PIANCIILNA  2

Pianciilna 1   Pianciilna 3   Innpii

 

1.   Tabangin Pathian in simlei le vantung buppi a bitphuana manthiang hi.

2.   Pathian in a nasep man siat a, a ni sali ni in a nasep tawlnga hi. (Heb 4:4,10)

3.   Pathian in a bitphua nasep zoin, a ni sali ni tawlnga ahikom, tua ni thupha pia in thupi sak hi. (Pu 20:11)

4.   Simlei le vantung pianna sia tu a bang teng ahi hi.

 

Eden Huan

      TOPA  Pathian in simlei le vantung a vawt lai in,

5.   leitung ah thingkung lopate om ngawl a, a po tu thaicii zongh om ngawl hi, banghangziam cile lotho tu khat zongh om ngawl a, ama in ngua zu sak ngawl hi.

6.   Ahizong leinuai pan tui pusuakin, lei kawt hi.

7.   Taciang  TOPA  Pathian in lei pan leivui la in mihing vawt hi. A nak sungah nuntakna hu mopin mihing nungta suak hi. (1Cor 15:45)

8.   Taciang  TOPA  Pathian in nisuana sangah Eden huan vawt a, tua munah ama vawtsa mihingpa koi hi.

9.   Ama in ngapha a nga thingkungte le a hoi mama thingkung namcin tua munah po sak hi. Huan laizang ah nuntakna thingkung le a pha a sia heak theina thingkung po sak hi. (Tpl 2:7; 22:2,14)

10. Huan sung kawt sak tu in Eden huan panin ngun khat luang a, huan puasang a thet ciang ngun li in kikhen hi.

11. A masa bel ngun sia Pishon hi a; Havilah ngam kiimvealin luang hi.

12. (Tua lai ah kham ciitak om a, paaknamtui le suang manphate zongh om hi.)

13. A niina ngun sia Gihon hi a; Cush ngam kiimvealin luang hi.

14. A thumna ngun sia Tigris hi a, Assyria ngam nisuana sangah luang hi. A lina ngun sia Euphrates ahi hi.

15. Taciang   TOPA  Pathian in Eden huan a tho tu le a keam tu in, mihingpa koi hi.

16. Pathian in ama tungah, “Huan sung thingnga theampo na ne theitu hi;

17. ahizong a pha le a sia heak theina thingnga na ne batu hi. Tua thingnga na ne bahet tu a; na ne a ahile na neak ni in na thi tu hi ci hi.

18. Taciang  TOPA  Pathian in “Mihingpa ama nguak a om tu pha ngawl hi. Ama taw kilawm a hu tu khat ka vawt sak tu hi ci hi.

19. Taciang Pathian in lei pan leitangh la in, nganhing theampo le vacim theampo vawt hi. Tua zawkciang mihingpa mu tu in paipui a, ama minphua bangin amate min hi papaih hi.

20. Taciang mihingpa in vacim theampo le nganhing theampo minphuak siat a, ahizong ama a panpui theitu a kilawm khat beak om ngawl hi.

21. Taciang  TOPA  Pathian in mihingpa a mut suak sak mama a, a mutthip lanin a telngu khat laak sakin, tua mun sia khak kik hi.

22. Pathian in tua telngu taw numei khat vawt a, mihingpa kungah paipui hi.

23. Taciang mihingpa in, “Tu papet ciang, keima bang mihing khat ka ngu pan kila ngu le ka sa pan kila sa, hi sungah om hi. Mihingpa sung pan a kila ahikom Numei kici tu hi ci hi.

24. Tua ahiciang pasal in a nu le a pa nusia in a zi taw kingawm tu a, amate pumkhat takkhat suak tu uh hi.  (Mt 19:5; Mk 10:7-8; 1Cor 6:16; Eph 5:31)

25. Mihingpa le a zi a pumnguakin om uh a, ahizong a maizum ngawl uh hi.

 

Pianciilna 1   Pianciilna 3   Innpii

 

________________________________________________________________

 

Siyin Bible, TEV, 1 February 2002. Vum, Yangon