相信李燦森六月二日日記上面，會有「先甜後苦」四個大字。前晚阿森第一日開工拍《七月又十四》，就 要同靚女陳穎妍沙灘咀咀，本來都算浪漫兼輕鬆，不過好戲在後頭。 錫完陳穎妍，阿森仲要即刻同程東咀咀，實行男女都錫。搞到阿森拍完兩場戲，神情呆滯，名副其實好似套戲名《七月又十四》咁邪！
     前晚《七月又十四》拍一場戲講陳穎妍（Anita）畀程東鬼上身，點知原來程東係隻基鬼，仲睇中阿森，於是借Anita肉身主動同阿森咀咀。為交代Anita係畀鬼上身，所以阿森咀完Anita之後，又要再咀程東。拍阿森同Anita咀咀時，可能因為佢兩個都係第一次獻出熒幕初吻，所以緊張到手足無措，NG近十次，導演先至收貨。而到拍阿森同程東咀時，工作人員一見程東埋位，已經開始忍住笑，連阿森自己都搖晒頭歎氣。一句Action，兩個大男人就埋牙咀住落沙灘。鏡頭一完，全場立即爆笑。
    陳穎妍：阿森仲驚
       事後阿森都話：「之前我唔知要同程東咀！我第一次拍Kiss戲，就一次過咀完女再咀男。不過咀男人都好過咀女仔，起碼知大家唔會有，女仔反而驚佢誤會！你唔好睇我外表好似好放咁，實際唔係！」而Anita亦坦言第一次拍Kiss戲非常緊張：「之前我諗過拍Kiss戲前，要阿森擦牙兼食香口膠先，但只係講笑，最後都冇做乜準備。我初時以為阿森會帶到我，點知佢仲驚過我。不過見到佢仲要同程東咀，我都戥佢慘！」
    
阿森咀完陳穎妍，又要咀
程東，真係濫呀！