| 壹仟零壹夜 － Benson 問：做左幾耐通宵更記者？ 答：四年半......計到十月尾四年半。四年啦，四年啦。 問：當人人倒頭大睡時，得你一個孤單作戰，有咩滋味？ 答：有ｄ野係要人做既，不能講話好痛苦，入唻既時候已經知道要響呢個崗位一段時間。 一開頭都幾戰戰兢兢，當你一個人孤立無援，唔知點做好，特別當帶我果位同事離開後， 自己一個人返，一步一驚心。當後來上到手，就覺自由自在，因為無老細。 問：有冇開始覺得厭？ 答：會架，當你上手後，每日都係一ｄ好routine既工作，日日都係大致做果ｄ野， 你所遇到既故仔都係冇咩大變化。故仔未返唻，原則上你都知道會點寫。 問：咁走係咪係你厭咁簡單？ 答：肯定唔係。因為我不能再接受往後都係咁過。 問：咁你打算點過？ 答：記者始終都係屬於前線，特別係我咁新，不可能一直在通宵位置做落去。 問：但都過左四年，而家先至覺得唔可以長此落去？ 答：係不嬲都覺得，最主要轉捩點係俾你返日頭，跟住又要你返通宵， 或者係唔會再有機會上番唻。呢ｄ都係走既最大原因，非走不可。 幾乎任何人聽到都覺得走係應該，無留既需要，再者都無人留過我。 問：有冇覺得個世界突然間現實左？ 答：世界不嬲都係咁現實。 問：既然現實，又何必呆在這裡四年才離開？ 答：中間都試過有想離開，但最後走唔到。 問：有冇檢討過當中係咩問題？ 答：真係好難講，因為冇人直接話你知有咩問題。不過通宵更有局限，人地唔了解， 你冇咩往績俾人睇到，另外識你既人太少了，無乜人睇到。所以再咁落去就唔會再有機會走到。 問：咁回望過去千幾個夜晚，有咩野係你最難忘的？ 答：唔知點答......因為太多野都係日日如是，唔係話好大變化，就算係幾咁轟天動地， 你只係坐響公司收，人地出面做好，你只係車衫，不論你車到天花龍鳳。 無人會覺得你點，再者，morning唻講太趕，比較粗疏，唔可以話係pack得好好，好多時， 晏晝有人再pack過，留唔到過夜，當然後來有幾次突破，屯門公路跌架巴士， 有份留底幫手pack故仔；捉到季炳雄，留到下晝pack俾noon，用埋唻做六點半頭條， 但如終都唔係咩大成就。因為覺得功勞唔係響你度。 問：係咪覺得少左一份被認同感？ 答：有少少諷刺既唔係我pack既港聞故仔，而係我pack既一隻體育故。 問：但係有ｄ人做一世記者，都係冇乜代表作，你會唔會係有ｄ貪心？ 答：絕不。有時唔一定話代表作，頭先講過，記者係響前線，唔係應該一味車衫， 我唔係老細級別，我冇網絡，做唔到自己故仔，咁何來發展空間。冇得升，自然冇人工加， 就算我day one話我願意長返，我都有權反悔，公司都唔會請我一世架，你咪當我而家反悔囉。 你覺得我唔0岩，你可以叫我起身，正如我覺得我唔想再做落去，我都可以起身。 問：但總有人要車衫架喎。 答：係，但唔係我一世都由我車，輛流車都得掛。大家咁高咁大，點解永遠都係我先得架？ 問：咁如果你去新環境，最終又係要你車衫，你會點樣？ 答：咁咪再轉。 問：有冇咩說話同車衫同工講？ 答：正如我入唻時，有一ｄ做得耐既人同我講：返通宵唔緊要，但唔好俾自己返太耐。 問：有冇野同工廠管工講？ 答：冇咩野需要同佢地講。 |
 |
 |
 |
 |