Manifiesto del Ligallo de Fabláns de l'Aragonés 6-IV-1995
Y l'aragonés, ta cuán?Aragón, amplo y alleno.
A clase politica de l'Aragón ofizial contina dando a esquena a la cultura aragonesa. Contina dando a esquena a o reconoximento ofizial y a l'amostranza de a lengua aragonesa. No sólo ixo, agora la clase politica de l'Aragón ofizial pretende boicotear o combenio t'amostrar aragonés en Conzellos de l'Alto Aragón. Dica cuán?
Dende a perdida de a identidá politica a clase politica aragonesa, aculturizata, ha feito de o nuestro propio país un paisache cuasi alleno.
No lis han espabilau años y años de dibulgazió años y años de creyazión de cultura en aragonés, años y años de saniar a conzienzia lingüistica de os fablans emporquiata por a cultura y o poder ofizials allenadors de lo aragonés.
Emos sacau de as catacumbas a la lengua y a cultura en aragonés, emos retornau y somos retornando a conzenzia de lengua y de Pueblo a os aragoneses, pero a mayor parti de a clase politica de l'Aragón ofizial contina fendo bandera de l'aculturazión y de a dependenzia politica de o nuestro Pueblo.
Pero no emos de reblar debán de a frustrazión que mos produze o muro d'ixa clase politica.
Continamos espleitando, recreyando y creyando cultura en a nuestra lengua, continamos manifestando-nos como aragoneses cosziens y continamos luitando por a lengua y a libertad de nuestro Pueblo.
Otro año más mos achuntamos aquí. Que iste punto d'inflesión nos sirba ta enrestir con más rasmia, ta implicar-nos toz en toz os ambitos en o emplego y a reibindicazion de a lengua.
Lis emos d'espabilar con os feitos, con a luita.
Cal salir ta la carrera a fablar en aragonés, a desixir a ofizialidá de a nuestra lengua, a desixir o refirme a la normalización.
No seremos libres dica que no tiengamos autogobierno. No seremos libres dica que a nuestra lengua plegue ta la escuela.
Nunca un Aragón amplo y alleno.
Aragón libre, solidario y en aragonés!
Entalto Aragón!
A Lucana, 6-IV-95