\id Gen Gen10

PIANCIILNA 10

Noah Tapate ii Suan le Paalte (1Khang tangthu 1:5-23)

1. Hite sia Noah ii tapa ahi Shem, Ham le Jepheth te ii suan le paalte ahi hi. Tuipi liim zawkciang hite thum in tapate nei uh hi.

2. Japheth ii tapate sia Gomer, Magog, Madai, Javan, Tubal, Meshech le Tiraste ahi uh hi. Hite sia amate ii min a pu minamte ii pute pate ahi hi.

3. Gomer ii suan le paalte sia Ashkenaz, Riphath, le Togarmah minamte ahi uh hi.

4. Javan suan le paalte sia Elishah, Spain, Cyprus le Rhodes minamte ahi uh hi.

5. Amate sia tuikulh tung le tuipi dung a, a teangte ii pianna pute ahi uh hi. Hite sia Japheth ii suan le paalte hi a, amate kampau tek zanghin ngam tuatuam ah a minam in teang uh hi.

6. Ham ii tapate sia Cush, Egypt, Libya le Canaan ahi uh hi. Hite sia amate ii min a pu minamte ii pute pate ahi hi.

7. Cush ii suan le paalte sia Seba, Havilah,Sabtah, Raamah, le Sabteca minamte ahi uh hi. Raamah ii suan le paalte sia Sheba le Dedan minamte ahi uh hi.

8. Cush in Nimrod a kici tapa khat nei a, leitung ah a masa bel a minthang ngalzopa ahi hi.

9. TOPA huna taw savai minthang khat hi a, tua ahikom mihingte in “TOPA in nang sia Nimrod bangin savai minthang khat hong suak sak tahen!” ci uh hi.

10. A masa in ama ukna ngamte sia, Babylon ngam sungah a om Babylon, Erech le Accad ngam thum teng ahi hi.

11. Tua ngam panin Assyria ah pai a, Nineveh, Rehoboth Ir, Calah,

12. le Nineveh le Calah khuapi kilaklaw ah a om, Resen khuapite saat hi.

13. Egypt suan le paalte sia Lydia, Anam, Lehab, Naphtuh,

14. Pathrus, Casluh le Crete minamte ahi uh hi. Philistinte sia Crete ii suan le paalte ahi hi.

15. Canaan ii tapate sia, tapa lianbel Sidon le Heth ahi uh hi. Hite sia amate ii min a pu minamte ii pute pate ahi uh hi.

16. Canaan sia Jebus te, Amor te , Girgash te,

17. Hiv te, Arka te, Sin te,

18. Arvad te, Zemar te le Hamath te ii pianna pute pate zongh ahi hi. Canaan te kithethaang a,

19. amate ngam sia, Sidon panin thangsang Gerar ngam manaw in Gaza dong hi a, nisuana sangpan Sodom ngamsang panin Gomorrah, Admah le Lasha khua paam Zeboiim dong ahi hi.

20. Hite sia Ham ii suan le paalte hi a, amate kampau tek zanghin ngam tuatuam ah a minam in teang uh hi.

21.Japheth ii upa Shem sia, Hebrewte ii pianna pu ahi hi.

22. Shem ii tapate sia Elam, Asshur, Arpachshad, Lud le Aramte hi uh a, hite sia amate ii min a pu minamte ii pute pate ahi uh hi.

23. Aram suan le paalte sia Uz, Hul, Gether le Meshek minamte ahi hi.

24. Arpachshad in tapa Shelah nei a, Shelah in tapa Eber nei hi.

25. Eber in tapa nii nei a, a khat sia ii min sia Peleg ci hi, banghangziam cile ama hun sungin leitung mihingte kikhentham hi. A khat sia ii min Joktan kici hi.

26. Joktan suan le paalte sia Almodad, Sheleph, Hazarmaveth, Jerah,

27. Hadoram, Uzal, Diklah,

28. Obal, Abimael, Sheba,

29. Ophir, Havilah le Jobab minamte ahi hi. A vekpi in Joktan suan le paalte ahi hi.

30. Amate tenna ngam sia Mesha pan nisuana sang mualtung ngam Sephar dong ahi hi.

31. Hite sia Shem ii suan le paalte hi a, amate kampau tek zanghin ngam tuatuam ah a minam in teang uh hi.

32. Hi mihing tatuam te theampo sia Noah ii suan le paalte hi a, khang simna taw kizui in, minam tuatuamte suak hi. Leitung minam theampo sia tuipi liim zawkciang Noah tapate ii suan le paalte ahi hi.

Pianciilna 9 Pianciilna 11 Innpii

_______________________________________________________________

Siyin Bible, TEV, 1 February 2002. Vum, Yangon