Kung ang Tatay
ang haligi ng tahanan
ang Nanay ang bubong
sahig, dingding,
pintuan at durungawan
Nanay ang balon ng pagmamahal
batis ng aruga
ilog ng pagtitiis
dagat ng tiyaga
at karagatan ng kalinga
Ang Nanay sa panganganak
isang paa ang nasa hukay
at kung magka-minsan
nagbubuwis pa ng buhay
Ang Nanay
nag-aalaga ng mga mahal sa buhay
nag-aasikaso ng pamamahay
nagsisinop ng kabuhayan
tanungan ng lahat
ng kahit na anong bagay
Kaya nga
Kapag ang Nanay ay naratay
di malaman ng Tatay
kung ano ang uunahin
sa dami ng kinakailangang gawin.