Baaki saare pages English mein hain, is baat ke liye Hindi bhasiyon se maafi chahunga. Yeh page Devnagri mein nahin sahi lekin, Hindi mein zaroor hai. Fihaal aap log Roman lipi se hi kaam chala lijiye.

Aakhir maine yeh “Hindi” page banayi kyon? Iska hona zaroori tha. Is liye kyonki mere Angl bhasa ke prayog se meri ek aisi chhavi banti hai ki mano mein keval pashchatya sanskriti se hi prabhavit hoon aur Bharatvarsh ki sanskriti mere liye koyi mayne nahin rakhti. Lekin aisa bilkul nahin.

Yeh sach hai ki kuch had tak maine Angrezi bhasa mein nipunta hasil ki hai lekin iske kayi karan hain. Pehli yeh ki main English medium ka padha hoon. Doosri yeh ki maine apne shikshakon ki suni aur school time mein apne bandhuon se sirf shudh Angrezi mein vartalap ki. Teesri baat yeh thi ki Calcutta pe Angrezon ka chhap ab tak kayam hai. School aur anya patshalaon ke bahar bhi iska khul kar prayog hota hai. In sab baaton ko jaankar aap zaroor samajh chuke honge ki maine kaise English bhasa mein nipunta prapt ki. (Main kyon samjhana chah raha hoon ki maine English mein nipunta prapt ki? Isliye kyonki jis bhasa mein nipunta prapt hai, uska prayog hi zyadatar kiya jata hai- jo ki main kar raha hoon.)

Ha ha ha ha… kya aap log yeh to nahin samajh baithe ki main isi tarah ki Hindi roz doston ke sang use karta hoon? Arre baap re, aise to meri jeebh gale mein atak kar rahe jayegi!

Kuch khud se banaye huye chutkule:-

Ek aadmi ne doosre se kaha: “Kya aapne kisi se pyar kiya hai? Kya aapne kisi ko dil diya hai?”

Doosre ne jawab diya: “Arre nahin, dil dena to door ki baat hai… mera heart transplant hua hai!”

Teacher ne Raju se poocha: “Raju, do element aur ek compound ke naam batao?”

Raju ne jhat se uttar diya: “Ma’am, K, G aur K3G!”

Watch out for this space for additions in the future… oops… angrezi ke liye shama!