La nuesa aportación nun ye otru “Estatuto de Autonomía del Principado” con más competencies pa l’alministración asturiana. Cenciellamente, nun ye’l nuesu finxu desixir que xuba’l techu competencial nin algamar mayores cotes de xestión alministrativa. 

  La clave fondera de la nuesa propuesta ye la SOBERANÍA NACIONAL, polo que los fundamentos del ESTATUTU NACIONAL D’AUTONOMÍA que proponemos, son los que vienen darréu: 

* LA REALIDÁ NACIONAL ASTURIANA  

  Asturies ye una xunidá xeográfica, política, hestórica, social, cultural y llingüística, que la conforma comu un país estremáu, ello ye, una nación. 

* AUTODETERMÍN  

  A Asturies, comu comunidá nacional, asíste-y el drechu inalienable, permanente ya inrenunciable al so llibre autodetermín; al Pueblu asturianu asíste-y el drechu a decidir por sigo mesmu’l so modelu social, económicu, políticu, cultural y llingüísticu y a encadarmar comu-y pete les sos rellaciones colos pueblos y estaos que lu arrodien.  

  El drechu al autodetermín d’Asturies tien de tar garantizáu por entamu democráticu, tamién pol Estáu español. 

* XUNIDÁ POLÍTICA Y TERRITORIAL  

  Comu basa de toa nación, Asturies tien drechu a la so integridá territorial y a una organización política común pa tolos sos territories hestóricos. 

* L’ASTURIANU: LLINGUA NACIONAL  

  Ensin la capacidá’l Pueblu asturianu pa comunicase nel so propiu idioma, enxamás nun algamará la so braera identidá. Soberanía asturiana quier dicir tamién que la llingua nacional y prioritaria del nuesu Pueblu ye l’asturianu y qu’esa seña d’identidá básica y fundamental tien de ser recuperada por tolos asturianos y asturianes porque ye un padrimoniu de tola sociedá. 

* PODER POLÍTICU PA LA RECOSTRUICIÓN NACIONAL  

  La soberanía y l’autodetermín del Pueblu Trabayador Asturianu y de les sos istituciones, pasen por recuperar la capacidá y el poder políticu pa garantizar la recostruición d’Asturies en toles estayes: la economía, la cultura, lo social, lo llaboral, lo político, la llingua, la hestoria,… ensin dependencies, inxerencies o imposiciones, y disponiendo de tola capacidá de representación direuta en tolos foros ya istituciones internacionales. 

* COL PUEBLU TRABAYADOR  ASTURIANU  

  La necesaria tresformación social y política d’Asturies sólo la puen facer les clases populares y trabayadores asturianes.  

  La inxusta realidá na que s’atopa la sociedá asturiana fai preciso algamar un sistema más xustu y llibre onde les clases populares y trabayadores protagonicen una fonda tresformación que les empobine haza’l so progresu nuna sociedá xusta, igualitaria, non sesista, desmilitarizada, ecolóxica y con especial pricuru haza los seutores qu’anguañu s’atopen marxinaos o amenorgaos. 
 
 
 
 
 

  Darréu d’ello, namás qu’un procesu sofitáu nestos entamos pue xenerar preseos valoratibles pa la recostruición d’Asturies ya iguar calces pa que’l nuesu Pueblu puea escoyer el futuru que-y abulte afayaízu, en llibertá, respetu y solidaridá.