我已經送番果份禮物俾佢，經過一晚"脫水"之後，o的玫瑰花
都已經凋謝得七七八八，所以淨係送o左札花入面果隻 "Winnie
the Pooh" 公仔俾佢，但係佢都已經開心到彈起，仲話呢次
係第一次有男仔送禮物俾佢．佢會好好珍藏．起初果個禮拜
我o地晚晚都有約出o黎食飯，次次食完飯又照樣送番佢番屋
企，週六日又有出o黎行街睇戲，我o地都好開心，阿君講多
o左好多o野，無論係開心同唔開心o既事，我o地都有傾有講，
我o地完全忘記o左自己仲有一個病緊o既親人~~~~>我個老婆，
佢o既家姐．
當我一想到呢度，我就會好矛盾，我始終都冇辦法完全投入
去扮演佢男朋友o既角色．相反o黎講，阿君自從果晚肯主動
"吉"高鍚過我塊面一啖之後，佢成日都特登製造好多好多機
會想我鍚番佢，我又唔夠膽又唔知好唔好咁快就鍚佢個咀咀，
我只係試過一次o係佢屋企樓下[車立]口度鍚過佢隻手背一
次，佢o既主動有時真係令到我有o的驚，雖然係扮拍拖，大
家手拖住手呢o的例行公事我都有做，但係有陣時拖拖o下佢
會捉住我隻手放去佢o既腰背...甚至...甚至再落o的...我
發覺佢越o黎越投入，所以我有時對佢都會有所避忌，好似
佢成日想鍚我咁，初時我都覺得好爽任得佢，但係後來佢成
日都懶嗲咁係唔係都哄埋o黎，我又開始覺得大家好似有o的
過火，我都會及時捉住佢雙臂唔俾佢再哄埋o黎，然後我再
扮晒打噴嚏，或者[足否]低綁鞋帶去避開佢．（哈！好奇怪，
呢咁o既情況以前同阿欣又係扮拍拖果陣都好似有做過，估
唔到佢o地兩姊妹似到連呢o的o野都似埋！）
只係短短o既一個禮拜度，戀愛已經令到一個情竇初開o既
女仔產生o左咁大o既反應同轉變，呢次真係唔知係教精o左
佢定係害o左佢？佢咁單純，又未見過世面，萬一俾o的壞
人呃o左佢咪死！但係我又估唔到佢會咁陶醉o係我o既懷抱
中，當到有朝一日佢先發覺呢個懷抱係冇可能屬於佢o既時
候，我又好似無形中"玩"多佢一次咁，而呢次唔係話就咁
講幾句o野激喊佢，佢嬲一陣間咁簡單，係會好傷害佢將來
對戀愛o既價值觀，以後大家見面亦會好尷尬，可能要喊要
嬲足一生一世......（宜家又咁識諗喎）
其實我覺得阿君佢咁o既性格真係唔係幾適合做義工，雖然
話佢都係o係單親家庭之中長大，對處理同類個案會較有經
驗，但係佢自己本身而已經夠慘，仲要佢成日睇埋人o地點
慘，搞到佢就更加慘，更加習慣將自己唔開心o既事收收埋
埋，格硬扮到自己好似好堅強咁，去幫人o地......而我
o既責任就o岩o岩同佢一模一樣，做一個義工，去開解佢，
[乙水]佢講出收埋o係心入面唔開心o既事......既然宜家
佢都肯主動同人溝通，又開開心心咁......咁即係話我呢
個做義工o既係好應該暫時停一停，去處理另外o的個案，
例如照顧病人咁啦（即係指阿欣）唉！諗到頭都爆......
君：你係度諗緊乜o野呀？o的牛肉熟晒啦！（我o地果晚去o左打邊爐）
我：君呀.........夠啦！
君：咁快就夠？我o地o岩o岩先開始咋喎......？！
我：但係......再係咁落去......我驚遲早會出事o架喎！......
君：......我都認為係......其實我都想講o左好耐o架啦！......
我：咁就好啦！......咁不如我o地就......
君：......就快o的扶番正個煲佢先啦！......（唉！真係有其姊必有其妹呀！忽然
間諗起阿欣o添）......你睇o下你，猛咁扲住果邊整到個煲"咩"晒啦！
我：不如我o地走先o羅！（忽然間好想快o的番屋企陪阿欣）
君：唔好啦！我都未試過打邊爐o家，而且我o地仲有好多o野都未曾試過......
我：試......試乜o野呀？（佢咁講當堂打個突）
君：象拔蚌啦！丸啦！菜啦！生腸啦！（我幾驚佢話係結婚啦！生仔啦！咁）
我：呢o的我食過啦！...其實都唔係咁好食o架咋！
君：乜你咁o架？...咁你又要帶人o黎試？！
阿君死都唔肯走，最後要我扮晒食o左舊唔熟o既雞肉肚痛
唔舒服好辛苦咁佢先肯走，可能係我o的演技夠精湛，連個
酒樓經理都呃埋，猛咁同我o地道歉，仲話呢次唔洗收錢，
下次再o黎搵番佢就仲有半價o添，不過諗諗o下打邊爐都唔
係咁o岩我！o係送佢番屋企o既途中，我再問佢......
我：阿君呀，呢個禮拜妳覺得開唔開心呀？
君：好開心呀！以前都未試過有呢種咁o既感覺o家，好似有人好關心自己，好鍚自
己咁，而自己又會好關心，好鍚果個人......真係好開心呀！
我：咁妳有冇諗過將來點呀？
君：......（我咁問佢，佢又急然間由好開心o既表情，變成鬱鬱不歡咁）
我：...我意思係...妳有冇諗過去搵番份工做之嘛！...（我費事又搞喊佢啦！）
君：...o我！...我試過啦！...不過自己又冇經驗...電腦又唔識...都冇人請我啦！
...宜家唯有讀埋個義工課程先算啦！
我：咁妳就要俾o的心機讀啦！（好彩佢都肯講番o野，如果唔係又有排[乙水]佢啦！）
[差唔多去到阿君屋企樓下[車立]口大堂]
君：好番o的未呀？
我：......仲有o的搞肚痛，應該都冇乜事......（其實果陣時忽然好人有三急）
君：我唔係問你呀......我係問...阿欣呀！
我：阿欣？......妳家姐？（我識o左佢o地兩姊妹咁耐，除o左o係醫院聽過阿君同
o的醫生護士嗌過佢家姐個全名外，真係從來未聽過佢咁樣嗌阿欣）
君：仲有邊個叫阿欣喎？......如果佢仲係咁傻傻o下，咁你點？
我：...我...我都唔知點樣解決好啦？...（其實我都冇留心聽佢講緊o的乜...我
果陣都用晒全身o既力量去控制住......"合上眼")
君：不如咁呀！我又去你度幫你照顧佢呀......你日頭要返工，夜晚又要睇住佢喎，
你一定會好辛苦o架啦！係唔係呀？
我：......依家仲辛苦呀！（險些兒爆眼）
君：你做乜呀你？...唔舒服呀？...快o的番上去先啦！
我其實真係唔係幾想上去，因為每次上親去岳母大人度都
會冇乜好結果，不過我真係好急，阿君又話都已經咁夜佢
阿媽應該都睏o左。阿君輕輕力開門，佢阿媽果然係o係房
度睏o左，我咪靜靜雞咁鼠入廁所o羅！一心諗住快趣o的搞
掂，快o的番去睇阿欣......搞掂晒出番o黎，嚇死我！見
到個廳開o左燈，阿君同佢阿媽兩個，摙住個鼻坐o左o係梳
化度，阿君好似好驚好想喊咁，而岳母大人就黑口黑面咁
"掘"實我，終於佢都忍唔住"吉"o左起身盤(問)我......
我 ：對唔住呀！...... 醒o左妳o添！
岳母：(好嬲)...... 做乜淨係您上o黎呀？大妹呢？(大妹即係指阿欣)
君 ：...... (猛咁係佢阿媽後面向我打眼色做手勢，但係我都唔知佢想講乜)
我 ：冇，佢o係下面等，頭先我o地三個去o左食飯，我咁o岩又好肚痛......所以
咪送細妹上o黎，順便借個廁所咁o者......（細妹即係指阿君）
岳母：(好惡咁擰轉面望住阿君)...... 咁妳又話咁o岩o係[車立] 口見到佢！
君 ：嗚嗚嗚嗚嗚！嗚嗚嗚嗚嗚！(喊得好大聲，雙手掩住塊面衝o左入房度繼續喊)
我 ：阿君唔好喊啦！......(我想衝埋入房度安慰下佢)
岳母：(好大聲) 你想死呀！仲想入去佢間房？！......
之後岳母大人就好似癡o左線咁，衝o左出騎樓，應該係想
搵把掘頭掃把棒我走，我見到自己o既生命可能會受到威脅，
所以咪同阿君講o左句：唔好喊呀！打電話俾我呀！就即刻
走，阿君o既喊聲，岳母大人o既嘮叨聲，充斥o左整條走廊，
仲有一陣陣o既臭氣從佢間屋度傳出o黎，諗諗o下先記得，
可能係我頭先猛諗住阿欣，搞掂之後都唔記得o左沖水o添！
之後幾日阿君已經冇再搵番我傾偈，我又搵唔到佢，佢又
冇開到手提電話，我又唔想打去佢屋企度搵佢，怕如果係
佢阿媽聽，俾佢知道o左係我，又鬧到阿君唔開心喊晒咁我
又唔想...不過我已經將阿君屋企個電話號碼，由第二粒
Memory 制，轉o左去第十粒果度（第一粒係自己屋企，set
o左好耐），千祈唔好以為我咁做係想將阿君佢忘記，將佢
o既排名下降，其實就係o岩o岩相反，因為第十粒 Memory
都係由右邊數起第一個，反而係提升o左阿君o既地位o添！
其實我都係想兩個 Memory 制唔好"痴"道咁埋，唔想又打
錯o左去阿欣度......我好掛住阿君，有時真係掛住佢仲多
過掛住阿欣，正當我終於決定鼓起去[手禁]第十粒 Memory
制o既時候，電話突然之間響起，睇o下個來電顯示......
太好啦！係阿君o係屋企打o黎o家！......
我 ：君君！妳點呀？做乜o野事幾日唔開電話又唔搵我呀？
妳阿媽仲有冇鬧妳快？......
君 ：(好微弱o既聲) 我......我阿媽......嗚嗚嗚嗚嗚！
岳母：(從電話旁邊大嗌) 喊喊喊！喊乜鬼o野呀？快o的講完
就好快o的收線啦！......衰女包！......唔知醜！
我 ：君君，唔好喊啦！好乜o野事慢慢講啦......
君 ：......嗚嗚！......我阿媽話佢好耐冇見過家姐o羅喎！叫你呢個禮拜六帶佢上
o黎食飯喎！......嗚嗚嗚嗚！
我 ：好呀好呀！......不如我o地今晚出o黎呀？......喂！喂？
岳母：(從電話旁邊大嗌) 收線啦！......仲講！
之後我同阿君又再次失去聯絡啦！聽到阿君把聲又開心又
擔心......開心o既係幾日冇佢消息，宜家聽到佢把聲，
知道佢都冇話諗埋一邊算安心o的，不過又再一次聽到阿
君o既喊聲，個心又好唔舒服，我知道佢係好錫佢阿媽，
但係咁唔等於佢阿媽可以咁成世綁住個女o羅！......
唉！仲話要我禮拜六帶埋阿欣上去佢度食飯喎......
我真係擔心到時又有乜o野事會發生啦？！
......(待續)
(13-05-2002)
