LA NUESA CONDICIÓN D'AUTONOMÍA PERMITE QUE'L CONSEYU D'UNIVERSIDAES MOS ÑEGUE LA NUESA LLINGUA
 

MENTANTU EN PORTUGAL RECONOCEN OFICIAL EL MIRANDÉS, VARIANTE DEL ASTURIANU
 

 

El Conseyu d'Universidaes tornó humillar al Pueblu asturianu al torgar por segunda vegada la Llicenciatura en Llingua Asturiana que desixe la nuesa Universidá.
 

Ye un murniu exemplu más de cómu dende fora se reprime al Pueblu asturianu y se-y impón un futuru ensin llibertá y ensin identidá. Un exemplu que foi posible, polo menos por tres motivos:
 

Llendaos comu tamos a la condición de "autonomía", nun se mos reconoz la capacidá soberana de decidir el nuesu futuru comu pueblu. Sólo se mos permite la xestión parcial de delles competencies. Ello ye que'l Conseyu d'Universidaes, xente ayeno a Asturies, puea decidir cuála ye la nuesa llingua.


 

Sabedor del poder qu'esa circustancia pon nes sos manes, el Conseyu d'Universidaes permitióse escaecer los normales criterios científicos, recurriendo direutamente a la motivación política p'aseverar que l'asturianu "nun ye llingua".


 

El Reutoráu la nuesa Universidá, el Gobiernu asturianu y la Xunta Xeneral faen una grave dexación de responsabilidá política al nun facer d'esta humillación un motivu d'inevitable conflictu col Estáu. Too ello abulta güei más dolioso, si cabe, sabedores comu somos de que l'Asamblea Nacional portuguesa, sofitándose en criterios científicos y hestóricos claros, reconoció, por unanimidá, el pasáu 17 de setiembre, la oficialidá del mirandés.

 

El mirandés fálase na fastera de Miranda do Douro, nún de los territorios que perteneció al Reinu d'Asturies. Ye una llingua perteneciente al dominiu llingüísticu asturianu, pos trátase d'un dialeutu asturianu de la rama ocidental. Na esposición de motivos de la llei d'oficialidá aprebada, l'Asamblea Nacional reconoció espresamente que'l mirandés ye un llegáu cultural de valir descomanáu. Afitó que ye la llingua materna que dio aniciu a la cultura de tou un pueblu, del que ye istrumentu de comunicación, d'identificación y de memoria coleutiva. Y asumió que la defensa y el futuru'l mirandés dependen del compromisu cultural y padrimonial del Estáu portugués y qu'ésti nun pue escaecer tala responsabilidá hestórica.
 

La llei aprebada reconoz la oficialidá'l mirandés, el drechu al so deprendimientu nel sistema educativu, el so usu nes rellaciones y fechos alministrativos, el drechu al sofitu científicu y educativu y la necesaria formación del profesoráu.
 

Lo asocedío en Portugal ye bona preba de cómu el Estáu español afala una dura política represiva escontra la nuesa identidá cultural. Polo qu'Andecha Astur procederá a denunciar la nuea agresión del Conseyu d'Universidaes y toma nota de la falta rempuesta del Reutoráu, del Gobiernu asturianu y de la Xunta Xeneral.
 
 

Xixón, 3 d'ochobre de 1998