ap Hesen qesê bikero . Qesanê dê mı re, bıcere teyibe u buruşne, hama kesi nêruşna. Ê ap Heseni zaf meselê xu ye weş estê.
Roce ma çê dina de bibe. Xebere amê ma rê ke esker nawo êno dewe. Ma remayme, derê pil ra şime pê Tapi, tenê hevali ki  veroce tapra oncinêwê. Esker ina vêneno. Eke esker erzeno çê ap Hesen' i ser. Qe çiye nêvênene. Başçavuş Hesi Xalıt ra vano:" Bak ben biliyorum ki sizin çocuklar bu dağın arkasındadırlar. İstesem gidip hemen yakalıyabılırım."  Ap Hesen bıneqesa Başçavuş  de qe maneno. O ki vano: " Komutanım bu dağın arkasında başka bir dağ daha var."
Halê şare ma başko. Her jü ye dina, hêcaê dınya bi. Ma dina ra kewt me düri. Ma rındiya dina nêdiye. Pilanê ma vatene ê verêni zaf leqçi biye. Tenê dina mı ki di. Ê Tırka jü Nasredin Xocê xo esto. Ema zaf Nasredin Xocê ma  estê. Hama jü bı jü ye dina şi heqiye. Qe kes wayirê dina nêvecia.
Mamudê ap İsi, dewa ma de, vist u bonc seri muxtariye kerde. Mamudê ap İsi zaf zereweşaye bi, Zafi ki leqçi bi. Dewe de nêverde ne ke kes pêrado. Eke dıdine dênepêra,o kewtêne wertê ardê verê. Ap Mamudi qe kesde nêdene pêra. Pêradişa de, o bêteref mendene.  O şiyene çê cirana pero. Ebe leqa xo memurê Tırka kerde memnun. Ap Mamud mı ki di. Mı ra vatene: " Qey Hamılkana şone aşme qey ma nêşonime." Mıakilê Feqi Hero gameşê xo çıraynêne. Feqır kal bi  nêşkiye nê ke şoro. Waxto ke gameşi berde ke bıçırayno, niştenerê gameşi . Ap Mamudi ki ayera leqi kerdêne. Mı ra vatene: "Xınami ez u to jü ki Mıkail ma nişenime gameş ra şonime aşme. To wendo; tı wertê qoçane gameşte ronişe, ma rê kaytê xarta ke çımke to wendo tı zana. Xebato bin mı no Mıkail sera. Ma gameşi benime Kemerê Qertal ser uja benzin nanmê pıro, gameş indi şono. "
 Ap Mamud ancia muxtar beno, bekçi ki Hesenê Xalıt beno. Lewê çê Qaçi de zaf qerebelığ beno. Muxtar u bekçi şone lewê çê Gaçi  ke Use gaci cena Memê Evdalı Sela remna. Ceniya Memê Evdali çê Gaçi ra xeber dana. Ap Mamud bekçi yê xo ra vano: "Lao lao na çêna kutigi hem bı xo çêna xo layikte kena raşt, hemi ki  merka ra xebêr dana." Mılet pêro veciyo bona nê xo ser, qat kenê. Maa çêneke nêvindena, xebêr dana,ğaftla balmışbena muxtar u bekçi şone lewê. Muxtar caqête xo ra derzini veceno. Hesenê Halıti vano: "Ne nê xêxo tı se kena." Muxtar vano: "Lao Heso tı qe vengê xo meke, to rê çı lazım."  Ap Mamud derzini beno keno qorê  maa çêneke ra, Se ke derzini keno qorê cênike ra , cênike caê  xo ra qıl bena, vezêna ra u şona çê xo.
Dewa made jü Esxan bi. O ki ze tarixi bi. Tarix ra zaf qesê kerdêne, her çi ze nıkay amêne dê vêri. Qesê xo qesê kamıla bi. Qesê xo zaf caê xo guretêne. Ap Esxan xaf hazır cewab bi. Roce dewa made veyvo ma govende kaykenime, Xaço qol kılama vana. Ap Esxan ame lewê veyvi. Se ke heşna ke Xaç kılama vano. Ap Esxan va: "Lao lao çê Meşe u dengbez tine." Ancia rocê; lace Memê Gulsune,Us Ap Esxani qarneno. Us ki zaf esber bi. Ap Esxan Us ra vano:"Hero lao tı ebe sed panote nêbena qılayı." A tah ki sed panote xelê pere bi.
Mıletê Ewropa ze şarê ma niyo. Ş arê ma zaf leqci o. Leqia ke ma kenime. Ş arê  Ewropa nêkeno. Lewê made dewe Kurmanca estê,  Leqia ke ma kenime ê nêkene , eke leqia ke ma kenime ê bıkere, ulahi jüvini kışenê.
Na leqia ma, na rındia ma,  na zereweşia ma qe çaê çina. Ma gereke; na leqia ma, na rındia ma, na zereweşia ma bınıvisni me. Wa domanê ma xo re buwanê. Made qesê pi u kalkanê ma zafê, Kulturê ma zaf zengin o. Ma gerege nê kulturê xo bınıvisni me.
Qe tarixe de zonê ma niyamo nıvınaine. Ayera ma çı ke pilanê xo ra heşno awa. Nıka ze veri ki niyo verde mılet handê nêşiyene düri. Nıka her caê dınya ra biyê vıla. Eke ma  kulturê xo menıvisnime pêro beno vindi. Ayera ez wazen ke tı uja, kal u piranê made qesê bıkere. Mı rê qesê pila, şanıkanê u kılamane ma, edet u qeydê ma; to çı ke pilanê mara heşna xo de biya. Qawte pirıka to zaf çiya zana. Aê de qesê bıke. A nıka xazina kulturê mawa. A zaf çiya zana. Ma kal u piranê xo de qesê nêkerd. Zaferê dina şiyê heqıye ê ke mendê ê ki nıka zaf biye kali. Hini bıkemeke dina ra xo rê çiye bumusime. Ê ke ma kerdê vindi, ma kerdi vindi, barê ê ke weşe ma ina mekeme vindi.
Ez ke şona xebat, ez ke şona suke, qawtê mıletê itay kena, kawtê şarê ma ken. Wertê made zaf ferqe esta. Çiyo ke nina de esto, made çino, çiyo ke made esto, nina de çino. Mıletê itay zaf xebetino. Hini xebetino ke biyo kolê makina. Her kes xo rê xebetino, ne pi dano laci ne ki lac dano pi. Nina de qe isanetiê çina. Nê handê ze ma leqi ki nêzane. Hama ekonomê nina zaf rindo. Ez vana ke isan wertê ma o, ina bıvêno çığa biyêne rınd. Belki tı vana ke ekonomi  ma ki niya rınd biyêne, ma ki biyêne ze dina. Eke ekonomi ye dina u isanetia ma tê lewê de biyene, çığa biyêne rınd. Her çi ki beno. Çiyo ke nêbeno çino. Eke isan buwazo her çi ki keno.
Gula mı, tı zana isanê itay, seba  hewa u awxe seba temizya dorme ma zaf gurine. Ma Reqasa mı, hewaê xo ki rındo, awxa xo ki weşa.  Ş arê ma ne awxe, ne ki hewa kene pis. Ê dina ki jü awxa xo, jü ki hewa xo esto. Dina ra başqe çiye xo çino.
Ya, roşna çıme mı, şarê ma, dewa ma, zaf kewta mı vêri. Mı rê şarê ma ra qesê bıke. Dina ra muculbe. Halê dina senêno, ina mı rê vacê. Ez şarê xo ra düriya. Mı rê şarpa Çilerê çiye mevace, qalê  heci u xoca meke. Şaro xerip mı rê çı lazim. Tı mı rê şarê ma ra qesê bıke. Cıra vace, wa ma xo vêra mekerêne.
Ez welato düri dera. İta rüye mı hüyayiş niya. Ez ita nêhüna. Belki ke tı heqli ya ke, tı mı ra vana ke : "Tı biya robote". Ez ke mebi kam beno ze robata. Ez ita ebe xo cere na, mı xo kerdo vindi. Ez Reqasa ra Memi wazena. Ez xo wazena. Ez ita mendis tine nêwazena. Ez rehetey  itayi nêwazena. Rehetey nina wa nina rê bo. Ez newazen bıbı "gula adırı". Ez Reqasa xo wazena. Ez hevala ne domantia xo wazena. Ez hard u kemeranê Reqasa wazena. Ez kınkor u sunganê Warêkorta wazena.
Ahxx.. ez nıka koyêkorta sera biyêne, hetan ke mı ra amêne ez xo rê bıqerêne. Uja ra biyamêne Warêkorta. Uja de serê xo iniye Xêyme kerdêne, xo re awxe serdıne bışmıtine wa zer u pêşke  xo rehet kerdêne.
Reqasa mı, tı çığa şırina. Ez wazen ke weşiyede beri to bıvêni. Ez belki to nêvena hama hardê xo mı ra meşevekne.  Merdene bo ki ez resêna to. A taw mı rınd vırana xo ke.
***
Tu di êno to veri mıno  to ma piya qaytê "32. gün"  kerd. Jü cênıka yobaze, hêrame dabı xora. Dereqê "şerihat" de qesê kerdêne. A dısmenê ceniya biye. Ez tewr nêwazen ke aê biyari ceniyane dewa ma ver. Qaşo aê unverstê  wenda. Mobeta dewa ma qe nêşiya mektebe. Mobete aê ra zaf zaf baqıla. Mobete zerê çê xo de, her çi aê desde bi. Hama na yobaze koletiê waştene. Make dewe de qesê kerdene Mobete mara vatene: " hero bawo bawo şıma heqliye hama....." Mobete saf biye, hama na yobaze ra zaf rınde biye. Leqê xo ki biye. Ame bi Estenbol çê piye to. Waxto ke şona tualet êna vana: "herê çene çene şıma se qemış benê ita ciye xo kene." Zaf hadise mobete estê.
Roce miya Mobeta lengê, şone lewê miya nê çê Esxani. Mobete şona ke miya xo bıdoşe. Se ke na, miye nêverdane ke a  bıdoşo. Na bena hers miyê ra vana ke: " Ne miya ma şiye lewê miya nê çê Esxan'i, miya  ma xüya miya nê dina gureta." Halê cêniyanê ma başko.  Cêniya mawa safê, cêniyanê "şerihatcı " yara dayina baqılê.
Nê yobaz  u dindari demokrasi rê zaf  zerarê xo esto. Ş arê ma qela demokrasiya. Ma gere ke heşar vındime. Ne yobaz ke şerihat biyarê. Nêverdana ma weş bımanime. Çımke şare ma  şerihat  nêwazeno. Ma zerêhirayi me, ma şikinme her kes te piya vındime hama ê ma nêwazene. Eke beno remezan, ê zane ke ma roce nêcênime ancia nêverdane ke ma lewê dina de non bume.  Eke Yobazi (fundemantalisti) hukmat bıcêrê ma sera hukum kenê. Ma gere ke ze dina bime, eke mebime ze dina ma kışenê.
Çimke ê ma islam qebul nêkene. Raştine mı ra pers kena çiye de ma ki zedina niyo ke. Ma tewr  ze Kurani nêkenime ke. Make musluman biyene ma ki gere ke ze kuran'i bıkeme u şerihati qebul keme. Ma ceneto ke Kuran de nivisno nêwazenme. Kuran de vano ke: "Pırode hetan ke kuliye dınya biye islam." Ayera ki mordemekê ze dina niyê, ê kışenê. Tu di yobaz vanê ke "kam ke hawt eleviya ya ki hawt ermêniya bıkışe şono cenet".
***
Ş êwle çıma nê mı, ewro çarê aşma amnanu verê no. A7  de "lopp marknad" bi. Ez şiya uja. Halê mı qe cade nêbi. Hin biya ke ze xêxa biya. Uja, mı tayê hevali di. İna mı ra pers kerd; qey ez niya kefsıza. Mı ki va "cêniya mı ita niya, domanê mı ita niye, belki ke dayera o". Qe mı nêşkiya ke, ez jükek te qesê bıkeri. Xelê cêra ayera  tepiya, jü lampa dıde ki resmı herina u ama çê.
Mı resmi oda roniştenede darde kerdi. Lampa ki oda made darde kerde. Resmi rındekê hama lampa de, handê kêfê mı tê niyame. Tı ke ita biyêne ma dayina zêde çimi hernêne.
Ez zaf biya weşane, xore tenê non werd, ayera dıme, ez şiya wertê baxçe ma. Hewa ki ewro zêde germo. Ancia ciranê ma,maa u çêneke biye vıran. Tı zana eke ita hebê beno germ pêro benê rut. Ezi ki biya rut pantore qoli kerd payi. Wertê baxçe de vıneta. Baxçe ma zaf rınde ko ezi ki tede zaf biya tuğ.  Darê ke dormê baxçi derê, zaf biye rındek. Hama waş wertê dina de biyo gewe. Ez şiya, mı gelberi ard. Waşo ke wertê dara de biyo gewe, mı gelberi kerd.  Ez xelê xebetiya, xelê ki qefeliya. Ez ama çê.
Waxto ke ez ama çê, ez zaf qêfeliaye biya. Canê mı zaf çay waştenê. Hama çê de kes çinê bi ke mı rê  axwa çay bıgırêno. Eke tı çê de biye ne, çayê mı hazır nêbiyene,  mı to de dêne pêra. Tı zana ke camerdê ma hêrsınê. Tı vana ke: "Cêniye u camerd ze juviniye. Ferqê wertê cêniya u camerda çina."  Hêya, a henêna hama camêrd ke zaf qêfeliya bi, xebetiyo u araq de bi sia; cênike gereke xızmeta merdê xo bıkero. Xızmete xızmeta kurêşya. Eke piya xebetiye a başqa. Hama ez to zana; waxto ke tı çê de biyenê, to çay ki noni ki kerdêne hazır.
Ma nıka ez hem cêniya çêyi ya, hemi ki camerdê çêyi ya. Werdena, non  potena pêro mı sera wa. Ez qemışê Muradi nêbena ke cıra çiye vacine.  Qe yardım mı nêkeno. Vızêri çê de nêbi, şibi Stockholm. To oda dê bıdıyêne. Rınd ke to nêdiya. De xo rê weş bo, se keno wa bıkero.
Na dem de, ez hem to rê nıvisnena, hem ki goş nana kılamanê Zulfi ser. Dêyşanê Pir Sultani vano. "... Ra uze, roca to ama  Pir Sultan abdala qesê mı raste..."  Nıka ki deyşa de bine vano. "...Ezo ke amo Dınya dewa mı dewa Ulu divan bo..."
Ancia şarê ma amê mı vêri. Eke xo zanê ancia êma yê.  Wertê şarê  made rewêna demokrasi esto. Ze demokrasiye nıkay nêbi , hama ancia ki zaf rınd bi. Ş arê ma vano ke "her çi isana de esto". İna isan rê secde kerd. Goranê aqıl u mantıqi  rae ra şone. Ş are ma gege Heq rê  isyan kerdo. Çiyo ke nêkewte serê dina,  ina o qebul nêkerdene. Waxto ke elewi qalê ceneti kene mesele de dina esta. Ez wazen ke a mesela to rê bınıvisni:
Roce Usıbê Meli şono Ezurım, uja tene heci u xoce kune dorme dê, nê dereqê dinde qesê kene. Mesela êna cenet ser.
Wertê dina ra jü xoce vano: "Ma ke şime cenet Heq çewres horiye dano ma." Usıbê Meli  vano: " Ez nêwazen ke ceniya mı bero cenet." Xoce vano: "Qey" Usıb ki  vano: " Xoce efendi; Heq ke cenet de çewres horiye bıdo ma, eke ceniyê ma şore cenet çewres boğe ki dane dina. No cenet niyo no beno kerxanê."
Zaf meselê este. Mesele pırde şerhat  esta. Kaygusuz Abdal vano: " Heqo, to jü pirdê de, henên  vıraşto ke, têle ra bariyo, şımşer ra tüjo, tı vanake wa kulê to sera şore. Be tı hini jiyatia tı verê mı şo, ez ki to dıme êna."
Ez ita nêvana ke her çiyê şare ma ê bina ra rındo. Se ke pilê ma nevane "iyiler iyidir". Kalıkê M. Emini  Heq rama xo pıro kero, vatêne:"Heqile heq, ez raşte vana, Heq raşte ra hes keno."
Xezika  pi u kalkanê ma xo ra mevatenê islam. Ma ke islama ra dür biyene nıka halê ma dayina rınd bi. Belki ma nıka ze ewropa bime. Şarê ma, ilım rê yakerdiyo. Ş arê ma ilım ra hes keno. Qaytê ina se Turan Dursun kişt. Turan Dursun piya de ilımkar bi. İsan se piya ye ze Turan Dursun kışeno. Na dışmeniya ilım niya çıka? Mı çen kıtave dê wendi. İsan gereke kıtavanê dê buwano. Mı xezuka Turan Dursun  bıdıyêne.
Nê tenê isani çığa xırabê. Ş ıma se qemışê isananê niya rında benê.  Gorane felsefa islama, Heq bı xo can dano isani, ancia O şikino canê isani bıcero. O waxt qatil çı lazımo? Roca to ke amê, Heq bı xo Ezraili nêruşneno?  Tenê isani se ba male dınya her çi kenê. Se ke pile ma nêvane: "Heq hevsê ma wa, domanane ma isanê xırabara bıkero."
***
Hêya roşna çımê mı, belki tı vana nê resmı çı ke to vetê.  Mı ê resmi seba to  nêvete. Pêro resmi, mı Piya xo rê vetê. Çımke Piya mı nêzana buwana xo re qaytê cı kena. Mı zaf ki nıvisna, ebe tenê resma dayina beno rındek. Tı belki mı ra pers kena, qey mı niya zêde nıvisno. Ezi ki nêzana qey mı niya zêde nıvisna. Verê computor de nişta ra u nıvisna. Mı jü roce de nênıvisna. Qaytê ewro  hawte aşma amnanio verêno. Sate bena des u dıde nêmeşewe.  Ez indi xo rê şori rakü ke meşte ez rew vezenra u şona xebat.
Waxto ke tı ita biya ez ke xebat ra amêne, none mı amêne verê mı. Hama nıka regeke hero werdene poci. Çiyo ke esto ez çı pocena Murad weno. Na zaf rında. Çımke ez çı werdene pocena heftê ravêri nıvısnena. Murad ke bêro welat, ita ez bena têyna. A waxt ez to rê mektuve nênıvısnena. Eke ez bınıvisni, tı zede berbena. Ayêki ez nêwazena.
Wertê mı no Muradi zaf rındo. Ma qe nêdanme pêra. Waxto ke tı şiya welat, ma ki to de amême hetan Stockholm, a waxt ma heftê uja mendime. Rocê ez u Murad jü ki Aydin ma şimê Lune park. Mı 170 kron da, parçe ze bazıni kerd deste Muradi. Sate hawt ra hetan des u jü ye şêwe, ê çı waşt nişt dê. Zaf kefê Muradi amê bi. Wertê çimi de zaf remêne. Murad ke amê uja dayina zaf to rê qesê keno.
***
Ewro heştê aşma amnaniya verêno, roca ra çarşeme o. Ez ke ewro  şodır weşta ra, ez  ze hero nêbiya, ewro zaf rında. Ez şiya xebat ze hero sate çar de ama çê. Ez ewro, qe çê de kar nêkena, Muradi mı ra va ke ewro pero kar o keno. Ayera ez şiya P18. Uja 2km. rema tenê ki cêra, dayera dıme ama çê. Na serê ra zêdo ez nêrema. Ayera ez şenık rema.
Ez ke ma çê Muradi "gröt"  e pot bi. Ma hurdina piya nıştimero, nonê xo werd. Eke ma veştmera, ma qaytê jüvini kerd hüyame. Mı zana ke o ki weşano. Ma her jü ki "hamburgare" xo werd,.Muradi qab u mabi ki şüti. Ez şiya baxçe de nişta ro o ki şi lewê hevalane xo.
Ule ke mektuva mı biye derg. Nıka tı vana ke " ma jüvin ra düri me dayare  tı niya derg nıvısnena. Ma ke lewê züvinde biyêne belki ma nıka dêne pêra." Ma ze tu yo. İsan ke züvinra düri bo dayina caye isani aseno. Karê dınya niyanêno. Her çi de rındiye ki esta, xırabiye ki esta. Xırabe ke çine bo, kes qimetê rındiye nêzano. Waxtê vêri de ki pero dina de hem Heqê rındiye bi hem ki Heqê xırabiye bi.
Hes kerdene wertê dı isana de zaf çiye de rında. Cêniye u camerdi eke bi jü can gereke jüvinra hes bıkere. Na dınya da emrê isani zaf kılm o. Na dınya kesre nêmende. Ma ki roce mırenme. Gereke ma zaf züvinra hes bıkeme. Qaytê na nezdie şeş serio ma lewê züvinderime. İsan tehr nêzano serı se şonê. İsan vano belki isani hewn diyo. İsan gereke kelbê züvini  meşkıno.
 Ez  zan ma zaf züvinra hes kenime hama... Ahğ na "hama" çine biyêne çığa rınd bi. Gorane mı dormê ma, ma rehet nêverdano. Ma ke nê welat de biya mene dınya. Goşê  ma asayebi. İta niyo her kes weş bo xo rê. Na maa, no pio, nê bıraye qe ğemê dina niyo. Ma nime fıkrema kuli mordemanê ma sera wa.
Qaytê be ke mevace, Xeri perê xo berdi dai zamay xüyo zürekeri. Eb xo ki hini wertê de mend. Nıka mı de ki perê çineke ezi ki dolımêna cırê buruşni. De be meqariye tı se nê qarina. Ma ke welat de biyene xo re şiyêne jükek de qesê kerdene yaki qerêne.
İta niyo, tı nêşkina çiye bıkerê. İta ne kes to de dano pêra ne ki to rê yardım keno. Ulahi bilahi tı ita bımre kes wayire to nêvecino. İndi belki belediya  meyitê to wedaro. Na welat de gege ma ğazata de wanenime tenê piya merdê ebe aşma meyitê dina zerê çê dina de mendo, ke xebera kesi çinêbiya.
Ma ni me, xo ra zêde şare bini re ,danme xo ra u berbenime. Mı tı zaf diya ke, tı berbêna. Tı qe seba xo nêberba, tı her waxt seba ê bina berba. To di, To ke hewn diyene ayera tepiya berbêne. Hewnê ma ki xırabê. Ma hewnanê rında ki nêvenenime. To di vane, "Eke hewni bıbe raşt, çığa rındo". Ma rê çı, hewn bene raşt. Ma hewnanê rındeka nêvenenime ke. Par piye to amê ita, seba ê ke welate bi berbêne. Uja ki seba ma berbeno. Uja ki çımê xo hesirinê, ita ki çemê xo hesirinê.
İsan vano belki no qederê ma wa. Kul u bırinê şarê ma zafe. Ma welatê de henên de amême dınya ki, herçi tede yasax o. Na hazar u bonse sere ra zêde esto, hale ma niyanêno. Ş arê ma her waxt bındeste biyo. Hem ki çen qor ma bındesterime. Ma nêşıkime ke, ma  vacime ma kamı me? Ahx defê ma bındesiyera veciyen, ma rê zaf biyene rınd.
Çimke na zereweşiya ke made, no kulturu ke made, no adetê ke made qe kes te çinê. Nêverdane, eke bıverdê,  demokrasi senê no ma musnenime dewleta Tırka.
Roşna çıme mı, zaf vatene mı estê, hama ebe nıvısnayine nêbeno. Tı ke ama ita ancia ma qesê kenime. Tı zana ke ez seba isantey xebetina.  İsan ke ma ra memnun bo, çığa çiye de rındo. Tı ke seba isana xebetina gorê dina rae ra şo. Eke tı ze dina mekerê peyniya to bena ze Urızi.
Mı zaf isana da hevaltine kerde. Pêro isani azadey u serbestey wazene. Hama tene zorbê nêverdane ke mılet azad u serbest bo. Nê zordê xo ra  ki vane;"demokrat, sosyalist".
Tı zana  kamji isani emrê xo ra memnun o? İsan no ke fıkrê xo serbest  vano u  fıkrê xo serbest nıvısneno o isan beno şa. Piya o ke demokrat o, gereke fıkrê xo serbest vaco u fıkre ê bina gereke goş serno. Piya o ke vano fıkrê mı/ma raşt o, fıkrê ma ra başka fıkrê bini çewte.  O piya ne beno demokrat ne ki beno sosyalist. Piya ye  henêni dı rüye u zordarey kene. Piya ke fıkrê xo ebe zordarey dane qebul kerdene. O piya tewr isan niyo. Tewr mordeme ke piya kışene. Ez dina ra vaci çı? Ma gereke isana ra hes bıkeme. Zereweşayey u demokratey awa ke, mordemê ke fıkrê made niye ma gereke ina ki qebul keme. Qawte pêniya Soyvet u dugelane bina se biye?
Ma gereke her çi ebe serbestey züvinde qesê bıkeme. İsanê ke   fıkrê to de niye, tı se kışena. Na heqe kam da to? Pêniya zordarey çina. Hetan çê waxt mıleti xo ra tersnena? Tı nıka zordarey kena isana kışena isan ebe kıştena nêbene ze to. Belki zamanê mılet beno bêveng, hama waxt ke amê ancia urzeno ra. Dınya de zaf zordarey bi, pêniya dina se biye? Tı ke zordarey bıkere, piya ke êno zordarey to ser keno. İsani gereke züvinde qesê bıkerê. A waxt şıkine raşte bıvene. Ma ke hini nêbo ferqa isana u dawari çıka?
Ez qe famn nêken, qey isani züvini kışenê? Cewabe na pers kerdene cahiltina. Ma cahiley nêbo qey mordema kışene. Qaytê ita Awropa de  zaf qımet dane heywani. Jükek ke heywanê de xo bıkuyo, zaf aybê de pila. Hama Turkiye de piya ke isan bıkışo, beno Qereman. Waxto ke dane pêra, xo zaf goynenê, eke mordemê dê lewê de bê, caanê binade qesê ke vanê:  "Lawo ê hini dapıro ke hini vace, se ke jüye dêpıro, o cayê xo ra nêveştra. " Mordemo ke medo pêra cıra vanê "tersonık".
Tı vana ke domantine de tı se nên biya. Mı pêradişra handê hes nêkerdene. Hama waxto ke ez biya "devrimci" a taw piya kıştene zaf normal biye. Ma vetene, ma seba dawa xo kışenime. Qayte dewa made pêradiş bi hama qe kes kes nêkışt. Dewa made en verde "devrimciya " silah eşte piya kerd birindar. Qaytê ma vatenê ma rae rınde musnenime mılete xo. Senê rae?
Zana gula mı, ma pilanê xo ra vatêne "gerici" ma xo ra ki vatêne "ilerici". Ş arê ma zereweş bi, şare ma demokrat bi, şare ma isana ra hes kerdêne. Ma ma se kerd? Ma şare ma ra qewt me düri. Ma şare ma nas nêkerd. Make verde telebê mıletê xo biyêne u mıletê xo nas bıkerdêne dayina rınd bi.
İsan isan ra gereke zaf  hes bıkero. Hes kerdene zaf çiye de rında. Na hes kerdene gereke verde çê isan de bo. Ma gereke şarê xo ra hes bıkeme. Mı no to ma ke züvinra hes nêkerd, ma ke şarê xo ra hes nêkerd, ma se isananê bina ra hes kenime. Şarê ma se ke nêvano: "Kelb vıraştêne zaf zora, hama kelb şıknayine zaf reheta."

Dewa ma birr u kare
Der u ciran sono ware
Ez malê dina sekeri
Esqe to marê beso,çêna xali
 Çêna xali, çêna xali, çêna xali
 Bisiki poze sime mali, çêna xali
Dewa ma birr u seji
Be izlemêto veji
Na usarri veyvê ma bo
Pil u qiz têde sa bo
 Çêna xali, çêna xali, çêna xali
 Bisiki poze sime mali, çêna xali
Dewa ma birr u kare
Der u ciran siyo ware
Ez malê dina sekeri
To ra piya kume têvirare
 Çêna xali, çêna xali, çêna xali
 Bisiki poze sime mali, çêna xali
 

Memıkê Mı!

Bao durumê to seno, halê to seno.  Jü teyibe Aydin ma rê arda tawarê nêbena. Na teyibe piê to ardê, ma nêzo senêna, nêzo veng cena, nêcena. Ma indi vengê xo kenmecı.
Lao, tı lewê mı de niya ke, ez to de qesê bıkerine. Mı tı vırana xo kerdêne, boya to bışantêne mezg u beyna xo. Mı qıda u belaya to bukretêne. Mı tı kerda bıne pêrane Xızırê khali, Eli şahê merda, Çifteşehide Evdıleli. Mı destê to do destê İsa ruhallahi. İsa Heqi nefs u sifetê xo ra vıraşto. Nayera şıko u şufê ma cıra çino.
Xeri ye mı ki na aşmedê şono esker , va kağıda dê ama. İndi ma bime jüki Xeri bi. O ki hawa  şono esker. Ma se keme şahe şehida wa şıma cera nêkero. Ma xo rê koti benê wa bıbê.
Kağıda to u perê to ma rê amê. Tı sanki ama lewê ma, mı tı kerda vırana xo, qevsingê xo, tı paçi kerda. Mı qıdaye canê to guretêne; berxa mı, Memkê mı, pi u bıraê mı; Xızır u khal u gelekê gemiyano, Qazi cihano des u dı imamano, gerçek eru ewliya, embiya, mı destê to kerdo destê dina, wa heşarê şıma bo, şıma cera nêkero.
Şıkır ke dost şa bi, dışmen kor bi, tı nêkewta destê zalıma, nêbiya feqir, nêbiya hesir. To ax nêva, to wax nêva, şıkır ram u keremê derê. Naza waa to, na bazar şona çê xali, dı heftê manena. Mı cıra va deboye peynir xo de bere, ma aê nêberd. Çımê ma tede bi, ma va belki Aynure êna ita, zamanê lewê made manena. A ki hawa niyame. Çê piê xo terk nêkena. Seba Aynure qe mereq meke. Tı zana namus u hesiyetê Alican senêno. Ş ar bê sere Aynure sond weno. Aynure marifeta, xanıma u wezira. Kaytê lacê xo kena; ule, çê pie xo sera, xo kışena. Çê piê xo terk nêkena ke zamane bero ita.  Eke biyamêne ita ağri taye bına ma bıyene ya. Qe kes rê mereq meke, mı qıdaye to; ne pi rê, ne maa rê, ne ê rê, ne aê rê.
Ule, ez ki tahê nêweş kewta. Ule, mı xeli nêweşiye onute. İta şinê doxtor amêne tayine vatene, qelbo, tayine vatene, nêzo çıko. Mı balişna kerdene çokê xo ser, zênde xo nêne ser hetan şodır hewnê mı niyamêne. İsan se can keş te bo , ez henên biya.
Ez şiya Muş, ule, waa mı Hediya xelê mı verde zamet onut. İndi ez berda arda filme mı onut, ez da ayna. Doxtori vake qe caê to de hile u xurde  çino. Her caê to sağlem o. Kelbê  to üzüntü ra biyo huşk amo pêser. Nê axwe nê ki goni tede menda. Des des u çen derzini tenê ki ilaçi dayi mı. Ez dolmenake şiya lewê doxtori  vake tı tam biya rınde, hama mereq meke. Mı ki vake ma ez mereq mekeri kam mereq bıkero. Ê şari veyvê xo lewê derê, torni lewê derê, laci lewê derê. Ma sekeri ancia çox şıkır rama dê rê.
Her çiye ke kewt esker dest, berde şane işkence hini kuyege xınç kerdê, biye ze lemone, biye feqir u bie hesiri; reng u ruçuk tede çino.
Ş ar wazene ke şoro Awroba. Tı xo re şiya xelesiya ra.Taye tersê ma ina ra esto, qe me terse, destê to destê Eli Memed dero. Mı ita hewnê xo diyo.  Şehidê Ewdileli mı ra vake: " Tı qe Memik ra medêrse. Mı dı eskeri kerdê tayinê serê Memi ki to.  Memiki sağlamış kenime." İşallah ê lewê to de rê. İna xo ra mede mıradiş kerdene.
Gulcemala waa to amê ita. A şiye ware. Heq çê Memê sene ra razi bo. Emser çêneke ruşnê ita, xelê yardim da ma. Ez nêşkina nêzo ma mali bıroşime, meroşime, ma ki nêzanime sebikerime. (Eke qalê Gulcemal'e kenê lace daye qesê keno. Selamê xo mıre esto. O ki Tırki qesê keno.  mk)
Perê ke to mare ruşna ma gureti. Ê perê qıda u qalxane serê to be. Wa şoro rama De de qebul bo.
To ma ra puci, lapıki u telıka tıftgeni waşt bi. Ma zaf cerayme, hama ma tawa nêdi. Maa Lutfi amê ita. A ki zaf cêrê, aê ki tawa nêdi. Wa piê to şoro Goşgar; uja kayt kere, belki uja to rê veneno. Ma ke bıvenime to rê ruşnenime, eke ma nêdi ma ma sebıkeme. Verde cêniya lepıki, puçiki, telıki vıraştenê. Bao bao nıka qe kes nêvırazeno. Cêniye nıkay rehetiye derê.
Ez roce şiya waranê çê Memê Sene. Ez cor de ama mıleti linga dundıle musnê mı. Ez şiya serê linga dundıle; mı firqan u amanie kerde. Xo werd u xo qedêna. Ule heftê kewt ver, lacê Berti bi vindi. Bert amê mezela pir ser. O pir ra vanoke "To se ke intıqame Memi guret hini ki intıqamê lace mi bıce." Mıleto ke dorme de, cira vano: "Tı nêheqa, Memi qe çiye nêkerd, xo re 'solci' bi şıma uştra mordemê xo kerd Memi ser." Ma, Sey Nesemi xurto. Sey Nesemi neçe caa Mem xelesno ra.
Berxa mı, Mı qıdaye to guretêne, meşo denıza, seba cênıke, seba layik mereq meke; kuli zaf rındê, ma sebeno, Heq can weşiye bıdo. Rocê şıma resenepê. Tı xo rê qayte xo bıke, heşarê xo vınde. Sevgiye şari qezenc bike. Ş ari vera tik meşo. Tı ina ra vısiya, cıra qesê meke.
Watena şari qan mebe. Berxa mı, ita ke to xebera ma bıkerdêne, na jüye to nêdiyene. Ewro ki tawa nêbeno, xo re jıyati vınde. Tı şiya Awropa, qe tawa nêbeno. Qe merzere kesi, ne ina ra qese bıke ne ki berzere cı.
-Uff çığa kefeliya. ( vengê teyibê bıriya. mk)

Ez nıka rinda piêe to rındo. Dewe de qe çiye çino. Çena Kotani lacê Ewni rê waşta. ( Piye mı mk) vano: "Ma şerbet werd, qelındê xo şeş bıleziki jü ki metrê zincire."  Vanê çena Ewni lace Use Heydê Çêke rê wazenê.
(Apê mı Barko Hem berbeno hemi ki qesê keno. mk)
Memed, mı qıdaye to guretêne. Heq esto ke ma defêna jüvini venenime. Kefê to seno, tı çı hal dera, durumê to seno mı qıdaye to bukretêne. Tı çı haldera. Xezube a roce ke çımê ma gıneno jüvinra. Wayirê rama zafe to xero selamet biyaro ma jüvini bıvenime. Nêşkina ke qesê bıkeri. Ez zan ke ez bı xo to nêvenena, belki tı u domana jüvini bıvêne.
(Pie mı qesê keno.mk)
Merhaba bao!
Durumê ma rındo seba ma qe mereq meke. Qe çiye ra uğraşmış mebe. Xo teyna duşmuş be. Xo bıxelesnê ra. İndi çı qesê bıkeri. Wa Hezretê, Xızır sıyo sıtarê serê to bo. Omudiya xo Ş ahê vilayet ra mebırne. Comerdiya Dê zafa. Xo rê rınd vınde,alaqa xo her çira bıbırne. Durumê ma rındo; indi ze veri nêerzene çê ma ser (qale eskerê Tırka keno. mk) İndi to handê pers nêkenê. Ê zanê durum senêno.
 (Maa mı qesa piê mı bırnena mk)
- Waxto ke eskeri eştêne çê ma ser, ina tı pêrskerdenê, maa to ze bılbılı dina verde qesê kerdenê.
(Piye mı vano mk)
-Hini wendêne ke vantêne: "Qomutanim kelbim pat pat ediyor."
-Qa tı vana şo cı rê çay serne. Mı ki dinara va: "Ş ıma hero hero enê ita; erzenê çê ma ser, kaytê kelbê mı pat pat dano pıro. Ez nêşıkina şori axwe bıyarı."
- Meymanê rê isan lazimo xizmeta dina bıkero.
- İna ma şenık tersnayime.
- Memed Ez apê tü ya ma Ercan zewecna, Tata ra torna Kamılê zemi. Ma hona qelınd nêdo ma veyve serêna kenime.

(Maa mı mk)
- A bine ki ma anime Xeri rê, çêna apê daya bine.
Bao Memik, her çiye ke dostiê qayte to kenê, wa Xızır dina de bo; her çiye ke dışmeniê qaytê to kene, Eli şahê Merda wa xainiye qayde dina bıkero.
Bıne linga ra to lew kena hetan serê to.

(Maa mı kurmanci kılami vana, ez çarnê na zonê ma:
Na kılame eşta bıra mı Xêri se. mk)

Merga piê Xêre mı gırsa,
Pala gureto sere bıne merge,
Ser karê pala cigera mına,
Ser karê pala Xêre mıno.

(Bina xo nêna kılame nême de caverdana.
Na kılame ki eşta mı ser. Na ki kurmanci vana, ezi ki çarne na zonê ma. mk)

Koê dewa ma se aseno,
Berxa mı ze belekê varo,
Cigera  mı ze belekê varo,
 

Berxa mı welatê xeribiye de,
Her çiye ke enê serê merdemi,
pero yazi u qedere isana o.

(Ancia nêşkina kılama xo bıxelesno. Bina xo nêna.
bant kena ya kılamede bine vana. mk)

Berxa mı Korta wa bıwêşo çalede
Berxa mı Çelker wa bıwêşo çalede
Xezül be ê welati berxa mı te dera,
Çıxa berxa mı ê welati de şewle dana.

Berxa mı çığa mı ra dür kewta,
Cigera mı çığa mı ra dür kewta.
Xezül be ê welati berxa mı te dera,
Çıxa berxa mı ê welati de şewle dana.

Cigera mı mılet amê ez hewn dera,
   ....
 
(Ma mı jü kılamê ki Tırki vana, ez ancia na kılame ki zonê ma nivisnena. mk)

Nê koi wa çine biyene,
Wa guli bebiyene xırab,
Merdena isani ebe emrê Heq ya,
Wa na qurbetiye çinê biyene.

Dormê Vartoy çar koi,
Heq Varto sağlamiş kero,
Jü berxa mı wertê de ra.
Jü berxa mı wertê de ra.
 
Qayte kemera ne Vartoy ke ,
Qayte hesirane çımane mı ke,
Daê mı na welat ca nêverdene,
Qedere maa mı niya nêbiyene.

Qayte qederê serê mıke,
Belki Qederê berxa mıno,
No çı welate de zalimo,
Kam ke ez diya ez da berbiş,
Kam ke verd ra ez da berbiş.
 
(Kasetê de bin Seze rê kerdo bır.  Waxto ke Xeri yê bıra mı eskerde beno maa mırê jü şiirê nıvısneno u ruşneno cırê. Zê kılama hem bılina hemki vana mk)

Lao mı destê şıma kerdo destê Xızırê khali. Xızıro khal bêşirıgo bêhevalo. Destê şıma bıcêro şıma cêra nê kero. Derdê şıma nêdo mına feqira gunekare. Ero berxo tı nêvana daika to feqira, daika to derdliya. Tı qey şiiranê niya dertli nıvısnena, cigera maa xo kena lete, bao mı qıda. Ero berxo to qey şiirê dertli mırê wendi to cigerêmı parçe kerdi. Tı nêzana ez dertliya maa derd u çilana u belana. De xezuka Rebê aleme ez niyardê dinya.
Lê daê lê daê lê daê to qey ez arda na kamaxa dinya. To ez kerda tabiyê derdo kulanê na dinya. Eza feqire niştaro berxa mı,  mı rê wanena. Vana Xeri torêna şiire nıvısna Seza mı wanena ezi ki ze teyraka usari varnena.
Ero bao to nêva na ma mı feqira, maa xeribana, na maa mı maa devrimciyana, maa belana.Tı qey na şiire nıvisnena, tı qey na şiire mırê ruşnena? Seza mı ki mırê hurdi hurdi wanena. De eza feqire cigerê mı biyê lete; tekat u qudumê mı çino ke ezo feqir rae ra şori.
De Xızır, Xızır Xızırê gelekê gemiyano, Xızırê serê koano, Xızırê makinan, kuline pia heval u ogıri; dost u dışmeni kuline ki raxelesno, mı na sêye ki cara cigera siyayê medo mı. Kar u berxanê mı ki cêra nêkero. İndi tenge nêdo Aydinê mı. Tenga Aydinê mı berz kero ze pırên maa Aydinê mı ser kero.
Seza mı piê dae waşte va wa bêro Elman maki ruşne. A ki na ancia Elman ra ma ita lewê pirıka xo. Nıka a ki lewê mı dera. Seza mı kuna mı ser vana marê kılama vace, de eza feqire nêzan ke vaci.
Mektuba Xeriyê mı amê. Ma wande ki jü ki şiire nıvisna, ' ya ez êna, yaki ez nêna, ya mırena, daê meberbe, daê nêzo sebıke, daê nêzo semeke. Ezi tahê dertlemiş biya, Seze ki guret teyibe, her çiyê ke goşnanê ser kusur de qayt mekerê.
Eza feqira hesire çı zan kılama vaci. Kegıl ez torê selam kena, mevace niya biyo niya şiyo. Ez to ra ki ze Aydini heskena. Lew nana çımanê tora, selamê mı cênıka torê, domananê torê esto, lew nana çımara.
Xezuka wa Memıke mı ki nıka kişta to de bıbiyêne. Mı bıvatene Memıkê mı;  ez lew nan çımanê tora, mı qıdayê to buguretêne. Xızır to saxlamış kero bao. Xızır tenge nêdo şıma. Xezula Memıkê mı lewê şımade biyêne, vengê maa xo bıheşnêne. Bao Memıkê mı seba maa xo mutesir mebe, maa xorê mereq meke. Maa to merde ki cırê meberbe, Emrê isani rocê ki xelesino isan mıreno, yeter ki şıma weşbê. Xızır emro derg bıdo şıma.
Xeriyê mıki qıjke ko şıma indi xatırê Xeriyê mı bızanê. İndi xatırbe şıma. Nıka ez seba şiira Xeri çıxa ke mutesirbiya ki, nıka ez wertê sevgi dera. Çımke Aynur'a mı ama, Husniye ama, Aydınê mı amo domani amê. dormê mı biyo şen. Tornê mı amê. Seze nawa lewê mı dera, çê mı kerdo şen a tewr başka. Anıka ki ê şiyê Xınıs, Aynur'amı şiya Muş ez teyna menda. İndi Xızır yardımciyê şıma bo. İndi şonê koti ki destê şıma destê Xızırde bo.
Eke mı Memıkê xo ra vatêne destê Xızıri destê to de bo, Memi ki vatêne; heya daê, mı ra nêbo Xızır raa xo nêveceno. Ez ke destê dê mecêri o terseno. Mı ki vatêne ero Xızır zano ez se vana.
Mase keri Xızır, Eli Ş ahê Merda can şımade nêdejno. Ewro şıkır na rocerê. Ş ıkır ke mı kar u berxê xo di.
Ero bai seba ma qe mereq meke. Her çiyo ke êno serê isani ser yazı u qederê Heqi yê.
Serê koê ma feqıra mıj u duman guret o.
Nê zan şiliya nêzan vara.
İmdadê ma feqıra de bêro Xızırê gelê kê gemiya, Eli şahê merda.
Eza sêa jare, ez se keri?
Çıxa bınê bonde teyna menda.
Verde handê kal u berxê mı bi zere pır bi.
Mılet zaf amêne zaf şiyêne, meymani zaf bi.
Lıngê isani meymana ra raşt nêbiyêne.
Ewro şahê şehida pirê pira,
Pirê ulu divani cara kesirê xırabiye niyaro,
berxe
Ewro kes nêno çê ma, kuli mara remênê.
Ez vana wa Eli şahê Merada wa yar bo.
Qey ke wa isan neyar bo.
Qesê apê de mı biye vatêne:
"Verê hokmati dara çama.
De qul gauro, Ali bı ramo."
Ali yar bo, Xızır dost bo  wa destê berxa nê mı bıcêro.
wa dosti şah kero, wa dışmeni kor kero.
Wa qey ke mêrê çê ma
Wa Heq yar bo marê beso.
De ê xora vacê, yol u tarıqê erkanê xora vacê
Ê züre kerbi, zürê xorê diyar nêbi.
Her kes qefeliya cade mend.

Ero berxo destê to cêna, to bena ulu divan; to dan mehkemê kibriya.
De daê de daê; dosti biyê dışmen, dışmen  Fata feqıre ra biyê dost.

De ewro çend roci o Mıstefa u feqır ma ra xatır waşto
Bıhimetê pirê mı SeyNesemi serê oxura rae şiyo.
De mırê ne mektuba ne ki kağıdê
De Fata feqıre teyna bınê bonde menda.
 

(na kılame erzena Doğan ser mk)

Can u bedenê Doğê mı vêşa
De bê mı no na hekmete
Doğe mı nê baqıli
Na hekmeta ke serê xo veta
Doğe mı nê baqıli
Na jüyake serê xo vete.
Tı beke Doğe mı bıxapno jü çopa kıbrite
Reben ezê, feqır ezê, way wayi way
Na bejna bala titale kıle gurete
Tı beke na bejna titale wertê dost u dışmen de
Reqemra qewte.
Hey wax u hey way feqıriya marê

De sekeri derdê ma jü niyo dı de niyê.

Ule ez nêzan çı vaci. Eke band kenê ya u anê lewê mı ez kuli xo vêra kena. Ez nêzanke vaci çi? Ez nêweşa ki, indi şahê merda sata weşe bıdo to, emro derg bıdo to. De ma indi bime khal, bımırime ki tawa nêbeno.
 
 

Sure êna sura koi
Şanena deşta kamaxa Wartoy.
Ewro ancia gere kerdo.
Qol ordiyê Muş u Elezizi
Berxa mı dıme cêreno.
Hey wax, hey wax mala mınê.

Sure êna sura nerme
De xo rê şono Berxa şona.
Ancia kami gere kerdo?
Berxa mı tı merex meke.
İmdadê berxa mı de şahê merda bêro.
Wa Xızır imdadê berxa mı de şoro.
Hey wax, hey wax mala mınê.

Şahê merda berxa mı bêwayir meverdo
De bê mı no na jü hekmete kerê
Ancia gerê berxa mı kerdo
Namê berxa mı kerd do xezeta
Namê berxa kerda kıtave na dewleta züre kere

De nêzo no zewtê kami o?
Memedê mı rê amê
Na feqıriya marê
Wax feqıriya mı rê

Ero bao ma serbırnê
Zımıstani qurban Xızıri
Ez vecia tever serdo puko
Mı qayt kerd ancia,
Eskeri dormê çê ma çar no.
Eskeri kıncê sıpêy bi
Verê çêverde bi bi tiki.
De mı va:
Hey wax hey wax
Ma feqırarê, ma hesirarê.

Eskeri destê mı no piê Memê mı guret.
Kerdime makina  ma berdime khamaxê Muş'i
Bondırıxê bini, tari bi
Ma va:
Hey wax, hey wax feqıriya ma rê
Na hesiriya marê
De mı va:
Wah wah wah
De indi be marê wayirbe.
Ewro roca tenga
Ewro roce tenga Pirê mı SeyNesemi
Marê wayiriye bıke.

Eskeri mara soru sual perskerd.
Ma va:
Ma nêzanime.
De bê Şahê şehida Pirê pira
Ewro roce tenga Pirê mı SeyNesemi
Marê wayiriye bıke.

Mı Mıstefai ra va:
De meterse
De rınd ke Memıke ma nê guret
Ma tawa nê kenime.
Qul zalım o, Ali bı ramo.
İndi bê wayiriye bıke.
Xızırê kelekê gamiya
Pirê mı SeyNesemi berxa mı emanê tuyo.
Berxa mı saxlemiş ke
Berxa mı feqıra safa...

Koêbingoli

Ancia serê koê Bingoli dumax o
Mıji eşto ser,
Hini niyo?
Qey awxa goşkari dertli wanena
Qey amika Fate dana xora.
Mıradê xo çıma der o
Qey kewta xeyala şiya?
Aseno çıma verde lacê xeribiye
Vıneto vengê awxa goşkari?
Zerê amıka Fate bi ya hebê
Koê Bingoli ra vaci çı.

Fırat Çelker
Çarnanox: Memê Koêkorta

Seyid Musa (Na kılamê xalê mı Alicani vatêne)

Hini va hin berba
Şewa şewa ma şikiya
Damako buko Sê Musa
Çêniyê Lola rındê tı se vana
 Mı ra wazenê emlakê dı hirê sera
 Çıftê cendırmê amê mı dı me
 Ez berda a roce çetınê usari
 De sewda sewda Pirê mı sewda sewda cedê ma
Amo çığe des u dı koa
Çığ de şiyê dı laci jü zama
Sê Musa şi serê çıği ra
Tanburê xo dapıro.
 Şe u roc nêveştra
 Qayt kerd wayirê qıri cord amê.
 Va Sê Musa çıko biyo zibiya to
 Se ke şımşêr dapıro çığ bi dı parçe.
Hurdima laci gureti berdi.
Çêna va bao to ardi dı laci
Kanê zama? De mı sewda
Sewda Pirê mı sewda sewda cedê ma
 Amo çığe des u dı koa
 Çığ de şiyê dı laci jü zama
 Çêna va bao to ardi dı laci, kanê zama?
 Vakê hela bıde mı ê tanburê mı.
 Şi ancia zamaê xo guret ard.

Hozan Faik Baysal na lawike 1966 de hardlerzê vartoy sera nıvısna:

MERHA BA VARTO
Nıka rae awxe nêwazenê, doktor wazenê,
Non u katıx nêwazenê,
Têlewe derê çinê u laceki.
Ze toxum erzinê hard
Ma qe kes nêda qesê kerdene
Çımê maa bıbo ya ki doktor,
Aqılê xo çêde nêmendo...
Domanê dewa dara indi nêberbenê

 İndi tumana ki, fistani ki newazenê,
 Lamba ki qazaxi ki nêwazenê...
 Tari biyayine qe xemê kesi de nêbi,
 Mektebe, malım, duwa u  namaz nêwaştêne.
 Xo can ra meke doktor,
 Çımanê domananê dewa dara
İndi qe kes nêkeno ya...

Çadıre ki, doşeki ki nêwazenê,
Qe kesirê çiyê xuyo vatene çino...
Ez biya nêbiya niya destê dina serdınê,
Lıngê xo warwayê...

 Vınde doxtor, rehetsiz meke,
 Ê musayê harde merediyayine.
 Nayede çiyêde şaşbiyaine çina,
 Waxto ke ê weş bi ki nêmê jü harde bi.
Ma nêmê şewe de Vartoy  de bime
Qe kesi pers nê kerd ke ma kamime
Ahmet ma va Xınıs de
Kadır va, Ayşe va
Tewr serê xo nê kerd berz qaytê ma nêkerd.

 Qe ne sole, neki biber,
 Qe koçıqe de çorba germıne,
 Neki toxımê genimi waştêne...
 Awxe decı nêşımıte,
 Ma berbayime, ê nêberbayi
 Çımê çen heba hona yakerde bi,
 Ma selam da cı o ki nêguret.

   Faik Baysal
Çarnanox: Memê Koêkorta