diyang kantoi
KANTOI
Mon Aug 5 21:43:12 2002
202.184.23.246

Ni carita diyang kantoi jaman baharikala, kira kira masa darjah lima dan anam.

Diyang kantoi ni pa macal jua urangnya, katuju malacong lacong, mun bagusti wan sapaadingan tu kira biasa la tu. Napakada abang 2 ikung , ading lalaki pulang nang dibawah diyang balima, mun diyang aur bawadu adu ka ayah gen kada baguna, tulak haja ayah bagawi, siap la diyang kana tinjak wan abang nang 2 ikung tu, kada buleh jadi ni, diyang gen kana la jadi macal jua.Ummai ai muyak nya ai, mun bakalahi sapa'adingan bagumpal gumpal...batumbuk..batampar , bahalulong bahintaung..cah !!! kada hingkat diyang madahkan lagi kiyaapa gigirnya kami, mun warek dalam Zoo nireng kami sapaadingan..maupang dikuyanya kami...tabalik warek nang manonton kami hehhehehhehe.

Alkisah dalam kaadan diyang nang macal, pawanian , gancang pulang tuh..bila diadakan pamilihan wakil "bula jaring" disakulah, diyang diantara murid nang tapilih, bukan sambarangan pulang tuh..diyang diandak dibahagian "depender"....kira urang kuat dan urang harapan la tu (masuk bakul angkut saurang hihihi), wayah itu diyang dalam darjah lima.

Awan gaya macho diyang gen bahabar nu uma ayah barita nang ma'araikan ninto. Ayah ni kira OK la, kada kisah. Uma tarus bamamai "ikam tu Yang ai, bulik sakulah banyak lagi gawian dirumah ni, bamasak, basisimpun, ingo ading, ulahkan susu ading, ikam ni kira nasib baik...nyamannnnnn haja disakulah dudukan , ako nih hulu kada suah kasakulah tumat halus lagi...bangun pukul ampat pagi tarus manyiang ikan puyu, kali, haruan,sapat hagan diulah ikan karing...ba bisin bisin banyaknya...Siang pulang ako nih kana basisimpun bamasak hagan ading ading, uma ayah bagawi mananam padi. Ikam tu taho lah Yang...pa badusa taho lah malacong lacong ditireng urang, lintuhut pulang mambangal kaya tihang jamban, praya...praya..gani'e uma ulah gawian dirumah ni...badusa taho lah...badusa". Ummai ai punya lah hibat mamaian uma, satumat irama tinggi, satumat randah irama padang pasir uma tuh, kaya urang rahat mangaji Quran..siap wan panjang handap nya...kaya batajuid pang. Napalagi kantoi la harapan diyang, tuhuk Diyang mamikirakan kayaapa handak mahabari barita sadih ni nu Ciggok.

Baisukan nya Ciggok gen mahiau sunyaan murid nang tapilih tadih hagan balatih barang sa jam dua. "Ciggok, diyang kada hingkat umpat la dalam pasukan bula jaring nih, uma kada mambariakan, uma nyuroh diyang jaga ading, mun patang (latihan waktu patang) diyang kada hingkat kaluar rumah", jer Diyang bawadu nu Ciggok. Napakada mancileng Ciggok Ramlee wan Ciggok Maimunah, "alasan jaga ading daida, ikam musti datang balatih, mun kada datang kina ciggok denda ikam".

Apa buleh buat, tiap pagi Diyang kana mama'e wan ciggok sabab kada datang balatih waktu patang, balatih waktu pagi haja. Waktu handak balawan wan sakulah lain (paringkat daerah) dah parak dah.

Diyang kantoi ungut ungut handak ma'akalani kiyaapa handak mamintare uma ayah, balatih waktu patang. Tabaraung pulang masa tuh darjah lima ada "papariksaan panilaian" , jadi Diyang gen badusta la nu uma (shhhtttt Diyang dah minta maaf dah) , jer Diyang patang ada "kalas tambahan". Bila uma ayah dah katuju diyang ka sakulah waktu patang, Diyang kantoi gen bapiragah lah mawa buku, pinsil dalam beg. Diyang mamuruk baju kurung batapih (shhhtttt dalam baju kurung tu Diyang puruk T'shirt...dalam tapih Diyang puruk salawar handap. Sampai haja ka Padang sakulah, diyang timbai baju kurung wan tapih, taros malacong kasukaan dapat mandusta'e uma dan dapat bamain bula jaring.

Tujuh hari lagi parlawanan ka sakulah Kuala Kubu Bharu, ummai ai bapaluh paluh Diyang mancari akal pulang kiyaapa handak mahabari uma ayah handak tulak ka parlawanan tuh. Tujuh hari tujuh malam pulang Diyang inda kada karuan rasa, maklum haja ah handak naik mutukah ciggok tulakan ka KKB tuh. Ciggok dah mahabari, pamain nang kira hibat, dapat naik mutukah Ciggok nang paling ganal, nang lain lain naik mutukah Ciggok nang halui, Diyang nih wan dua pamain sooter tamasuk dalam sanarai naik kurita ganal....hmmmm..kada sabar rasanya. DiCardap kan carita wan campur tangan Ciggok, dapat la Diyang tulakan ka KKB...Manang.

NI kisah uma pulang nang tulak bagawi "manabur baja", di Felda Sungai Dusun wan Sungai Tangi, pahadangan puhun gatah hingkat di toreh. Uma ni tulak bagawi susubuhan badarau wan urang sakampung naik LURI, bulik pulang dah jauh patang hanyar cangol karumah. Biasa la banyak haja kawan uma nang anak dara. Bila masa makan tangahari, maka bacarita lah kawan kawan uma pahadangan mahabisi nasi ditangan. Salah saikung anak dara tu bangaran Rusmah, inya nih aktip dalam "BELIA" di kampung, inya gen bacarita nu uma. "Ano Cik ai ulon ni mun patang sasakali pasukan Belia karap balatih bula jaring wan kakanakan sakulah Gadangsa, ummai ai walaupun kakanakan lagi tagal pintar wan hibat bangat pasukan tu. Ada saikung Diyang tuh, walaupun awaknya agak lamak saikit tagal ummaiiiii ai kada hingkat malawan ulon...hibat babanar"."Ooohhh kah, sipa jer ngaran nya Diyang tuh???" uma nakuni Rusmah. "Diyang kantoi" jer Rusmah.
"Hah?????....kiyaapa urang nya jer", uma nakuni panuh saspen. "Urangnya lamak saikit, bakulit hirang (sshhhhh tapi manis U), rambut nya kariting, mun kuriheng ada lasung pipit dihujung bibirnya". Uma diam haja.

Bulik karumah rahat Diyang bamasak disapur, uma gen mahiau Diyang, karas haja bunginya....Bah napa lagi Diyang gadibak gadibuk bungi dalam dada Diyang, ni musti ada nang kada kana nih, dalam hati Diyang kantoi. "Kasia ikam Yang...caam ikam bapadah bujur bujur, salawasan ni ikam bapadah handak tulak umpat "sakulah tambahan" tu bujur ka kada, bapadah bujur bujur, mun ako taho ikam badusta...kada mayo tanah ikam ku kapongi..ku pupuhi". Di handapkan carita patang tu jua Diyang gen KANTOI...ripu awak Diyang kana pupuhi uma, dasar uma kada magan diwaluhi, pantang banar inya, kaya inya bapantang tatamo tahun pang...pantang tatamo tahun baru, makaam baanak saikung inya...kada gen tahun hadapnya musti uma bapantang. Tagal Diyang Basukur Banyak Banyak nu Allah s.a t, nang bagus babanar, sunyaan anak uma "manjadi", kada manyusahkan uma ayah.

Barkat Diyang nang mawaluhi uma...kaputusan papariksaan Diyang darjah lima tuh, kada baik, Kantoi...ciggok mahadiahkan Diyang "bukah sakuliling padang" hagan satiap matapalajaran nang kantoi.

Sakian haja carita Diyang Kantoi nang KANTOI sebab mandustai uma ayahnya. Haaaa...mun ada kakanakn nang maca carita diyang ni, jangan sasakali mawaluhi kawitan..badusa taho lah!!!.

MANYALAYA

Upal batakun ka nenek bini wan atuk laki. Takakana bagamat manyuuk, bakidip bapatak mamaraki handak manyuari ka nang tuha-tuha bahari, napa ‘pandinding’ ilmu panyangga diri ? Huhunyanyang, kalawasan mangiciki. Tapaning surangan batapuk dahi, bagintas jari, gagarunum bilang parak satangah lali. ”Napa jua pang tuntutan andika bahari ?” Bubuhan nang anum takarumus muha, tagicing gigi, garujutan kaning, kujub-kujub, takijim tabincalak umpat mahawasi, magun kada jua maharati. Gawian nang disambat turang MANYALAYA .Wasi tuha batagar nang jabuk di haragu, ‘barang’ tahagaan rahat mangukut bulanak manambak tungkaran. Dikariup, dipundut awan kain kuning bakasumba bungur. Napa ka inahulnya ?

Kucing marau laki, hirang mantuala saikungan nang pina katuju diingu. Babatis handap, batalinga capang, hidung mingar, sisingut labat. Mata bulat nyarak bila maningas, kada bakirip, habang mancirau ilah tataguk. Amun mangiau, mamburinjing cagat bulu awak mandangar. Kada magan di galah, dihanyakan haja, jauh sakali amun di pupuh awan sasapo, ngintu kucing ‘inguan’, jangan dihirani. Amun digalah gin, mancungkung, manyadin mambu-u haja. Kada bisa basisimban, dasar ‘binatang inguan’. Kada cagar ba-ugah, kada bukah mancicing ilah kucing-kucing lain. Kaina malam ada nang baulihan, ada nang bahilangan, ada nang kamalingan. Sarumahan sunyi suung kana pukau, janak guringan kada sing garakan. Si Maling umpat makan pahadangan mahungkar barang cuntanan. Kaina satuyuk tahi ditinggalakan. Gawian bilang baliwatan….. sapala intuh babanar ….

Urang bahari banyak nang katuju ‘manuntut’. Nang lalaki handak taguh, handak kuat, handak kabal. Gancang basahanan, tung banih dijujung di kapala awan layarnya, banih saguni bapangup dikilik maringgung kiwa kanan. Tugul manajak, talah satangah long sapagian. Batulang wasi baurat dawai, bahati karing, batalinga rinjing.

Takajut tasimpurut duktur, takuciak misi, injik dibahu, malitak patah jarum, kada lanjam. Ada nang handak baisi ‘Ilmu Panunduk’ bagawi nyaman aci tunjuk, ricuk-ricuk. Urang takutan, napa kahandak diturutakan. Akal mamilanduk. Napa jar sidin satuju tantan, ilah karabau di cucuk hidung.

Nang bibini handak, “Ilmu Pangasih” bapamanis disayangi laki. Napa jar bini kada kawa ditangati. Babahum saurang manurut sakahandak hati, nang laki karap dikalihumi, lalu nasi di padu sapariukan ‘ditangasi’. Bacari, manuntut satayuhnya ilmu nang kada karuan. Basusuk jarum amas gasan mamarunai pipi, putih mampilak kadada bakunat. Licin kaya hintalo bakupas, arai bangat amun disaro “Si Diang Bungas”. Di tangah kaning susuk bahalang, manghias alis nang lantik. Bagalung, basanggul tinggi pesen ‘aneka gorondo’

Di bawah dagu susuk malintang, kakaruncum, muha manis, kada suah marong, kukurihing tantan, bagigi amas kada bisa basasarik.. Tahi lalat ulahan ditambahi, talinga disubangi, jari diinai-i. Basusuk di bawah ilat gasan manyamani suara. Cacaringit bakuriak banyanyian, bilang sampai tamimpi-mimpi, karindangan. Maigau-igau, malalur kasiangan.

Nang basusuk di awak nyawa liat, ngalih mahadap mati. Ditimbak awan paluru amas, manjul kada mambari bakas, awan paluru pirak, matan takipai tapuracak, kada jua batamu ajal. Ditimbak, ditatak, disudat, diudar magun banyawa. Di gantal disumbalih kada pagat urat mareh. Dirandam ka sungai, kada kawa lagi maliwa. Paampihan, disudi awan buluh barincung sumpahan pamuga masa baguru. Sangsara hidup handak bamati. Tuntutan kaitu gasan dunia nang pana. Kada manyanangkan, kada manyugihkan, imbah ta-ulih bala, azab sangsara.

Saminggu sakali ‘haraguan’ diunjuki habuan, dibari pamakan saidang bajubung, sanyiru wawadaian, apam mirah apam putih. Diandak, ditagai di tangah ruang. Gagarungkap ilun kadangaran. Isuk pagi disingkai di bawah tudungan, dilihati, tatinggal idang puang, langis kada bakaliungan. Pinjung rumah ditungkali, baras kunyit dihamburi, bucu rumah dikulilingi tujuh kali, tihang ibu dipajari. Rumah bahari batihang ‘karas’, di tarah awan balayung.

Tumbak barajah bangaran Khalifah kana digaduhi. Kapiangan, amun kada diharagu jurang ‘mamakan’ tuan. Kaina mati nang tuha, kana ada nang manyanggupi - mahakuni. Amun kada disanggupi kaina bangalihan. Garing manahun, batangah bulanan kada jua tacabut hinak urang nang maharagu. Awak kurus manjaing, gigi jalanggaran, pipi limpap, mata calong, batis tatinggal tulang karing, daging kandal sudah kandur, dada lipir tinggal kurangka, kapala gipih, suara garut, basurah kada lungkas, kada babuku kada baruas lagi. Ta-ampar surangan di paguringan. Taganang Orkes El-Suraya Medan wan lagu “ Salimut Putih “.

Manggayau takamih di tapih, lancun saawakan, hancing saalaman. Magun kada mada lawan kaluung, mahantos bubur nasi kada maalang. Talah batangah purtin , mahaup-haup ilah saminggu kada tahaba makanan. Guring balampas kahangatan.

Ilat tajulur panjang sampai ka barumahan. Guring di padapuran. Disintak di ulur, sampai tapulilit di rasuk di galagar. Barabah surangan ‘mambarungun’. Bangun mancugat mamandiri ‘inguan’, ilah urang basurah surangan.

Dirut-dirut ilah ilun itik manyudur
Napa di hirup, napa di kinum ? Urang batakun,
Jar….banyu pucirin.
Muriri, galianan, mandangar
Napa tuntutan ? Napa ulihan ?
Napa maka manyalaya bangat ?

Mata cagat maningadah ka bumbungan.Awak dingin manganyim, kuku biru, palipatan karas. Nang suah kahantuan kawa malihat ‘Si Iblis’ baatui di alang, mahadang handak manyakak puhun gulu ‘tuannya’ karana pamakan kada di bari. Anak cucu takutanan, tajun bacuntan ka barumahan. Mana jalan kaluar nang ‘diharagu’. Kahulu kahilir sasarudup bacari bumuh, mangasiam minta ganiie minta tulungi. Bangsul bumuh lalu batakun. Siapa nang hakun manyanggupi bat kawitan ikam nih ? Anak cucu, ba-uling kada, ba-unggut gin kada.

Sakalinya bumuh sudah lawas manaho.
Hanyar sampai di muhara lawang,
Luman sawat malangkah watun,
Bau bilang manyalangsang.
“Sidin sudah kadada lagi.” Jar si bumuh.

Kawitan mangaroh ilah karabau kana sumbalih. Hinak habis, tabulaning tajujul bigi mata manciling. Satangguk mata urang datang maniring. Ada nang kapidaraan, maigau-igau kada mau taguring samalaman, katakutanan. Kayapa malaikat manyintak pahinakan ?

Takibar samangat, taungkap tulang bumbungan, tasilak hatap rumbia, takitar titiwa, mancuhung lubang tambus ka langit – bakas kaluar ‘barang haraguan’. Kayapa pulang maurus janazah, batakun ka tuan guru ka tuan Imam. Mapa mamandi, mapa mangapan? Hulat kalatikan, bahamburan, kaluar dimuntung, bagarak dihidung. Bau haruk sakampungan, saalamanan. Sambil mamandi sabuyung minyak engsen dikubuyi, bau bangkai magun mandingur. Satusaini dikapan lalu disumbahayangakan, awak nang tinggal sakaping papan. Ditangah halaman, bagarak-garak tabala, kakarubut tangan di dalam kain kapan…Takipik mamarina sapadangsanakan, wani-wani takutan. Saikung-saikungnya mandam. Mapa handak mambawa ka pakuburan. Balapan kakanakan nang gancang, tamam-tamam awak manyahan, mausung baumbaian sampai lantur buluh hauran. Pangusungan maumat-umat……Barat....Barat….Barat…Bawa bamandak, barantat satumat…takalirut muntung basurah surangan. Dihihingkatakan, diusung tarus ka tanah pakuburan. Manabuk liang gin batutunjulan, kada wani, kada hakon kaluko kapuhunan. Takajut sabarataan, tanah liat rumbih sing ganalan. Liang halui jadi ganal. Musim karing, kamarau panjang, tagal banyu magun mangkabau. Mapa mamatak tabala timbul. Dijajak dihindik hanyar mahu tinggalam. Tumbar urang sakampungan.

Tu pang jurang mun ‘ kada ditampan bumi’

Galitiran awak saikungan kadinginan, mancabi-cabi puhun gulu, ganal hinak, lamahan lintuhut mahadang ari mulai kadap. Sunyaan kada sabar, kulang kapik handak mantok badadas, badadahuluan maninggalakan pakuburan nang kada bakatalahan.Talqin handap ancap dibaca-akan pahadangan urang mula baisur.

Talah sapaju mamangan urang tuha bahari.

Parang kumpang nang disayangi paninian laki, simpak salawi matanya di asapi tiap malam Jumahat. Baju hirang dipuruk satahun sakali, dijarumati intang nang rabit. Batu guliga ‘sakti’ kawa bakunyung amun diparahi limau mipis. ’Batu hidup’ jar nang manaruhi. Karambit dumul ditakutani. Karis basapoh nang kawa

‘tarabang’ tapacak ka tawing saban minggu disintoki. Pisau lipat dilimaui. Kaca, papaci sarabanya baturang bahari di taruhi silip di dalam laci. Lading dumpu dikamiyani. Napa maka kaitu gawian urang tuha kita bahari ? Kamana tulaknya ilmu ‘kihal’ ? Kadadakah nang mawarisi gasan kita ari ni…!!!! Napakah ianya munafaat atawa mudharat ?

Pasan paguruan
“ Jangan pati talalo manyalaya batuntut Ilmu Kihal.
” Hati kada mau sanang. Pikiran kada tanang,
Hidup kada mau nyaman,baganangan,
Tuhuk bacari, uyuh bagawi
Ulihan kada dibarakati,
Ngalih mahadap mati.

Bah! dasar bujur banar napa nang di kisahakan dika tuti orang bahari saja kakaitu haja pang napa kah leh! aur handak bahaharatan haja tagal kada mangganang akibat nang dudi.Amun mati nang karap jadi hantu nih bilang Banjar pang sako ,napang parian nya di kisahakan gin cakadanya bubuahan Malayo taho angkara nang kalakon tuh napa kah? Panjadian jar! imbah haja di tanam siang ti habis haja sanja alamat bakukus pang pakuburan, kada lawas ari makin sasain kadap iya hudah jaajaap pam bulik karumah. Amun hantu lalakian tak kukurang jua tagal amun nang bibinian saja mambari marma kapala pina curing kaya kukusan di muntung bajuntaian tanda nang hudah di untalakan ka laki wayah hidup bahari napa ,basuara pulang tu ........Aku minta ampun ayah nya ai!!!......jar, imbah tu tatawa ........parian mandangar tantu mamburinjing bulu awak batis gin asa kada bajajak di tanah lagi ,maka hantu panjadian nih kada kawa di tutulak kaya iblis mun di tantang saja di dapatinya banaran.Katalaluan tuti ada haja nang wani manakuni kanu si hantu .........kaya apa di ahirat si anu.......manjawap ai......Ratttt.....ratttt....rattttt heee heeeee napangada makin hangkui di tatawa akan nya banarai!

Di sasadangi haja parian nya handak manyalaya jua!
 

ba
Kaganangan Bahari
Wed Aug 7 21:50:14 2002
203.106.72.217

Kaganangan Bahari
Ako ni dilahirakan uma' di Sg Manik.Pt7D.Permatang Halt.
Saingatan ko la,,,,nang taho bahari tu kada lain.Bamacal pang.Pagi tulak sakulah.Patang bamacal.Rumah ko ni parak awan jalan kuritapi.Aktiviti harian to kada tanto.Mun musim banyu karingan dibandang,maikan pang.Mun malam ni,kada tanto jua,takadang to bisa ai mambanjur kali.Mun imbah mangatam,pahadangan urang handak manampak,(bahari padi tahun ngah ai....)kami tulakan bagarit burung.Mun kadada aktiviti lain mun malam ni,ada kakawanan mambawaik maliat talibisin(TV),kamana tulak?.To..ka Sg Tukang Sidin tu mun handak maliat talibisin.Babiskar haja tu tulakan.Biskar kada balampu.Mun ada gen sabuting jua nang ada.Mana nang ada balampu kana jalan dihadap.Mun nang dihadap to pina kada karuan,maupang ada nang tacabur ka parit 'kong'.Mun ada haja nang tacabur kadalam kong,talah nang dihadap to kana injing talinga.Napa am,sajanya baamalar pa.Tulakan to kada mun ramai,antara tujuh ka lapan biskar jua,taga masing-masing naik badua.Mun maliat talibisin ni kana bayar sakupang(10 sen) saikong urang.Taga nang tatapnya to ari carita malayo ari Jumahat malam,waktu siaran jam 10:30 malam.Bayangkan mun habis carita pukul barapa.Batangah malaman pang hanyar hampai karumah.Kakawanan ko bahari to ramai ai.Antaranya Mad Said Yadin,Zamuri Ladning,Amai,Utuh Haliling(galaran..)ito balah Pt 7D la..mun balah Pt 7C, Pt 7B,Pt 8 awan Pt 9 to,,Usup Ahmad(cucunya Hj Karim)Hakim,Abangnya Puraca,Atip(Anaknya Asan Tahrip mamarinanya aLLan),A'an,Ali Arshad,tamasuk lah Tinjau.
Ako ni bukanya apa,saja kaganangan kakawanan bahari narai.Asa mustahil sunyaan nya to baulang baasa.Mana sunyaan nya to wayah ni?.Kada taho.Nang ko taho Tinjau awan Abangnya Puraca jua nang ada.Tu gen parak maniga puluh tahon kada batamuan.Suah mamandir di Internet awan manalipon banarai.Tu gen Tinjau jua nang karap manalipon.Kakawanan nang lain to kada suah batahabaan lagi dah.
Dikampong bahari kada kaya wayah ni.Bahari tulak kasakulah bajalan batis.Tangah dua batu jauh nya rumah awan sakulah.Taga handak jadi urang,tapaksa la sakulah.Mun tida,jadi hanto pang.Sakulah bahari mula balajar jam 8:30 pagi.Napa am mun mahadang kakanakan nang jauh,ada nang dari Pt 10 gen ada.Nang ada bahari sakulah kada banyak.Tu pang satu-satunya Sekolah Kebangsaan Permatang.Sakulah ni kada mun harat banar.Sakulah paninggalan British.Cuma ada dua haja bangunan.Kacuali di akhir tahon 1967 hanyar diulah bangunan hanyar,hagan bangunan tambahan.Bahari sakulah to kadada bakantin.Nang ada dua buah kadai ganti kantin.Antaranya,subarangan jalan to,kadai Uteh.Nang sabuting lagi to,kadai Palui.Dua buah kadai ni pang ganti kantin.Tinjau taho banar kadai Palui ni.
Saat palih sadih ako sakulah disini(Permatang),ialah bila ayah baandah ka Simpang 4 Semanggol.Masa to rahat cuti Penggal Ke III.Jar abah ko"Kita baandah ka Spg 4 pulang umanya ai...."Mandirau darah ko,napa am tapaksa maninggalakan kakawanan sakulah,Paninian di Pt 4,Along Mohamad di Pt 6D,Pak Lang Dol di Kg Banjar.Ingui-ingui tangis,ako kada hakon baandah kalain.Tuhuk uma' mamujuk.Katuhukan nya ako baalah jua.Asa sadih banar ako maninggalakan kampung saurang awan kakawanan.Ari handak baandah to hibak rumah awan urang kampung cagar basalaman wan barelaan jar,ada nang batatangisan.Ako ni bilang kada karuan rasa pang.Kada sawat batamuan awan kakawanan,ada la batiga baampat nang datangan karumah,nang lain to kada taho di habar ako handak baandah kalain.Dari tarikh to,hampai wayah ni kada batamuan lagi dah awan kakawanan bahari.
Patang tu jua sampai di Pt 1 Simpang 4 Semanggol.Mimang kada jauh antara Pt 7D Permatang Sg Manik awan Pt 1 Spg 4 Semanggol,taga mun hati saurang mimang di Sg Manik kayapa am rasa.Sayu,sadih,,,,,sapanjang jalan ako to satumat manangis,satumat baampih manangis mangganangakan kakawanan.Wayah ni,,,mana kakawanan ko bahari?.............

tinjau
Kaganangan bahari jua
Thu Aug 8 00:07:15 2002
161.142.2.11

Aku nik di baranakakan di patangahan tahun 50'an di Permatang atawa Parit 7B, Sungai Manik. Arwah ayah ko asalnya urang Parit 6B Sg. Manik, umako urang Masjid Tinggi, Bagan Serai. Kaduanya bahari basakolah atawa mangaji pondok di Mesjid Tinggi sampai lah manyambung balajar ugama di Singapura. Imbahnya tu bulik ka Sg. Manik lalo kadua dua nya maajar ugama di Sakolah Agama Rakyat di Permatang tu tih sampai lah umur ko 4 tahun, imbah tuk uma ko ampih ma ajar, pasal aku ni ba ading lagi. Arwah ayah ko gin bagawi pulang di Pejabat Ugama Islam Daerah di Teluk Anson ( Teluk Intan ), kami bapindah ka Kuala Sungai Manik, damini kampong tu di ngarani Kampong Bahagia, sampai lah ka akhir hayat nya.

Kaluarga kami ni dari banjar kaluak, tapi, pasal salawasan badiam di Sg. Manik, aku hingkat basurah kada pilat langsung dalam ka dua dua inguh nih.

Babulik ka carita masa haloi sabalum basakulah, yang tadi tu mukaddimah nya banarai. Bahari tu leh, Parmatang tu saja rame', pasal nya kadida batalibisen lagi, letrik langsung ngai, banyu paip gin kadida. Jadi bila ada sukan Sakolah Parmatang ( sakulah angah lanjung ) atawa Ehtifal di sakulah Agama tu maka banyak urang datangan, kira la dari Parit 1 sampai ka Parit 12 urang turunan. Kadai Paloi tu hibak pang, lagi lagi imbah musim mangatam. Mudirnya bahari Ustat Hj Khalid. Sasakali bila malam tu tarang wan lampu gaslin, tu yang rame' tu, pasal malam malam lain nya bagalap haja pang. Mainan ko tu pang mangulung tayar biskar, mangulung.... napa tu ngaran nya ( tampat jari jari biskar ) kalumpanan ngaran nya, di gulung dangan kayu, muntung babunyi macam mutu. Bila panat mangulung, nah mamulur sasiur wan gatah nangka, kada payah basalipar, bukah budas haja, kada suah pulang tu tajajak papaci, bia di bawa kawitan ka kadai paloi, nah bapaluang makan es kapal atawa kuaci cap halang. bah, mun dapat es kapal tu gin bilang arai babangat.

Bibia umor ko dalam lingkungan masuk 5 tahun, kami bapindah ka Kuala Sg. Manik, di kabun gatah. Tanah arwah paninian. Masa tu jalan Sg. manik tu gin haloi haja lagi. Bas RIDA warna biru, bas nya gin handap haja. Arwah ayah hanyar mula bamantukah, Morris Minor, Bia handak manguna, malacung signal di pinggir lawang ( urang damini kada suah malihat signal mantukah bahari bisa malacung. Mun betri nya kada kuat, kana ulai dari hadapan. Aku kadida kawan, bakawan sadangsanakan pang. Sasakali kami di bawa kawitan ka rumah paninian di Bagan sarai, 2-3 hari. Bakubang pulang di paparitan, ujar urang Bagan Sarai, Taluk Ayak.

Tahun 60'an, aku mula basakulah di Sekolah Kebangsaan Sungai Tungku ( tungku dapor ) Basurah malayo gin kada pati ruhui. Mujur jua sakalasan banjar. Bahari darajah satu hanyar balajar mambaca ` Ali main layang- layang'. Bila mula basakulah ni lah aku mula bisa bakawan, sampailah ka darajah 6. Ngini lah jaman yang paling manis mun di ingatakan. Masa tu lah aku mula bisa maunjun, manangkoi / mahancau, manaut, manimba, mangacal. Taho lah mangacal ? mangacal tu manangkap haruan / kali dangan tangan haja, di caluk lubang haruan, di tangkap hidup- hidup. Mun musim mambuang banyu, panuh raga ganal. Talah ma ikan, balumba pulang di kunci air, tajun dari atas ilah Tarzan. bayang kan lah, punya lah tinggi, wani haja manajuni, tajun tirok pulang tuh, taga' kami taho dah di mana yang batunggul. sasakali, malam ada wayang gambar pertanian / ugama. nah, kada mambaca buku pang, dari patang lagi spekal nya dah hahalulung, kuciakan kakanakan kaaraian. cuti mangaji malam tu. al maklum lah kada ada talibesen lagi masa tuk.

Bia sampai musim hampalam, di Kuala tu hibak pang wan hampalam, hagan di jual ka cina. hampalam talok, bamban, putih wan kuinik, tuhuk dah ako makan hampalam. Kuinik bahari kadida yang bahulat nya. Hayam bahari gin kadida hayam haraguan bainjek, samua hayam kampong, tu yang jarang makan hayam.

Hingan di sini mayui luko dah, mun di tarusakan jua kina sampai ka jaman dah baligh, supan. Dah bisa ma eksen pa, bakasut beatle / A go go, suak elvis, surui mancungit di paket, tasmak plastik hirang ( 1.50 ) bia bajalan di pakan, malining dahi, hapak katiak, bapalohan pa ma iringi babinian bajalan dari balakang. Duit dalam paket kada sawat dua ringgit, luko tajajak pinggan cina di kaki lima, pajah kiraan, mapa mambayari.

Mayu dah.......barilaan lah.

ba.ra.nga
umpat mangganang waktu bahari...
Thu Aug 8 10:50:00 2002
202.184.41.16

Amun bacarita kisah bahari, sama haja kita ni leh. Tulak sakulah bajalan batis dua tiga batu, bajinting kasut, bacalumut batis, sampai disakulah hanyar babasuh, mamuruk kasut. Ako gen kaitu ai jua, kaluar rumah papagian masih kadap, babaya kaliatan jalan, bakumpulan dipangkal kampung, hanyar baumbaian tulakan. Salain mambawa kampil buku, bajinjing tiping sango, nasi awan hantaho basanga bakicap.
Amun diJohor ni bahari, kakanakan mula sakolah agama bila sakolah Malayu sudah darjah 3 atau 4, sudah bisa mambaca sasaikit, bajuju. Sakolah Malayu pagi , disambung awan sakolah agama disakolah yang sama. Sudah baisi biskar, jajarunju mailak licak, mailak akar kayu. Jalan kada mun kaya wayahini, ada jalan khas, hanya lorong disasala pohon gatah. Bahanu kana jua turun bairit biskar, napa biskar basumpal tanah, dikuit awan ranting kayu.

Aktiviti harian, bulik dari sakolah, bamacal pang, main kotak ruku, tutup botol, main galah, malastik burung, main kalayangan. Bamusim. Kakanakan bahari memang kreatif: pistol, kalayangan, gasing sunyaannya baulah saurang. Main biskar naik calok, tajungkang dalam parit suah haja. Biskar diandaki galumbungan (belon) atawa karatas kandal, babunyi ilah moto amun dijalanakan. Bah rami nya ai batinjak biskar, balumba ilah Formula 1.

Malam kada ada letrik. Lampu ayan pang. Lampu gaslin ada ai, tapi dipasang hanya bila ada aruhan. Karap ai jua umpatan maliat talibisen, kana tulak babiskar, umpat maliat dirumah urang, kira jauh jua lah, ada sako mandua batu. Bayar kira masok tong, kaya tong derma masjid tu lah, kada kiralah 5 sen kah 10 sen kah, hagan balanja bateri (generator) tuan rumah. Banyak jualah yang meniring, ilah panggung wayang. Paling banyak bila carita Malayo awan carita koboi.

Kaitulah labih kurang. Sama haja dimana-mana sekitar tahun 60an. Jauh bezanya awan wayahini. Kakanakan wayahini kada dapat marasani nang kaya itu. Kada dapat dibayangkan. Wayahini bangun haja kada lagi bakadap, kada lagi mandi disumur. Kalunyuran matokah, kada lagi bajalan batis, babiskar.

Segalanya telah banyak berubah…….
 

Kupiah
Bakisah bahari jua kalukok dapat masuk cardap
Thu Aug 8 19:12:22 2002
219.92.222.11

Mun diganang kisah lagi haloi bahari, asa marista ada jua, asa mambari tatawa ada jua. Kulaan AB nang lawas di AB ni tanto sudah malihat kisah-kisah jaman kakanakan KupiahSasak bahari. Antaranya : Kisah KS maulah duit palsu, kisah KS awan kurita tahi, kisah KS tatiring wayang hindu, kisah KS kakanak sugih (tajumpa sabuntil duit), kish KS naik biskar ganal kayoh bacalok, dll. kada kawa maingatakan.

Tagal ada sauting lagi nang kada dicaritaakan, supan kaina pacah rasia. Hari ini kada apa ulun mancaritaakan. Napangnya handak disupanakan awan kulaan leh. Kamungkinan parkara ini jua ada dialami kulaan nang lain. Parkaranya ialah KS ni mampunyai satu 'phobia' iaitu asa takutan yang
keterlaluan.

Nang ditakutani tu bukannya hanto atawa ular, tatapi polis awan saikung hindu pamanjat nyiur. Bayangkanlah, rumah kami tu bujur-bujur basubarangan awan balai pulis. Balai pulis Changkat Jaring tu pang. Kami diam di rumah kadai, lumor 12. Wayahini balai pulis tu tinggal tapaknya haja lagi. Kawasan tu dah dibangunkan sebagai kawasan gerai/restoran. Jadi mun kaluar rumah kada wani kada jalan hadap; jalan balakang rumah tu pang. Mun ada apa-apa hal nang parlu dilakukan di bahagian hadapan, dangsanak nang saikung tu pang jadi urang suruhan. Tagal mandakannya kawasan balakang rumah tu luas haja. Disitu pang tampat bamain. Nang herannya pulang, dah lapas ka balakang tu, kawa haja layau ke mana-mana sampai pulis gin kada kaingatan lagi dah !

Nang manjadi punca takutan pulis tu pasal kes makan di bulan Ramadan ! Pada suatu patang tu macam biasa la ulun ni bamain di hadapan kadai. Muntung tu sambil ingap-ingap makan wadai hagan kawitan babuka kaina. Tiba-tiba talihat saikung pulis tu manyubarang jalan saolah-olah manuju ka arah ulun. Bah dalam hati, aku ni kada puasa ni, habis ditangkapnya ni kaina. Napang pada bukah ha lagi tarus ka dalam rumah. Ranai samiut di pinjung dapur. Tu pang mulaannya.

Badi takutan tu baluman habis, tarjadi pulang kes kedua. Kali ini malibatkan hindu pamanjat nyiur. Di balakang kadai ada banyak rapon nyiur. Labat-labat buahnya. Hindu pamanjat nyiur tu datang kira-kira salang sabulan sakali maambil buahnya. Mancuntan kah, disuruh nang ampun nya kah, tahuam ulun kurang pariksa. Kami kakanakan karap mahuhuluti hindu tu. Mun talihat inya daripada jauh, lalu dikiyau ' Wakkrok boohh '. Lalu sarik ai hindu tu. Maka tatawaan kami sambil bukahan. Sakalinya hanyar katahuan makna wakkrok bohh tu ialah maliwat kalimut lambu ! Han, dimapa kada sarek sidin. Mun saurang gin amon dihuhuluti kaya itu, tahan batimpasan. Bapala banar !

Jadi suatu hari rahat bamain-main di balakang rumah (kada bapagar yaa am) kada parasan hindu datang. Dah parak maka hanyar tatireng ka hindu napang pada bukah mancicing ha. Dimapa kada takutan malihat awaknya nang hirang kaya burit rinjing sulih kada babaju. Salawar handapnya nang gubih di ikat awan talipinggang ganal. Pisau cakuk sing ganalan basisip dipinggang. Jar ko dalam hati ni misti handak disumbalihnya kah ako ni pasal mahuhuluti inya harito.

Bah parah mun kaya ini. Ka hadap takutan di pulis, ka balakang takutan di hindu. Masalah ganal. Tumat hari tu maka ulun jarang kaluar jauh dari rumah, takutan bahagaan hindu tu napa. Tagal caradik haja tih utak ni mamikirakan. Hindu tu datang sabulan sakali haja. Jadi pahadangan tu 'the coast is clear' jar urang wayahni.

Itulah saraba sadikit pangalaman masa haloi nang ngaleh dilupakan. Tagal mandakannya apabila ulun mula basakulah darjah sato, phobia nginto hilang dengan sandirinya.

Dari ambin ku liat hibak di tungkaran kakanakan saumuran ko babawa rantang. Ako nangguh tanto gulai hayam. Kakanakan tu halam mangaji nu uma ko, damini banyak yang dah tuntong. Yang babinian nya ku liat mina babungas dah, halam masa haloian nginto bahingusan. Bahadangan kawan lagi luko, hanyar baumbaian singgah. Bahari kakanakan ngaji mailangi paguruan hulu, hanyar bajalanan ka lain.

Ku itihi di halaman hibak wan ratik marcun, damaran gin magunai ada lagi yang manyala. Mariam cuntang kada ta hirani lagi. Fazidah Junid bagagantian ngan Saloma di radio balagu raya. Baju patihah yang ku puruk ni pugaan nam makai pagi ni, imbah di lubi kada suah di gagatuk, di taruhi dalam lamari, ada haja lagi bau ubat gagat. Halam imbah di tukar, di tapas uma hulu wan kanji, bah, tajam sait nya, mun tagatuk maui luka.

Di atas mija mancunggul Kapala Idang baandak dalam talam haja, di tutup awan tanggoi / sangai babunga bunga ulahan uma, rajinan bangat uma baulah tanggoi. Wadai nya, halua miskat, bahulu,wajik, putu, taho jua, napa napa kah lagi. Bahulu tu matan subuh imbah sahur rajin uma mamukul hintalo sampai pagi, kaito pang sarajinan tu parak raya.

Kami halam bia bajalanan ka rumah hurang, kada suah bainta duit, urang gin kada mambagie duit. Di paket marcun wan bunga api jua ada. Kami bajalanan saja bujur bujur bailangan, kada tapikir bacari duit raya. Yang tuhanya gin bujur bujur arai bila di ilangi, damini sapalih tu magunai manunggui talibisin ari raya, macam macam carita pang, tu yang asa kulir tulak ka rumah hurang patang raya.

Malam nya imbah haja maghrib bajurut pulang biskar ampah ka pakan, tulak maniring wayang. Di Teluk Anson tu ada 4 panggung wayang. Yang sabuting tu di galari urang panggung suku. Tiket nya 25 sen haja, di hadapan kah di balakang kah, sama haja., makai bangku kayu panjang haja. Carita nya 007, Tarzan awan koboi. Mun di panggung lain tu maka hibak urang aanuman bahadangan di higa lawang. carita Pendekar Bujang Lapuk pa. Amun di panggung sauting lagi tu carita Mat Sentul, Mat Bond. Yang babiskar babawa bini sambil mahambin anak haloi gin ada.

Ako kada di bagiakan kawitan uumpatan babiskar ka pakan manireng wayang, di hati tu bilang asa handak bangat umpatan urang. Tapi dua tiga hari raya, kawitan kada manyuruh mambaca buku, ayuha malam tu mambanam bunga api wan main marioam buluh. Masa tu kada suah tadangar urang masuk supital pasal mariam buluh pacah. Kami baulah mariam sing ganalan, kada suah pacah gin, sing hangkoian bunyi nya. Galaguian samalaman balawanan hangkoi, kalu yang bamarcun tu, di sambungi panjang panjang, parak 10 minit kalatuian hanyar ampih. Tumbar pang warik di kabun gatah.

Han damini kada tahaba lagi dah, hanyar mamagang marcun gin di tangati kawitan, panyudahnya kawitan yang main marcun.

Jadiam hulu....kina maulah pulang cardap 2

dangsanak
Banjar Wani
Mon Aug 12 18:03:07 2002
203.121.0.15
 

Kisah nani kisah bahari, urang Banjar handak tulak bahaji ka Makah, bahari mana ada kapal tarbang, kapal laut tu pang nang dinaiki. Jadi nya rumbungan nih dakatuhaie ulih si Haji Palui, nang paling harat, wani, alim awan pahandelnya lah.

Di pajalanan nantu, ialah bahari laut nih rame awan lanun nang marumpak kapal nang badagang nih. Hunyaan urang takutan, tu am sampai ka wayah hini, urang bejejal ma-atar kulaan nang tulak haji, begagerung pisin handak ma-atar urang mati ka kubur. Napa tu bahari banyak urang tulak kada bulik lagi.

"Bajage-jage kita nih" je Haji Palui ka jumaah sambil mambujurakan parang kumpang di pinggang di sini nih banyal lanun.

Kada kalawasan nya bahalulong saikung jumaah "lanun! lanun!" gigitiran takutan hunyaan jumaah nang lain kabila malihat sauting kapal lanun makin beparak.

"Ka-ipa nih Katuan?" batakun si Utoh Nyaring nang bahalulong tadi.
"Napa kawo ni burisit bangat, ce ambilakan ako baju ku nang habang dalam kampil di hige ranjang" ujar Haji Palui

Imbah mamuruk baju nang habang nantu, tarus situsaini Haji Palui cakah besamangat bekuriak "Allahhuakbar! ayo kita timpas lanun nang calutak nih"

Alhamdulillah jumaah Haji Palui manang, mangalahakan lanun kada saikung tatinggal, hunyaan mati ditimpas.

Kamisuknya bahalulong lagi si Utoh Nyaring "lanun! lanun!"
Nah ham gigilitiran pulang ngai hunyaan urang takutanan maka awak magunnai uyuh imbah batimpasan sumalam.

"Ka-ipa ni Katuan?, nani mandua buting kapal lanun" Utoh Nyaring betakun sambil takamih dalam salawar.

"Ceh! napang nang ditakutani, ajal di tangan Allah, ambilakan ako baju ku nang habang di hige ranjang" jer Haji Palui.

Sakali lagi Haji Palui sabarataan manang betimpasan awan lanun, kada ide nang tatinggal, hunyaan lanun mati ditimpasi Haji Palui awan jumaah nang lain.

Utoh Nyaring nang duduk di hige Haji Palui kaingatan kawanian awan taguhnya Haji Palui manimpas lanun, tarus batakun "O! Katuan, napa tang andika mainta baju habang amun handak bakalahian? patua panya nanih?".

"Oh, nantukah, ka ini tuhai, amun ako luka batimpasan, darah kada kalihatan di baju nang habang, amun ako makai baju lain darah kalihatan, tanto kawo hunyaan takutan bakalahian awan lanun" jer Haji Palui bewarah.

Hanyar tapikir Utoh Nyaring "Bujur jua, ndasar harat hidin nani" si Utoh besurah surangan.

Kamisuknya, takipik lagi jumaah sabaratan kabila tadangar si Utoh bahalulong "lanun! lanun!"

Hunyaan jumaah sabarataan takamih kada behinip kabila malihat sapuluh kapal lanun beparak, sumaan malihat ka Haji Palui, napanya pulang akal hidin.

Dengan tenang Haji Palui betata ka Utoh Nyaring "Toh ambilakan salawar ko nang kuning di bawah ranjang"
 

TAMMAT....

Alkisah bahari ade tinjau nang bisa besurah, nang katuju mahuhulut urang lalu di hadapan rumah tuan ampunya.

Inya paling katuju mahuhulut bibinian nang lalu-lalang.
Taga bepadaan kada tahu napanya maksud nang disambat si tinjau nani. Nang disambat si tinjau ni warna ndarai.

Amun bebini lalu, "merah jambu" je nya, kaina ada nang lain lalu sambatnya warna nang lain pulang. Habang kah Hijau kah, macam-macam warna lah.

Di kampung si tinjau ada bibini betiga nang paharatnya nang karap malalui rumah tuan ampunya, beumbaian tulak-bulik bagawi.

Kabila bibini batiga nani lalu, si tinjau beigal mahuhulut "habang!, hirang!, kuning".

Esoknya kaitu pulangai, bibini batiga ni lalu haje, besurah pulang si tinjau "coklat!, putih!, biru" jer

Napa tu bibini nih minik bapikir napanya nang disambat si tinjau. Hari-hari lalu, hari-harilah besurah si tinjau manyambati warna nang nga nga pang.

Kalawasannya bibini ni tapikir, napa to sakalinya si tinjau ni manyambati warna sutung karing si diyang batiga nih.

"Merah jambu!, hijau!, ungu!" jer tinjau kabila bibinian batiga nanto lalu.

Bewarah si diyang ka kawanannya "amun kaini esuk kita beistilah kada payah basalawar halui"

Esuknya lalu lah si diyang batiga di hadapan si tinjau kaya rajin.

Napatia papalingau si tinjau kada hingkat besurah lagi, kurihingan si diyang kamanangan.

Satumatan to, beiigal sitinjau salajur besurah "karinting!, lurus!, gundul!"

"Bepala kao tinjau" sarik si diyang sabarataan.

TAMMAT