Kuv Txoj Kev Hlub Muab Rau Koj

"Kuv Txoj Kev Hlub Muab Rau Koj"
To: Kuv Me Nploooj Siab Maiv Lis
From: Koj Me Honey Voos Xyooj


Maiv, thov nthuav txog txoj kev hlub
Uas kuv muab pub rau koj tiam no
Kuv ua siab tso txhua yam rau koj
Hauv siab muaj koj ib leeg lawm xwb
Vam hais tias wb yuav txawj sib hlub
Yuav tsis muaj hnub kuv ncaim koj li
Txawm siab quaj dhi los yuav hlub koj
Yuav ntshaw koj txoj kev hlub ib leeg
Yuav mloog thiab ntseeg koj cov lus qhia
Yuav hlub thiab hnia koj ib leeg xwb
Hauv lub siab twb muab rau koj lawm
Kuv me nkauj ntxawm thov qhia koj paub
Txawm yuav noj qaub noj ntsuag noj qab
Thiab yuav noj dab tsi los tsuav muaj koj
Tsuav tau nrog koj xwb yeej zoo lawm
Txawm lub sij hawm dhau mus zuj zus
Tsis hnov koj lus tsis hnov koj hmoo
Kuv siab tseem zoo thiab tseem hlub koj
Tseem yuav tuaj coj koj los sib sau
Tseem tos kom tau koj nyob tiam no
Tseem hlub thiab nco koj li qhov qub
Maiv tus kuv hlub thiab tus kuv nco
Ua hnub ua hmo nco ntsoov txog koj
Mov tsis xav noj pw tsis tsaug zog
Xav muaj koj nrog kuv nyob tas li
Lub siab quaj dhi vim nco txog koj
Nco txog wb txoj kev hlub tsis ploj
Nco thaum muaj koj ntawm kuv ib sab
Thaum wb sib thab nyob tham luag ntxhi
Txawm muaj dab tsi yuav phem thiab zoo
Txawm tos tsawg xyoo thiab ntev npaum cas
Txawm nplooj zeeg tas thiab txiv lwj tag
Txawm tsis los nag thiab ntuj tsis tshav
Txawm daim av yuav ntxeev lawm ntau
Lub ntuj yuav phau mus ua ib phawg
Txawm paj tsis tawg tsis hnov kab quaj
Thiab kuv tsis muaj yam li luag los
Kuv yeej yuav tos kom hlub tau koj
Yuav ua siab loj hlub koj tiag tiag
Hauv lub xub ntiag yuav puag koj cia
Hauv siab yeej qhia txhua yam rau koj
Nyob hauv wb txoj kev hlub thiab nco
Txhua hnub txhua hmo kuv xav txog
Nco txog koj mog kuv me nplooj siab
Yuav tsis muaj tshiab yuav hlub koj xwb
Yuav nco ntsoov wb mus txog hnub kawg
Txawm muaj tsawg tus poj niam hmoob
Txawm yuav muaj coob tus ntxhais hluas
Thiab tsawg tus hluas nkauj nyob tiam no
Los kuv yuav nco txog koj xwb mog
Yuav tsis hais txog luag lwm tus lawm
Yuav tsis mus khawm thiab puag leej twg
Txawm muaj phooj ywg los zoo tsis cuag
Li kuv tau puag koj hauv xub ntiag
Txawm dag thiab tiag los yuav sib hlub
Yuav tsis cia lub kua muag poob ntxiv
Txawm wb yuav tiv tshav thiab tiv nag
Lub cev laus tag tsis tau sib ntsib
Lub siab xav sib sau los nyob ua ke
Txhais tes xav sib de thiab sib kov
Xub ntiag xav rov tuaj mus sib puag
Wb lub ntsiab muag laus heev lawm los
Kuv yeej yuav tos kom tau koj los hlub
Vim koj yog lub hnub rau kuv ntsia
Koj yog txoj sia rau kuv lub siab
Koj muaj tus ntxhiab uas kuv xav hnia
Koj puag kuv cia thaum kuv nyuaj siab
Koj hlub kuv thiab thaum kuv ua txhaum
Koj hlub kuv npaum li kuv hlub koj
Koj ua siab loj thaum kuv mus tsev
Koj ua siab ntev thaum kuv hais tias
Txawm nyias nyob nyias ib sab ntuj lawm
Vim lub sij hawm tseem yuav muaj tuaj
Koj puag kuv ruaj hauv koj xub ntiag
Koj yeej hlub tiag hauv koj lub siab
Kuv zoo siab thiab txaus siab hlub koj
Nyob hauv kuv txoj kev hlub tiam no
Yuav hlub thiab nco koj ib leeg xwb
Yuav tsis pub wb leej twg ntshaw luag
Yuav muab koj puag hauv lub xub ntiag
Qhia koj paub tiag tias hlub koj tshaj
Yuav ua siab ncaj hlub koj tiam no
Txawm txhua hmo tsis tau puag koj pw
Txawm tsev sw tsis muaj tus nrog tu
Thiab tsis tau hu koj npe txhua hmo
Los kuv tseem nco thiab yuav hlub koj
Tseem nyob pem toj siab tos hlub koj
Tseem ua siab loj hlub koj ib leeg
Yuav tsis muaj neeg yuav pauv tau koj
Kev hlub yuav coj koj rau txhua yam
Lub xub ntiag mam li puag koj cia
Hauv siab yuav qhia tias hlub koj tshaj
Txhua yam mam npaj rau wb lub neej
Ntawm kuv tus kheej muab rau koj xwb
Lub cev nraug xwb yuav tseg rau koj
Zoo siab muaj koj nyob rau tiam no
Thov koj nco tias kuv hlub koj tshaj
Lub siab kaj thaum kuv tuav koj tes
Lub plawv nres thaum puag koj cia
Lub ntsws dhia thaum muaj koj nyob ze
Thaum nyob ua ke ntawm koj ib sab
Tsis pom qab yuav xav txog dab tsi
Tsis xav ncaim li vim hlub koj dhau
Thaum tsis muaj koj rau kuv xub ntiag
Xav xav ib pliag tsis pom qab nyob
Ua kuv siab mob vim tsis muaj koj
Mov tsis paub noj pw tsis tsaug zog
Xav sib thab nrog koj txhua hnub
Tus neeg kuv hlub tus neeg kuv tshuav
Thaum ua npau suav pom koj ib muag
Ua rau kuv xav puag koj kawg li
Lub siab quaj dhi tsim dheev los txog
Cas nws ho yog npau suav lawm xwb
Cas tsis muaj wb nyob ua ib ke
Lub siab phua rhe nco dheev txog koj
Thiaj xav txog txoj kev hlub wb muaj
Vam tias yuav tuaj nrog koj nyob dua
Yuav ua txhua yam raws li koj xav tau
Tsis ua siab ntau tsis ua siab coob
Kuv me nkauj hmoob hais rau koj paub
Kom koj tau taub tias nyob tiam no
Thov hlub thiab nco koj ib leeg xwb
Kuv me nkauj xwb kuv hlub koj os
Kuv mam nyob tos koj mus ib txhis
Kuv me honey koj nco ntsoov mog
Tias koj thiaj yog tus kuv hlub tiag
Kuv me nplooj siab cog lus rau koj
Tias kuv hlub koj mus txog hnub kawg

1