YE L'INTE D'ARAGÓN Zaragoza 2008 ye l'inte que Aragón senzero á d'aprofeitar ta desenbolicar-se están un d'os millors ugars d'o sielgo XXI. L'esposizión, antiparti de creyar triballo, empentar l'economiya aragonesa y plantar fuerte o seutor ostelero en Zaragoza, cambeyará la fatxa d'a capital e a imatxen d'Aragón.

Emos d'alufrar dillá d'os diyas de l'esposizión e no nomás en os aspeutos fisicos d'a muestra. S'á charrau muito sobre a reutilizazión d'os diferens espazios e palazios que se farán serbir, pero s'á xublidau a os aspeutos sicolotxicos. Sapemos que toz os besitans salirán con bella imatxen de l'esposizión, pero emos de parar cuenta que tamién salirán con bella imatxen de Zaragoza e, consecuenmén, d'Aragón. En ixas calendatas, a soziedat aragonesa acucutará dixán beyer a suya fatxa autual. A brempa de chen no guaire alantata e cocotona, a la cuala semos mesos en muitas ocasions, á d'esmoscar-se en a boira ta mostrar una nueba imatxen d'Aragón: más autual, que guarde os aspeutos positibos que ya emos consegiu anzoniar-ie e bi-meta de nuebizos. Ta ixo, toz semos importans, pero espezialmén a colla organizatiba á de fer un uen triballo de publizidat e rilazions publicas. O suyo triballo ye alazetal: á d'enzurizar a o forano a besitar no nomás o rezinto sino tot a ziudat de Zaragoza, á d'ufrir conoxer atros lugars d'Aragón e, dillá, á de prebar que se faiga una ideya fuerte e positiba d'o conchunto d'a soziedat aragonesa.

TEUNICAS D'ESPRESIÓN PERSUASIBA Cual ye l'esferenzio entre publizidat, marquetín, rilazions publicas e maniamén? Ta escomenzipiar, cal saper que publizidat ye a marquetín igual como rilazions publicas ye a maniamén. Parolas como pormozión, rebaxas, publiziti... sen inter-rilazionatas e sen, a ormino, inter-cambeyatas. Sin dembargo, encá que toz as sen teunicas d'espresión persuasiba empresarial, sen autibidáz diferenziatas. Marquetín Ye o conchunto d'autibidáz de mercau rilazionatas que desembolican as nesezidáz d'os crompadors dica consegir retonar-les-ne en forma de porduto final, consegindo l'intercambeyo que fará esquímens a empresas e cliyens.. Istas autibidáz encluyen a retxira de mercau ta escubillar, por exemplo, l'esistenzia d'o rolde de cliyens potenzials, as suyas nesezidáz, as posibilidáz e manieras d'amanamén, etzetera. O marquetín tamién encluye l’analís d'a competizión de mercau e d'o posizionamén, pre, posibles pormozions e campanyas publizitarias d'un articlo u serbizio determinau. As rilazions publicas tamién s'emplegan como teunica de pormozión. Publizidat Ye porpozionar un articlo u serbizio a l'atenzión de cliyens potenzials, mercán un espazio comunicatibo ta meter-ie un mensatxe persuasibo d'un articlo identificau a una companyía u empresa. As ferramientas que fa serbir tradizionalmén sen: anunzios de prensa, sinyals, correu, mercaders (contauto personal)... A publizidat, a chuntas con atras teunicas d'o marquetín, fan que l'articlo romanda en os tozuels d'os cliyens e agana a ra crompa de l'articlo. Allora, amenista de pormozions e de publiziti ta desembolicar-sen. Antiparti, as rebaxas, consideratas como una mena de pormozión temporal, aganan o consumo cheneral d'o porduto. Maniamén Ye l'analís e interpretazión de l'opinión publica. Diritxe e condiziona as dezisions d'autuazión e comunicazión d'una empresa impaután, ta bien o ta malamén, en as autitúz, creyenzias e comportamén que o publico otxetibo aiga d'era. A rechira chunto con l'ebaluazión d'os plans de comunicazión d'os publicos d'estudeyo muitas begadas encluyen teunicas de marquetín. A porpaganda ye una teunica esclusiba de maniamén e no pas de publizidat, como se creye popularmén. Rilazions Publicas Ye una serie d'espresions, autibidáz e teunicas dedicatas a creyar o cambeyar a imatxen publica d'una empresa, bien publica u pribata. As rilazions publicas amanan o publico enta l'empresa, aduyán a replecar o quefer d'a companyía e os suyos pordutos. A ormino, i-sen mesas grazias a comunicaus esternos u publizidat crompata en os meyos de comunicazión (diarios, rebiestas, telebisión, radio e rete). Ista mena de rilazions publicas, difuera d'o sino interior de l'empresa, ye izita publiziti.

Tornar entazaga