捷旅假期 HKD9698 + Tax1108 + Visa470 + tips800 領隊: Eric Lee
Day 1 Feb 7 (Tuesday)
3 am 起床，約3:30am出門去碼頭，因為要搭4am船。約5:45am搭A11出機場，7am集合。坐係張櫈訓左幾分鐘，好眼訓啊…………. 起身後集合加食通心粉做早餐，都唔好味…
到閘口訓左一陣，約9:50am登機，開始見到亞叉。(HK飛 Delhi德里，CX753)
有電影雜誌睇又唔眼訓lu，睇左Pride & Prejudice，慳番唔使去戲院睇，仲睇左少少有關Prague的video添 ^_^。臨落機派的茄子蕃茄包好好味啊！
到步，排隊落樓梯等過關，等好耐都落唔到樓睇，因為德里機場好鬼細。其間有印度旅遊大使BB老鼠來歡迎大家~~~~~~~~~~~~~~~~~~~！
當地時間下午兩點幾上到旅遊巴，有點焗sauna的感覺...
途中見到當地人及商舖，好似埃及咁落後。隨行見d男人週街疴尿尿... (該燴！)
約3pm去餐廳食中餐。
今晚入往新德里的Ashok Hotel，好鬼舊呀，service又要等，仲要我地尾程住多日添... 嗚！
今晚晚餐要食自己，所以去左酒店的coffee shop。累透了，要訓訓啦！
Day 2 Feb 8 (Wednesday)
因時差及早訓的關係，零晨訓下醒下。8am食早餐，9am出發去內陸機場。機場乜都無，連櫈都唔夠分，好鬼悶。上到飛機等到訓著佢都未起飛... 機上有After Mint，即係平日去印度餐廳食完飯佢地供應的薄荷碎糖，好好味咖 ^_^
飛抵Kashimir喀什米爾的Srinagar斯里納卡，第一時間被人搜身。我地坐吉普車去船屋，途經平民屋，超多沙塵呀，陰功… 因政局不穩定，不論機場或市區郊區，都有軍警把守。
3pm到船屋食午餐，由大叔captain搞掟。船屋對住Nageen Lake，仲有山景，靚到傻左 ^0^
4pm出發去Mughal Garden蒙戈爾花園。由於現在是冬天，花園得幾朶pansy，連d樹都無哂葉。無無聊聊影下雀仔囉…
6pm回到船屋，拿拿聲沖涼先！7:30pm晚餐，之後好無聊訓覺…………………….. ! 因為我地係郊區，加上天空無雲，可以睇到好多星星。訓到半夜，大叔周不時入房加柴入火爐。媽咪又訓唔著，又係到玩加柴，搞到間房好鬼熱…
Day 3 Feb 9 (Thursday)
6am起床，天仲未亮，但都出屋尾睇風景~~~~ 嘩，超凍呀！約7am慢慢先天光，風景真係好-靚啊 ^_^
8:30am出發去Gulmarg 古爾瑪，越行越凍，無機耐仲見到雪呀。中途去廁所及租膠boots上山，怕d雪入波鞋。因上山條路兜來兜去，見暈添…
一到步，未落車已被當地人圍住。佢地ge目的只有一個 → 幫襯佢個雪兜。本來我同家姐都想玩雪兜，因大家都暈暈地，只有媽咪去玩。我地就行雪地影得意相。行到一半，大家玩雪地裡的百力支、雪地裡的飲熱水、雪地裡的朱古力，等。臨走時仲有人向我地兜生意，話自己窮喎… (我都好窮咖，大叔)
落山熱到要除衫，約2pm回船屋食午餐，肚都餓到扁左啦！之後影下相，3:30pm出去shopping。其實shop乜鬼鴉，係去船屋主管的家/家族/有關係人士/朋友的家庭式店舖。呢度出名地毯正，花紋ok，但價錢太貴啦，唔洗客氣。被肩款唔夠靚，都無買到。屋主的4歲女跟住我地，想玩家姐部相機，真係大想頭。
無幾耐我地返船屋，那些水上商人入我地隻船賣野，有被肩、盒仔、皮袋、手飾。我買左對燈籠耳環，樣都ok，但應該係膠造的。家姐買左被肩比朋友，媽咪買左兩個木缸仔，一個我地，一個比人。
之後沖涼等開飯。飯後又係無無聊聊，9am就訓… 該燴！
Day 4 Feb 10 (Friday)
6am醒左，出外看日出。9am到船尾上船仔，遊Nageen Lake，日子真寫意~~~~~
11:30am食午飯，然後出發去機場。有點唔捨得船屋啊…
今次飛，check得仲嚴過入黎。我地各人被搜身數次，又要乜都寄倉。好彩機場仲有幾間商店，我同家姐買三角被肩，我的是芥辣色的。另外仲買左相架送比自己同朋友。
飛機又delay到5pm，所以拿了delay餐。杯奶茶係本地特色香料奶茶，好好味咖，有點ginger味。機場周圍都係軍人，應該係軍隊換班/休假，當中有傷兵添。佢地帶不同款的軍服、badge、帽…
約6pm飛到Delhi，見到當地導遊“舒華”。我地到食第一餐的Sahara Restaurant dinner，但食物唔夠第一餐好。一邊食有印度歌舞睇，其中一隻舞係要個dancer頭頂火盆跳的，利害！
之後坐5個小時車落Agra 亞格拉，途中經旅館去廁所。地面雖然有光，但不多，所以睇到好多星星。
入住Mughal Sheraton，好舒服好靚。
Day 5 Feb 11 (Saturday)
7am起床，9am出發去Taj Mahal泰姬陵，之前係酒店家姐買左紀念品。
一落車，已被一群小孩商販包圍，當正我一定要買咁… 之後乘電巴入Taj Mahal範圍，再步行入內。途經的巷仔，好似小鎮咁。唉，唔好彩跟住部垃圾車，好臭呀！
入Taj Mahal，又要被搜身。Taj Mahal超大超靚，亦好多人。周圍的樹都有好中型鸚鵡及松鼠仔。入主殿要除鞋 & no photos。
天氣超晴朗，未行到一半已變咸魚乾！好奇怪，平日咁熱的天氣，我一陣已大汗搭細汗，但今日半滴都無，事關太乾燥。
睇完坐15mins車去Agra Fort亞格拉城堡，一個粉紅色的堡壘。在上面可看到Taj Mahal遠景。
睇到又熱又累，之後返Sheraton食午餐。因太肚餓，而且有地度好味食物，食到好飽。
之後坐1小時車去Fatehpur Sikri法德坡錫克里古都。它的建築跟Agra Fort很相似。
印度的狗原來都有午睡的習慣…
好喇，要坐5小時車入Jaipur 齋浦爾。入住Rajputana Palace Sheraton，今晚9:30pm dinner buffet，好多好味辣辣 ^_^。酒店房細，但幾靚。
Day 6 Feb 12 (Sunday)
6am起床，7:30am出車騎大象上Amber Fort琥珀堡。到步時已有好多人排隊等上象，我地都等左成個鐘呀。Amber Fort唔大，但幾靚。上面風涼，但太陽太勁…
約11am去地毯廠，d人獅子開大口，但都有團友以半價買到地毯。
Jaipur幾有特色，周圍的屋都係粉紅色的，途徑市集及風之宮殿。
回酒店食午餐，之後去City Palace Museum 城市宮殿博物館。太熱啦，又剛剛食飽，一路行一路眼訓…
皇宮裡超曬，曬到都唔想睇野。我地入左3個博物館 → textile, weapons, arts
哈哈哈，今次來印度的其中一個願望，係可以見到吹蛇人，就係係呢個皇宮的門口見到啦，家姐仲偷偷地拍左video & photo ^0^
之後我地去玉石廠，但d石太無款又唔夠吸引，所以一粒都無買到。
本來要去天文台，但因維修的原故，改去印度廟。呢間廟整個由白色大理石建成，跟Taj Mahal所用的石是同一款，所以望落好白好靚。廟外係一個大花園，有好多勒杜鵑。有樣好搞笑的，就係廟外牆上的雕像，竟然有耶穌、摩西、孔子，等。入廟要除鞋，所以門外有一陣陣臭味，仲有好多烏蠅…
回酒店，1小時後先有晚飯。我地一邊睇plasma，一邊食尤魚絲！餐後家姐買了CD及soap，都幾香 ^_^
Day 7 Feb 13 (Monday)
6am起床，7:30am出車。但有團友唔見手機，所有有延誤。嘩，咁大間酒店裡都有賊呀，印度果然係全民皆賊!!!!!!!!!!
出發去Hawa Mahal風之宮殿，嗚嗚嗚，我地只係路邊影相咋，無得上去，更加無得入小販檔口買下紀念品…
上公路要5小時才入到Delhi，中途去廁所。我地試左拉茶，但唔夠Kashmir機場的好味。
約2pm到Delhi，到印度餐廳食午餐。我呀，點都估唔到今日親戚到，緊張到連午餐都食唔落，因為我著左條白褲…
之後我地去香料舖買茶葉。家姐提意到後面的巷仔搵下雜貨店，感謝主，真係搵到，仲好平咁買到所需用品添，終於笑得落lu！
我地坐車遊總統府，但無得落車影相，之後去印度門。印度門成個法國凱旋門咁，但細d，上面都刻有戰死士兵的名子，亦有海陸空三軍旗。
去完甘地墓，再去印度廟。呢間同Jaipur的有少少唔同。外牆是普通牆，裡面都係拜那些像。印度的廟比馬來西亞的簡單，外牆及裡面都少好多公仔。
之後去Hotel Broadway睇show及食晚餐。D食物無今日下午的好味，但個豆餅特別香辣。
入住頭一間的Ashok Hotel。今次住7樓的套房，有騎樓，但因怕有雀仔及蟲，所以唔敢出去睇。好彩臨訓上鎖，半夜果然有人想開門入黎呀，賊呀！
家姐開始搞肚痛...
Day 8 Feb 14 (Tuesday)
3am起床，輪到我搞肚痛啦，嗚…
4:30am出機場，無咩好買，剩下的錢，買左少少零食送比人。等飛機時，有個中東媽咪抱住BB坐埋黎，佢d眼睫毛成吋長咖！
(DEL/HKG, CX 752)上到飛機肚仔繼續痛，開始想嘔添… 機上見到Mt. Everest，影左相。開始無咁辛苦啦，但唔敢食餐，只食了少少水果咋。
下午HK時間3:10pm到步，輪到媽咪搞肚痛…
後記:
印度周圍都係potential thieves，個個都開價高幾倍，d人又成日謀住你d行李…
印度好污糟呀，都處都係人，佢地對衛生要求又唔高。周街都係烏蠅，你想開開心心企係街度講野哈哈笑都唔敢呀，費事有烏蠅入口，到時真係笑唔出啦。
印度d人真係好"愛"遊客，係鄉下地方還好，d人純品d，一入城市，未到旅遊區，已經見周圍d人問你要錢要糖，入左旅遊區，周圍都係小販，真係煩到你想死... 我想好好地影下相都唔得，一睇完景就逼住要回旅遊車"避難"... !_!
好衰咖，無得比人地大買特買，所以回到家，第二日就同家姐去葡京的Emporium，買左千幾蚊被肩同手飾，以洩我地心頭之恨！