Na golulun ir ndğa lazoburati giçondrinertu, 3ulu berepe nana nenanişi var
diguramtey, mitik’ti var dvoguramtu. Na imcvelen 3anape
peyatobaşkunişirtu...
 Ar ndğa babaşkimişkala lazeburaşeni bisinapamtit ; him ora ar
kocebimsifoni,
nenaşkuni şkunişkule mitik var isinapasen mitik’ti var asinapasenti.
Onçarumuşi
husşa mitik dulya var ixenu  na ixenuti var mişkurtey.
Hasteri ar nena goçondrinu dido peyati ar dulya ortuko! Him ora guri moxtu
do armutxa domançarku. Peya  şkimisteri mitik var insifonertuyi...
Him ndğa şkule mesimaderi na miğun sinape’pe onçaru ko ceboçi ; ora 1985
3anağanirtu. Poli na borti şeni lazuri onçaroni  vamemandzinertu. Badobaşe
bidasi lazuri sinapepe memapşertu.
 Lazeburas dido çareli ar nenartu soti na var izin dadalartu edo na dolilay
mjorartu !ey cumalep do dalep şku na paten dulya na dolilay mjora ekabgaru
var ,
mjora na var dolilasen steri na cemogzanen dulya oxenu ren!

OROPA

Oropa mu ren? Ko mişkunani!
Xe iklimen do toli cema3irenani?
Vana guri doloxeni dulya reni?
Oropa mu perin? Mipes ioropen?
Mezuma mendra vartasi  oropa;
Guri gamiçodinen ar’ti dogandğulenu.
Var işkomen do var işvertu koti!
Var nixonden vartasi oropa.
Oropa ; ar mitxani şeni obgarun,
Himu şenis vrosoba ogorun,
Kapula muşi kale peyatoba var , oxvamun!
Ali cenkoru xvala var, gurepe xinci medumun...
Oropa: ar si xvalate var,
ioropute cindziren!
Eger ioropertna gurişas guri,
var megan3anen peyatoba daçxuri .
Hişo mutxa renu  mitxa guri cegiren,
Himuşkala gulur, şuramuş çxindi megiren,
Ar m3ika eleginktuyi, guri kfa giren,
Ham dulya haşote var intfalen, oroputen iyenu...

Bahadır keleş,19/11/1990

KFA LİVADİ NDĞALEPE


Ar kfa livadi ko miğunan ;
Mtel txironan , danziti kon,
Oşkenamuşi ar 3ulu ğali on,
Ko mezun poğari 3arimuşi inion,
Disxupe purkeri ğunepe pşeri.
Ko mşun bere borti do na elebitti,
Zade na bixelamti ikumtey noderi,
Him orape kfa livadi ndğa ortu;
An3kili cebizdamti , toçi bikumti.
Oşi turli bibirti, rubaşe dolobitti.
Soti var magitinertu, rakanepe gobitti,
Dalepe ekemourtu hini boşkurinamti.
Ndğalepe golilu edo: obirupe cinkturu
Kfa livadi xolo kon soti var idu heyon...
Skudala xvala var koçepeti cinkturu,
Berepe mu an cenkturu onkturaren.
Oy gidi mcveli ora do oropape ,
Mişkun ar potte var moxtaten,
Ma çilambri doboba do ekegabgarare,
Ora golilasen si kfalivadi ortare..

Bahadır keleş, 27/11/1990

ANDĞANİ PANDA VAR BZİRAT


Şku do şku biyat,
Ar vrosi dolobinkorat.
Peyatoba cebvrosat.
Andğani panda var bzirat!
Atxe do andğani buntalat,
Ar vrosi ndğa dopçadat,
Haşote cendğanepe bo3edat.
Andğani panda var bzirat !
Miti guri mot cebutinat,
İri oropa mebutişat,
Peyatobaşe bişletinat.
Andğani panda var bzirat !
Vrosoba dadala ren!
Peyatobati daçxuri!
Cebonziratna peyatoba,
Dijvalasen vrosoba...

Bahadır keleş, 01/12/1990

BOZO HAŞO MOT MOĞODAM

Çağarya  porçaskani, opinam do gulur.
Him mskva nenaskani ovalam do trağudur.
Mjora cekças do yalisteri prandur.
Çipe şkaskani na taxum do ulur.
Ekegospinam; var eki3er do dzi3am.
Toma şka eyegizun ovalam do ovalam,
Muço mturi mskverire eyukapam dukapam.
Haşo moğodam edo; ar vrosi emoğrindinam.
Ma mi3omenan likuduri yayiçi ,
Si ore 3ulupina ar kinçi,
Ar koxogizdana gamogistvasen şuri.
Haşo mot moğodam celemistvasen nosi.

Si omçeşinute mjora kextu dolilu,
Potte var moxtareyi naku tuta meyilu.
Var mulur na mot mulur opordace domayi!
Var misinapam mikriyam, nokterisa dogayi.
Şkimi şkala mot ibir, guri doma popodu,
Haku mazangiri mot ore , ikraği ko cemadu,
İrote var maorepen maare galendoni,
Osuri ko dolomabi dobiyat oroperi.
Hasteri ar oropa kiana var zirare!
Moxti ko memancudi, ma tabu dogaare,
Ubağun mot moyivar siti oroperire,
Moxti dolobinkorat, miti var ginçinare...



Bahadır keleş,19/11/1990


GURİ DOLOXE

Yali cebo3er pici do tanişkimi,
Mi bore sonuri bore, biçitxam do kobore,
Gyulvaşkule malte’şi rakani kocelapxedur!
M3a murun3xay mzuğa cogzas do prandums,
Tutasten seri, ixi memobas do moraxunas...
Oruba liprade uras ontfa na goyoxen mğu kriyas,
Çilambrite maşkiden toli 3am3amepes,
Peya mjora mematananeni? Bitanateni?
Vana jvaleri çona mibağunani?
Cebimsifonam edo: bedi kopalişkunin...
Mi anbari momçanen kextu mjoratkvani,
İdit ke3uxedit inbonit xuratkvani...

Bahadır  Keleş, 1985

MZUĞA MEYANKTASEN KAPÇA İGZALASEN!


Kapçapes dop3xoti ko celebudvi tağani,
Cumu ekebunçferi, buntali çferi,
Ekebuşkori meroca, kromiti buntali,
Mebaşkvi ditağanu, mebançi do opşkomi.
Kapça şuri momçamtey, mzuğati guri:
Xristena tuta moxtasi kapça içopinertu,
Felukape cinkfertu parapati izdertu,
Huy mutxa dvağodes, mzuğa çxindi cemibes,
Didi felukape cidziru kapçape dolişiru,
Ma bixelamu ar kapi3i domamcumoru,
Ar ti na memates mzuğa na şavumanu
Mosape var eyi3en leta do tuta intalenu.
Ham haşo var iyasen çvetelape dinzgipit,
Haşo ar mutxa var patna na mağodanen ,
Xeneri kapça oşkomurtasen gomoçondranen şura.
Omçiru so doskidu xe var doloman3anen.
Pici var miğunan mzuğa var cema3edanen.



Bahadır keleş,8/11/1990


NANA DO BEREMUŞİ!


Nana korba a3unen ,Şuri dolomilas dva3onen,
Si dirinam becğinam; Şuri guri ar dvaen.
Korba ga3uy do ibgar,Nana guri utva3un,
Si poxnum do igzar, Nana takus do dzi3ay.
Ogzalu ko moyiçam bandi bandaleri,
Nana ekego3omis ixeleri xeleri,
Caroba diyas do nciri keyegadvasi,
Kapula ko ceginciras dulyamuşi xeneri,
Ar m3ika ko moirder ukriyam nanaskani,
Him nena var ikums aropen beremuşi.
Diğer vito 3aneri nuşvelam dulyamuşi,
Du3ilam urzenepes gixenams ekşaşi...
Eçi 3ana gointavasi mendulur askerişa,
Nana guri dvanbaren mendvalen yağmişa,
Guri var ukorun kocoçay obgaruşa...
Megitişay , gixvamay ser do ndğalerişa!
Si diçilam din3xilam, him xolo nanaskanin,
Var aropertukoti nusa, nena var ikums koxenu misa...


Bahadır keleş,5/11/1990,

NODERİ!


Bonkanatu txiri kvalepe,
si korobi fotapete.
Buoxare maltepe,
patenu txiri noderi.
Ko ceboçaten okakalu,
Megozitare otrağudu.
Ma noderepe maoropen:
Oşkuriti miğunan pkorobaten,
Lazutepe doskuras pkfasaten,
Bira do dzi3ute ptva3aten...
Ham dulya peyatoba var oren!
Okobikorobamt,bisinapamt, bioropamt,
Ham ora kutavi nanamuş var içinas,
Şku orapa cebondziramt.
Moxtit cumalep do dalep noderişa,
Dobogurat berepetis, moxtanu noderişa,
İr mcveli işinasen, moxtanen meşveluşa,
Mtel şkunişi tkvanen cextasen montalişa...



Bahadır keleş,9/11/1999

OBGARONİ  ORA!

Şku var bibgarat do mipes ibgaras;
Nena var miğunan domamsiles,
Guri var  miğunan, nosi cemampires,
Leta ko goomobğes do xe var emazdes.
Şku var bibgarat do mipes ibgaras;
Dixa ko3omiğes merçale domixenes,
Yoxo ko3omiğes muper cemodves,
Ağani nosi momçes ar vrositi mintales.
Şku var bibgarat do mipes ibgaras;
Memokvadey do dzi3ey unoseriret mi3vey,
Şku do şku cemoçamapey mot isinapamt mi3vey,
Berpetkvani şkuni ren dudep mot untalamt tkvey.
Şku var bibgarat do mipes ibgaras;
Mi3vey misinapey do nena gomindines,
Ziterep cindziru badepes uçitxes!
Mi bort, nenaşkuni bigurat yado nokaçes,
Şku var bibgarat do mipes ibgaras;
Ham nena andğaneri  xvala var pişindğlaşitin,
Huy obgaru ora varen! Edo dobiplanat!
Nosi mobiğat do nenaşkuni ceboçat,
Him ora do biplanat dulyaşkuni mobiçat...



Bahadır keleş,14/11/1990

OXORİ DOLOXE



Oxor ir çxindi ceberi,
Ar3o na işinay
Mancura var goişinay,
Mutxani diçodu; peya mu?
Mcvel ğeci ti icibertu,
Huy ir dostibu!
Dimcvelu peyatoba ,
Kayobati dijvalu...

PUTGURİ DO NOSTONİ


Putguri xe do nosi dulya ren!
Nostoni pici do nenaşin.
Şku hişo mağodeski curiti’ti memaşkves,
Teknoloji cindziru, ir dulya meyinkturu:
Xe domakores nostoni momakvates,
Rakanape cikopalu letape cişoru!
Mzuğa çareli amtu, şuri ko dolulu.
Oşkomalepe mçxu iyertu nostonyari...
Huyti iyen putguri amtu, bobolyari...



Bahadır keleş,14/11/1990

DOMİLUMCU


Haku mot madulyalen!
Yağmişa var gamomalen.
Lumci domaen edo:
Pucepe var masturesaen.
Livadis çala pkonum,
Tikinate lazuti ptorum,
Lumci domaen edo:
Kormepe var mayanen...
Oxorşa var amomalen,
Kuçxe yazma domata3en,
Lımci domaen edo:
Katu kudeli gomasven.
Ar bozo var mionun!
Koçiti nçineri ko mulun!
Lumci domaen edo:
Hamtepek var macaren.
Haku mot madulyalen!
Toliti momatasen!
Lumci domaen edo:
Koçiti kelemanciren...

Bahadır keleş, 02/12/1990

NANAŞKİMİ

Çilambrepe gi3ur3uy,
Na bigzalare şeni!
Daçxur dologan3en,
Bimendralare şeni!
Haşo ren kianaş skuduri!
oropa var gixaresiyam
mot ibgar nanaşkimi.
Şuri do guri ar miğurtey!
Huy guri xvalate dopskudit,
Ko ko3omadvey rakanepe;
Mot ibgar nanaşkimi.
İbgar do guri mot mindğulam,
Zati pupul steri bor,
Elemankalasna var gaplanasen!
Bulurna skedinuşeni golvaşa var!
Naku 3ana vato momalas!
Momalas mot momalas,
Si mihelali mja skani...


Bahadır keleş, 06/12/1990

İNVA SERİ

 Okromule ko3apxer,
Muperepe bimsifoner,
 Nosis muper ikter!
 Purki mona elikter?
 Çimati var goloğalas
 İxi 3iyoneri bas
 Şuri ko3omixin3as
 Ham oraşi ndğalepes
 Okromule ko3amcar
 Daçxuri memoğalas
 Xvaloba mona ikter
 Purki mona elikter?
 Kremuli kukma inkas
 Nani nani mi3omes
 Katu var ko3omaşkven!
 Kuçxe mani misumes...

BAHADIR KELEŞ, 21/01/1994 YARIMCA

MEXONDALE

 Hişo ar sxaderen utarifu!
 Hişo ar ntaleriren ume3u!
 Hişo ar monkoleriren ugon3u!
 Hişo ar  ndğaren çağarya do çağarya!
 Ar3o eçopi mancura metkoçi,
 Ar3oşa işletini mancuraşe niçopi,
 Gaziray haşoren mexondala,
 Gazden gapotanen , gazden do ikten.

BAHADIR KELEŞ, 21/04/1993 YARIMCA

MZUĞAŞ EKABGARU

 Mu  gağodu  mzuğaşkimi?
 Moy  çxindi cemibit ?
 Gaşur  do mcveşi şura var giğun,
 Mjora dolilay do okvançxe var giğun.
 Mu gağodu mzuğaşkimi?
Çareli gamtu putguri var giğun,
 Mamçxvapu  bimçirare edo:
 Omçiruş nostoni var giğun.
 Mu gağodu mzuğaşkimi?
 Kçe kvinçepe var giğun!
 Oxaçke  iyareyi  mezuma mendra...
 Çarel letaşi giğun.
 Mu gağodu mzuğaşkimi?
 Sapu şura moy var k3ur?
 Çxomiş ontule na orti!
 Keti kvataşi oncire mot iyi?
 Mu gağodu mzuğaşkimi?
 Mik goğodu mzuğaşkimi?
 Şku so bortit mzuğaşkimi?
 Muço pikot mzuğaşkimi?

*29/01/1994, yarımca




 TERE  SORE?


Gale  bore gale
 Dido ti gale
 İçitxatna sole?
Na dobirini kale,
 Na dobixvare kale...
 İrote mebozmor, tolişa golomalen:
 Mpuleri rakanepe, ndğuleri abcape,
 Enna  gobağarare rabbişkimi!
 Haşo skvanobape na çkadişeni.
 Toli çilambrepe dibas do
 Nana dixaşkimişa idas
 E3vatas do e3vatas
 Gurişkimi olobas.


Bahadır  KELEŞ, Ğera

 STVELİ TUTA

Stveli tuta moxtas do mjora gza meyinkturasi,
Ar ineri ixi kelabas pavrepes gamoskurinas,
Diçonçen pavrepes pucepe xela –kayoba!
Eyingonan cingonan mja buzişen abenan.
Mzuğa diyen morderi, mosape keti kvata 3oneri,
Enpus mzuğa xarxalas, gza mendiğas cemonus.
M3a ko gyoçams o3xontu mçima muço xişimati,
Ontfa uturgunna oxar diyen tikina!
Dişkape içitfalas do cilemona kelisvarasi,
Kremul ko gyinçen, kukma ko gyeliben,
Lazut mendulun karmateşa knferi mulun sağraşa
Didalep moiçaman oşoluşa badepek meçaman oçvuşa,
lu zeri cidven sağanişa, gyari nikvaten grestaşa,
Bere bara nançenan sufraşa, imxonan tva3a do imçaşa...


Bahadır KELEŞ, 7.11.1990 Yarımca

 XVALOB

Xvaloba do xvaloba
Doskudas gogaşinen
Cumaloba do daloba
İyeni? Elegaşineni ğormoti...

BAHADIR KELEŞ, 6/11/1999 İZMİT



ATMA TÜRKÜ