|
ARTZAI gaztea, artzai
ni, mendien anai...!!
Alboka artuta, goizero,
yaikitzeke dala Bero,
noia larrera ardiekin
intzaren gain, alai, arin...
Zorroan arto ta gaztai,
belardia da nere mai,
ta iturrian edanaz ur,
enaiz mozkortzeko bildur...
Nere lau lagunen izen,
Udaberri, Udara, Negu ta Udazken...
Udaberri-neskatilla,
nerekin atzo pinpilinpauxa billa,
gaur illa...!!
Basoan ara nun ager
Udara, Bero'aren andra gazte-eder...
Egoa!!
Gorritzen asi garoa,
ta laixter il bear Udara gaixoa!!!
Piztu Su!!
Kaskabarra ta aize t'euri ditugu...
Ba-dator elur gain, amona Negu...
Zatozte nere lau lagun,
artzaian zoriontasun,
bata bestearen urren,
dakartzutela urte-laurden.
I, neskatilla Udaberri,
loraz ingura nazan ni...!
t'otoi dizut Andra Udara,
basoan ur eta itzala...!
Nere poza, dala udazken,
usoa ikusi igarotzen...
Ta neguan, elurretan,
oñak oztuz bideetan,
ardiekin natorrela,
gauaz, baserri aldera...
aiek aterpean utzi,
mantar bustiak erantzi
sutondoan; ta aitonari,
sorgiñen kontu-kontari
diarduala, ari aitu...
Ta artoa yan... ta lo artu.
Artzai gaztea, artzai
ni, mendien anai...!!
Telesforo Monzon
ARTZAI GAZTEAREN ABESTIA
(Urrundik bake oroi 47-51)
|
UDAZKEN garaia...
Beroa'k amaia...
Xirimir-euri,
yaio-berri...
Lañuak anaia.
Datoz mendi-bera
aterpe epelera
artalde ta artzai;
bai-dute zai
negu biziera.
Bidera yausiak osto ustel busti,
ni,
zuek ikutzeko, abarkaz yantzi...
Udako uso txuri abarketa arin,
min
nuke ba, zu zauritzen lokatzakin...
Ate yoka ari da, iltzaile Negu!
Su,
aitonaren zaindari, ernai degu...
Telesforo Monzon
OSTOAK BIDEAN
(Urrundik bake oroi 43-45)
BAKARTASUN...! Aspaldi naukak ire miñez;
iskanbilla bizian, gogo lantzerik ez.
Ator. Guazian biok Ixiltasun'gana,
ba-diat ene baitan irurontzat lana.
Uxaitzak inguruko gezur, Ixiltasun...!
Egia bear diat artu nere lagun.
Ator Egi, lepotik zintzilizka atxurra,
yorratzen asi ari nere barne-lurra.
Eraintzak ene baitan maitasun azia;
emaitzetan ederren, etsai-barkatzia.
Nere barne-baratzan, datorrela gora
bake-zugaitz azpian, alaitasun-lora.
Ta asi gaitez abesten Euskalerria'ri,
gure gogo biurtuz bera bezin garbi.
Gorrotua ta illuna doiazela igesi...
Gure basoetan ez txori oiek abi.
Maitasun batek egin niñun bidezkari
ta maitasun orretxek biur bertsolari.
Euskalerri'ko oroitza neramala bizi,
oartu izan nintzan bein... nengola kantari...!
Telesforo Monzon
BAKARTASUN
(Urrundik bake oroi 17-19)
|